[1] Takale weꞌ meꞌ kawakilanin duk meꞌ katindegan si Isa si tibuꞌukan Yahudiyahin weꞌ kinahagad ne lapal Tuhanin weꞌ meꞌ aꞌa dumaꞌin bangsa Yahudihin.
[2] Pagbalik si Petros hap Awrusalam, niyaꞌ meꞌ Yahudi masandel pu si Isahin nganjawab iye.
[3] Paꞌinde, “Weꞌey kew pī si lumaꞌ meꞌ aꞌa gaꞌ bakas magislam duk magkakanan kew isab duk siye?”
[4] Hangkan pinahātihan siye weꞌ si Petros kahalannen amban tagnaꞌ.
[5] Paꞌinne si siye, “Laꞌi ku miyaꞌan si lahat Joppa ngampun. Manjari niyaꞌ pabagala si aku. Niyaꞌ takiteku kuweꞌ bantuk olos ladjab iningketan pidjūnen kaꞌampat duk pinatuntun amban langit padiyawaꞌ pī si bihingku.
[6] Pinayaman weꞌ ku papastiꞌ bang ine malaꞌi diyalem olos miyaꞌan. Iye takitekun meꞌ hayep, meꞌ hayep talun, meꞌ mapalele si bulakin, duk meꞌ manuk-manuk isab.
[7] Manjari niyaꞌ takaleku suwala missā si aku. Paꞌin suwalahin, ‘Kuwat kew, Petros. Numbaliꞌ kew duk mangan kew.’
[8] Saguwaꞌ paꞌinku, ‘Gaꞌi ku, Tuwan. Tiggelanku ellum gaꞌ pe ku bakas makaꞌakan ine-ine mukalu atawa haram.’
[9] Saguwaꞌ takaleku ne isab balik suwalahin, paꞌinne, ‘Daꞌa paꞌinun haram bakas tahalal weꞌ Tuhanin.’
[10] Mintellu inin pinalabey si aku, ubus bu pinaꞌangkat ne balik olosin pī si langit.
[11] Sābu miyaꞌan du, niyaꞌ tekka pī si lumaꞌ patennaꞌankun tellungan lella dinaꞌak pī si aku amban lahat Kesarea.
[12] Dinaꞌak ku weꞌ Niyawa Tuhanin gaꞌi magalang-alang nuhut siye. Duk sinaweꞌan ku isab weꞌ de inin, ennem siye meꞌ pagkasite bi tindeg si Isa amban Joppa. Pagtekka kami si Kesarea, hap pī kami padiyalem si lumaꞌ Kapitan Korneliyus.
[13] Inakahan kami weꞌ Korneliyus weꞌ niyaꞌ koꞌ takitene malaꞌikat nengge laꞌi dem lumaꞌne duk missā si iye. Paꞌin malaꞌikatin koꞌ, ‘Ngandaꞌak kew pī si lahat Joppa ngeddoꞌ dambuwaꞌ aꞌa inēnan si Simon, inēnan isab si Petros.
[14] Niyaꞌ iyuꞌ meꞌ bissāne si kaꞌu makatimbul kaꞌu duk kēmon saweꞌnu magdambuwaꞌ lumaꞌin.’
[15] Manjari sakaliꞌ ne ku missā pu disi Korneliyus,” paꞌin si Petros, “paꞌasek pī si siye Niyawa Sutsihin kuweꞌ si kite bi tagnaꞌin.
[16] Manjari taꞌessebku bakas pinaꞌin si Isahin. Paꞌinne hep, ‘Boheꞌ pamandi si Yahiya meꞌ aꞌahin, saguwaꞌ kaꞌam,’ paꞌin si Isa, ‘pamandi si kaꞌamin seddili. Pinapiyu du si kaꞌam Niyawa Sutsihin.’
[17] Na,” paꞌin si Petros, “asal pastiꞌ ne weꞌ pinangurung isab weꞌ Tuhanin si meꞌ aꞌa dumaꞌin Yahudi Niyawanen, lasa-lasahan pinangurungne si kite bi meꞌ Yahudihin, pagsandel ne kite bi pu Isa Almasi, Panuhutanin. Hangkan gaꞌi tasaggaꞌku Tuhanin.”
[18] Pagkale meꞌ Yahudihin inin, gaꞌ ne niyaꞌ bissāde. Bisan miyaꞌan pinudji weꞌ de Tuhanin. Paꞌinde, “Bang sa īꞌ, pinapikilan du isab weꞌ Tuhanin meꞌ kabangsahan dumaꞌin Yahudihin supaya pinda pagateyden duk taga umul siye salama-lama.”
[19] Masa pamapatey si Estepanin, kanat-kanat hep meꞌ masandel pu si Isahin sabab paminasa si siyehin. Sinduwehin umabut sampay pī si lahat Penisiya, si pūꞌ Kiprus, duk laꞌi si Antiyok. Minahalayak weꞌ de laꞌi aka-aka mahāpin saguwaꞌ si meꞌ Yahudi hadja.
[20] Meꞌ tindeg si Isa sinduwehin, meꞌ aꞌa amban Kiprus duk Kirene, hap pī siye inin si Antiyok, duk minahalayak isab weꞌ de si meꞌ aꞌa dumaꞌin Yahudi aka-aka mahāp sabab si Isa, Panuhutanin.
[21] Laꞌi si siye balakat Tuhanin duk ekka teꞌed aꞌa Antiyok kahagad duk nuhut ne pu si Isa, Panuhutanin.
[22] Takale weꞌ meꞌ masandel pu si Isa si Awrusalamin sabab inin, hangkan dinaꞌak weꞌ de Barnabas pī si Antiyok.
[23] Pagtekka Barnabas laꞌi, takitene meꞌ hininang Tuhan si meꞌ aꞌahin sabab lasane duk aseꞌne si siyehin. Hangkan kēgan iye duk tinoloꞌan siye weꞌ ne weꞌ subey siye pateteg pu si Isa, Panuhutanin, ateyden dambūs-būs.
[24] Si Barnabas inin, aꞌa hāp addatnen. Pagbayaꞌan iye weꞌ Niyawa Sutsihin duk basag teꞌed sandelnen. Ekka aꞌa si Antiyok taboꞌo weꞌ ne sandel pu si Isa, Panuhutanin.
[25] Manjari si Barnabas inin hap pī si lahat Tarsus miha si Saul.
[26] Pagkasuwaꞌne iye, binoꞌo iye weꞌ ne balik hap Antiyok. Niyaꞌ siye dan tahun laꞌi duwangan patennaꞌ si meꞌ masandel pu si Isa si Antiyokin duk magusihat siye si meꞌ aꞌa banes teꞌed. Laꞌi hep si Antiyok miyaꞌan tagnaꞌ inēnan meꞌ tindeg si Isahin, meꞌ aꞌa Almasi.
[27] Masa miyaꞌan, niyaꞌ meꞌ aꞌa magpalataꞌ bissā Tuhanin padurul amban Awrusalam hap Antiyok.
[28] Dangan siye inēnan Agabus, nengge magpaꞌal pinanoloꞌan weꞌ Niyawa Tuhanin. Paꞌin Agabus, “Niyaꞌ unus sōng tekka si kēmon kalahat-lahatan.” (Tekka unus inin masa Sultan Kalaudi, sultan nakuraꞌin.)
[29] Hangkan meꞌ tindeg si Isa si Antiyokin magsakap weꞌ magpaboꞌo siye dangan-dangan tamanan tapanabangden pī si meꞌ pagkaside tindeg si Isa si lahat Yahudiyahin.
[30] Na, iye inin hininang meꞌ katindegan si Isa laꞌi si Antiyokin. Magpaboꞌo siye pilak pu si Barnabas duk si Saul pī si meꞌ kabahiꞌan meꞌ masandel laꞌi si Awrusalamin.