[1] ᓂᒋᐋᐧᒥᑎᐠ, ᓂᑌᐃᕽ ᐅᐦᒋ ᓂ ᐸᑯᓭᔨᒫᐤ ᒥᓇ ᓂ ᒪᐃᐧᒧᐢᑕᐋᐧᐤ ᑭᓭᒪᓂᑐ ᐁᐊᐧᑯᓂᐠ ᐅᐦᒋ, ᑭᑕ ᑭ ᐱᒫᒋᐦᐅᒋᐠ.
[2] ᒋᑫᒫ ᓂᐟ ᐋᒋᒫᐊᐧᐠ ᐁ ᐋᑲᒣᔨᒧᐢᑕᒪᐋᐧᒋᐠ ᑭᓭᒪᓂᑐᐊᐧ, ᒫᑲ ᓇᒪᐃᐧᔭ ᑭᐢᑫᔨᑕᒧᐃᐧᓂᕽ ᐃᓯ.
[3] ᐃᐧᔭ ᐁᑳ ᐁ ᑭᐢᑫᔨᑕᐦᑭᐠ ᑭᓭᒪᓂᑐ ᐅ ᑲᐧᔭᐢᑭᑖᑎᓯᐃᐧᐣ, ᐁ ᓇᑐᓇᑭᐠ ᒫᑲ ᐃᐧᔭᐋᐧᐤ ᑭᑕ ᐋᔮᑕᐢᑖᒋᐠ ᐅ ᑲᐧᔭᐢᑭᑖᑎᓯᐃᐧᓂᐋᐧᐤ, ᓇᒪᐃᐧᔭ ᑭ ᐃᓯ ᐸᑭᑎᓂᓱᐊᐧᐠ ᐅ ᑲᐧᔭᐢᑭᑖᑎᓯᐃᐧᓂᔨᕽ ᑭᓭᒪᓂᑐᐊᐧ.
[4] ᒋᑫᒫ ᙭ ᐁᐊᐧᑯ ᐁ ᑭᓯᐱ ᐊᔮᐠ ᑲᐧᔭᐢᑭᑖᑎᓯᐃᐧᓂᕽ ᑲᐦᑭᔭᐤ ᐊᐃᐧᔭᐠ ᑳ ᑖᐯᐧᑕᕽ
[5] ᐃᐧᔭ ᒧᓯᐢ ᐃᑕᓯᓇᐦᐃᑫᐤ ᐊᓇ ᐊᔨᓯᔨᓂᐤ ᑳ ᐃᑐᑕᕽ ᑲᐧᔭᐢᑭᑖᑎᓯᐃᐧᐣ ᐅᔭᓱᐁᐧᐃᐧᓂᕽ ᑳ ᐊᔮᐠ ᐁᑯᑕ ᑭᑕ ᐅᐦᒋ ᐱᒫᑎᓯᐟ.
[6] ᒫᑲ ᑲᐧᔭᐢᑭᑖᑎᓯᐃᐧᐣ ᑖᐯᐧᔦᔨᑕᒧᐃᐧᓂᕽ ᑳ ᐅᐦᒋ ᐊᔮᐠ ᐅᒥᓯ ᐃᑌᐧᒪᑲᐣ, ᐁᑳᐃᐧᔭ ᐃᑌᐧ ᑭᑌᐃᕽ, ᐊᐁᐧᓇ ᑫ ᐅᐱᐢᑳᐟ ᑭᐦᒋ ᑭᓯᑯᕽ ᐃᓯ? (ᐁᐊᐧᑯ, ᑭᑕ ᐯ ᔮᓱᑕᐃᐦᐟ ᙭:)
[7] ᐊᐦᐳ, ᐊᐁᐧᓇ ᑎᒥᔮᕽ ᑫ ᐃᓯ ᔮᓯᐟ? (ᐁᐊᐧᑯ, ᑭᑕ ᐯᓯᐦᐟ ᙭ ᓂᐳᐃᐧᓂᕽ ᐅᐦᒋ.)
[8] ᒫᑲ ᑖᓂᓯ ᐁᑌᐧᒪᑲᕽ? ᐊᓂᒪ ᐃᑌᐧᐃᐧᐣ ᑭ ᐯᓵᐧᐸᒥᑯᐣ ᑭᑐᓂᕽ, ᒥᓇ ᑭᑌᐃᕽ; ᐁᐊᐧᑳᐧᓂᒪ, ᑖᐯᐧᔦᔨᑕᒧᐃᐧ ᐃᑌᐧᐃᐧᐣ, ᑳ ᑲᑫᐢᑭᒥᐁᐧᔮᕽ:
[9] ᒋᑫᒫ ᑭᐢᐱᐣ ᐋᒋᒪᒋ ᑭᑐᓂᕽ ᒋᓴᐢ ᐁ ᑎᐯᔨᐦᒋᑫᐟ, ᒥᓇ ᑖᐯᐧᑕᒪᓂ ᑭᑌᐦᐃᕽ ᑭᓭᒪᓂᑐᐊᐧ ᐁ ᑭ ᐊᐧᓂᐢᑳᓂᑯᐟ ᓂᐳᐃᐧᓂᕽ ᐅᐦᒋ, ᑭ ᑲ ᐱᒫᒋᐦᐅᐣ:
[10] ᒋᑫᒫ ᐅᑌᐦᐃᕽ ᐊᔨᓯᔨᓂᐤ ᑖᐯᐧᑕᑦ ᑲᐧᔭᐢᑭᑖᑎᓯᐃᐧᓂᕽ ᐃᓯ; ᒥᓇ ᐅᑐᓂᕽ ᐅᐦᒋ ᐋᒋᒧ ᐱᒫᒋᐦᐃᐁᐧᐃᐧᓂᕽ ᐃᓯ.
[11] ᒋᑫᒫ ᑭᐦᒋ ᒪᓯᓇᐦᐃᑫᐃᐧᐣ ᐃᑌᐧᒪᑲᐣ, ᐱᑯ ᐊᐃᐧᔭᐠ ᑖᐯᐧᑕᐋᐧᒋ ᓇᒪᐃᐧᔭ ᑭᑕ ᓇᓀᐯᐃᐧᐋᐤ.
[12] ᒋᑫᒫ ᓇᒪᐃᐧᔭ ᐱᑐᐢ ᒍ ᒥᓇ ᑲᕒᐃᐠ: ᐃᐧᔭ ᐯᔭᑯ ᑳ ᑎᐯᔨᐦᒋᑫᐟ ᑲᐦᑭᔭᐤ ᑳ ᑎᐯᔨᒫᐟ, ᒥᓇ ᑳ ᐁᐧᔪᒋ ᒥᔮᐟ ᑲᐦᑭᔭᐤ ᑳ ᒪᐃᐧᒧᐢᑖᑯᐟ:
[13] ᒋᑫᒫ, ᐱᑯ ᐊᐃᐧᔭᐠ ᑫ ᒪᐃᐧᒧᐢᑕᒫᐧᐟ ᐅ ᐃᐧᔪᐃᐧᓂᔨᐤ ᑳ ᑎᐯᔨᐦᒋᑫᔨᐟ ᑭᑕ ᐱᒫᒋᐦᐋᐤ.
[14] ᑖᓂᓯ ᒫᑲ ᑫ ᑭ ᐃᓯ ᒪᐃᐧᒧᐢᑕᐊᐧᒋᐠ ᐊᓂᐦᐃ ᐁᑳ ᑳ ᑖᐯᐧᑕᐋᐧᒋᐠ? ᒥᓇ ᑖᓂᓯ ᑫ ᑭ ᐃᓯ ᑖᐯᐧᑕᐋᐧᒋᐠ ᐊᐃᐧᔭ ᐁᑳ ᐁ ᑭ ᐅᐦᒋ ᐯᑕᐋᐧᒋᐠ? ᒥᓇ ᑖᓂᓯ ᑫ ᑭ ᐃᓯ ᐯᐦᑕᐦᑭᐠ ᑭᐢᐱᐣ ᐁᑳ ᐊᔮᐋᐧᑖᐧᐃᐧ ᐅᑲᑫᐢᑭᒥᐁᐧᐊᐧ?
[15] ᒥᓇ ᑖᓂᓯ ᑫ ᑭ ᐃᓯ ᑲᑫᐢᑭᒥᐁᐧᒋᐠ ᑭᐢᐱᐣ ᐁᑳ ᐃᓯᑎᓴᐅᑖᐧᐃᐧ? ᑖᐱᐢᑯᐨ ᑳ ᐃᑕᓯᓇᐦᐃᑳᑌᐠ, ᑖᓂᔨᑯᕽ ᑲᑕᐊᐧᓯᓯᓂᔨᐊᐧ ᐅᓯᑎᐋᐧᐊᐧ ᐊᓂᑭ ᑳ ᐯᑖᒋᐠ ᐁ ᒥᔮᐧᑐᑖᑲᐧᑭ ᒥᔪ ᑫᑲᐧᔭ!
[16] ᒫᑲ ᓇᒪᐃᐧᔭ ᑲᐦᑭᔭᐤ ᑭ ᓇᑐᑕᒪᐧᐠ ᒥᔮᐧᒋᒧᐃᐧᐣ. ᒋᑫᒫ ᐊᐩᓵᔭ ᐃᑌᐧᐤ, ᑌᐯᔨᐦᒋᑫᔭᐣ, ᐊᐁᐧᓇ ᑳ ᑖᐯᐧᑕᕽ ᓂᐟ ᐋᒋᒧᐃᐧᓂᓈᐣ?
[17] ᐁᑯᓯ ᒫᑲ ᑖᐯᐧᑕᒧᐃᐧᐣ ᐅᐦᒋᐸᔨᐤ ᐁ ᐯᑕᒥᕽ, ᒥᓇ ᐯᑕᒧᐃᐧᐣ ᐅᐟ ᐃᑌᐧᐃᐧᐣ ᐅᐦᒋ ᙭.
[18] ᒫᑲ ᓂᐟ ᐃᑖᐧᐣ, ᓇᒪ ᒋ ᑭ ᐅᐦᒋ ᐯᑕᒪᐧᐠ? ᒋᑫᒫ, ᑖᐯᐧ, ᐅ ᐯᐦᑖᑯᓯᐃᐧᓂᐋᐧᐤ ᑭ ᓯᐯᐧᐸᔨᐤ ᒥᓯᐁᐧᐢᑲᒥᐠ, ᒥᓇ ᐅᐟ ᐃᑌᐧᐃᐧᓂᐋᐧᐊᐧ ᐁ ᑳᑭᓯᐸᐢᑲᒥᑳᐠ ᐊᐢᑭ.
[19] ᒫᑲ ᓂᐟ ᐃᑖᐧᐣ, ᓇᒪ ᒋ ᐃᐢᕒᐁᐃᓬ ᑭ ᑭᐢᑫᔨᑕᑦ? ᓂᑳᐣ ᒧᓯᐢ ᐃᑌᐧᐤ, ᑭ ᑲ ᐃᓴᐋᐧᓇᑫᔨᒧᐃᑎᓈᐋᐧᐤ ᐊᓂᑭ ᐅᐦᒋ ᐁᑳ ᑳ ᓇᔦᐢᑕᐊᐧᐢᑳᓀᓯᒋᐠ, ᐊᔨᓯᔨᓂᐊᐧᐠ ᐅᐦᒋ ᐁᑳ ᑳ ᐅᓂᓯᑐᑕᒧᐃᐧᓂᒋᐠ ᑭ ᑲ ᑭᓯᐋᐧᐃᑎᓈᐋᐧᐤ.
[20] ᐊᐩᓵᔭ ᒫᑲ ᒥᑐᓂ ᓱᑫᔨᒧ, ᒥᓇ ᐃᑌᐧᐤ, ᓂ ᑭ ᒥᐢᑳᑲᐧᐠ ᐊᓂᑭ ᐁᑳ ᑳ ᓇᓈᑐᓇᐃᐧᒋᐠ; ᓂ ᑭ ᐊᑎ ᓂᓯᑕᐃᐧᓈᑲᐧᐠ ᐊᓂᑭ ᐁᑳ ᑳ ᓇᑐᐢᑲᐃᐧᒋᐠ.
[21] ᒫᑲ ᐃᐧᔮ ᐃᐢᕒᐁᐃᓬᐊ ᐃᑌᐤ, ᑲᐯᑭᓯᐠ ᓂ ᑭ ᓱᐃᐧᓂᐢᑫᔨᐢᑕᐋᐧᐊᐧᐠ ᐁ ᓴᓯᐱᑕᑭᐠ ᒥᓇ ᐁ ᐋᓀᐧᑕᐢᑭᒋᐠ ᐊᔨᓯᔨᓂᐊᐧᐠ.