[1] Wa Ayyuub chaal al-kalaam wa gaal :
[2] Al-yoom, ana muʼaarid le l-Rabb wa nitaabiʼ fi chakwiti. Wa iidi tagiile foogi wa laakin ma tagdar tiwaggif ganiiti.
[3] Yaareet ! Kan naʼarif bakaan nalgaah wa kan nagdar nawsal // fi bakaan maskanah,
[4] khalaas nagdar niwassif leyah // kadar ana bari wa namla khachmi be l-hujaj.
[5] Wa be da, naʼarif al-kalaam al-yuruddah leyi wa nagdar nafham al-yuguulah.
[6] Hal yihaakimni be kulla gudurtah walla ? La ! Yasmaʼni.
[7] Wa hu yaʼarif kadar ana khasiimah, saalih. Wa hu al-yichaariʼni, fi l-nihaaya yibarriini.
[8] Wa laakin kan ana macheet ale l-sabaah, hu ma fiih wa fi l-kharib, ana ma nichiifah.
[9] Kan hu machkhuul fi l-munchaakh, ma nichiifah wa wakit hu yinlafit wati, ma nichiifah.
[10] Wa laakin le derbi ana, hu yaʼarfah. Wa kan kachafni, yalgaani saafi misil al-dahab.
[11] Rijli titaabiʼ khatwaatah wa ana hafadt derbah, ma talagtah.
[12] Ana ma khalleet wasiiyaatah wa hafadt gawaaniinah ziyaada min al-akil al-fi khachmi.
[13] Wa kan hu bas kharrar, yaatu yagdar yifachchilah ? Aywa, al-hu yidoorah, yihaggigah.
[14] Hu yinaffiz al-hu kharrarah leyi misil kharaaraatah // al-aakhariin kula.
[15] Fi chaan da giddaamah hu, ana ninbahit wa kan fakkart foogah, narjif.
[16] Al-Rabb, hu al-waddar chajaaʼti wa l-Gaadir malaani be l-ruʼub.
[17] Wa da, ma dalaam al-sakkatni wa la sawaad al-khattaani.