[1] Paꞌin Agarippa pu si Paul, “Makajari ne kew missā para si dinu.” Manjari magsinyas si Paul peggeꞌ sōng ne iye missā. Duk missā ne iye mēbbegan dine.
[2] “Tuwan Agarippa,” paꞌinne, “kēgan ku teꞌed peggeꞌ ellew inin kapamissāku bēbbegku si diku tuꞌu si panaꞌanannu, sabab meꞌ palkalaꞌ panuntutan meꞌ Yahudi akuhin.
[3] Pasōng teꞌed ku kēgan peggeꞌ kataꞌuhannu du meꞌ addat meꞌ Yahudihin duk meꞌ luwal pagsaggaꞌanden. Hangkan pakimaꞌapanku si kaꞌu, pakalehun ku. Daꞌa kew hadja jumuꞌ.
[4] “Kēmon meꞌ Yahudihin, kataꞌuhande du hatulankun kemuwe mākanak ku dem lahatku duk laꞌi isab si Awrusalam.
[5] Tiggel ne pangataꞌude hatulankun duk bang asal mabayaꞌ siye, kasaksiꞌande weꞌ kemuwe tagnaꞌley, hatulankun hatulan dambuwaꞌ Pariseo. Gaꞌ niyaꞌ makasaliꞌ si meꞌ Pariseohin bang panuhutde si saraꞌ āgama Yahudihin.
[6] Na kuweꞌitu,” paꞌin si Paul, “tiyaꞌ ku tuꞌu hinukum sabab pangase-ngaseku weꞌ tumanan Tuhanin du janjiꞌne si meꞌ kapapuꞌan kamihin.
[7] Iye du isab inin inase-ase meꞌ bangsa kami Yahudi sampūꞌ duk duwehin, hangkan nambahayang teꞌed siye si Tuhan ellew-sangem. Saguwaꞌ sabab pangase-ngaseku inin, Tuwan, tiyaꞌ ku tinuntutan weꞌ meꞌ pagkasiku Yahudihin.
[8] Weꞌey teꞌ kaꞌam kahunitan kahagad weꞌ pakellum Tuhanin du balik meꞌ pateyin?
[9] “Bisan aku matuꞌuhin kuweꞌ siyehin du isab. Kannalku weꞌ subey ku teꞌed maggeꞌes ngahinang sasuku kuntara si meꞌ manuhut si Isahin, aꞌa Nasaretin.
[10] Duk iye miyaꞌan hininangkun laꞌi si Awrusalam tagnaꞌ. Kaꞌurungan ku kapatut weꞌ meꞌ nakuraꞌ meꞌ imamin, hangkan ekka meꞌ aꞌa masandel pu si Isahin kinalabusu weꞌ ku. Duk padūsku isab paghinukum siye hukuman kamatey.
[11] Daran papeddiꞌanku meꞌ masandel pu si Isahin dem meꞌ kalanggal-langgalan supaya lebbahande pakahagadde pu si Isahin. Duk hawal peddiꞌ ateyku si siyehin, tinurul-turul siye weꞌ ku bisan si meꞌ kalahatan seddili supaya siye tabinasaku.”
[12] “Iye hep miyaꞌan akakun,” paꞌin si Paul, “hangkan ku hap pī si Damaskus pagubus ku kaꞌurungan kapatut duk meꞌ daꞌakan weꞌ meꞌ nakuraꞌ meꞌ imamin.
[13] Manjari sābuku si lān, Tuwan, lettu ellew ne miyaꞌan, niyaꞌ takiteku sahaya amban diyataꞌ langit sinag pe amban ellew. Ninag dantaꞌ miyaꞌan pī si aku duk meꞌ saweꞌku maglengnganin.
[14] Hebbaꞌ kami kēmon diyataꞌ bulak. Manjari niyaꞌ suwala takaleku missā si aku si bissāhan Hibrani. Paꞌin suwalahin, ‘O Saul, Saul. Weꞌey ku binasanu? Kaꞌu hadja kahunitanin bang saggaꞌnu ku.’
[15] ‘Sine kew, Tuwan?’ paꞌinku. Paꞌinne, ‘Si Isa ku. Aku hep bininasanun.
[16] Saguwaꞌ kuwat kew nengge,’ paꞌinne. ‘Hangkan ku paguwaꞌ si kaꞌu, peggeꞌ tapeneꞌte kew hinang daraꞌakanku. Subey kew magaka si meꞌ aꞌa sabab pangitenu aku ellew inin duk sabab niyaꞌ pe pakitehanku si kaꞌu si pasōngan.
[17] Timbulte du kew bang kew bininasa weꞌ meꞌ pagkasinu Yahudi atawa meꞌ kabangsahan dumaꞌin Yahudi sōng pamapīhanku kaꞌuhin.
[18] Daꞌakte kew pī dalil makellat meꞌ mataden supaya talinda siye amban lindem pī si dantaꞌ, amban antanan nakuraꞌ seyitanin pī si antanan Tuhanin, duk supaya isab taꞌampun meꞌ duseden bang sandel siye si aku,’ paꞌin si Isa, ‘duk sumakup du siye si meꞌ aꞌa tapeneꞌ Tuhanin.’ ”
[19] “Hangkan hep, Tuwan,” paꞌin si Paul, “asal tinuhut weꞌ ku bakas pinabagala si aku amban surgaꞌ miyaꞌan.
[20] Manjari magusihat ne ku tinagnaꞌan laꞌi si Damaskus, ubus si Awrusalam, ubus bu laꞌi isab si meꞌ kalahat-lahatan si Yahudiya duk sampay si meꞌ aꞌa dumaꞌin Yahudihin. Magusihat ku si siye kēmon weꞌ subey pagsusunande duk lebbahande ne meꞌ duseden duk subey ne siye nuhut Tuhanin. Duk subey isab pakitehande si meꞌ hinanganden weꞌ asal pinda ne ateyden.
[21] Iye hep inin sababnen hangkan ku siggew meꞌ Yahudihin laꞌi si langgal hadje duk sōng ku papateyde.
[22] Saguwaꞌ tinabangan ku weꞌ Tuhanin sampay kuweꞌitu,” paꞌin si Paul, “hangkan tiyaꞌ ku nengge tuꞌu magaka-aka si kēmon aꞌa, si meꞌ mabangsahanin duk si meꞌ madiyawaꞌ bangsanen saliꞌ-saliꞌ. Gaꞌ niyaꞌ akaku palabi amban binissā meꞌ kanabihan awwalley duk binissā si Musa sabab maꞌumantag si pasōnganin.
[23] Paꞌinde hep weꞌ Almasihin subey nandalan kabinasahan duk matey. Duk Almasihin dehellu pinakellum amban meꞌ pateyin, duk urunganne dantaꞌ pikilan meꞌ Yahudihin duk meꞌ bangsa dumaꞌin Yahudihin. Hātinen palataꞌne si siye weꞌ makajari ne siye timbul.”
[24] Sasang si Paul missā sa miyaꞌan mēbbegan dine, ginasudan iye weꞌ si Pestus, paꞌinne, “Paul, binalew ne kew. Lumanduꞌ kataꞌunun duk iyan makabalew kaꞌuhin.”
[25] Nambung si Paul, paꞌinne, “Tuwan Pestus, gaꞌ ku ituꞌ binalew. Meꞌ bissākun bennal duk tewwaꞌ.
[26] Tahāti sultanin du meꞌ bissāku inin,” paꞌin si Paul. “Hangkan ku makatawakkal missā si iye, peggeꞌ tabugtuꞌku weꞌ kataꞌuhanne du kēmon bakas maꞌumantagin. Asal du meꞌ maꞌumantag inin dumaꞌin tinapuk.
[27] Sultan Agarippa,” paꞌin si Paul. “Kahagadnu ke bissā meꞌ kanabihanin? Kataꞌuhanku weꞌ kahagadnu.”
[28] Paꞌin Agarippa pu si Paul, “Tapikilnu hatu weꞌ kahumatannu ku dayiꞌ-dayiꞌ nuhut Almasi.”
[29] “Dayiꞌ-dayiꞌ ne ke atawa tiggel,” paꞌin si Paul, “iye pināku-pākuku si Tuhanin, weꞌ dumaꞌin hadja kaꞌu, Tuwan, saguwaꞌ kēmon meꞌ mapakale si aku ellew inin, bang du pasaliꞌ si aku nuhut Almasi, gaꞌi hadja isab pasaliꞌ iningketan.”
[30] Manjari kuwat sultanin duk gubnulin duk si Bernike duk kēmon saweꞌde magtingkoloꞌin.
[31] Pagtahalaꞌ ne siye billaꞌi, magbissā-bissā siye, paꞌinde, “Aꞌa miyaꞌan gaꞌ niyaꞌ tahinangne pataꞌ pamapateyan iye atawa pangalabusuhan iye.”
[32] Paꞌin Agarippa pu si Pestus, “Makajari siꞌ aꞌa miyaꞌan pinaluwas bang gaꞌ iye magpaꞌin weꞌ mabayaꞌ iye hinukum weꞌ Sultan Nakuraꞌin.”