[1] Wa khalaas, Ayyuub chaal al-kalaam wa gaal :
[2] Akiid, intu bas timassulu juduudna ! Wa l-hikma tumuut maʼaaku // wakit tumuutu.
[3] Laakin ana kula indi agul misilku intu wa ana kula ma naagis minku ! Yaatu ma indah maʼrafa misilku ?
[4] Ana bigiit madhaka le rufgaani hatta kan narja al-radd min al-Rabb. Aywa, bigiit madhaka, ana al-saalih wa l-tamaam !
[5] Al-murtaahiin yahguru al-taʼbaaniin wa da misil darbe fi rijil al-yittartaʼo !
[6] Wa khiyam al-mukharribiin gaaʼidiin be hudu wa l-naas al-yikhaddubu al-Rabb gaaʼidiin be amaan. Wa gudrithum bas ilaahhum.
[7] Wa laakin asʼal al-haywaanaat wa humman yiwassufuuk wa tuyuur al-sama yiʼooruuk.
[8] Hajji maʼa l-ard wa hi tiwassifak wa huut al-bahar yiballikhak.
[9] Yaatu minhum kulluhum ma yaʼarif kadar iid Allah sawwat al-cheyy da ?
[10] Wa fi iidah hu, nafas kulla l-hayyiin wa ruuh kulla l-makhluugiin.
[11] Buguulu : «Al-adaan tifassil al-kalaam misil al-lisaan yifarrig al-taʼaam.
[12] Fi l-cheeb, tinlagi al-hikma wa fi l-umur al-tawiil, yinlagi al-fihim.»
[13] Wa laakin al-hikma wa l-khuwwa wa l-kharaar wa l-ilim, kulluhum // min al-Rabb.
[14] Al-yihaddimah al-Rabb ma yinbani battaan wa l-naadum al-hu yasjinah, ma fi al-yatilgah.
[15] Wa kan hu yiwaggif al-almi, yaji al-yabaas wa kan yikhalli al-almi yusubb, yaakul al-ard.
[16] Al-gudra wa l-hikma hineeyah hu wa l-yiwaddir wa l-muwaddir kula // fi iidah hu.
[17] Hu yiwaddi al-mustachaariin bala niʼle wa yiwaddir raas al-gudiya.
[18] Hu yamrug kadmuul al-muluuk wa yihazzimhum be firaad.
[19] Hu yiwaddi rujaal al-diin bala niʼle wa yarmi al-gawiyiin.
[20] Hu yibarjil kalaam al-amiiniin wa yadrub agul al-aagliin.
[21] Hu yijiib al-hugra le l-masaaʼiil wa yarkhi hizaam al-kubaaraat.
[22] Hu yibayyin al-dalaam al-khariig wa yijiib al-dalaam al-haalik // fi l-nuur.
[23] Hu yikabbir al-umam wa yidammirhum wa yichattit al-chuʼuub wa yiwaddiihum fi l-khurba.
[24] Hu yibarjil uguul kubaaraat al-chuʼuub wa yikhalliihum yichittu fi l-sahara // bala derib.
[25] Humman yiddaggacho fi l-dalaam bala nuur aywa, hu yiwaddirhum misil al-sakkaara.