[1] Meꞌ kapungtinaꞌihanku masandel pu si Isa Almasihin, taman inin saꞌ panessaꞌku si kaꞌamin. Subey kaꞌam luwal magkēg peggeꞌ kaꞌam sukuꞌ pu si Almasi. Gaꞌi makaꞌine si aku bisan tabalikku bakas sinulatku si kaꞌamin, duk hāp si kaꞌam duk kaꞌam asal maghalliꞌ.
[2] Papateng-pateng kaꞌam peggeꞌ niyaꞌ iyuꞌ meꞌ aꞌa luꞌu maghinangan laꞌat. Pangēnku siyehin meꞌ asu bingis. Gaꞌi toꞌo meꞌ panoloꞌden, weꞌ subey koꞌ meꞌ aꞌahin inislam meke siye tayimaꞌ Tuhanin.
[3] Saguwaꞌ kite bi meꞌ masandel pu si Isa Almasihin, kite bi meꞌ aꞌa tinayimaꞌ Tuhanin, dumaꞌin siye, peggeꞌ kite bi pahadjete bi Tuhanin sabab tabang Niyawa Tuhan dem ateyten bi. Duk magkēg kite bi peggeꞌ sukuꞌ pu si Isa Almasi kite bi. Duk dumaꞌin pangandelanten bi meꞌ hinangan si baranten kuweꞌ magislam miyaꞌan.
[4] Makajari siꞌ ku ngandel si meꞌ hinangan kuweꞌ inin. Bang niyaꞌ aꞌa magpaꞌin weꞌ tayimaꞌ Tuhanin iye sabab panuhutne āgamane Yahudihin, tadaꞌag pe iye weꞌ ku.
[5] Peggeꞌ aku inin walum bahangi ku hadja diyataꞌ kāpan inislam ne ku sa addat Yahudihin. Meꞌ matettoꞌakun tubuꞌ Benjamin, dambuwaꞌ anak papuꞌ kamihin Israꞌil. Asal aku inin purul Yahudi. Bang pasal saraꞌ sinulat si Musahin, asal tinuhut teꞌed weꞌ ku peggeꞌ dambuwaꞌ ku Pariseo, meꞌ mamēbbegan saraꞌin.
[6] Duk hawal ellegku si āgama Yahudihin, bininasa weꞌ ku sasuku masandel pu si Isa Almasihin peggeꞌ gaꞌi siye kahagad kuweꞌ akuhin. Bang pasal panuhutku meꞌ daꞌakan dem saraꞌ tasulat si Musahin, gaꞌ niyaꞌ sallaꞌ-sallaꞌku.
[7] Matuꞌuhin kannalku weꞌ kēmon miyaꞌan moꞌo kahāpan si aku. Saguwaꞌ kuweꞌitu gaꞌi ne ku ngandel si meꞌ miyaꞌan peggeꞌ kataꞌuhanku weꞌ gaꞌ niyaꞌ gunane. Isa Almasi hadja pangandelankun.
[8] Duk dumaꞌin hadja miyaꞌan, saguwaꞌ kēmon ne mamahalgaꞌ si aku matuꞌuhin, tinayikutan ne weꞌ ku supaya hadja kataꞌuhanku Isa Almasi, Panuhutankun, peggeꞌ pasōng teꞌed inin mahalgaꞌ si aku. Sabab iye tinayikutan weꞌ ku kēmon miyaꞌan duk kimmatanku kuweꞌ meꞌ seggit hadja supaya ku tapanuhut pu Almasi,
[9] duk supaya ku kapagdambuwaꞌ duk iye. Gaꞌ ku kinimmatan bentel sabab panuhutku saraꞌin saguwaꞌ kinimmatan ku bentel sabab sandelku pu Almasihin. Kabentelan inin pangurung Tuhanin bang kite sandel pu Almasi.
[10] Iye hadja kabayaꞌankun weꞌ kataꞌuhanku teꞌed Almasi. Hātinen mabayaꞌ kataꞌuhanku balakat mamakellum iye balik amban kamateynen duk mabayaꞌ ku magsandal katiksaꞌan kuweꞌ panandalne meꞌ katiksaꞌan matekka si iyehin. Kabayaꞌankun weꞌ tatuhutku hadja kinabayaꞌan Tuhanin kuweꞌ panuhut Almasihin bisan sampay matey iye.
[11] Hangkan inin kabayaꞌanku, supaya si pasōngan pinakellum du ku amban kamateykun duk ellum ku salama-lama.
[12] Gaꞌi ku magpaꞌin weꞌ tepe si aku ne kēmon miyaꞌan atawa weꞌ kuweꞌitu gaꞌ ne niyaꞌ sallaꞌ-sallaꞌku. Saguwaꞌ apasku ne paꞌin ngahinang kinabayaꞌan Isa Almasihin peggeꞌ inin sababnen hangkan ku pagdapuꞌne.
[13] Toꞌo, meꞌ kapungtinaꞌihanku, gaꞌ pe taꞌabutku inapasku inin, saguwaꞌ gaꞌi ne pikilku meꞌ bakas talabeykun. Iye hadja pinikilkun kuweꞌitu maggeꞌes teꞌed supaya tepe si aku kēmon kabayaꞌan Tuhan para si aku si pasōnganin.
[14] Maggeꞌes ne ku paꞌin supaya du tasangkaku kahāpan pangurung Tuhan akuhin. Kahāpan inin umul salama-lama. Tinawag ku weꞌ Tuhanin supaya tapangurungne umul inin si aku peggeꞌ sandel ku pu si Isa Almasi.
[15] Manjari kēmon kite bi meꞌ mabasag sandelne pu si Isa Almasihin subey saliꞌ-saliꞌ pamikilten bi sabab meꞌ miyaꞌan. Saguwaꞌ bang niyaꞌ kaꞌam seddili pamikilbin, na, papastiꞌ Tuhanin du inin si kaꞌam.
[16] Saguwaꞌ subey tuhutte bi ne paꞌin meꞌ bakas panoloꞌ Tuhan si kite bi kemuwe matuꞌuhin.
[17] Manjari meꞌ kapungtinaꞌihanku, batukanun bi ne paꞌin kawul-piꞌilkun. Pandogahanun bi isab meꞌ aꞌa mamatukan kawul-piꞌilkun duk batukanun bi siye.
[18] Daran kaꞌam akahanku inin matuꞌuhin, duk kuweꞌitu akahante ne isab kaꞌam balik duk makatangis-tangis aku, weꞌ ekka aꞌa magpaꞌin weꞌ sukuꞌ pu si Isa siye saguwaꞌ takitete si kawul-piꞌilden weꞌ kuntarahande du toloꞌ sabab kamatey Almasi diyataꞌ olomin.
[19] Ujud tapī du siye si narkaꞌ peggeꞌ meꞌ napsuden kuweꞌ tuhande, iye luwal tinuhutden. Imbes siye iyaꞌ, magbantu pe siye sabab meꞌ hinangande makaꞌiyaꞌ-iyaꞌin. Duk iye luwal pinikilden meꞌ bayuꞌan si dunya inin hadja.
[20] Saguwaꞌ kite bi, lahatten bi laꞌi si surgaꞌ duk asal agad-agadte bi teꞌed pabalik manimbul kitehin bi amban surgaꞌ, iye Isa Almasi, Panuhutanten bi.
[21] Bang pitu iye, pindahanne ne barante bi malamma duk mamatey inin duk hinangne kuweꞌ barannen gaꞌi matey-matey duk makajari patennaꞌ laꞌi si Tuhan. Si Almasi taga balakat magbayaꞌ si kēmon-kēmonin duk gunane balakatne inin pamaꞌahune baranten bi.