[1] Tiyaꞌ ku kinalabusu sabab panuhutku Panuhutanten bi. Junjungku si kaꞌam, ine-ine hinangbi, subey hinanganbin tewwaꞌ si matahan Tuhan peggeꞌ tapeneꞌ kaꞌam weꞌ ne.
[2] Subey diyawaꞌ ateybin duk lunuk, duk subey kaꞌam magpasensiya. Magmahāp kaꞌam si saweꞌbi pamakitebi lasabin.
[3] Paggeꞌesanun bi hinang inin supaya luwal kaꞌam magsulut-sulut ne paꞌin, peggeꞌ pinagdambuwaꞌ kaꞌam weꞌ Niyawa Tuhanin.
[4] Kite bi kēmon pinagdambuwaꞌ dalil baran Almasihin. Dambuwaꞌ du barannen. Dambuwaꞌ du isab hadja Niyawa Tuhanin. Damikkiyan dambuwaꞌ du hadja inase-aseten bi kēmon peggeꞌ saliꞌ kite bi tapeneꞌ weꞌ Tuhanin.
[5] Dambuwaꞌ du hadja isab Panuhutanten bi duk dambuwaꞌ pangandelanten bi kēmon, iye si Almasi. Duk dambuwaꞌ du hadja jānnen hangkan kite bi pinandi.
[6] Dambuwaꞌ du isab hadja Tuhanin duk iye sama meꞌ aꞌahin kēmon. Iye magbayaꞌ si kēmonin. Antag-antag laꞌi iye duk tuꞌu isab iye dem ateyte bi kēmon.
[7] Bisan kite bi magdambuwaꞌ saguwaꞌ dangan-dangan kite bi kaꞌurungan magseddili-seddili kapandeyan weꞌ Almasi. Urunganne kite tamanan kabayaꞌannen.
[8] Paꞌin kitabin hep, “Paꞌangkatne hap surgaꞌin ekka taboꞌone meꞌ pilisu, duk inurungan weꞌ ne meꞌ aꞌanen kahāpan.”
[9] Na, bang pinaꞌin weꞌ paꞌangkat iye, hātinen weꞌ duwaꞌi dahuꞌ iye pitu si dunya.
[10] Na, mapitu si dunya inin, iye du isab mapaꞌangkat balikin pī diyataꞌ si dambiyaꞌ langit supaya antag-antag si tibuꞌukan alamin laꞌi du isab iye.
[11] Iye du isab “mangurung kahāpan si meꞌ aꞌanen”. Niyaꞌ kawakilan weꞌ ne magmahalayak lapalnen. Niyaꞌ isab urunganne kapandeyan magpalataꞌ bissānen. Sinduwehin urunganne kapandeyan ngahumatan meꞌ aꞌahin nuhut Almasi. Niyaꞌ isab urunganne kapandeyan magusihat duk ngahatul meꞌ masandel pu Almasihin.
[12] Hininang inin weꞌ Almasi supaya tahinang meꞌ masandel si iyehin meꞌ bayuꞌan hinangde si Tuhanin supaya siye, meꞌ dalil barannen, magasig-inasig du siye duk ngabasag sandelden.
[13] Ujudnen saliꞌ-saliꞌ ngabasag sandelten bi duk magkasōng pangataꞌuten bi kēmon sabab Almasi, Anak Tuhanin. Manjari pagen ne sandelte pu Almasihin duk kawul-piꞌilten kuweꞌ ne kawul-piꞌil Almasihin.
[14] Bang pagen ne sandelten, na, pikilanten dumaꞌin ne kuweꞌ pikilan nakanak mura tapadupang. Gaꞌi ne kite kahumatan weꞌ panoloꞌ ine-ine. Dumaꞌin ne kite kuweꞌ meꞌ aꞌa sinduwehin, ine-ine panoloꞌ si siye weꞌ meꞌ guru pangakkalin, kahagadde kuweꞌ dalil patuhut ne hadja siye tungan-tungan siye boꞌo goyakin atawa baliyuhin.
[15] Saguwaꞌ kite bi, iye binissāten bi si meꞌ saweꞌten bi sabab toloꞌ mabennalin hawal lasate bi si siyehin. Manjari pasōng ngabasag sandelte pu Almasihin duk kawul-piꞌilten manjari ne kuweꞌ kawul-piꞌilnen. Iye hep dalil kōkin
[16] duk kite bi meꞌ masandel si iyehin dalil barannen. Kēmon bayuꞌan si baranin, iye magbayaꞌ si siyehin kōkin. Kēmon siye magsugpat pahāp-hāp duk pagen siye sabab meꞌ ohat mangantanan siyehin. Bang kēmon bayuꞌan si baranin dangan-dangan ngahinang-hinang pinasukuꞌ si iyehin, nulig baran miyaꞌan duk ngabasag. Damikkiyan kite bi meꞌ dalil baran Almasihin, bang kite bi maglasa-ilasa duk magtabang-tinabang, ngabasag duk ngapagen sandelten bi.
[17] Hangkan hep sessaꞌante kaꞌam peggeꞌ kaꞌurungan ku kapatut weꞌ Panuhutanten bi. Amey-amey daꞌa ne tuhutun bi meꞌ addat meꞌ aꞌa manggaꞌi manuhut Tuhanin peggeꞌ gaꞌ niyaꞌ kagunahan meꞌ pamikilden.
[18] Kuweꞌ lanab dem pikilanden. Gaꞌ niyaꞌ umulde salama-lama amban Tuhan peggeꞌ gaꞌi kataꞌuhande Tuhanin duk tuwas ateyden.
[19] Gaꞌi ne siye iyaꞌ. Iye ne hadja luwal tinuhutden meꞌ napsuden duk baꞌisan siye duk gaꞌi siye ngatu kaduhulan.
[20] Saguwaꞌ kaꞌam, dumaꞌin kuweꞌ miyaꞌan taꞌayabi amban Almasihin.
[21] Takalebi sabab iye duk peggeꞌ kaꞌam meꞌ tindegne katoloꞌan kaꞌam toloꞌ mabennal amban iyehin.
[22] Hangkan lebbahanun bi ne meꞌ addatbi matuꞌuhin. Peggeꞌ meꞌ addatbi iyan ngakkalan kaꞌam hangkan ūtanbi napsu baranbin duk inin makapagkaꞌat kaꞌamin.
[23] Subey ne teꞌed asal binaꞌahuhan pagateybin duk pamikilbin.
[24] Duk subey addatbin binaꞌahuhan duk ne kuweꞌ addat Tuhanin. Manjari kawul-piꞌilbin bentel ne duk bunsi ne kaꞌam magduse.
[25] Hangkan daꞌa ne kite bi magdustaꞌ. Subey bissāte bi hadja sasuku matoꞌohin si pagkasiten bi, peggeꞌ kēmon kite bi pinagdambuwaꞌ dalil baran Almasihin.
[26] Bang kaꞌam astel, pahatul-hatul kaꞌam kaw kaꞌam kapaghinangan laꞌat hawal astelbin. Daꞌa boꞌohun bi tuli astelbin.
[27] Daꞌa urunganun bi lugal seyitanin nassat kaꞌam.
[28] Aꞌa panangkewin subey ne padeheng nangkew, saguwaꞌ subey ne iye papages maghinang, supaya niyaꞌ kaꞌellumanne duk supaya niyaꞌ panabangne meꞌ mamiskinin.
[29] Daꞌa kaꞌam missā laꞌatan saguwaꞌ bissāhun bi hadja meꞌ bissā mahāpin duk meꞌ bissā makaꞌasig ateyin duk meꞌ bissā matumewwaꞌin para si kahāpan meꞌ mapakale si kaꞌamin.
[30] Duk daꞌa padukkahun bi Niyawa Tuhan Masutsihin. Peggeꞌ Niyawa Tuhan dem ateybin, tandaꞌ pangurung Tuhanin weꞌ kaꞌam sukuꞌ si iye. Duk sabab Niyawa Tuhanin kabugtuꞌanbi weꞌ niyaꞌ ellew si pasōngan pinaluhaya teꞌed kaꞌam weꞌ Tuhanin.
[31] Lebbahanun bi ne kēmon peddiꞌ ateybin, pagastelbin, duk pagamābin. Daꞌa ne kaꞌam maggasud. Daꞌa ne kaꞌam missā-missāhan saweꞌbi. Daꞌa ne kaꞌam bunsi si saweꞌbi.
[32] Saguwaꞌ subey kaꞌam hāp duk magaseꞌ-inaseꞌ. Duk subey isab kaꞌam magampun-inampun, kuweꞌ Tuhanin inampun kaꞌam weꞌ ne sabab Isa Almasi.