[1] ᓇᒪᐃᐧᔭ ᒫᑲ ᐁᑲᐧ ᓈᓂᐳᒫᐊᐧᐠ ᐊᓂᑭ ᙭ ᒋᓴᓯᕽ ᑳ ᐊᔮᒋᐠ.
[2] ᒋᑫᒫ ᐅᐟ ᐅᔭᓱᐁᐧᐃᐧᐣ ᐱᒫᑎᓯᐃᐧᓂ ᐊᐦᒑᕽ ᙭ ᒋᓴᓯᕽ ᓂ ᑭ ᐃᓯᐃᑯᐣ ᐁᑳ ᑭᑕ ᑎᐯᔨᒥᑯᔮᐣ ᒪᒋᐃᑎᐃᐧᓂ ᒥᓇ ᓂᐳᐃᐧᓂ ᐅᔭᓱᐁᐧᐃᐧᐣ.
[3] ᒋᑫᒫ ᐊᓂᒪ ᐁᑳ ᑳ ᑭ ᐃᑐᑕᒧᒪᑲᕽ ᐅᔭᓱᐁᐧᐃᐧᐣ, ᐃᐧᔭ ᐁ ᓀᓱᐊᐧᕽ ᐅᔮᓯᐃᐧᐃᐧᐣ ᐅᐦᒋ, ᑭᓭᒪᓂᑐ, ᐁ ᐃᓯᑎᓴᐋᐧᐟ ᐃᐧᔭ ᐅᑯᓯᓴ ᐁ ᐃᓯᓈᑯᓯᔨᐟ ᑳ ᐃᓯᓈᑲᐧᕽ ᒪᒋᐃᑎᐃᐧᓂ ᐃᐧᔮᐢ ᒥᓇ ᑭᑕ ᐸᑭᑎᓂᒥᐦᐟ ᒪᒋᐃᑎᐃᐧᐣ ᐅᐦᒋ, ᑭ ᓈᓂᐳᑕᑦ ᒪᒋᐃᑎᐃᐧᐣ ᐅᔮᓱᐁᐧᐃᐧᓂᕽ:
[4] ᐊᓂᒪ ᑳ ᑭ ᐃᑕᑭᑌᐠ ᐅᔭᓱᐁᐧᐃᐧᐣ ᑭᑕ ᑎᐱᐸᔨᑖᔭᕽ ᑭᔮᓇᐤ, ᑳ ᐱᒧᐦᑌᔭᕽ ᓇᒪᐃᐧᔭ ᐅᔮᓱᐁᐧᐃᐧᓂᕽ ᐃᓯ ᒫᑲ ᐊᐦᒑᐦᑯᕽ ᐃᓯ.
[5] ᒋᑫᒫ ᐊᓂᑭ ᐅᔮᓱᐁᐧᐃᐧᓂᕽ ᑳ ᐃᓯ ᐊᔮᒋᐠ ᓈᑲᑕᐁᐧᔨᑕᒪᐧᐠ ᐊᓂᐦᐃ ᐃᐧᔮᓯᕽ ᑳ ᐊᔮᑭ; ᒫᑲ ᐊᓂᑭ ᐊᐦᒑᐦᑯᕽ ᑳ ᐃᓯ ᐊᔮᒋᐠ ᐊᓂᐦᐃ ᐊᐦᒑᐦᑯᕽ ᑳ ᐃᓯ ᐊᔭᔨᑭ.
[6] ᐃᐧᔭ ᐁ ᐃᓯ ᒥᑐᓀᔨᑕᒧᒪᑲᕽ ᐃᐧᔮᓯᐃᐧᐃᐧᐣ ᐁᐊᐧᑯ ᓂᐳᐃᐧᐣ; ᒫᑲ ᐁ ᐃᓯ ᒥᑐᓀᔨᑕᕽ ᐊᐦᒑᕽ ᐁᐊᐧᑯ ᐱᒫᑎᓯᐃᐧᐣ ᒥᓇ ᐯᔭᑕᑫᔨᒧᐃᐧᐣ:
[7] ᒋᑫᒫ ᐁ ᐃᓯ ᒥᑐᓀᔨᑕᒧᒪᑲᕽ ᐃᐧᔮᓯᐃᐧᐃᐧᐣ ᐁᐊᐧᑯ ᑭᑕ ᐸᑳᐧᑎᐦᐟ ᑭᓭᒪᓂᑐ; ᒋᑫᒫ ᓇᒪᐃᐧᔭ ᑎᐯᔨᑖᑲᐧᐣ ᐅᔭᓱᐁᐧᐃᐧᓂᕽ ᑭᓭᒪᓂᑐ ᐅᐦᒋ, ᓇᒪᐃᐧᔭ ᒥᓇ ᐁᑯᓯ ᑭᑕ ᑭ ᐃᑭᕽ:
[8] ᐊᓂᑭ ᒫᑲ ᐃᐧᔮᓯᐃᐧᐃᐧᓂᕽ ᑳ ᐊᔮᒋᐠ ᓇᒪᐃᐧᔭ ᑭᑕ ᑭ ᓇᐦᐃᔭᐁᐧᐋᒋᐠ ᑭᓭᒪᓂᑐᐊᐧ.
[9] ᒫᑲ ᑭᔭᐋᐧᐤ ᓇᒪᐃᐧᔭ ᐃᐧᔮᓯᐃᐧᐃᐧᓂᕽ ᑭᐟ ᐊᔮᓈᐋᐧᐤ, ᒫᑲ ᐊᐦᒑᐦᑯᕽ, ᑭᐢᐱᐣ ᐅᑎ ᐅᐟ ᐊᐦᒑᐦᑲᐧ. ᑭᓭᒪᓂᑐ ᑭ ᑭᑭᐢᑳᑯᐋᐧᐤ. ᒫᑲ ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐁᑳ ᐊᔮᐋᐧᒋ ᐅᐟ ᐊᐦᒑᐦᑲᐧ ᙭, ᓇᒪᐃᐧᔭ ᑎᐯᔨᒥᐠ.
[10] ᑭᐢᐱᐣ ᒫᑲ ᙭ ᑭᑭᐢᑳᑯᔦᑯ, ᒥᔭᐤ ᓂᐳᒪᑲᐣ ᒪᒋᐃᑎᐃᐧᓂᕽ ᐃᐧᔭ ᐃᓯ; ᒫᑲ ᐊᐦᒑᕽ ᐱᒫᑎᓯᐤ ᑲᐧᔭᐢᑭᑖᑎᓯᐃᐧᓂᕽ ᐃᓯ.
[11] ᒫᑲ ᑭᐢᐱᐣ ᐅᐟ ᐊᐦᒑᐦᑲᐧ ᐊᓇ ᑳ ᑭ ᐊᐧᓂᐢᑳᓈᐟ ᒋᓴᓴ ᓂᐳᐃᐧᓂᕽ ᐅᐦᒋ ᑭ ᑭᑭᐢᑳᑯᐋᐧᐤ, ᐊᓇ ᑳ ᑭ ᐊᐧᓂᐢᑳᓈᐟ ᙭ ᒋᓴᓴ ᓂᐳᐃᐧᓂᕽ ᐅᐦᒋ ᑭᑕ ᐱᒫᑎᓯᐢᑲᑦ ᑳ ᓂᐳᒪᑲᑭ ᑭᔭᐃᐧᐋᐧᐊᐧ ᐅᐟ ᐊᐦᒑᐦᑲᐧ ᐅᐦᒋ ᑳ ᑭᑭᐢᑳᑯᔦᐠ.
[12] ᐁᑯᓯ ᒫᑲ, ᓂᒋᐋᐧᒥᑎᐠ, ᑭ ᒪᓯᓇᐃᑳᓈᓇᐤ, ᓇᒪᐃᐧᔭ ᐃᐧᔮᓯᐃᐧᐃᐧᓂᕽ ᐃᓯ, ᑭᑕ ᐱᒫᑎᓯᔭᕽ ᐁ ᐃᓯ ᓇᑕᐁᐧᔨᑕᒧᒪᑲᕽ ᐃᐧᔮᓯᐃᐧᐃᐧᐣ:
[13] ᒋᑫᒫ ᑭᐢᐱᐣ ᑭ ᐱᒫᑎᓯᓈᐋᐧᐤ ᐁ ᐃᓯ ᓇᑕᐁᐧᔨᑕᒧᒪᑲᕽ ᐃᐧᔮᓯᐃᐧᐃᐧᐣ, ᑭ ᑲ ᓂᐱᓈᐋᐧᐤ; ᒫᑲ ᑭᐢᐱᐣ ᐊᐦᒑᕽ ᐅᐦᒋ ᑭ ᓂᐸᑖᓈᐋᐧᐤ ᒥᔭᐃᐧ ᐃᓯᐦᒋᑫᐃᐧᓇ, ᑭ ᑲ ᐱᒫᑎᓯᓈᐋᐧᐤ.
[14] ᒋᑫᒫ ᑕᐦᑐ ᑳ ᑭᐢᑭᓄᑕᐃᑯᒋᐠ ᑭᓭᒪᓂᑐ ᐅᐟ ᐊᐦᒑᐦᑲᐧ, ᐁᐊᐧᑯᓂᐠ ᑭᓭᒪᓂᑐ ᐅᑯᓯᓴ.
[15] ᒋᑫᒪ ᓇᒪᐃᐧᔭ ᑯᐦᒋ ᒥᔨᑲᐃᐧᓈᐋᐧᐤ ᑎᐯᔨᒥᑯᐃᐧ ᐊᐦᒑᕽ ᒥᓇ ᑭᑕ ᐊᐢᑖᓯᔦᐠ; ᒫᑲ ᑭ ᑭ ᒥᔨᑲᐃᐧᓈᐋᐧᐤ ᑖᐹᑯᒥᐁᐧᐃᐧ ᐊᐦᒑᕽ, ᑳ ᐅᐦᒋ ᐃᑕᑌᐧᒧᔭᕽ, ᐋᐹ, ᓄᐦᑖ.
[16] ᐊᐦᒑᕽ ᐃᐧᔭ ᑫᐦᒋᐋᐧᐠ ᐋᒋᒧ ᑭᑭ ᑭᐟ ᐊᐦᒑᑯᓇᐊᐧ, ᐁ ᐅᐟ ᐊᐋᐧᓯᒥᓯᒥᑯᔭᕽ ᑭᓭᒪᓂᑐ:
[17] ᑭᐢᐱᐣ ᒫᑲ ᐅᐟ ᐊᐋᐧᓯᒥᓴ, ᐁᑯᓯ ᐁᑲᐧ ᐅᑖᓂᐢᑫᐢᑲᒫᑫᐊᐧᐠ, ᐁ ᐋᓂᐢᑫᐢᑲᒪᐋᐧᔭᕽ ᑭᓭᒪᓂᑐ, ᒥᓇ ᐁ ᐃᐧᒋ ᐋᓂᐢᑫᐢᑲᒪᐋᐧᔭᕽ ᙭; ᑭᐢᐱᐣ ᐅᑎ ᑭ ᐃᐧᒉᐋᐧᓇᐤ ᐅ ᑯᑕᑭᑖᐃᐧᓂᕽ, ᑭᑕ ᐃᐧᒉᐋᐧᔭᕽ ᒥᓇ ᐅ ᑭᐢᑌᔨᑖᑯᓯᐃᐧᓂᕽ.
[18] ᒋᑫᒫ ᓂᐟ ᐃᑕᑭᒋᑳᐣ ᐊᓂᐦᐃ ᑯᑕᑭᑖᐃᐧᓇ ᐊᓄᐦᐨ ᒣᑳᐧᐨ ᑳ ᐊᔭᑭ ᓇᒪᐃᐧᔭ ᐁᑯᔨᑯᕽ ᑭᑕ ᑭ ᐃᑕᑭᑌᑭ ᐁᐢᐱᑌᔨᑖᑲᐧᕽ ᐊᓂᒪ ᑭᐢᑌᔨᑖᑯᓯᐃᐧᐣ ᑫ ᓄᑯᑖᐧᑲᐃᐧᔭᕽ.
[19] ᒋᑫᒫ ᐁ ᒥᑐᓂ ᐸᑯᓭᔨᒧᐟ ᐊᓇ ᑳ ᑭ ᐅᓯᐃᐦ ᐯᐦᑖᐤ ᑭᑕ ᓄᑯᐃᒥᐦᐟ ᐅᑯᓯᓴ ᑭᓭᒪᓂᑐ.
[20] ᒋᑫᒫ ᐊᓇ ᑳ ᑭ ᐅᓯᐃᐦᐟ ᑭ ᑎᐯᔨᒥᐠ ᐱᑯᓇᑕ ᑫᑲᐧᐩ, ᓇᒪᐃᐧᔭ ᒫᑲ ᐃᐧᔭ ᐁ ᐃᑌᔨᑕᕽ, ᒫᑲ ᐊᓂᐦᐃ ᐅᐦᒋ ᑳ ᑭ ᐃᓯ ᑎᐯᔨᑖᑯᐃᑯᐟ,
[21] ᐁ ᐃᓯ ᐸᑯᓭᔨᒧᐟ ᐊᓇ ᑳ ᑭ ᐅᓯᐃᐦᐟ ᑭᑕ ᐸᐢᐱᐟ ᐁ ᑎᐯᔨᒥᑯᐟ ᓂᓯᐊᐧᓈᑎᓯᐃᐧᐣ ᐅᐦᒋ ᑭᑕ ᐱᐦᑐᑫᐟ ᐁ ᐃᓯ ᑎᐯᔨᒥᓱᔨᐟ ᑭᐢᑌᔨᑖᑯᓯᐃᐧᓂᕽ ᐅᐟ ᐊᐋᐧᓯᒥᓴ ᑭᓭᒪᓂᑐ.
[22] ᒋᑫᒫ ᑭ ᑭᐢᑫᔨᑌᓈᓇᐤ ᑲᐦᑭᔭᐤ ᐊᐃᐧᔭᐠ ᑳ ᑭ ᐅᓯᐃᐦᐟ ᐁ ᒪᐃᐧᒧᑫᐟ ᒥᓇ ᐁ ᑯᑕᑭᑖᐟ ᐃᐧᓴᑫᔨᑕᒧᐃᐧᓂᕽ ᒫᒪᐃᐧ ᐱᔨᐢ ᐊᓄᐦᐨ.
[23] ᓇᒪᐃᐧᔭ ᒫᑲ ᐱᑯ ᐁᑯᓯ, ᒫᑲ ᑭᔮᓇᐤ ᒥᓇ, ᑳ ᑭᑭᐢᑳᑯᔭᕽ ᐅ ᓂᐢᑕᒥ ᒥᓂᓯᐃᐧᐃᐧᐣ ᐊᐦᒑᕽ, ᐊᐦᐳ ᑭᔮᓇᐤ ᑭ ᒪᐃᐧᒧᑳᓈᓇᐤ ᐱᒑᔨᕽ, ᐁ ᐯᐅᔭᕽ ᑭᑕ ᑖᐹᑯᒥᑲᐃᐧᔭᕽ, ᐁᐊᐧᑳᐧᓂᒪ, ᑭᑕ ᑭᑖᐧᒥ ᐱᒫᒋᑖᕽ ᑭᔭᐃᐧᓇᐤ.
[24] ᒋᑫᒫ ᐸᑲᐧᓇᐃᐧ ᐃᑕᑌᔨᑕᒧᐃᐧᐣ ᑳ ᑭ ᐅᐦᒋ ᐱᒫᒋᐦᐅᔭᕽ: ᒫᑲ ᑳ ᐃᑕᑌᔨᑕᒥᕽ ᐁ ᐋᐧᐸᐦᑕᒥᕽ ᓇᒪᐃᐧᔭ ᐁᐊᐧᑯ ᐸᑲᐧᓇᐋᐧᑖᓂᐊᐧᐣ: ᒋᑫᒫ ᐊᐁᐧᓈᓇ ᐯᑲᐧᓇᐃᐧ ᐃᑕᑌᔨᑕᕽ ᐊᓂᒪ ᑳ ᐋᐧᐸᐦᑕᕽ.
[25] ᒫᑲ ᑭᐢᐱᐣ ᑭ ᐸᑲᐧᓇᐃᐧ ᐃᑕᑌᔨᑌᓈᓇᐤ ᐊᓂᒪ ᐁᑳ ᑳ ᐋᐧᐸᐦᑕᒪᕽ, ᐁᑲᐧ ᓯᐯᔨᑕᒧᐃᐧᓂᕽ ᑭ ᐯᑖᓈᓇᐤ.
[26] ᐁᑯᓯ ᒥᓇ ᐊᐦᒑᕽ ᐃᓯ ᓂᓱᑲᒪᐋᐧᑕᑦ ᑭ ᓀᓱᐃᐧᓯᐃᐧᓂᓇᐤ: ᒋᑫᒫ ᓇᒪᐃᐧᔭ ᑭ ᑭᐢᑫᔨᑌᓈᓇᐤ ᑭᑕ ᐃᓯ ᐊᔭᒥᐦᐋᔭᕽ ᐊᓂᒪ ᑫ ᐃᓯ ᐊᔭᒥᐦᐋᔭᑯᐸᐣ; ᒫᑲ ᐃᐧᔭ ᐊᐦᒑᕽ ᑭ ᓇᑐᑌᐢᑕᒫᑯᓇᐤ ᐁ ᐃᓯ ᒪᐃᐧᒧᐢᑕᒫᑯᔭᕽ ᐁᑳ ᑭᑕ ᑭ ᐃᑌᐧᔭᕽ;
[27] ᐊᓇ ᒥᓇ ᑳ ᓇᑐᓂᑫᐟ ᒥᑌᐃᕽ ᑭᐢᑫᔨᑕᑦ ᐁ ᐃᓯ ᐅ ᒥᑐᓀᔨᒋᑲᓀᔨᐟ ᐊᐦᒑᐦᑲᐧ, ᒋᑫᒫ ᓇᑐᑌᐢᑕᒪᐁᐧᐤ ᐅᑲᓈᑎᓯᐊᐧ ᐁ ᐃᑌᔨᑕᒥᔨᐟ ᑭᓭᒪᓂᑐᐊᐧ.
[28] ᐁᑯᓯ ᑭ ᑭᐢᑫᔨᑌᓈᓇᐤ ᐊᓂᑭ ᑳ ᓵᑭᐋᒋᐠ ᑭᓭᒪᓂᑐᐊᐧ ᑲᐦᑭᔭᐤ ᑫᑲᐧᐩ ᐊᑐᐢᑫᒪᑲᐣ ᑭᑕ ᒥᔪ ᐋᐸᒋᐃᑯᒋᐠ, ᐊᓂᑭ ᐅᑎ ᑳ ᓇᑐᒥᐦᒋᐠ ᐁ ᐃᑕᐢᑌᔨᐠ ᐅᐟ ᐃᑕᐢᒋᑫᐃᐧᐣ.
[29] ᒋᑫᒫ ᐊᓂᐦᐃ ᓂᔮᐠ ᑳ ᑭᐢᑫᔨᒫᐟ, ᐁᐊᐧᑯᓂ ᒥᓇ ᓂᔮᐠ ᑳ ᐅᔭᑭᒫᐟ ᑭᑕ ᐃᓯᓈᑯᐃᑯᐃᐧᓯᔨᐟ ᐅᐟ ᐃᓯᓈᑯᓯᐃᐧᓂᔨᕽ ᐅᑯᓯᓴ, ᑭᑕ ᐅᐢᑌᓯᒫᑲᑕᒥᔨᐟ ᐁ ᒥᐦᒉᑎᒋᐠ ᐅᒋᐋᐧᒥᒫᐊᐧᐠ:
[30] ᒥᓇ ᐊᓂᐦᐃ ᑳ ᑭ ᓂᑳᓂ ᐅᔭᑭᒫᐟ, ᐁᐊᐧᑯᓂ ᒥᓇ ᑭ ᓇᑐᒣᐤ: ᐁᑯᓯ ᐊᓂᐦᐃ ᑳ ᑭ ᓇᑐᒫᐟ, ᐁᐊᐧᑯᓂ ᒥᓇ ᑳ ᑭ ᑲᐧᔭᐢᑭᑖᑎᓯᐊᐧᑭᒫᐟ: ᐊᓂᐦᐃ ᒫᑲ ᑳ ᑭ ᑲᐧᔭᐢᑭᑖᑎᓯᐊᐧᑭᒫᐟ, ᐁᐊᐧᑯᓂ ᒥᓇ ᑳ ᑭ ᑭᐢᑌᔨᑖᑯᐦᐋᐟ.
[31] ᑖᓂᓯ ᒫᑲ ᑫ ᑭ ᐃᑌᐧᔭᕽ ᐅᐦᐃ ᐅᐦᒋ? ᑭᐢᐱᐣ ᑭᓭᒪᓂᑐ ᑭ ᐃᐧᒋᐃᑯᓇᐤ, ᐊᐁᐧᓇ ᓈᐣᑕᐤ ᑫ ᑭ ᐃᑐᑖᑯᔭᕽ?
[32] ᐊᓇ ᐁᑳ ᑳ ᑭ ᒪᓈᒋᐋᐟ ᐃᐧᔭ ᑎᐱᔭᐤ ᐅᑯᓯᓴ, ᒫᑲ ᑳ ᑭ ᐸᑭᑎᓈᐟ ᑲᐦᑭᔭᐤ ᑭᔮᓇᐤ ᐅᐦᒋ, ᑖᓂᔨᑯᕽ ᐋᐧᐃᐧᐢ ᑫ ᑭ ᒧᐦᒋ ᒥᔨᑯᔭᕽ ᑲᐦᑭᔭᐤ ᑫᑲᐧᐩ?
[33] ᐊᐁᐧᓇ ᓈᐣᑕᐤ ᑫᑲᐧᐩ ᑫ ᑭ ᐊᑖᒥᒫᐟ ᐊᓂᐦᐃ ᑭᓭᒪᓂᑐ ᑳ ᑭ ᓇᐊᐧᓱᓈᐟ? ᑭᓭᒪᓂᑐ ᐁᐊᐧᑯ ᑳ ᑲᐧᔭᐢᑭᑖᑎᓯᐊᐧᑭᒥᐁᐧᐟ;
[34] ᐊᐁᐧᓈᓇ ᑫ ᓈᓂᐳᒥᐁᐧᐟ? ᙭ ᒋᓴᐢ ᑳ ᑭ ᓂᐱᐟ, ᐁᐦᐁ ᔮᔭᐤ, ᑳ ᑭ ᐊᐧᓂᐢᑳᓂᐦᐟ ᓂᐳᐃᐧᓂᕽ ᐅᐦᒋ, ᑳ ᐊᔮᐟ ᐅ ᑭᐦᒋᓂᐢᑭᔨᕽ ᑭᓭᒪᓂᑐᐊᐧ, ᐁᐊᐧᑯ ᒥᓇ ᑳ ᓇᑐᑌᐢᑕᒫᑯᔭᕽ.
[35] ᐊᐁᐧᓇ ᑫ ᑭ ᐸᐢᑫᑎᓯᓂᑯᔭᕽ ᐅ ᓵᑭᐦᐃᐁᐧᐃᐧᓂᕽ ᙭ ᐅᐦᒋ? ᐊᔨᒥᓯᐃᐧᐣ ᒋ, ᐊᐦᐳ ᐃᐧᓴᑫᔨᑕᒧᐃᐧᐣ, ᐊᐦᐳ ᑯᑕᑭᐦᐃᑯᐃᐧᐣ, ᐊᐦᐳ ᓄᑌᑲᑌᐃᐧᐣ, ᐊᐦᐳ ᒧᓭᐢᑲᑌᐃᐧᐣ, ᐊᐦᐳ ᓈᓂᓵᓂᓯᐃᐧᐣ, ᐊᐦᐳ ᐃᓴᐁᐧᐢᐠ?
[36] ᑖᐱᐢᑯᐨ ᑳ ᐃᑕᓯᓇᐃᑲᑌᐠ, ᑭᔭ ᐅᐦᒋ ᓂ ᓂᐸᐃᑲᐃᐧᓈᐣ ᑲᐯᑭᓯᐠ; ᓂᐟ ᐃᑕᑭᒥᑲᐃᐧᓈᐣ ᑖᐱᐢᑯᐨ ᒫᔭᑎᐦᑲᐧᐠ ᑭᑕ ᒪᓂ ᓂᐸᐃᐦᒋᐠ.
[37] ᓇᒪᐃᐧᔭ, ᑲᐦᑭᔭᐤ ᐁᐊᐧᑯᓂ ᐅᐦᐃ ᐊᔨᐋᐧᐠ ᑭᐟ ᐃᓯ ᐊᔮᓈᓇᐤ ᐃᔨᑯᕽ ᐅᓵᑯᑖᐧᐊᐧᐠ, ᐊᓇ ᐅᐦᒋ ᑳ ᑭ ᓵᑭᐃᑯᔭᕽ.
[38] ᒋᑫᒫ ᒥᑐᓂ ᐁ ᑫᒋᓈᐅᔮᐣ, ᓇᒪᐋᐧᐨ ᐊᐦᐳ ᓂᐳᐃᐧᐣ, ᓇᒪᐃᐧᔭ ᒥᓇ ᐱᒫᑎᓯᐃᐧᐣ, ᓇᒪᐃᐧᔭ ᒥᓇ ᐅᑭᓯᑯᐊᐧᐠ, ᓇᒪᐃᐧᔭ ᒥᓇ ᑳ ᑭᐢᑌᔨᑖᑯᓯᒋᐠ, ᓇᒪᐃᐧᔭ ᐊᓂᐦᐃ ᐊᓄᐦᐨ ᑳ ᐊᔮᑭ, ᓇᒪᐃᐧᔭ ᐊᓂᐦᐃ ᓂᑳᐣ ᑫ ᐊᔮᑭ, ᓇᒪᐃᐧᔭ ᒥᓇ ᓱᑫᔨᑖᑯᓯᐃᐧᓇ,
[39] ᓇᒪᐃᐧᔭ ᒥᓇ ᑳ ᐃᐢᐹᐠ, ᓇᒪᐃᐧᔭ ᒥᓇ ᑳ ᑎᒥᐠ, ᓇᒪᐃᐧᔭ ᒥᓇ ᓈᐣᑕᐤ ᑯᑕᐠ ᐅᓯᐦᒋᑲᐣ ᑭ ᑲ ᑭ ᐸᐢᑫᑎᓯᓂᑯᓈᓇᐤ ᐅ ᓵᑭᐦᐃᐁᐧᐃᐧᓂᕽ ᐅᐦᒋ ᑭᓭᒪᓂᑐ, ᑳ ᐊᔮᐠ ᙭ ᒋᓴᐢ ᑳ ᑎᐯᔨᒥᑯᔭᕽ,