[1] Puwas miyaꞌan, tahalaꞌ si Paul amban Aten hap pī si puweblo Korinto.
[2] Laꞌi magkasuwaꞌ siye duk dambuwaꞌ Yahudi inēnan Akila, inanakan si lahat Pontus. Baꞌahu du tekka Akila miyaꞌan si Korinto amban lahat Italiya magtuhut duk andanen Pirisila. Tahalaꞌ siye amban Italiya peggeꞌ dinaꞌak hep weꞌ Sultan Kalaudi tahalaꞌ kēmon Yahudihin amban Roma, puweblo hadje laꞌi si Italiya. Manjari hap pī si Paul nindew disi Akila.
[3] Peggeꞌ saliꞌ kaꞌellumanden maghinang-hinang tolda, patennaꞌ ne si Paul laꞌi si siye duk patabang iye si hinangden.
[4] Kahabaꞌ ellew Sabtuꞌ, pī si Paul si langgal Yahudi magsuꞌal duk meꞌ aꞌa malaꞌihin. Tuyuꞌanne ngahumatan meꞌ Yahudihin duk meꞌ Girikin weꞌ toꞌo teꞌed meꞌ panoloꞌnen.
[5] Pagtekka si Silas duk Timoteo amban Makedoniya, iye hadja hinang si Paulin magmahalayak lapal Tuhanin si meꞌ Yahudihin. Pinapastiꞌ weꞌ ne si siye weꞌ si Isa asal Almasihin ne, tapeneꞌ Tuhan magbayaꞌin.
[6] Saguwaꞌ sinagda iye weꞌ de duk binissā-bissāhan pe. Hangkan ileppugan weꞌ si Paul semmeknen, tandaꞌ weꞌ papuwas ne iye amban siye. Paꞌinne si siye, “Bang kaꞌam magmula dem narkaꞌ, dumaꞌin ne amban aku. Tinagnaꞌan kuweꞌitu, papinda ne ku magmahalayak pī si meꞌ aꞌa bangsa seddilihin.”
[7] Hangkan tahalaꞌ ne si Paul amban meꞌ Yahudihin. Pī iye patennaꞌ si lumaꞌ aꞌa bangsa seddili, ēnnen si Titus Justus. Aꞌa inin nambahayang si Tuhan. Lumaꞌnen magtapit du duk langgal Yahudi.
[8] Nakuraꞌ langgal miyaꞌan inēnan si Kirispus. Iye duk meꞌ saweꞌne dambuwaꞌ lumaꞌin sandel pu si Isa, Panuhutanin. Ekka isab meꞌ aꞌa si Korinto miyaꞌan makakale lapalin duk sandel ne pu si Isa duk pinandi siye, tandaꞌ weꞌ sukuꞌ pu si Isa ne siye.
[9] Dambuwaꞌ sangem niyaꞌ pabagala pu si Paul, duk takalene Panuhutanin, si Isa, missā si iye. Paꞌin Panuhutanin, “Daꞌa kew talew missā saguwaꞌ magmahalayak ne kew paꞌin. Daꞌa kew padeheng.
[10] Peggeꞌ luꞌu du ku nuhut-nuhutan kaꞌu,” paꞌinne. “Gaꞌ niyaꞌ makabinasa kaꞌu peggeꞌ ekka meꞌ aꞌaku tuꞌu si lahat inin.”
[11] Hangkan si Paul patennaꞌ pe laꞌi dan tahun duk tengaꞌ. Magtoloꞌ ne paꞌin iye lapal Tuhanin si meꞌ aꞌa malaꞌihin.
[12] Manjari inin, sakaliꞌ ne si Galliyo gubnul si lahat Akayahin, magtuhut meꞌ Yahudihin pī niggew si Paul. Binoꞌo iye weꞌ de pī si gubnulin tinuntutan.
[13] Paꞌinde, “Aꞌa inin sinegeꞌ weꞌ ne meꞌ aꞌahin magsambahayang si Tuhan, saguwaꞌ pagsambahayangden kuntara si saraꞌte bi.”
[14] Arak ne si Paul missā saguwaꞌ missā ne Gubnul Galliyo si meꞌ Yahudihin. Paꞌinne, “Bang palkalaꞌ inin sabab hinangan laꞌatan atawa hinangan gaꞌi bentel, pataꞌ kaꞌam pakaleku.
[15] Saguwaꞌ peggeꞌ iye pagjawabanbin sabab meꞌ bissā duk sabab meꞌ ēn aꞌa duk sabab saraꞌ āgamabin, maghatulan kaꞌam dibi. Gaꞌi ku bayaꞌ maghatul meꞌ palkalaꞌ sa inin.”
[16] Duk pinatahalaꞌ siye weꞌ ne amban bilik paghukum-hukuman miyaꞌan.
[17] Manjari siniggew weꞌ meꞌ aꞌahin si Sostenes, nakuraꞌ langgal Yahudihin, duk pinapeddiꞌan weꞌ de laꞌi si harapan lumaꞌ paghukum-hukumanin. Saguwaꞌ gaꞌ hinang ine weꞌ Gubnul Galliyo.
[18] Si Paul patennaꞌ pe laꞌi si Korinto tiggel-tiggel, ubus bu maꞌid ne iye amban meꞌ pagkasine tindeg si Isa malaꞌihin. Patulak iye hap Siriya magtuhut duk Pirisila duk Akila. Gaꞌ pe siye patulak, magkeke dahuꞌ si Paul laꞌi si Kenkerea, panumanne niyaꞌ da bayuꞌ janjiꞌne si Tuhan.
[19] Pagtekkade si Epesus, paꞌamban ne si Akila duk Pirisila laꞌi maglahat. Saguwaꞌ si Paul padeheng hadja. Hap pī si Paul si langgal Yahudi duk magsuꞌal iye laꞌi duk meꞌ Yahudihin.
[20] Inohotan iye weꞌ de dinaꞌak patiggel-tiggel dahuꞌ laꞌi, saguwaꞌ gaꞌ iye ngatu.
[21] Paꞌinne si siye sōng patahalaꞌnen, “Bang amban kabayaꞌan Tuhan du, balik du ku pitu si kaꞌam.” Ubus patulak ne iye amban Epesus.
[22] Pagtekka si Paul si Kesarea, pataked iye hap Awrusalam nindew meꞌ aꞌa malaꞌi masandel pu si Isahin. Ubus bu pī iye hap Antiyok.
[23] Paglaꞌi iye si Antiyok bang piyem bahangi, tahalaꞌ iye duk ilatag weꞌ ne meꞌ kalahat-lahatan si Galatiya duk Pirigiyahin, duk inasig weꞌ ne atey meꞌ katindegan si Isa si meꞌ lahat īꞌen.
[24] Masa miyaꞌan, niyaꞌ tekka laꞌi si Epesus dambuwaꞌ Yahudi inēnan Apollos. Inanakan iye laꞌi si lahat Iskandal. Pandey teꞌed iye missā-missā duk lalem pangadjiꞌnen si kitab.
[25] Bakas iye katoloꞌan sabab toloꞌ si Isa, Panuhutanin. Missā iye pinateꞌed-teꞌed duk tumuꞌun pagusihatne sabab si Isahin. Saguwaꞌ iye hadja kataꞌuhannen pandi panoloꞌ si Yahiyahin.
[26] Magusihat iye dem langgal meꞌ Yahudihin duk gaꞌ niyaꞌ talew-talewne missā si meꞌ aꞌahin. Pagtakale iye weꞌ Pirisila duk Akila, binoꞌo iye weꞌ de hap lumaꞌde duk pinahātihan iye namba weꞌ de sabab toloꞌ Tuhanin.
[27] Manjari magsakap si Apollos pī si lahat Akaya. Tinabangan iye weꞌ meꞌ masandel pu si Isa si Epesusin, duk maboꞌo siye sulat pī si meꞌ masandel pu si Isa si lahat Akayahin, dinaꞌak Apollos hinatul si siye. Pagtekka Apollos laꞌi, tinabangan teꞌed weꞌ ne meꞌ aꞌa masandelin. Sandel ne siye sabab lasa Tuhan si siyehin.
[28] Tinabangan siye weꞌ ne peggeꞌ tadaꞌag hep weꞌ ne magsuꞌal meꞌ Yahudihin si kaꞌekkahan aꞌa. Peggeꞌ basag teꞌed meꞌ pureba pinaguwaꞌne amban kitabin weꞌ si Isa iye Almasihin, pineneꞌ Tuhan magbayaꞌin.