[1] ᑖᐯᐧᐃᐧᐣ ᑳ ᐃᑌᐧᔮᐣ ᙭ ᐃᓯ, ᓇᒪᐃᐧᔭ ᐱᑯᓇᑕ ᓂᐟ ᐃᑖᐧᐣ, ᑳ ᑲᓈᑎᓯᐟ ᐊᐦᒑᕽ ᐁ ᐋᒋᒧᐟ ᓂ ᑭᐢᑫᔨᒥᓱᐃᐧᓂᕽ,
[2] ᒥᐢᑕᐦᐃ ᐱᑫᐧᔨᑕᒧᐃᐧᐣ ᒥᓇ ᐃᐧᓴᑭᑌᐁᐃᐧᐣ ᓂᐟ ᐋᔭᐣ,
[3] ᒋᑫᒫ ᓂ ᑲ ᓇᑕᐁᐧᔨᑌ ᓂᔭ ᑭᔮᑦ ᑭᑕ ᒪᒐᑭᒥᐟ ᙭ ᓂᒋᐋᐧᒪᐠ ᐅᐦᒋ, ᓂ ᐋᐧᑯᒫᑲᓇᐠ ᐃᐧᔮᓯᕽ ᐃᓯ:
[4] ᑳ ᐃᐢᕒᐁᐃᓬᐃᐃᐧᔨᓂᐃᐧᒋᐠ; ᑳ ᐊᔮᒋᐠ ᑖᐹᑯᒥᐁᐧᐃᐧᐣ, ᒥᓇ ᑭᐢᑌᔨᑖᑯᓯᐃᐧᐣ, ᒥᓇ ᑭᐢᑯᑕᒫᑯᐃᐧᓇ ᒥᓇ ᐅᔭᓱᐁᐧᐃᐧᐣ, ᒥᓇ ᐅᐟ ᐊᑐᐢᑳᑯᐃᐧᐣ ᑭᓭᒪᓂᑐ, ᒥᓇ ᐊᓱᑕᒫᑯᐃᐧᓇ;
[5] ᐃᐧᔭᐋᐧᐤ ᑯᔪᑖᐃᐧᒋᐠ, ᒥᓇ ᐃᐧᔭᐋᐧᐤ ᐃᑕ ᑳ ᐅᐦᒋᐟ ᙭ ᐃᐧᔮᓯᕽ ᐃᐧᔭ ᐃᓯ, ᐊᓇ ᑲᐦᑭᔭᐤ ᐊᐃᐧᔭ ᑳ ᑎᐯᔨᒫᐟ, ᑭᓭᒪᓂᑐ ᑳ ᑭᐢᑕᑭᒥᐦᐟ ᑳᑭᑫ. ᐋᒣᐣ.
[6] ᒫᑲ ᓇᒪᐃᐧᔭ ᑖᐱᐢᑯᐨ ᐅᐟ ᐃᑌᐧᐃᐧᐣ ᑭᓭᒪᓂᑐ ᐁᑳ ᓈᐣᑕᐤ ᐁ ᐃᑖᐸᑕᓂᔨᐠ. ᒋᑫᒪ ᓇᒪᐃᐧᔭ ᑲᐦᑭᔭᐤ ᐃᐢᕒᐁᐃᓬᐃᐃᐧᐊᐧᐠ ᐃᐢᕒᐁᐃᓬᐃᕽ ᑳ ᐅᐦᒋᒋᐠ:
[7] ᓇᒪᐃᐧᔭ ᒥᓇ, ᐁᑊᕒᐁᐋᒪ ᐁ ᓂᐦᑖᐃᐧᑭᐃᑯᒋᐠ, ᐁᑯᑕ ᐅᐦᒋ ᐅᐟ ᐊᐋᐧᓯᒥᓯᐤ: ᒫᑲ ᐋᐃᓴᐠ ᐁᑯᑕ ᑭᑕ ᐅᐦᒋ ᐃᐧᒋᑳᓱᐊᐧᐠ ᑭ ᓂᐦᑖᐃᐧᑭᐋᑲᓇᐠ.
[8] ᐁᐊᐧᑳᐧᓂᒪ, ᓇᒪᐃᐧᔭ ᐃᐧᔮᓯᕽ ᐅᐦᒋ ᑳ ᐅᐟ ᐊᐋᐧᓯᒥᓯᕽ ᑭᓭᒪᓂᑐ ᑳ ᐅᐟ ᐊᐋᐧᓯᒥᓯᐟ; ᒫᑲ ᐊᓂᑭ ᐊᓱᑕᒫᑫᐃᐧᐣ ᐅᐦᒋ ᐊᐋᐧᓯᓴᐠ ᐁᐊᐧᑯᓂᐠ ᑳ ᐃᑕᑭᒥᐦᒋᐠ ᑭᑕ ᓂᐦᑖᐃᐧᑭᐋᑲᓂᐃᐧᒋᐠ.
[9] ᒋᑫᒫ ᐁᐊᐧᑯ ᐅᒪ ᐊᓱᑕᒫᑫᐃᐧ ᐃᑌᐧᐃᐧᐣ, ᐅᒪ ᐃᑭᐦᑭ ᓂ ᑲ ᐯ ᐃᑐᐦᑖᐣ, ᐁᑯᓯ ᓭᕒᐊ ᑭᑕ ᐅᑯᓯᓯᐤ.
[10] ᓇᒪᐃᐧᔭ ᒫᑲ ᐁᑯᓯ ᐃᓯ ᐱᑯ; ᒫᑲ ᕒᐃᐯᑲ ᐃᐧᐢᑕ ᐁ ᐊᔮᐋᐧᐟ ᐊᐋᐧᓯᓴ ᐯᔭᐠ ᐅᐦᒋ ᑯᑖᐃᐧᓇᐊᐧ ᐅᑎ ᐋᐃᓴᑲ;
[11] ᒋᑫᒫ ᐊᐋᐧᓯᓴᐠ ᐁᑳ ᒉᐢᑲᐧ ᐁ ᓄᑯᓯᒋᐠ ᒥᓇ ᐁᑳ ᑫᑲᐧᐩ ᐁ ᑭ ᐃᑐᑕᐦᑭᐠ ᐁ ᒥᔮᐧᓯᓂᔨᐠ ᐊᐦᐳ ᐁ ᒫᔮᑕᓂᔨᐠ, ᐅᐟ ᐃᑕᐢᒋᑫᐃᐧᐣ ᑭᓭᒪᓂᑐ ᑭᑕ ᒪᐢᑲᐊᐧᐢᑌᔨᐠ ᐁ ᐃᓯ ᐅᑎᓂᐁᐧᐟ, ᓇᒪᐃᐧᔭ ᒫᑲ ᐊᑐᐢᑫᐃᐧᓇ ᐅᐦᒋ, ᒫᑲ ᐊᓂᐦᐃ ᐅᐦᒋ ᑳ ᓇᑐᒥᐁᐧᐟ,
[12] ᑭ ᐃᑖᐤ, ᐅᐢᑌᓯᒫᐤ, ᑭᑕ ᐊᑐᐢᑲᐁᐧᐤ ᐅᓯᒥᒫᐊᐧ.
[13] ᑖᐱᐢᑯᐨ ᒥᓇ ᑳ ᐃᑕᓯᓇᐦᐃᑳᑌᐠ, ᒉᑲᑊ ᓂ ᑭ ᓵᑭᐦᐋᐤ, ᒫᑲ ᐃᓵ ᓂ ᑭ ᐸᑳᐧᑖᐤ.
[14] ᑖᓂᓯ ᒫᑲ ᑫ ᐃᑌᐧᔭᕽ? ᒪᒋᐃᑎᐃᐧᐣ ᒋ ᑭᑭᐢᑳᐠ ᑭᓭᒪᓂᑐ? ᓇᒪᐃᐧᔭ ᑭᑕ ᑭ ᐃᐦᑭᐣ.
[15] ᒋᑫᒫ ᐃᑌᐤ ᒧᓯᓴ, ᓂ ᑲ ᑭᓭᐊᐧᑐᑕᐋᐧᐤ ᐊᓇ ᑳ ᐃᐧ ᑭᓭᐋᐧᑐᑕᐋᐧᐠ, ᒥᓇ ᓂ ᑲ ᑭᑎᒫᑭᓇᐋᐧᐤ ᐊᓇ ᑳ ᐃᐧ ᑭᑎᒫᑭᓇᐊᐧᐠ.
[16] ᐁᑯᓯ ᒫᑲ ᓇᒪᐃᐧᔭ ᐊᓇ ᑳ ᐃᑌᔨᑕᕽ ᐅᐦᒋ, ᓇᒪᐃᐧᔭ ᒥᓇ ᐊᓇ ᑳ ᐱᒥᐸᑖᐟ ᐅᐦᒋ, ᒫᑲ ᑭᓭᒪᓂᑐ ᑳ ᑭᓭᐋᐧᑎᓯᐟ.
[17] ᒋᑫᒫ ᑭᐦᒋ ᒪᓯᓇᐦᐃᑫᐃᐧᐣ ᐃᑎᐠ ᐯᕒᐅ, ᐁᐊᐧᑯᒪ ᐅᐦᒋ ᑳ ᑭ ᐊᐧᓂᐢᑳᓂᑖᐣ, ᑭᑕ ᐋᐧᐸᐦᑕᐦᐃᐁᐧᔮᐣ ᑭᔭ ᐅᐦᒋ ᓂ ᒪᐢᑲᐃᐧᓯᐃᐧᐣ, ᒥᓇ ᓂ ᐃᐧᔪᐃᐧᐣ ᑭᑕ ᑭᐢᑫᔨᑖᑯᑖᕽ ᒥᓯᐁᐧᐢᑲᒥᐠ.
[18] ᐁᑯᓯ ᒫᑲ ᑭᓭᐋᐧᑐᑕᐁᐧᐤ ᐊᓂᐦᐃ ᑳ ᐃᑌᔨᑕᕽ, ᒥᓇ ᐊᓂᐦᐃ ᑳ ᐃᑌᔨᑕᕽ ᒪᐢᑲᐃᐧᐁᐤ.
[19] ᑭ ᑲ ᐃᓯᐣ ᒫᑲ, ᑖᓀᑭ ᑫᔮᐱᐨ ᑳ ᐋᓀᐧᔨᒥᐁᐧᐟ? ᒋᑫᒫ ᐊᐁᐧᓂᐃ ᑳ ᓇᑳᐢᑲᒥᔨᐟ ᐅᐟ ᐃᑌᔨᑕᒧᐃᐧᐣ?
[20] ᓇᒪᐃᐧᔭ ᐁᑯᓯ, ᑭᔭ ᐊᔨᓯᔨᓂᐤ, ᐊᐁᐧᓇ ᑭᔭ ᑳ ᓇᓈᐢᑫᐧᐊᐧᓯᐊᐟ ᑭᓭᒪᓂᑐ? ᐊᓂᒪ ᑳ ᑭ ᐅᓯᒋᑳᑌᐠ ᑭᑕ ᐃᑌᐤ ᒋ ᐊᓂᐦᐃ ᑳ ᑭ ᐅᓯᐃᑯᐟ, ᑖᓀᑭ ᐅᒪ ᑳ ᑭ ᐃᓯᐃᔭᐣ?
[21] ᐊᐦᐳ ᓇᒪ ᒋ ᐅᒥᑭᓯᔮᑲᓂᑫᐤ ᑎᐯᔨᑕᑦ ᐊᓂᒪ ᐊᓯᐢᑭ, ᐁ ᐯᔭᑲᐧᕽ ᐋᐧᐃᐧᔦᓂᑲᐣ ᐸᐦᑭ ᑭᑕ ᐅᐦᒋ ᐅᓯᑖᐟ ᐊᓯᐊᐧᒋᑲᐣ ᑭᑕ ᑭᐢᑖᐸᑕᕽ, ᐁᑯᓯ ᐸᐦᑭ ᑯᑕᐠ ᐁᑳ ᐁ ᑭᐢᑖᐸᑕᕽ?
[22] ᑖᓂᓯ ᑭᐢᐱᐣ ᑭᓭᒪᓂᑐ, ᐁ ᐃᐧ ᐋᐧᐸᐦᑕᐦᐃᐁᐧᐟ ᐅ ᑭᓯᐋᐧᓯᐃᐧᐣ, ᐁᑯᓯ ᐅ ᒪᐢᑲᐃᐧᓯᐃᐧᐣ ᑭᑕ ᑭᐢᑫᔨᑖᑲᐧᓂᔨᐠ, ᑭ ᐃᔨᓇᒪᐁᐧᐤ ᒥᐢᑕᐦᐃ ᓯᐯᔨᑕᒧᐃᐧᓂᕽ ᑭᓯᐋᐧᓯᐃᐧ ᐊᓯᐊᐧᒋᑲᓇ ᓂᓯᐊᐧᓈᒋᐦᐅᐃᐧᓂᕽ ᐁ ᐃᑕᑭᑌᑭ:
[23] ᐁᑯᓯ ᒥᓇ ᑭᑕ ᑭᐢᑫᔨᑕᒧᐃᐁᐧᐟ ᐁ ᐃᓯ ᐁᐧᔪᑕᓂᔨᐠ ᐅ ᑭᐢᑌᔨᑖᑯᓯᐃᐧᐣ ᑭᓭᐋᐧᑎᓯᐃᐧᓂ ᐊᓯᐊᐧᒋᑲᓇ, ᑲᔮᐢ ᐅᐦᒋ ᑳ ᑭ ᐊᐧᐁᐧᔨᐋᐟ ᑭᐢᑌᔨᑖᑯᓯᐃᐧᓂᕽ,
[24] ᑭᔮᓇᐤ ᐅᑎ, ᐊᓯᒋ ᑳ ᑭ ᓇᑐᒥᑯᔭᕽ, ᓇᒪᐃᐧᔭ ᐱᑯ ᒍᐊᐧᐠ ᐅᐦᒋ, ᒫᑲ ᒥᓇ ᒉᐣᑕᐃᓬᐊᐠ ᐅᐦᒋ?
[25] ᑳ ᐃᑌᐧᐟ ᒥᓇ ᐦᐋᓯᔭ ᐅ ᒪᓯᓇᐦᐃᑲᓂᕽ, ᓂᐟ ᐃᔨᓂᒪᐠ ᓂ ᑲ ᐃᓯᔨᐦᑳᑖᐊᐧᐠ, ᐁᑳ ᑳ ᑭ ᐅᐟ ᐃᔨᓂᒥᔮᐣ; ᒥᓇ ᐅ ᓵᑭᐋᑲᓇ ᐁᑳ ᑳ ᑭ ᓵᑭᐃᐦᒋᐠ.
[26] ᑭᑕ ᐃᐦᑭᐣ ᒫᑲ, ᐃᑕ ᑳ ᑭ ᐃᑎᐦᒋᐠ, ᓇᒪᔦᐤ ᑭᔭᐋᐧᐤ ᓂᐟ ᐃᔨᓂᒪᐠ, ᐁᑯᑕ ᑫ ᐃᓯᔨᐦᑳᑎᒋᐠ ᐅᑯᓯᓴ ᑳ ᐱᒫᑎᓯᐟ ᑭᓭᒪᓂᑐ.
[27] ᐊᐩᓵᔭ ᒥᓇ ᑭ ᐃᑌᐧᐤ ᐃᐢᕒᐁᐃᓬᐊ ᐅᐦᒋ, ᑭᐢᐱᐣ ᐁᑕᓯᔨᑫᐧᓇ ᐅᐟ ᐊᐋᐧᓯᒥᓴ ᐃᐢᕒᐁᐃᓬ ᐁ ᐃᑕᑖᐧᐊᐧᑳᐠ ᔦᑲᐤ ᑭᐦᒋᑲᒥᕽ, ᑳ ᐃᐢᑯᒋᐠ ᐱᑯ ᑭᑕ ᐱᒫᒋᐦᐋᐊᐧᐠ:
[28] ᒋᑫᒫ ᑳ ᑎᐯᔨᐦᒋᑫᐟ ᑭᑕ ᑎᐱᑐᑕᑦ ᐅᐟ ᐃᑌᐧᐃᐧᐣ ᐊᐢᑭᕽ, ᐁ ᑭᓯᑖᐟ ᒥᓇ ᐁ ᒋᒫᓯᑖᐟ.
[29] ᐁᑯᓯ, ᑖᐱᐢᑯᐨ ᐊᐩᓵᔭ ᑲᔭᑌ ᑳ ᑭ ᐃᑌᐧᐟ, ᑭᐢᐱᐣ ᐁᑳ ᑳ ᑎᐯᔨᐦᒋᑫᐟ ᓵᐯᐋᑎᕽ ᑭ ᐃᐢᑯᓇᒫᑯᔭᕽ ᓂᐦᑖᐃᐧᑭᒋᑫᐃᐧᐣ, ᑭ ᑲ ᑭ ᐃᓯ ᐊᔮᑖᓇᐤ ᑖᐱᐢᑯᐨ ᓵᑕᑦ, ᒥᓇ ᑭ ᑲ ᑭ ᐃᓯᓈᑯᒋᑫᐃᑲᐃᐧᑖᓇᐤ ᑖᐱᐢᑯᐨ ᑲᒫᕒᐊ.
[30] ᑖᓂᓯ ᒫᑲ ᑫ ᐃᑌᐧᔭᕽ? ᐊᓂᑭ ᒉᐣᑕᐃᓬᐊᐠ, ᐁᑳ ᑳ ᑭ ᐱᒥᑎᓴᐦᐊᐦᑭᐠ ᑲᐧᔭᐢᑭᑖᑎᓯᐃᐧᐣ, ᑭ ᐅᑎᑕᒪᐧᐠ ᑲᐧᔭᐢᑭᑖᑎᓯᐃᐧᐣ, ᐊᓂᒪ ᐅᑎ ᑲᐧᔭᐢᑭᑖᑎᓯᐃᐧᐣ ᑖᐯᐧᔦᔨᑕᒧᐃᐧᓂᕽ ᑳ ᐅᐦᒋ ᐊᔮᐠ:
[31] ᒫᑲ ᐃᐢᕒᐁᐃᓬ, ᐁ ᐱᒥᑎᓴᐦᐊᐦᑭᐠ ᑲᐧᔭᐢᑭᑖᑎᓯᐃᐧᓂ ᐅᔭᓱᐁᐧᐃᐧᐣ, ᓇᒪᐃᐧᔭ ᐅᐦᒋ ᐅᑎᑕᒪᐧᐠ ᐁᐊᐧᑳᐧᓂᒪ ᐅᔭᓱᐁᐧᐃᐧᐣ.
[32] ᑖᓀᑭ? ᒋᑫᒫ ᑭ ᓇᑐᓇᒪᐧᐠ ᓇᒪᐃᐧᔭ ᑖᐯᐧᔦᔨᑕᒧᐃᐧᐣ ᐅᐦᒋ, ᒫᑲ ᑖᐱᐢᑯᐨ ᐊᑐᐢᑫᐃᐧᓇ ᐅᐦᒋ. ᒋᑫᒫ ᑭ ᐱᓱᑫᓯᓇᐧᐠ ᐊᓯᓂᕽ ᑳ ᓀᑳᒥ ᐱᓱᑫᓯᓄᐃᐁᐧᐟ;
[33] ᑖᐱᐢᑯᐨ ᑳ ᐃᑕᓯᓇᐦᐃᑳᑌᐠ, ᒫᑎᑲ, ᓄᔭᔮᐤ ᓵᔭᓂᕽ ᐱᓱᑫᓯᓄᐃᐧ ᐊᓯᓂ ᒥᓇ ᑭᐢᑖᐱᐢᐠ ᑫ ᓇᔦᑖᐁᐧᔨᒥᐦᐟ: ᒫᑲ ᐊᓇ ᑳ ᑖᐯᐧᑕᐋᐧᐟ ᓇᒪᐃᐧᔭ ᑭᑕ ᓇᓀᐯᐃᐧᐋᐤ.