[1] ᑫᑲᐧᐩ ᒫᑲ ᐊᔨᐋᐧᐠ ᐁᑖᐸᒋᐦᐃᑯᐟ ᑳ ᒍᐃᐃᐧᐟ? ᐊᐦᐳ ᑫᑲᐧᐩ ᐁᐧᑎᓯᐠ ᓴᕒᑲᑦᓴᐃᓯᐃᐧᐃᐧᐣ?
[2] ᒥᐢᑕᐦᐃ ᒥᓯᐁᐧ ᐃᓯ, ᓂᑲᐣ ᒫᑲ ᐁ ᑭ ᑲᓇᐁᐧᔨᑕᒧᐃᐦᒋᐠ ᐅᐟ ᐃᑌᐧᐃᐧᓇ ᑭᓭᒪᓂᑐ.
[3] ᑖᓂᓯ ᒫᑲ ᑭᐢᐱᐣ ᐋᑎᐦᐟ ᓇᒪᐃᐧᔭ ᑭ ᐊᔮᐊᐧᐠ ᑖᐯᐧᔦᔨᑕᒧᐃᐧᐣ? ᐁᑳ ᐁ ᐊᔮᒋᐠ ᑖᐯᐧᔦᔨᑕᒧᐃᐧᐣ ᐁᐊᐧᑯ ᒋ ᐅᐦᒋ ᓇᒪ ᓈᐣᑕᐤ ᑭᑕ ᐃᑖᐸᑕᓂᔨᐤ ᐅ ᑖᐯᐧᐃᐧᐣ ᑭᓭᒪᓂᑐ?
[4] ᓇᒪᐃᐧᔭ ᑭᑕ ᑭ ᐃᐦᑭᐣ: ᒋᑫᒫ, ᑭᔮᑦ ᑭᓭᒪᓂᑐ ᐁ ᑖᐯᐧᐟ ᑭᑕ ᑫᒋᓈᐋᐤ, ᐋᑕ ᑲᐦᑭᔭᐤ ᐊᔨᓯᔨᓂᐤ ᑭᔮᐢᑭᐟ; ᑳ ᐃᑕᓯᓇᐦᐃᑳᑌᐠ, ᑭᑕ ᑲᐧᔭᐢᑭᑕᑭᒥᑲᐃᐧᔭᐣ ᑭᐟ ᐃᑌᐧᐃᐧᓂᕽ, ᒥᓇ ᑭᑕ ᓵᑯᑖᐧᔭᐣ ᐁ ᐱᐦᑐᑫᔭᐣ ᐅᔭᓱᐁᐧᐃᐧᓂᕽ.
[5] ᒫᑲ ᑭᐢᐱᐣ ᐁᑳ ᐁ ᑲᐧᔭᐢᑭᑖᑎᓯᔭᕽ ᐁᑯᑕ ᐅᐦᒋ ᓄᑲᐧᓂᔨᐤ ᐅ ᑲᐧᔭᐢᑭᑖᑎᓯᐃᐧᐣ ᑭᓭᒪᓂᑐ, ᑖᓂᓯ ᑫ ᐃᑌᐧᔭᕽ? ᓇᒪᐃᐧᔭ ᒋ ᑲᐧᔭᐢᑭᑖᑎᓯᐤ ᑭᓭᒪᓂᑐ ᑳ ᐅᑎᐦᒋᐸᔨᑖᐧᑫᐟ ᑭᓯᐋᐧᓯᐃᐧᐣ? (ᐁ ᐃᓯ ᐱᑭᐢᑫᐧᐟ ᐊᔨᓯᔨᓂᐤ ᑳ ᐃᑌᐧᔮᐣ.)
[6] ᓇᒪᐃᐧᔭ ᑭᑕ ᑭ ᐃᐦᑭᐣ: ᒋᑫᒫ ᑭᐢᐱᐣ ᐁᑯᓯ, ᑖᓂᓯ ᑫ ᑭ ᐃᓯ ᐅᔭᓱᐋᐧᑕᕽ ᑭᓭᒪᓂᑐ ᐅᒪ ᐊᐢᑭ?
[7] ᒫᑲ ᑭᐢᐱᐣ ᐅ ᑖᐯᐧᐃᐧᐣ ᑭᓭᒪᓂᑐ ᓂᔭ ᓂ ᑭᔮᐢᑭᐃᐧᐣ ᐅᐦᒋ ᐁᐧᔪᒋ ᐊᔮᔨᐤ ᐃᐧᔭ ᐅ ᑭᐢᑌᔨᑖᑯᓯᐃᐧᓂᕽ ᐃᓯ, ᑖᓀᑭ ᑫᔮᐱᐨ ᐅᒪᒋᐱᒫᑎᓯᐤ ᑳ ᐃᑕᓱᐋᐧᑎᑲᐃᐧᔮᐣ?
[8] ᐁᑯᓯ ᑖᓀᑭ ᓇᒪᐃᐧᔭ (ᑳ ᐃᓯ ᑭᔮᐢᑭᐊᐧᒋᒥᑲᐃᐧᔮᕽ, ᒥᓇ ᐋᑎᐦᐟ ᐁᑯᓯ ᐃᑌᐧᐊᐧᐠ ᑳ ᐃᑎᑯᔮᑯᐠ), ᐃᑐᑕᑖᐠ ᑳ ᒫᔮᑕᕽ ᑳ ᒥᔮᐧᓯᐠ ᑭᑕ ᐅᐦᒋᐸᔨᐠ? ᐁᐊᐧᑯᓂᐠ ᐅᔭᓱᐋᐧᑎᑯᐃᐧᓂᐋᐧᐤ ᑲᐧᔭᐢᑲᐧᓂᔨᐤ.
[9] ᑖᓂᓯ ᒫᑲ? ᐊᐊᐧᓯᒣ ᒋ ᑭ ᒫᔨ ᐊᔮᓈᓇᐤ ᐃᔨᑯᕽ ᐃᐧᔭᐋᐧᐤ? ᓇᒪᐃᐧᔭ, ᓇᒪ ᓈᓇᑕᐤ ᐃᑕ: ᒋᑫᒫ ᓵᓴᐩ ᑭ ᑭ ᐊᑳᐧᑕᒪᐋᐧᓇᐊᐧᐠ ᒍᐊᐧᐠ ᒥᓇ ᑲᕒᐃᑲᐠ, ᑲᐦᑭᔭᐤ ᐁ ᐊᔮᒋᐠ ᒪᒋᑎᐃᐧᓂᕽ;
[10] ᑳ ᐃᑕᓯᓇᐦᐃᑳᑌᐠ, ᓇᒪᐃᐧᔭ ᐊᐃᐧᔭᐠ ᑲᐧᔭᐢᑭᑖᑎᓯᐤ, ᓇᒪ, ᓇᒪᐋᐧᐨ ᐯᔭᐠ;
[11] ᓇᒪᐃᐧᔭ ᐊᐃᐧᔭᐠ ᐃᑖᐤ ᐁ ᓂᓯᑐᐦᑕᕽ, ᓇᒪᐃᐧᔭ ᐊᐃᐧᔭᐠ ᐃᑖᐤ ᐁ ᓇᑐᓇᐋᐧᐟ ᑭᓭᒪᓂᑐᐊᐧ,
[12] ᑲᐦᑭᔭᐤ ᐅᐱᒣ ᑭ ᐃᑐᐦᑌᐊᐧᐠ, ᒫᒪᐃᐧ ᓇᒪ ᓈᓇᑕᐤ ᐃᑖᐸᑎᓯᐊᐧᐠ; ᓇᒪᐃᐧᔭ ᐃᑖᐤ ᐊᐃᐧᔭᐠ ᐁ ᒥᔪᑐᑕᕽ, ᓇᒪ, ᓇᒪᐋᐧᐨ ᑲᓇᑫ ᐯᔭᐠ:
[13] ᐅ ᑯᑕᐢᑳᐧᐋᐧᐤ ᑖᐱᐢᑯᐨ ᐁ ᔪᑌᑯᑌᐠ ᓇᐦᐃᓂᑐᐃᐧᑲᒥᐠ; ᐅᑌᔭᓂᐋᐧᐊᐧ ᐅᐦᒋ ᑭ ᐋᐸᒋᑖᐊᐧᐠ ᑲᑲᔦᔨᓯᐃᐧᐣ: ᐅ ᐱᒋᐳᐃᐁᐧᐃᐧᐣ ᑳ ᓂᐸᐃᐁᐧᐟ ᑭᓀᐱᐠ ᐱᒋᑐᓀᐢᑳᑲᐧᐠ:
[14] ᐅᑐᓂᐋᐧᐤ ᑳ ᒧᐢᑭᓀᔨᐠ ᐃᐧᔭᑫᐧᐃᐧᐣ ᒥᓇ ᒪᒋᑐᓈᒧᐃᐧᐣ:
[15] ᐅᓯᑎᐋᐧᐊᐧ ᒥᑲᐃᐧᑭᒪᑲᓂᔨᐊᐧ ᑭᑕ ᓯᑲᐊᑭᐠ ᒥᐦᑯ;
[16] ᓂᓯᐊᐧᓈᑎᓯᐃᐧᐣ ᒥᓇ ᑯᑕᑭᑖᐃᐧᐣ ᐊᔮᔨᐤ ᐅ ᒣᐢᑲᓈᐋᐧᕽ;
[17] ᒥᓇ ᐯᔭᑕᑫᔨᒧᐃᐧ ᒣᐢᑲᓇᐤ ᓇᒪᐃᐧᔭ ᐅᐦᒋ ᑭᐢᑫᔨᑕᒪᐧᐠ:
[18] ᓇᒪᐃᐧᔭ ᐅ ᑯᓯᑫᐧᔨᒥᑯᐃᐧᐣ ᑭᓭᒪᓂᑐ ᑲᓇᐊᐧᐸᑕᒫᐧᐠ.
[19] ᑭ ᑭᐢᑫᔨᑌᓈᓇᐤ ᒫᑲ ᑕᐦᑐ ᑫᑲᐧᐩ ᑳ ᐃᑌᐧᒪᑲᕽ ᐅᔭᓱᐁᐧᐃᐧᐣ, ᐊᓂᑭ ᐅᔭᓱᐁᐧᐃᐧᓂᕽ ᑳ ᐊᔮᒋ ᐁᐊᐧᑯᓂᐠ ᑳ ᐃᑎᐦᒋᐠ; ᑲᐦᑭᔭᐤ ᒥᑐᐣ ᑭᑕ ᑭᐸᐦᐃᑳᑌᐠ, ᒥᓇ ᒥᓯᐁᐧ ᐊᐢᑭ ᑭᑕ ᑎᐯᔨᑖᑲᐧᕽ ᐅᔭᓱᐁᐧᐃᐧᓂᕽ ᑭᓭᒪᓂᑐ:
[20] ᒋᑫᒫ ᐊᑐᐢᑫᐃᐧᓇ ᐅᔭᓱᐁᐧᐃᐧᓂᕽ ᐅᐦᒋ ᓇᒪᐃᐧᔭ ᐊᐃᐧᔭᐠ ᑳ ᐅ ᐃᐧᔮᓯᐟ ᑭᑕ ᑭ ᑳᐧᔭᐢᑭᑖᑎᓯᐊᐧᑭᒥᐦᐟ ᐃᐧᔭ ᐁ ᐃᓯ ᑭᑖᐸᑕᕽ: ᒋᑫᒫ ᐅᔭᓱᐁᐧᐃᐧᐣ ᑳ ᐅᐦᒋ ᑭᐢᑫᔨᑖᑲᐧᕽ ᒪᒋᐃᑎᐃᐧᐣ.
[21] ᒫᑲ ᐁᑲᐧ ᐱᐢᑭᐢ ᐅᔭᓱᐁᐧᐃᐧᓂᕽ ᐅᐦᒋ ᐅ ᑲᐧᔭᐢᑭᑖᑎᓯᐃᐧᐣ ᑭᓭᒪᓂᑐ ᑭ ᓄᑯᑖᓂᐊᐧᐣ, ᐁ ᐋᑐᑖᑲᐧᕽ ᐅᔭᓱᐁᐧᐃᐧᓂᕽ ᒥᓇ ᐅᑭᐢᑭᐁᐧᐦᐃᑫᐊᐧᐠ ᐅ ᒪᓯᓇᐦᐃᑲᓂᐋᐧᕽ;
[22] ᐊᓂᒪ ᐅ ᑲᐧᔭᐢᑭᑖᑎᓯᐃᐧᐣ ᑭᓭᒪᓂᑐ ᐁ ᑖᐯᐧᔦᔨᒥᐦᐟ ᒋᓴᐢ ᙭ ᑭᑕ ᐅᐦᒋ ᐊᔮᒋᐠ ᑲᐦᑭᔭᐤ ᑳ ᑖᐯᐧᑕᐦᑭᐠ; ᒋᑫᒫ ᓇᒪᐃᐧᔭ ᑲᑫᑭᓂᑳᓂᐊᐧᐣ;
[23] ᑲᐦᑭᔭᐤ ᒫᑲ ᐊᐃᐧᔭᐠ ᑭ ᐊᐧᓂᑐᑕᑦ, ᒥᓇ ᓄᑌᐸᔨᐤ ᐅ ᑭᐢᑌᔨᑖᑯᓯᐃᐧᐣ ᑭᓭᒪᓂᑐ;
[24] ᐁ ᒧᐦᒋ ᑲᐧᔭᐢᑭᑖᑎᓯᐊᐧᑭᒥᑲᐃᐧᔭᕽ ᐅ ᑭᓭᐋᐧᑎᓯᐃᐧᐣ ᐅᐦᒋ ᑳ ᑭ ᐃᓯ ᑎᐸᐦᐃᑫᐢᑕᒫᑯᔭᕽ ᙭ ᒋᓴᐢ:
[25] ᐁᐊᐧᑯᓂ ᑭᓭᒪᓂᑐ ᑳ ᑭ ᐃᑕᔮᐟ ᑭᑕ ᐃᐧᒋ ᐃᓯᐦᒋᑫᐃᐁᐧᐟ ᑖᐯᐧᔦᔨᑕᒧᐃᐧᓂᕽ, ᐅ ᒥᐦᑯ ᐅᐦᒋ, ᑭᑕ ᐋᐧᐸᐦᑕᐦᐃᐁᐧᐟ ᐅ ᑲᐧᔭᐢᑭᑖᑎᓯᐃᐧᐣ, ᐁᑳ ᐁ ᐊᑭᑕᒫᑫᐟ ᒪᒋᐃᑎᐃᐧᓇ ᐊᐊᐧᓯᐢᐱ ᑳ ᑭ ᐃᑐᒋᑳᑌᑭ, ᐅ ᒪᓈᒋᐃᐁᐧᐃᐧᓂᕽ ᑭᓭᒪᓂᑐ;
[26] ᑭᑕ ᐋᐧᐸᐦᑕᐦᐃᐁᐧᕽ, ᓂᐟ ᐃᑖᐧᐣ, ᐅ ᑲᐧᔭᐢᑭᑖᑎᓯᐃᐧᐣ ᐊᓄᐦᐨ ᐅᒪ ᒣᑳᐧᐨ: ᐃᐧᔭ ᑭᑕ ᑲᐧᔭᐢᐠ ᐃᑐᑕᕽ, ᒥᓇ ᑭᑕ ᑲᐧᔭᐢᑲᐧᐢᑕᒪᐋᐧᐟ ᐊᓂᐦᐃ ᑳ ᑖᐯᐧᔦᔨᒫᔨᐟ ᒋᓴᓴ.
[27] ᑖᓂᑕ ᒫᑲ ᐁᔮᐠ ᑲᑭᒋᒧᐃᐧᐣ? ᐋᒋᑭᐸᐃᑳᑌᐤ. ᑫᑯ ᐅᔭᓱᐁᐧᐃᐧᐣ ᐅᐦᒋ? ᐊᑐᐢᑫᐃᐧᓇ ᒋ? ᓇᒪᐃᐧᔭ: ᒫᑲ ᑖᐯᐧᔦᔨᑕᒧᐃᐧ ᐅᔭᓱᐁᐧᐃᐧᐣ ᐅᐦᒋ.
[28] ᑭᐟ ᐃᑕᑭᒋᑳᓈᓇᐤ ᒫᑲ ᐊᔨᓯᔨᓂᐤ ᐁ ᑲᐧᔭᐢᑭᑖᑎᓯᐊᐧᑭᒥᐦᐟ ᑖᐯᐧᔦᔨᑕᒧᐃᐧᐣ ᐅᐦᒋ, ᐱᐢᑭᐢ ᐃᐧᔭ ᐊᑐᐢᑫᐃᐧᓇ ᐅᔭᓱᐁᐧᐃᐧᓂᕽ.
[29] ᐊᐦᐳ ᒋ ᑭᓭᒪᓂᑐ ᒍᐊᐧᐠ ᐱᑯ ᐅ ᑭᓭᒪᓂᑐᒥᐋᐧᐊᐧ? ᓇᒪ ᒋ ᒉᐣᑕᐃᓬᐊᐠ ᒥᓇ ᐅ ᑭᓭᒪᓂᑐᒥᐋᐧᐊᐧ? ᒋᑫᒫ, ᒉᐣᑕᐃᓬᐊᐠ ᒥᓇ:
[30] ᑭᐢᐱᐣ ᐱᔦᔭᑯᑫᐧ ᑭᓭᒪᓂᑐ, ᐁᑯᓯ ᑭᑕ ᑲᐧᔭᐢᑭᑖᑎᓯᐊᐧᑭᒣᐤ ᑳ ᓴᕒᑲᑦᓴᐃᓯᐃᐧᔨᐟ ᑖᐯᐧᔦᔨᑕᒧᐃᐧᐣ ᐅᐦᒋ, ᒥᓇ ᐁᑳ ᑳ ᓴᕒᑲᑦᓴᐃᓯᐃᐧᔨᐟ ᑖᐯᐧᔦᔨᑕᒧᐃᐧᐣ ᐅᐦᒋ,
[31] ᐁᑯᓯ ᒋ ᒫᑲ ᑭᐟ ᐃᓯᑖᓈᓇᐤ ᐅᔭᓱᐁᐧᐃᐧᐣ ᐋᑳ ᓈᐣᑕᐤ ᑭᑕ ᐃᑖᐸᑕᕽ ᑖᐯᐧᔦᔨᑕᒧᐃᐧᐣ ᐅᐦᒋ? ᓇᒪᐃᐧᔭ ᑭᑕ ᑭ ᐃᐦᑭᐣ: ᓇᐊᐧᐨ, ᑭᐟ ᐋᔮᑕᐢᑖᓇᐤ ᐅᔭᓱᐁᐧᐃᐧᐣ.