[1] Inta taʼarif al-wakit al-talda foogah al-khazaal walla ? Wa inta chift tees al-hajar wakit yalda walla ?
[2] Wa taʼarif tahsib chuhuur waaluudithum wa l-wakit al-yaldo foogah walla ?
[3] Humman yaburku wa yaldo iyaalhum wa khalaas, yinjammo min wajaʼ al-waaluuda.
[4] Wa iyaalhum yakburu wa yabgo chudaad wa yibaʼʼudu min ammahaathum wa battaan ma yigabbulu.
[5] Yaatu anta al-hurriiye le humaar al-kadaade ? Wa hal fi naadum halla rubaatah ?
[6] Hu bas al-ana sakkantah fi l-kadaade wa maskanah fi l-ard al-indaha mileh.
[7] Wa hu yichchammat le harakat al-madiina wa ma yidoor yasmaʼ hiss hana siid.
[8] Wa yuruukh fi raas al-jibaal le yartaʼ wa yifattich al-gechch al-akhdar.
[9] Al-jaamuus yikhassid yakhdim leek wa yaakul maʼa bahaaymak walla ?
[10] Wa tagdar tarbut leyah harraata // le yahrit leek walla ? Wa hu yukurr al-harraata waraak walla ?
[11] Wa inta titwakkal aleyah achaan gudurtah al-chadiide wa tikhalli leyah kulla khidimtak walla ?
[12] Hal hu yagdar yijiib leek intaajak wa yilimmah fi l-madagg walla ?
[13] Janaahe al-naʼaam yilmattato // be suhuula wa laakin ma indah riich wa la suuf abunkhanam.
[14] Al-naʼaamaay talda beedha wa tikhalliih fi l-turaab wa hamu al-turaab yifaggiʼah.
[15] Hi tansa kadar rijil insaan tikassirah aw rijil haywaan tafjakhah.
[16] Hi jafiiye le iyaalha misil ma hineeha wa ma lammaaha kan taʼabha yamchi fi l-riih saakit kula.
[17] Achaan al-Rabb ma antaaha hikma wa hi ma ligat gisimha // hana l-maʼrafa.
[18] Wa laakin wakit hi tugumm wa tajri, tichchammat le l-juwaad wa siidah.
[19] Ya Ayyuub, inta tagdar tanti al-gudra // le l-juwaad wa tikhatti ragabatah be safiife walla ?
[20] Tinattitah misil jaraad walla ? La ! Hanhiniinah al-chadiid bikhawwif.
[21] Wa fi l-waadi, hu yudugg rijileenah. Hu farhaan be gudurtah, yamrug giddaam al-adu.
[22] Yichchammat le l-khoof // wa ma yinbahit wa ma yiʼarrid min al-duwaas.
[23] Foogah tinsamiʼ harakat al-kaloota wa l-harba al-tiraari wa l-tabiig.
[24] Al-juwaad yinattit min chiddit niiytah le l-jari wa ma yagdar yasbur wakit yasmaʼ al-buug.
[25] Ayyi wakit al-buug yadrub, hu yihanhin wa yuguul : «Aywa !» Min baʼiid, hu yuchumm al-harib wa yasmaʼ huraaj al-kubaaraat // wa korooraak al-harib.
[26] Hal be sabab irfitak inta bas, al-sagur yimidd janaaheeh wa yitiir ale l-junuub walla ?
[27] Hal be amrak inta bas, al-sagur yisawwi uchchah fi l-aʼaali walla ?
[28] Hu yaskun wa yunuum fi l-jibaal, aywa, fi bakaan gawi fi raas al-jibaal.
[29] Min al-bakaan da, yiraakhib fariistah wa min baʼiid, uyuunah yichiifuuha.
[30] Iyaalah yaakulu al-damm wa fi ayyi rimme, hu yinlagi.