[1] Hangkan hep meꞌ kapungtinaꞌihanku masandel pu si Isa Almasihin, bang inin inase-asete bi amban Almasihin, subey kite bi asal pateteg teꞌed sandel si iye. Kalasahante kaꞌam duk essebte teꞌed kaꞌam. Kaꞌam jānnen hangkan ku kēgan duk sinna ku teꞌed si kaꞌam.
[2] Kaꞌam, Yudi duk Sintiki, buyuꞌ-buyuꞌte kaꞌam subey kaꞌam magsulut-sulut peggeꞌ kaꞌam kuweꞌ magpungtinaꞌi ne sabab sandel ne kaꞌam pu si Isa Almasi Panuhutanten bi.
[3] Duk kaꞌu isab, saweꞌku kapangandelan maghinang si Tuhan maluꞌuhin, tabanganun koꞌ aku meꞌ dende iyan duk siye magsulut-sulut. Peggeꞌ matuꞌuhin tinabangan ku teꞌed weꞌ de supaya palatag aka-aka mahāpin. Magtuhut siye duk si Kelemen duk meꞌ saweꞌku sinduwe maghinang si Tuhanin. Meꞌ ēnden kēmon tasulat ne du weꞌ Tuhanin dem libru pangalistahanne ēn meꞌ aꞌa taga umul si surgaꞌ gaꞌ tamanannen.
[4] Subey kaꞌam luwal kēgan peggeꞌ sukuꞌ pu si Isa Almasi kaꞌam. Balikku pinaꞌinku miyaꞌan. Subey kaꞌam kēgan.
[5] Subey sulut-sulutbi saweꞌbin peggeꞌ sōng balik ne pitu Isa Almasi, Panuhutanten bi.
[6] Daꞌa kaꞌam suse sabab ine-ine. Saguwaꞌ bang kaꞌam ngampun si Tuhan, pākuhun bi si iye meꞌ sukalbin duk daꞌa kayipatanun bi magsukul si iye.
[7] Manjari pasanyang Tuhanin iyan dem ateybin duk dem pikilanbin peggeꞌ sukuꞌ pu si Isa kaꞌam. Duk kasanyangan inin gaꞌi takila-kila.
[8] Manjari si katambusannen, meꞌ kapungtinaꞌihanku, subey luwal pikilbi hadja sasuku mahāpin duk meꞌ pataꞌ pinudjihin. Pikilun bi hadja meꞌ mabennalin duk meꞌ pataꞌ pinahadjehin duk meꞌ hinangan mabentelin. Pikilun bi sasuku masutsihin duk meꞌ makasinna-sinnahin duk meꞌ tapudjihin.
[9] Ine-ine taꞌayabi duk tasangkabi amban aku, amban bissāku ke atawa amban meꞌ hinangankun, subey teꞌed tuhutbi. Duk luꞌu du si kaꞌam Tuhan mangurung kasanyangan dem ateyten bi.
[10] Kēgan ku teꞌed duk magsukul ku si Panuhutanten bi peggeꞌ tinabang ne isab weꞌ bi sukalkun. Kataꞌuhanku weꞌ bisan tiggel-tiggel bahu tekka inin pitu si aku, dumaꞌin hātinen weꞌ gaꞌ kaꞌam gagal si aku saguwaꞌ peggeꞌ gaꞌ tapaboꞌohanbi.
[11] Duk dumaꞌin hangkan inin paꞌinku weꞌ sabab kasukalan ku, peggeꞌ biyaksa ne ku bisan ine-ine talabeyku, niyaꞌ si aku atawa gaꞌ, gaꞌi ku magsuse.
[12] Talabeyku ne kasukalanin duk talabeyku isab maniyaꞌ maglabi-labihin. Biyaksa ne ku hangkan hep bisan antag duk bisan sumiyan, bang ku esso atawa inusan, bang labi-labihan ku atawa kasukalan, masi ku gaꞌi magsuse.
[13] Tahinangku inin kēmon peggeꞌ tinabangan ku weꞌ Isa Almasi duk urunganne ku basag.
[14] Saguwaꞌ asal hāp peggeꞌ tinabang ku weꞌ bi sakaliꞌ ku dem kasusehan.
[15] Kaꞌam meꞌ maluꞌu si Pilipihin, kataꞌuhanbi du weꞌ tagnaꞌ magmahalayak ku aka-aka mahāpin luꞌu si kaꞌam, ubus pagtahalaꞌ ku amban lahat Makedoniya, luwal hadja kaꞌam da grupu meꞌ masandel pu si Isa maluꞌuhin manabang sukalkun.
[16] Duk palaꞌiku isab si Tessalonikahin, dumaꞌin hadja mintedde pamaboꞌobi sīn si akuhin panabangbi sukalkun.
[17] Dumaꞌin weꞌ sinna ku hadja makasangka amban kaꞌam. Saguwaꞌ asal kabayaꞌankun weꞌ magkatamba pahalaꞌbi amban Tuhanin.
[18] Kuweꞌitu gaꞌi ne ku kasukalan peggeꞌ tasangkaku ne amban Epaprode meꞌ lasa-lasahan pinaboꞌohanbi si akuhin duk maglabi-labi pinangurungbi si aku inin. Kuweꞌ du inin pangurungbi si Tuhan duk kasulutan teꞌed Tuhanin si kaꞌam.
[19] Duk tabang Tuhanin du kēmon sukalbin amban alataꞌne gaꞌi takila-kilahin. Tabangne sukalbin peggeꞌ sandel kaꞌam pu Isa Almasi.
[20] Pudjite bi Samate bi Tuhanin salama-lama. Amin.
[21] Kēmon kaꞌam meꞌ aꞌa Tuhanin, meꞌ masandel pu si Isa Almasi maluꞌuhin, essebte kaꞌam. Maboꞌo bissā si kaꞌam isab meꞌ pungtinaꞌite bi matuꞌu manaweꞌan akuhin weꞌ essebde kaꞌam.
[22] Kēmon meꞌ masandel pu si Isa matuꞌuhin, lagiꞌ ne meꞌ maghinang dem astanaꞌ sultanin, essebde kaꞌam.
[23] Karayaw weꞌ luwal kaꞌam kēmon ipat Isa Almasi, Panuhutanten bi. Wassalam