[1] Dambuwaꞌ ellew, hap pī si Petros duk Yahiya si langgal mahadjehin waktu asal.
[2] Laꞌi si tarangka langgal ēnande Tarangka Mannisan, niyaꞌ dambuwaꞌ lella kukuꞌ kemuwe amban dem betteng. Kahabaꞌ ellew binoꞌo iye pī si tarangka miyaꞌan supaya iye kapamāku sīn si meꞌ aꞌa mapadiyalem si langgalin.
[3] Pagkitene si Petros duk Yahiya sōng padiyalem, māku iye amban siye.
[4] Pinayaman teꞌed iye pahantap weꞌ si Petros duk Yahiya. Manjari paꞌin si Petros, “Mayam kew pitu si kami.”
[5] Mayam ne aꞌahin pī si siye ngase-ngase weꞌ makasangka iye amban siye.
[6] Saguwaꞌ paꞌin si Petros, “Gaꞌ niyaꞌ teꞌed sīnku. Saguwaꞌ pangurungku kaꞌu maniyaꞌ si akuhin. Weꞌ balakat Isa Almasi, aꞌa Nasaretin, daꞌakte kew lumengngan.”
[7] Manjari inantanan iye weꞌ si Petros si tanganne kanawan pinakuwat. Magtawus ngabasag bettisnen duk mintelnen.
[8] Pahulangkad iye nengge duk lumengngan iye. Ubus padiyalem iye nuhut disi Petros pī dem langgal. Lumengngan iye duk maglaksuhan duk pinudji-pudji weꞌ ne Tuhanin.
[9] Takite iye weꞌ meꞌ aꞌa dem langgalin kēmon, lumengngan-lengngan mudji-mudji Tuhanin ne paꞌin.
[10] Sakaliꞌ takilalede weꞌ iye ne hatiꞌ miyaꞌan aꞌa bakas maningkoloꞌ magpāku-pāku si Tarangka Mannisan si langgalin, bengngangan siye duk ulaliꞌ teꞌed siye bang weꞌey ne iye kapalengngan.
[11] Paꞌantan pe aꞌahin pu si Petros duk Yahiya laꞌi si ēnande Simpey Sulaiman. Manjari magubas meꞌ aꞌahin pī si siye laꞌi magulaliꞌ teꞌed.
[12] Pagkite si Petros meꞌ aꞌahin, missā iye si siye. Paꞌinne, “O meꞌ aꞌa Israꞌil. Weꞌey kami pagulaliꞌanbi? Duk weꞌey kami dendenganbi? Weꞌ pangannalbi balakat kami makapalengngan aꞌa inin, atawa hangkan iye makalengngan sabab sutsi atey kamihin? Dumaꞌin.
[13] Kataꞌuhanbi, kapapuꞌanten bi disi Ibrahim, duk si Isahak, duk si Yakub, dambuwaꞌ du Tuhanten bi duk siye. Manjari Tuhan inin, pinahadje weꞌ ne daraꞌakannen, si Isa, saguwaꞌ sinōngan iye weꞌ bi si saraꞌ. Gaꞌ iye tayimaꞌbi laꞌi si panaꞌanan Gubnul Pilatus. Duk bisan iye batang paluwas Pilatus, gaꞌi kaꞌam mabayaꞌ.
[14] Sutsi iye duk bentel, saguwaꞌ gaꞌ iye tayimaꞌbi. Iye pinākubi pinaluwas gubnulin, dambuwaꞌ aꞌa bakas mapatey.
[15] Pinapatey weꞌ bi mangurung umulin, saguwaꞌ pinakellum iye balik weꞌ Tuhanin duk kasaksiꞌan kami inin.
[16] Na, balakat si Isa hep mangurung basag si aꞌa bakas makukuꞌ inin,” paꞌin si Petros. “Takitebi iye duk takilalebi. Puꞌunne inin kawuliꞌan, sabab sandel kami pu si Isa. Aweꞌ, sandel kami pu si Isahin hep makakawuliꞌ aꞌa inin tuꞌu si matahanbi kēmon.
[17] “Meꞌ kapungtinaꞌihanku,” paꞌin si Petros, “kataꞌuhanku weꞌ hininangbi duk meꞌ nakuraꞌbi pu si Isahin, tahinangbi peggeꞌ awam kaꞌam.
[18] Saguwaꞌ kuweꞌ miyaꞌan ne panuman Tuhan lapalne pinalataꞌ weꞌ meꞌ kanabihan awwalley. Pinalataꞌ weꞌ de weꞌ Almasihin subey teꞌed makalabey kabinasahan.
[19] Na,” paꞌin si Petros, “pagsusunanun bi duk lebbahanun bi ne meꞌ dusebin, duk balik ne kaꞌam si Tuhan supaya ānanne meꞌ dusebin.
[20] Manjari magkatekka du amban Tuhanin meꞌ waktu pangasig ateybin, duk papitune du balik si dunya si Isa, iye Almasi tapeneꞌne magbayaꞌ si kaꞌamin.
[21] Saguwaꞌ subey dahuꞌ iye laꞌi si surgaꞌ tiggelan gaꞌi pe tekka ellew pamahāp meꞌ kēmon-kēmonin balik kuweꞌ tagnaꞌin. Iye ne inin waktu bakas inaka weꞌ Tuhan si meꞌ kanabihanne masutsihin awwalley.
[22] Peggeꞌ si Musa bakas missā hep si bangsa Israꞌilin, paꞌinne, ‘Si pasōngan, mapitu du Tuhanin si kaꞌam dambuwaꞌ nabi kuweꞌ akuhin. Aꞌa bangsabi du iye. Subey pakalebi ine-ine paꞌinne si kaꞌam.
[23] Sine-sine gaꞌi pakale si nabi miyaꞌan, pinasapeꞌ du iye amban meꞌ aꞌa sukuꞌ si Tuhanin duk magmula iye.’
[24] Damikkiyan du isab,” paꞌin si Petros, “kēmon meꞌ kanabihanin, tinagnaꞌan amban Nabi Samuel, bakas makabissā du sabab meꞌ ellew kuweꞌitu inin.
[25] Si kaꞌam hep meꞌ sanggup Tuhan pinasampay meꞌ kanabi-nabihanin. Duk sakup kaꞌam si janjiꞌ Tuhan duk meꞌ kapapuꞌanbin. Ngajanjiꞌ hep Tuhanin si papuꞌten bi Ibrahim, paꞌinne, ‘Amban tubuꞌnun urunganku kahāpan kēmon manusiyaꞌ si dunyahin.’
[26] Hangkan tapeneꞌ weꞌ Tuhanin daraꞌakannen, Isa Almasi duk pinapitu iye weꞌ ne si kaꞌam dehellu. Patayikutne kaꞌam dangan-dangan amban meꞌ hinanganbi malaꞌatin peggeꞌ mabayaꞌ kaꞌam urunganne kahāpan.”