[1] Na, kaꞌam matuꞌuhin gaꞌ niyaꞌ umulbi baꞌahu amban Tuhan; kuweꞌ kaꞌam dalil aꞌa matey sabab hinanganbi malaꞌatin duk meꞌ dusehin.
[2] Masa miyaꞌan addatbin kuweꞌ addat meꞌ aꞌa manggaꞌi manuhut Tuhanin. Iye tinuhutbin nakuraꞌ seyitanin. Iye hep magbayaꞌ si meꞌ aꞌa gaꞌi takite diyataꞌ mahawanin duk kuweꞌitu iye isab magbayaꞌ si meꞌ aꞌa manggaꞌi manuhut Tuhanin.
[3] Kite bi kēmon kuweꞌ siyehin du matuꞌuhin peggeꞌ luwal hinangte bi ine-ine kinabayaꞌanten bisan kataꞌuhante weꞌ laꞌat miyaꞌan. Ine-ine kinabayaꞌan baranten duk ine-ine kasinnahan ateyten, iye miyaꞌan luwal hininangten ne paꞌin. Hangkan hep kite bi kuweꞌ meꞌ sinduwehin pagmulkaꞌan weꞌ Tuhanin peggeꞌ iye miyaꞌan matalep si kitehin bi.
[4] Saguwaꞌ bisan kite bi kuweꞌ miyaꞌan, hadje teꞌed aseꞌ Tuhan si meꞌ manusiyaꞌin duk malasa teꞌed iye si kite bi,
[5] hangkan bisan kite bi kuweꞌ aꞌa matey sabab meꞌ hinangante bi malaꞌatin, pinakellum kite bi weꞌ ne patuhut pu Almasi. Timbul kaꞌam sabab lasane duk aseꞌne si kaꞌamin.
[6] Duk peggeꞌ magdambuwaꞌ kite duk Almasi, pinakellum isab kite weꞌ Tuhanin patuhut pu Almasi duk pinatuhut isab kite si iye magbayaꞌ laꞌi si surgaꞌ.
[7] Hininang inin weꞌ Tuhanin, supaya tapakitehanne salama-lama weꞌ gaꞌi teꞌed takila-kila lasane duk aseꞌne si kitehin sabab bakas tahinang Isa Almasihin.
[8] Peggeꞌ sabab lasa duk aseꞌ Tuhanin hep hangkan kaꞌam timbul pagsandel ne kaꞌam pu si Almasi. Dumaꞌin sabab hinanganbin hangkan kaꞌam timbul, saguwaꞌ lasa-lasahan Tuhan inin si kaꞌam.
[9] Gaꞌi kaꞌam makapagabbu, peggeꞌ dumaꞌin hangkan kaꞌam timbul sabab hinanganbi mahāpin.
[10] Peggeꞌ binaꞌahuhan kite weꞌ Tuhanin sakaliꞌ kite magdambuwaꞌ duk Almasi supaya tahinangte meꞌ hinangan mahāp ginaraꞌne si kite andangin.
[11] Na, essebun bi bang saꞌingge kaꞌam matuꞌuhin. Dumaꞌin kaꞌam Yahudi duk inudjiꞌ kaꞌam weꞌ meꞌ Yahudihin peggeꞌ gaꞌi kaꞌam magislam bu siye magislam. Saguwaꞌ addatde miyaꞌan hininang weꞌ manusiyaꞌ si barande du hadja.
[12] Matuꞌuhin asal tala teꞌed kaꞌam amban Almasi. Duk gaꞌ kaꞌam sakup si meꞌ tubuꞌ Israꞌilin, meꞌ aꞌa tapeneꞌ weꞌ Tuhanin. Gaꞌ isab kaꞌam sakup si meꞌ janjiꞌ Tuhan si meꞌ aꞌanen. Ellum kaꞌam tuꞌu si dunya inin saguwaꞌ gaꞌ niyaꞌ ase-asebi tabang amban Tuhan bu labi pe, gaꞌi bisan kataꞌuhanbi bang sine Tuhanin.
[13] Saguwaꞌ kuweꞌitu magdambuwaꞌ ne kaꞌam duk Isa Almasi; bisan kaꞌam bakas tala amban iye matuꞌuhin, taboꞌo ne kaꞌam kuweꞌitu patapit si Tuhan peggeꞌ matey Almasi pamuwasne meꞌ dusebin.
[14] Inurungan kasanyangan kite bi peggeꞌ pinaghāp kite bi weꞌ Almasi; kami meꞌ Yahudihin duk kaꞌam meꞌ dumaꞌin Yahudihin, inānan weꞌ ne pagkuntaraten bi kuweꞌ dalil ilarak weꞌ ne dinding si elletten bi.
[15] Sabab kamateyne diyataꞌ olomin, inānan ne weꞌ ne kapatut saraꞌ meꞌ Yahudihin sampay pangandaꞌakannen. Inānan miyaꞌan weꞌ ne supaya kami meꞌ Yahudihin duk kaꞌam meꞌ dumaꞌin Yahudihin magdambuwaꞌ atey ne, saliꞌ-saliꞌ sandel si iye duk pinaghāp ne kite bi.
[16] Sabab kamateyne diyataꞌ olomin, pinaghāp ne weꞌ Almasi Yahudihin duk dumaꞌin Yahudihin, duk gaꞌi ne siye magbanta duk pinagdambuwaꞌ ne siye weꞌ ne. Damikkiyan sabab kamateynen maghāp kite bi duk Tuhanin.
[17] Hangkan pitu Almasi magaka weꞌ makajari kite bi kēmon maghāp duk Tuhanin. Inakahan kaꞌam meꞌ dumaꞌin Yahudihin, meꞌ matala amban Tuhanin, duk kami meꞌ Yahudihin isab, meꞌ matapit si Tuhanin.
[18] Kēmon kite bi, Yahudi duk dumaꞌin Yahudi, saliꞌ-saliꞌ kite bi tabangan Niyawa Tuhanin supaya kite bi tapī si Samate bi Tuhanin palabey amban Almasi.
[19] Na, hangkan hep kaꞌam meꞌ dumaꞌin Yahudihin, dumaꞌin ne kaꞌam meꞌ aꞌa liyu-liyu saguwaꞌ meꞌ aꞌa Tuhanin ne kaꞌam magtuhut duk meꞌ aꞌane tagnaꞌin duk sakup ne kaꞌam si meꞌ anak Tuhanin.
[20] Kēmon kite bi dalil lumaꞌ. Si Isa Almasi batu panenggehan lumaꞌin. Olom lumaꞌin meꞌ kawakilanin duk meꞌ kanabihanin.
[21] Dalil pinagtoket ne paꞌin weꞌ Almasi meꞌ panyap lumaꞌin duk ngahadje lumaꞌin sampay ujudnen manjari langgal pataꞌ patennaꞌan Tuhanin.
[22] Na, kaꞌam isab, peggeꞌ magdambuwaꞌ ne kaꞌam duk Almasi, kuweꞌ dalil panyap lumaꞌ kaꞌam magtuhut duk meꞌ sinduwehin duk pinagtoket kaꞌam sampay ujud manjari kaꞌam lumaꞌ Tuhanin duk luꞌu patennaꞌ Niyawa Tuhanin si kaꞌam.