[1] Manjari, ine paꞌinte sabab Ibrahim, papuꞌ kami meꞌ Yahudihin?
[2] Bang upama Ibrahim miyaꞌan kinimmatan bentel weꞌ Tuhanin sabab maghinangan iye hāp, niyaꞌ siꞌ miyaꞌan jānne magabbu Ibrahim. Saguwaꞌ gaꞌ iye kapagabbu si matahan Tuhan.
[3] Ine teꞌ paꞌin kitabin sabab Ibrahim? Paꞌin kitabin weꞌ kinahagad weꞌ Ibrahim sanggup Tuhan si iyehin. Duk sabab pakahagadne miyaꞌan inampun duk kinimmatan iye bentel weꞌ Tuhanin.
[4] Kataꞌuhante weꞌ bang aꞌahin maghinang, makasangka iye suweldo. Pagtasangkane ne suweldonen, gaꞌi paꞌinte weꞌ lasa-lasahan miyaꞌan si iye, saguwaꞌ iye miyaꞌan tangdan hinangnen.
[5] Bang aꞌahin maghinang hāp supaya, paꞌinne, ampun Tuhanin du dusenen duk kimmatan Tuhanin du iye bentel, salaꞌ teꞌed iye. Peggeꞌ dumaꞌin sabab hinangante mahāpin saguwaꞌ sabab sandelte si Tuhanin, iye magampun meꞌ dusehin, hangkan kite bi inampun duk kinimmatan bentel weꞌ Tuhanin.
[6] Iye hep inin hāti pinaꞌin si Daꞌud ley pamissāne weꞌ asal kēgan teꞌed sasuku taꞌampun dusenen duk kinimmatan bentel weꞌ Tuhanin bu dumaꞌin sabab hinanganne mahāpin.
[7] Paꞌinne, “Asal kēgan aꞌahin bang taꞌampun ne weꞌ Tuhanin dusenen duk kinayipatan ne weꞌ Tuhanin meꞌ hinanganne malaꞌatin.
[8] Asal kēgan aꞌahin bang gaꞌi ne kimmatan Tuhanin dusenen.”
[9] Kēg pinaꞌin si Daꞌud miyaꞌan, si meꞌ Yahudi bangsa magislamin ke hadja? Dumaꞌin. Saguwaꞌ paꞌinne miyaꞌan sampay si meꞌ bangsa manggaꞌi magislamin isab. Bakas paꞌinku dehellu weꞌ hangkan Ibrahim kinimmatan bentel weꞌ Tuhanin peggeꞌ kinahagad weꞌ ne sanggup Tuhanin.
[10] Sumiyan teꞌ pangimmat Tuhanin weꞌ bentel Ibrahim? Ubus ne ke iye magislam atawa gaꞌ pe? Gaꞌ pe iye miyaꞌan magislam, andang ne iye kinimmatan bentel weꞌ Tuhanin.
[11] Pagkinahagad ne weꞌ Ibrahim sanggup Tuhanin, manjari magislam ne iye, tandaꞌ weꞌ asal taꞌampun ne iye duk takimmat ne iye bentel weꞌ Tuhanin peggeꞌ kinahagad weꞌ ne Tuhanin. Hangkan Ibrahim miyaꞌan kuweꞌ ne matettoꞌa meꞌ aꞌa makahagad si Tuhanin duk takimmat bentel weꞌ Tuhanin bisan du siye gaꞌ bakas magislam.
[12] Duk Ibrahim kuweꞌ ne isab matettoꞌa meꞌ aꞌa bakas magislamin, dumaꞌin hadja peggeꞌ bakas magislam siye, saguwaꞌ peggeꞌ kahagad isab siye si Tuhan kuweꞌ pakahagad si Ibrahim, papuꞌ kami meꞌ Yahudihin, masa gaꞌ pe iye magislam.
[13] Masa awwalley nanggup Tuhanin pu Ibrahim weꞌ pangurungne tibuꞌukan dunyahin si iye duk si meꞌ tubuꞌnen duk ujud tepe si siye du. Sanggup Tuhan inin pinangurung weꞌ ne pu Ibrahim, dumaꞌin peggeꞌ tinuhut weꞌ Ibrahim saraꞌ Tuhanin, saguwaꞌ peggeꞌ kahagadne Tuhanin duk taꞌampun duk takimmat iye bentel weꞌ Tuhanin.
[14] Peggeꞌ bang saꞌupama sanggup Tuhanin pangurung si meꞌ manuhut saraꞌin, na, gaꞌ niyaꞌ guna pakahagadte bi si Tuhanin duk gaꞌ niyaꞌ guna sanggup Tuhan miyaꞌan peggeꞌ gaꞌ du niyaꞌ makatuhut saraꞌ Tuhanin.
[15] Saraꞌin jānante hadja kaꞌastelan duk ilegga weꞌ Tuhanin peggeꞌ gaꞌi du tatuhutte saraꞌin. Luwal bang gaꞌ niyaꞌ saraꞌ meke gaꞌ niyaꞌ ngalanggalan saraꞌ.
[16] Nanggup Tuhanin pu Ibrahim peggeꞌ sandel Ibrahim si iye. Duk hangkan nanggup Tuhanin supaya tapabugtuꞌne si meꞌ tubuꞌ Ibrahimin kēmon, weꞌ kalasahanne duk kaꞌaseꞌanne siye. Duk sanggupne miyaꞌan dumaꞌin hadja si meꞌ Yahudi, meꞌ manuhut saraꞌ sinulat si Musahin, saguwaꞌ si kēmon sasuku masandel si Tuhan kuweꞌ Ibrahimin. Peggeꞌ Ibrahim hep kuweꞌ matettoꞌate bi meꞌ masandel si Tuhanin.
[17] Toꞌo inin peggeꞌ tasulat hep dem kitab pinaꞌin Tuhan pu Ibrahimin. Paꞌinne, “Pineneꞌ kew weꞌ ku hinang matettoꞌa meꞌ aꞌa kabangsa-bangsahanin.” Bugtuꞌ tuman du sanggup inin peggeꞌ Tuhanin mananggup pu Ibrahimin. Duk iye kinahagad Ibrahimin peggeꞌ iye Tuhan magpakellum meꞌ pateyin duk ine-ine bissāne manjari du.
[18] Kinahagad weꞌ Ibrahim sanggup Tuhanin duk bisan du gaꞌ niyaꞌ ase-asene, asal ngase-ngase pe teꞌed iye weꞌ tuman du sanggup Tuhanin. Hangkan ujud tuman du duk manjari iye matettoꞌa meꞌ kabangsa-bangsahanin. Sa bakas pananggup Tuhan si iyehin, pinaꞌin dem kitab, “Meꞌ tubuꞌnun ekka du iyan manamal kuweꞌ meꞌ poteꞌanin.”
[19] Masa pananggup Tuhan pu Ibrahim inin, tapit ne da hatus tahun umulnen. Kataꞌuhanne weꞌ bahiꞌ ne iye duk gaꞌi ne iye makajari anakan. Bu si Sara isab, andanen, kataꞌuhanne gaꞌi nganak. Saguwaꞌ bisan ne kuweꞌ miyaꞌan, gaꞌ usaꞌ sandelne si Tuhanin.
[20] Kahagad ne paꞌin iye weꞌ ujud tuman du sanggup Tuhan si iyehin. Gaꞌ Ibrahim duwe-duwehan saguwaꞌ pasōng ngabasag sandelne si Tuhanin duk pinudji weꞌ ne Tuhanin.
[21] Kabugtuꞌanne teꞌed weꞌ asal tahinang Tuhanin du bakas pananggupnen.
[22] Hangkan hep peggeꞌ kinahagad teꞌed weꞌ Ibrahim sanggup Tuhan si iyehin, “kinimmatan iye bentel weꞌ Tuhanin,” sa tasulat dem kitabin.
[23] Meꞌ tasulat sabab Ibrahim miyaꞌan dumaꞌin hep para si iye hadja,
[24] saguwaꞌ sampay kite bi sakup du isab. Peggeꞌ kite bi kēmon masandel pu si Isahin kimmatan Tuhanin du weꞌ bentel peggeꞌ kahagad kite bi si Tuhan, iye bakas mamakellum Panuhutanten bi, Isa Almasi, amban kamateynen.
[25] Si Isa Almasi inin pinapatey sabab duseten bi duk pinakellum iye balik weꞌ Tuhanin supaya kite bi taꞌampun duk kinimmatan bentel weꞌ Tuhanin.