[1] Kaꞌam meꞌ mākanakin, subey tuhutbi pangandaꞌakan meꞌ matettoꞌabin. Patut inin hininang weꞌ meꞌ masandel pu si Almasihin.
[2] Paꞌin Tuhanin dem saraꞌne, “Pagaddatanun bi saꞌi-samabin.” Iye inin dehellu-dehellu daꞌakanne patuhutanne janjiꞌ:
[3] “Supaya,” paꞌinne, “ekka kahāpan tekka si kaꞌam duk tahaꞌ umulbin tuꞌu si dunya.”
[4] Kaꞌam isab meꞌ matettoꞌahin, subey hāp pagboꞌobi si meꞌ anakbin duk gaꞌi peddiꞌ ateyden si kaꞌam. Pagesun bi siye duk toloꞌanun bi siye meꞌ kinabayaꞌan Almasi panoloꞌ si siyehin.
[5] Kaꞌam meꞌ banyagaꞌin, subey tuhutbi pangandaꞌakan amubi tuꞌu si dunyahin. Pagaddatanun bi siye duk tuhutun bi siye ateybin dambūs-būs, kuweꞌ Almasi paghinanganbin.
[6] Hinangun bi pangandaꞌakanden, dumaꞌin hadja bang luꞌu siye mayam-mayam peggeꞌ kabayaꞌanbin weꞌ kasulutan siye si kaꞌam, saguwaꞌ maghinang kaꞌam peggeꞌ banyagaꞌ Almasi du kaꞌam duk hinangun bi kabayaꞌan Tuhanin dambūs-būs ateybin.
[7] Hangkan maghinang kaꞌam pahāp-hāp duk subey kaꞌam sinna maghinang, kuweꞌ dumaꞌin manusiyaꞌ amubin saguwaꞌ Almasi.
[8] Peggeꞌ kataꞌuhanbi du weꞌ tumbasan Almasi sasuku maghinangan mahāpin bisan iye banyagaꞌ atawa dumaꞌin banyagaꞌ.
[9] Kaꞌam isab meꞌ amuhin, subey isab kaꞌam hāp si meꞌ banyagaꞌbin. Daꞌa ne siye tunggaꞌanun bi. Essebun bi weꞌ kaꞌam duk meꞌ banyagaꞌbin, dambuwaꞌ du hadja amubin laꞌi si surgaꞌ duk gaꞌi kaꞌam pagbiddaꞌne.
[10] Si panambusanne, iye inin panessaꞌku si kaꞌamin. Subey papagenbi sandelbin peggeꞌ magdambuwaꞌ kaꞌam duk Panuhutanten bi duk peggeꞌ hadje balakatnen.
[11] Akahante kaꞌam, kuweꞌ kite bi magbonoꞌ duk seyitanin. Hangkan subey gunate kēmon panyap pangurung Tuhan kitehin pangatute supaya kite gaꞌi kaꞌakkalan weꞌ seyitanin.
[12] Peggeꞌ bantaten dumaꞌin manusiyaꞌ saguwaꞌ nakuraꞌ seyitanin duk kēmon daraꞌakannen bu laꞌatan siye kēmon; palaꞌihanden diyataꞌ mahawan. Balakatan siye duk niyaꞌ siye taga kapatut duk magbayaꞌ siye si kēmon aꞌa dem kalindeman si dunya inin.
[13] Hangkan hep gunahun bi kuweꞌitu kēmon panyap pangurung Tuhan kitehin bi pangelligte bi diten duk pangatute bi si meꞌ bantate bi seyitanin supaya bang tekka ellew panassat kaꞌamin, tatuwasanbi du siye. Duk pagubus ne tahinangbi kēmon subey hininangbin, gaꞌi du kaꞌam tadaꞌag weꞌ de.
[14] Hangkan subey kaꞌam luwal panyap ngatuhan meꞌ bantabi inin kuweꞌ meꞌ sundalu. Iye dalil kanditbin mabennalin, hātinen subey teꞌed kaꞌam gaꞌi magdustaꞌ. Iye dalil ellig dākanbin meꞌ hinanganbi mabentelin.
[15] Subey kaꞌam luwal panyap magaka sabab aka-aka mahāpin weꞌ hināp ne weꞌ Tuhanin manusiyaꞌin sabab bakas tahinang Almasihin. Iye inin dalil tehompaꞌbin.
[16] Duk subey kaꞌam luwal sandel pu si Isa Almasi peggeꞌ inin dalil tamingbin. Bang basag sandelbin gaꞌi kaꞌam tewwaꞌ weꞌ meꞌ panaꞌ seyitan makayatin, hātinen meꞌ sassatnen.
[17] Subey kaꞌam ngandel weꞌ tinimbul teꞌed kaꞌam hangkan inelligan kaꞌam, kuweꞌ sundalu ngandel peggeꞌ inelligan du kōknen weꞌ saruk basiꞌ. Tayimaꞌun bi isab lapal Tuhanin, iye dalil bessi pangurung Niyawa Tuhanin kaꞌam.
[18] Subey kaꞌam luwal ngampun si Tuhan duk māku-māku ine-ine sukalbin duk tuhutun bi pamanoloꞌ Niyawa Tuhanin sābubi mangampunin. Papateng-pateng kaꞌam duk pagtuyuꞌanun bi teꞌed māku-māku si Tuhan para si meꞌ pagkasibi masandel pu si Isa Almasihin.
[19] Duk māku-māku isab kaꞌam para si aku, supaya ku urungan Tuhanin bissā matumewwaꞌin, duk supaya ku isab bahani magpahāti sabab aka-aka mahāp amban Tuhanin. Gaꞌ inin kinataꞌuhan matuꞌuhin saguwaꞌ kuweꞌitu pinakataꞌu ne si meꞌ aꞌa.
[20] Aku inin kawakilan weꞌ Almasi magmahalayak aka-aka mahāpin, bisan ku ituꞌ tuꞌu dem kalabusu. Māku-māku kaꞌam si Tuhan karayaw bahani du ku magmahalayak peggeꞌ inin hinang pinasukuꞌan si aku weꞌ Tuhanin.
[21] Daꞌakku piyu Tikikus si kaꞌam supaya kaꞌam kaꞌakahanne bang saꞌingge du ku tuꞌu duk bang ine hinangkun. Si Tikikus inin dambuwaꞌ pungtinaꞌite bi kinalasahan peggeꞌ sandel isab iye pu si Almasi. Maghinang iye si Panuhutanten bi duk kapangandelan iye si hinangnen. Akahanne du kaꞌam sabab kami tuꞌu duk paꞌasigne du ateybin.
[23] Meꞌ kapungtinaꞌihanku, pāku-pākuku si Samate bi Tuhanin, duk si Panuhutanten bi Isa Almasi, karayaw weꞌ pasanyangde dem ateybin duk tabangande kaꞌam supaya maglasa-ilasa du kaꞌam kēmon, peggeꞌ sandel kaꞌam pu Almasi.
[24] Karayaw ipat Tuhanin kēmon sasuku gaꞌi pinda lasade si Panuhutanten bi Isa Almasi. Wassalam