[1] Sulat inin amban si Paul duk Timoteo, meꞌ daraꞌakan Isa Almasi. Pasampay kami inin piyu si kaꞌam kēmon meꞌ masandel pu si Isa Almasi maluꞌu si lahat Pilipihin duk sampay si meꞌ bahiꞌbin duk si meꞌ tabangbin.
[2] Karayaw kaꞌam luwal ipat Samaten bi Tuhanin duk Panuhutanten bi, si Isa Almasi. Karayaw isab kaꞌam urungande kasanyangan dem ateybi.
[3] Hadje pagsukulku si Tuhanin kahabaꞌ kaꞌam tapikilku.
[4] Duk kahabaꞌ ku ngampun-ngampun si Tuhan para si kaꞌam, kēgan teꞌed dem ateykun,
[5] peggeꞌ taꞌessebku bang saꞌingge panabangbi aku magmahalayak aka-aka mahāp sabab Isa Almasihin. Kemuwe tagnaꞌ sandel kaꞌam pu si Isa Almasi sampay maꞌin, tinabangan ne ku paꞌin weꞌ bi.
[6] Peggeꞌ Tuhanin hep managnaꞌan hinangne mahāp inin luꞌu dem ateybi, kabugtuꞌanku weꞌ gaꞌi dehenganne hinangne inin samantaꞌan gaꞌi pe taꞌabut ellew pabalik Isa Almasi mapitu si dunyahin.
[7] Patut kaꞌam pikilku peggeꞌ tuꞌu kaꞌam dem ateyku. Peggeꞌ bisan ku magmahalayak atawa mēbbegan aka-aka mahāpin, duk bisan baytuku ne tuꞌu dem kalabusu, tumuhut du kaꞌam si aku si hinang pinangurung Tuhan si akuhin peggeꞌ tinabangan ku weꞌ bi.
[8] Tuhanin saksiꞌkun weꞌ toꞌo pinaꞌinku inin, weꞌ asal ngesseb ku teꞌed si kaꞌam peggeꞌ lasaku si kaꞌamin kuweꞌ isab lasa Isa Almasi si kaꞌamin.
[9] Pāku-pākuku si Tuhan karayaw pasōng pe teꞌed paglasa-ilasabin. Karayaw isab weꞌ pasōng pangataꞌubi sabab Tuhanin. Duk ine-ine tekka si kaꞌam karayaw urunganne kaꞌam kataꞌu,
[10] supaya tapaꞌilbi bang ine asal tamanan mahāp subey hininangin. Manjari sutsi ateybin duk gaꞌ niyaꞌ aꞌa nallaꞌ kaꞌam pagtekka ellew pabalik Isa Almasi pitu si dunyahin.
[11] Hatulanbin hāp ne teꞌed peggeꞌ tabangan Isa Almasi kaꞌam. Manjari pagkite meꞌ aꞌahin hatulanbi mahāpin, pahadjede duk pudjide Tuhanin.
[12] Meꞌ kapungtinaꞌihanku masandel pu si Isa Almasihin, kabayaꞌankun weꞌ kataꞌuhanbi du weꞌ kēmon maꞌumantag si akuhin moleꞌ si kahāpan du. Peggeꞌ pasōng palatag aka-aka mahāp sabab si Isa Almasihin.
[13] Sabab pangalabusu aku inin kēmon meꞌ guwaldiya si astanaꞌ sultanin duk kēmon meꞌ sinduwe matuꞌuhin isab ngataꞌu ne weꞌ puꞌunku kinalabusu sabab panuhutku Isa Almasihin.
[14] Dumaꞌin hadja miyaꞌan. Sabab pangalabusu akuhin kaꞌekkahan meꞌ pungtinaꞌite bi masandel pu si Isahin ngabasag sandelde si Panuhutanin Isa Almasi, duk pasōng pe siye bahani duk gaꞌ niyaꞌ talew-talewde magmahalayak lapal Tuhanin.
[15] Toꞌo niyaꞌ siye magmahalayak sabab si Isa Almasi peggeꞌ ngimbū siye si aku duk bayaꞌ siye ngalindihan aku. Saguwaꞌ niyaꞌ isab magmahalayak peggeꞌ asal kabayaꞌanden weꞌ ngataꞌu meꞌ aꞌahin sabab Almasi.
[16] Magmahalayak siye inin hawal lasade si akuhin peggeꞌ kataꞌuhande weꞌ tapeneꞌ ku weꞌ Tuhanin supaya bēbbeganku aka-aka mahāpin.
[17] Saguwaꞌ meꞌ sinduwehin, iye mangimbūhan akuhin, dumaꞌin hangkan siye magmahalayak weꞌ dambūs-būs ateyden, saguwaꞌ magmahalayak siye supaya siye pinahadje weꞌ aꞌa. Duk kabayaꞌanden weꞌ sabab hininangde inin katambahande kasusehankun tuꞌu dem kalabusu.
[18] Saguwaꞌ gaꞌi ne makaꞌine! Hāp sababnen atawa gaꞌi, basta tamahalayak hadja sabab Isa Almasi, kēgan ne ku teꞌed.
[19] Duk magkēg ne ku paꞌin peggeꞌ kataꞌuhanku weꞌ pinaluwas du ku amban kalabusu inin peggeꞌ luwal kaꞌam ngampunan aku duk peggeꞌ tinabang ku weꞌ Niyawa Tuhanin.
[20] Asal iye teꞌed kabayaꞌankun duk inase-asekun weꞌ gaꞌi ku teꞌed dapat si hinang pinasukuꞌ Tuhan si akuhin. Bang du siꞌ ku luwal bahani magmahalayak, lagiꞌ ne kuweꞌitu, supaya tapudji Isa Almasi sababku. Bang ellum pe ku atawa bang pinapatey ku, kabayaꞌankun tapudji Almasi sababku.
[21] Peggeꞌ bang aku, hangkan ku bayaꞌ ellum tuꞌu si dunya supaya tapudjiku ne paꞌin Almasi. Saguwaꞌ bang ku matey, na pasōng ne hāp si aku.
[22] Hāp isab bang tahaꞌ-tahaꞌ pe umulkun supaya ku kapaghinang namba pu si Isa Almasi. Gaꞌi kataꞌuhanku bang inggehin pineneꞌkun, ellum ke atawa matey.
[23] Kahunitan ku mikil. Bayaꞌ ku matey duk ku mura tapī pu si Isa Almasi peggeꞌ pasōng inin hāp.
[24] Saguwaꞌ sabab kaꞌam gam pe ku ellum dahuꞌ supaya kaꞌam tatabanganku.
[25] Kabugtuꞌanku weꞌ subey pe ku nabangan kaꞌam hangkan kataꞌuhanku weꞌ gaꞌi pe ku matey, saguwaꞌ tuꞌu pe ku si kaꞌam supaya tatabangante kaꞌam duk ngabasag pe teꞌed sandelbi pu Isa Almasihin duk pasōng isab kēgbin.
[26] Duk bang ne ku luꞌu balik si kaꞌam, aku ne jān pamudjihanbi Isa Almasihin.
[27] Iye maꞌimportantehin weꞌ kawul-piꞌilbin gaꞌi pabiddaꞌ amban meꞌ panoloꞌ dem aka-aka mahāp sabab Almasihin, supaya bang tabalik ku piyu mayaman kaꞌam atawa gaꞌi ne, takaleku du paꞌin weꞌ magdambuwaꞌ atey kaꞌam duk pamikilbin pateteg du pu si Isa duk inapasbin magtuhut kaꞌam mēbbegan aka-aka mahāp sabab si Isahin.
[28] Daꞌa kaꞌam tinalew si meꞌ mamantahan kaꞌamin. Peggeꞌ bang kaꞌam gaꞌi tinalew, tahātide du iyan weꞌ siye ileggahin duk kaꞌam inurungan umul gaꞌ niyaꞌ tamananne peggeꞌ Tuhanin manabangan kaꞌamin.
[29] Sabab Isa Almasi niyaꞌ kahāpan pinangurung si kaꞌam. Kahāpan miyaꞌan dumaꞌin hadja weꞌ sandel kaꞌam pu si Isa Almasi, saguwaꞌ weꞌ nandal kaꞌam isab kasigpitan sabab sandelbi si iyehin.
[30] Sabab sandelbi pu Almasihin magsandal kaꞌam kabinasahan kuweꞌ akuhin. Matuꞌuhin takitebi meꞌ kasusehan sinandalankun duk kuweꞌitu takalebi weꞌ magsandal pe ku.