[1] Masa miyaꞌan, tinagnaꞌan ne weꞌ Sultan Herod bininasa meꞌ masandel pu si Isa sinduwehin.
[2] Dinaꞌak weꞌ ne pinunggelan si Yakub, pungtinaꞌi Yahiyahin.
[3] Duk pagkitene weꞌ kasulutan meꞌ Yahudihin si hininangne miyaꞌan, dinaꞌak isab weꞌ ne siniggew si Petros. Masa paniggew si Petros īꞌ, baytu kādjaꞌan meꞌ Yahudi pamangande pan gaꞌi sinagetan pasuligin.
[4] Pagubus si Petros siniggew, dinaꞌak iye kinalabusu weꞌ sultanin. Ampat tumpuk sundalu dinaꞌakne ngangguwaldiyahan si Petrosin, ampat-ampat da tumpuk. Sakap si Herodin weꞌ puwas hadja kādjaꞌan meꞌ Yahudi miyaꞌan, boꞌone si Petros paluwas pī si meꞌ aꞌahin hinukum.
[5] Hangkan laꞌi dahuꞌ si Petros tahan dem kalabusu saguwaꞌ meꞌ masandel pu si Isahin māku-māku teꞌed si Tuhan para si iye.
[6] Malam sōng pamoꞌo si Herod si Petros pī si meꞌ aꞌahin, tuli si Petros si ellet duwe guwaldiya. Kinarena iye duk duwe karena. Niyaꞌ isab meꞌ guwaldiya laꞌi si bukut manteyan tarangka kalabusuhin.
[7] Manjari inin, bessuwang niyaꞌ dambuwaꞌ malaꞌikat Tuhanin nengge laꞌi si bihing si Petros duk dantaꞌ dem kalabusuhin. Jinedjeg weꞌ malaꞌikatin si Petros si bahane duk binangun weꞌ ne. “Dongaꞌ kew padayiꞌ,” paꞌin malaꞌikatin. Magtawus duddag meꞌ karenahin amban meꞌ tangan si Petros.
[8] Paꞌin malaꞌikatin si iye, “Magkuwero kew duk magtehompaꞌ kew.” Magkuwero ne si Petros duk magtehompaꞌ ne iye. Ubus paꞌin malaꞌikatin, “Asekun jaketnun duk nuhut kew aku.”
[9] Manjari nuhut iye ne si Petros paluwas amban kalabusu. Saguwaꞌ gaꞌ kataꞌuhan si Petros bang toꞌo ke meꞌ hinangan malaꞌikat miyaꞌan atawa gaꞌi. Kannalne niyaꞌ hadja pabagala si iye.
[10] Paglumabey ne siye amban guwaldiya tagnaꞌin, ubus bu si kaduwenen, ujudnen tekka siye si tarangka basiꞌ paluwasan hap puweblo miyaꞌan. Lukahan dine tarangkahin duk paluwas ne siye. Lumengngan siye nuhut dambuwaꞌ kalsara manjari bessuwang lanyap malaꞌikatin.
[11] Paglanyap ne malaꞌikatin, bahu tasayu si Petros bakas talabeynen. Paꞌinne, “Asal bennal hatiꞌ inin. Pinapitu hatiꞌ weꞌ Tuhanin malaꞌikatnen maluwas aku amban antanan si Herod duk amban kēmon laꞌat inase-ase meꞌ Yahudi sōng maꞌumantag si akuhin.”
[12] Pagkataꞌuhan si Petros ne inin, hap pī iye si lumaꞌ si Mariyam, saꞌi Yahiya Markusin. Ekka meꞌ aꞌa laꞌi magtipun māku-māku si Tuhan.
[13] Tinuttuk weꞌ ne gawang si luwasanin. Niyaꞌ daraꞌakan dende inēnan si Roda pī nambag.
[14] Takilalene suwala si Petrosin. Kēgan teꞌed iye duk hawal kēgnen, gaꞌ dahuꞌ lukane gawangin saguwaꞌ magubas iye padiyalem ngakahan siye. Paꞌinne, “Īꞌ laꞌi si Petros nengge si luwasan.”
[15] “Hatu kew iyan magkanap-kanap,” paꞌinde pu si Roda. Saguwaꞌ luwal balik-balikne weꞌ asal toꞌo īꞌ laꞌi si Petros. Manjari paꞌinde, “Malaꞌikatnen īꞌ.”
[16] Saguwaꞌ gaꞌ pahali si Petros nuttuk. Ujudnen ilukahan ne weꞌ de gawangin. Pagkitede si Petros, asal ulaliꞌ teꞌed siye.
[17] Magsinyas si Petros duk tanganne, gaꞌi siye dinaꞌak magbukag. Manjari inakahan siye weꞌ ne bang saꞌingge pamaluwas Tuhan iye amban kalabusuhin. Paꞌin si Petros, “Akahanun bi saꞌ si Yakub duk meꞌ pagkasite bi masandel pu si Isa sinduwehin sabab inin.” Manjari tahalaꞌ iye hap pī si lugal seddili.
[18] Pagsalung ne, sasew teꞌed meꞌ guwaldiyahin. Ine enteꞌ maꞌumantag pu si Petrosin?
[19] Maguldin Sultan Herod dinaꞌak piniha teꞌed si Petros si meꞌ guwaldiyahin. Saguwaꞌ gaꞌ iye takasuwaꞌde. Manjari sinumariya siye weꞌ si Herod duk pagubus, dinaꞌak siye weꞌ ne pinapatey. Puwas miyaꞌan padurul Sultan Herod amban Yahudiya hap Kesarea duk laꞌi dahuꞌ iye patennaꞌ.
[20] Masa miyaꞌan astel hep teꞌed Sultan Herod si meꞌ aꞌa si lahat Tirosin duk si meꞌ aꞌa si lahat Sidonin. Manjari pī meꞌ aꞌa duwe lahatan miyaꞌan magtuhut mayaman si Herod. Binagay dahuꞌ weꞌ de Balastus, dambuwaꞌ meꞌ pangandelan dem astanaꞌ sultanin, supaya siye bēbbeganne. Manjari hap pī ne siye pu si Herod moꞌo iye maghāp, peggeꞌ amban lahat sultanin hep pangeddoꞌande kinakanden.
[21] Manjari inin, pagtekka ellew pangeddew si Herod pamissāne si meꞌ aꞌahin, inasek weꞌ ne semmekne mahāpin duk ningkoloꞌ iye diyataꞌ siya pagsultanannen. Manjari pinaluwas weꞌ ne bissānen si meꞌ aꞌahin.
[22] Magellang-ellang meꞌ aꞌahin, paꞌinde, “Dumaꞌin ne manusiyaꞌ mamissā iyan, saguwaꞌ dambuwaꞌ iye tuhan.”
[23] Magtawus si Herod pinasaki weꞌ malaꞌikat Tuhanin peggeꞌ tinayimaꞌ weꞌ ne sanglit meꞌ aꞌahin bu gaꞌ sanglitanne Tuhanin. Manjari kinaleg iye sampay tibuꞌukan barannen duk matey iye.
[24] Saguwaꞌ lapal Tuhanin pasōng ne paꞌin palatag duk pasōng magkaꞌekka meꞌ aꞌa masandel pu si Isahin.
[25] Peggeꞌ ubus ne tahinang disi Barnabas duk si Saul akade laꞌi si Awrusalamin, balik ne siye hap Antiyok. Binoꞌo weꞌ de Yahiya Markus.