[1] Kaꞌam iyan meꞌ anak Tuhanin kinalasahan teꞌed weꞌ ne, hangkan subey tuyuꞌanbi ilekkat addatnen.
[2] Subey kaꞌam luwal malasa si saweꞌbi kuweꞌ pangalasa Almasi kaꞌamin. Peggeꞌ Almasi hep, hawal lasane si kitehin bi, pinaglillaꞌ weꞌ ne dinen kuweꞌ kuluban para si kahāpante bi, duk kasulutan teꞌed Tuhanin si hininangne miyaꞌan.
[3] Kaꞌam iyan meꞌ aꞌa Tuhanin, hangkan bang pasal magjina duk magbaꞌis duk magnapsu, gaꞌi patut bisan binangkil weꞌ bi.
[4] Duk gaꞌi isab pataꞌ si kaꞌam ngalakaꞌ atawa maglalap atawa magulahan gaꞌi hāp. Saguwaꞌ iye hāp hinangbi, magpasalamat kaꞌam si Tuhan.
[5] Kataꞌuhanbi du weꞌ sasuku magjina atawa magbaꞌis, gaꞌi siye sumakup dem pagbayaꞌan Almasi duk Tuhanin. Damikkiyan meꞌ manapsuhanin gaꞌi du isab sumakup laꞌi peggeꞌ meꞌ pagnapsuhanden iye miyaꞌan hinangde tuhanden.
[6] Daꞌa pakalehun bi meꞌ aꞌa magpaꞌinin weꞌ meꞌ hinangan miyaꞌan gaꞌi laꞌatan, kaw kaꞌam tapadupang weꞌ de. Peggeꞌ meꞌ hinangan miyaꞌan hep jānnen hangkan astel Tuhanin si meꞌ manggaꞌi manuhut iyehin duk leggane du siye.
[7] Hangkan daꞌa teꞌed kaꞌam magtuhut-tuhut duk meꞌ aꞌa kuweꞌ meꞌ aꞌa miyaꞌan.
[8] Matuꞌuhin kuweꞌ kaꞌam dem lindem. Saguwaꞌ kuweꞌitu kuweꞌ dem dantaꞌ ne kaꞌam peggeꞌ nuhut ne kaꞌam pu si Isa Almasi. Hangkan kawul-piꞌilbin subey matalep si meꞌ aꞌa dem dantaꞌ.
[9] Peggeꞌ bang aꞌahin dem dantaꞌ, kawul-piꞌilnen hāp duk bentel duk kapangandelan iye.
[10] Pagtuyuꞌanun bi ngaya bang ine-ine makasulut Panuhutanten bi.
[11] Daꞌa kaꞌam palamud si meꞌ hinangan laꞌat hininang meꞌ aꞌa dem lindemin. Saguwaꞌ iye subey hininangbin, papastiꞌun bi si siye weꞌ meꞌ hinangande miyaꞌan gaꞌi hāp.
[12] Makaꞌiyaꞌ-iyaꞌ teꞌed bisan binissā sabab meꞌ hinangande tinapukanin.
[13] Saguwaꞌ bang pinapastiꞌ si siye weꞌ salaꞌ hinanganden ujud pagtamamde sāꞌden,
[14] peggeꞌ ine-ine kadantaꞌan pastiꞌ teꞌed pinayaman. Hangkan hep niyaꞌ pinaꞌin, “Ngape ne kew, matulilu dongaꞌ ne kew amban kamateynun ubus dinantaꞌan du kew weꞌ Almasi.”
[15] Hangkan pahatul-hatul teꞌed kaꞌam bang saꞌingge kawul-piꞌilbin. Daꞌa kaꞌam kuweꞌ aꞌa gaꞌi taꞌu mikil saguwaꞌ subey lalem akkalbin.
[16] Bang niyaꞌ hāp subey hinangbi, hinangun bi ne. Daꞌa ne tangguhanun bi peggeꞌ hinangan meꞌ aꞌa kuweꞌituhin laꞌat ne teꞌed.
[17] Hangkan hep daꞌa kaꞌam kuweꞌ aꞌa gaꞌi taꞌu mikil, saguwaꞌ subey tahātibi bang ine-ine kinabayaꞌan Panuhutanbin Isa Almasi, duk tuhutun bi.
[18] Subey kaꞌam gaꞌi maglangohan peggeꞌ makapagkaꞌat kaꞌam. Saguwaꞌ iye subey hinangbi, subey pasagadanbi Niyawa Tuhanin magbayaꞌ si kaꞌam.
[19] Bang kaꞌam magbissā-bissā, gunahun bi meꞌ bissā dem kitabin duk magkalangan kaꞌam pamudjibi Tuhanin, dumaꞌin hadja duk behebi saguwaꞌ sampay dem ateybi.
[20] Duk subey kaꞌam luwal magsukul si Samate bi Tuhanin bisan ine-ine tekka si kaꞌam, peggeꞌ sandel kaꞌam si Panuhutanten bi Isa Almasi.
[21] Magpadiyawaꞌ kaꞌam si saweꞌbi hawal pagaddatbi pu Almasihin.
[22] Kaꞌam meꞌ dendehin, subey kaꞌam magpadiyawaꞌ si ellabin, peggeꞌ magpadiyawaꞌ kaꞌam si Panuhutanten bi.
[23] Peggeꞌ lellahin taga kapatut si andanen kuweꞌ Almasihin isab taga kapatut si kite bi, meꞌ masandel si iyehin. Iye manimbul kitehin bi, kite bi dalil barannen.
[24] Hangkan dendehin subey teꞌed magpadiyawaꞌ si ellanen ine-ine kabayaꞌan ellanen, kuweꞌ kitehin bi isab meꞌ masandel pu Almasihin magpadiyawaꞌ si iye.
[25] Kaꞌam meꞌ lellahin, subey kalasahanbi andabin kuweꞌ du isab pangalasa Almasi si kitehin bi meꞌ masandel si iyehin. Pinaglillaꞌ hep weꞌ ne umulnen para si kahāpante bi.
[26] Hininang inin weꞌ ne supaya kite bi manjari meꞌ aꞌa Tuhanin. Sinutsi kite bi weꞌ ne sabab kinahagad weꞌ te bi lapalnen duk sabab pinandi kite bi, tandaꞌ weꞌ kahagad ne kite bi si iye.
[27] Hangkan inin hinangne si kite bi supaya gaꞌ ne teꞌed niyaꞌ duse-dusete bi duk gaꞌ ne niyaꞌ tamak-tamakte bi atawa kotot-kototte bi atawa sallaꞌte bi. Manjari hāp ne kite bi manamal duk tayimaꞌne kite para si iye.
[28] Damikkiyan isab kaꞌam meꞌ lellahin, subey kalasahanbi andabin kuweꞌ pangalasabi baranbin. Bang kalasahanbi andabin, iye kinalasahanbin baranbin.
[29] Gaꞌ niyaꞌ aꞌa bunsi si di barannen. Saguwaꞌ pakanne duk ipatne teꞌed barannen, kuweꞌ Almasihin ipatne kite bi meꞌ masandel si iyehin,
[30] peggeꞌ kite bi dalil barannen.
[31] Tasulat hep dem kitab, pinaꞌin, “Bang lellahin maganda, ambananne saꞌi-samanen duk padambuwaꞌ iye si andanen, duk duwehin magdambuwaꞌ baran ne.”
[32] Ayat inin lalem maꞌananen. Bang tasabutkun, bissā inin tewwaꞌ pu si Almasi duk meꞌ masandel si iyehin.
[33] Saguwaꞌ inin pasal kaꞌam du isab meꞌ maglewlekebinihin. Lellahin subey kalasahanne andanen kuweꞌ pangalasane dinen, duk dendehin subey pagaddatanne ellanen.