[1] ᐁᑯᑕ ᒫᑲ ᒋᓴᐢ ᐁ ᐊᑎ ᐱᒧᐦᑌᐟ, ᑭ ᐋᐧᐸᒣᐤ ᐯᔭᐠ ᓈᐯᐊᐧ ᐁᑳ ᐁ ᐋᐧᐱᔨᐟ ᐁᑯᓯ ᐁ ᑭ ᐃᓯ ᓂᐦᑖᐃᐧᑭᔨᐟ.
[2] ᐅ ᑭᐢᑭᓄᐦᐊᒫᐋᐧᑲᓇ ᒫᑲ ᑭ ᑲᑫᐧᒋᒥᐠ, ᐁ ᐃᑌᐧᔨᐟ, ᕒᐋᐸᐩ, ᐊᐁᐧᓇ ᑳ ᒪᒋᑐᑕᕽ, ᐊᐊᐧ ᐊᔨᓯᔨᓂᐤ, ᐊᐦᐳ ᐅ ᓂᑭᐃᑲᐧ, ᑳ ᑭ ᐅᐦᒋ ᐃᓯ ᓂᐦᑖᐃᐧᑭᐟ ᐁᑳ ᐁ ᐋᐧᐱᐟ?
[3] ᒋᓴᐢ ᑭ ᓇᐢᑫᐧᐊᐧᓯᒣᐤ, ᓇᒪᐃᐧᔭ ᐊᐊᐧ ᐊᔨᓯᔨᓂᐤ ᐁ ᑭ ᐅᐦᒋ ᒪᒋᑐᑕᕽ, ᐊᐦᐳ ᐅᓂᑭᐃᑲᐧ: ᒫᑲ ᑭᓭᒪᓂᑑ ᐅᐟ ᐊᑐᐢᑫᐃᐧᓇ ᑭᑕ ᐅᐦᒋ ᐸᔭᑌ ᐋᐧᐸᐦᑕᒧᐦᐟ ᑭ ᐅᐦᒋ ᐃᓯ ᐊᔮᐤ.
[4] ᓂ ᑳ ᐊᑐᐢᑳᑌᐣ ᐅᐟ ᐊᑐᐢᑫᐃᐧᓇ ᐊᓇ ᑳ ᐯ ᐃᓯᑎᓴᐦᐅᐟ, ᐁ ᒣᑲᐧ ᑭᓯᑳᐠ: ᐯ ᑎᐱᐢᑳᐤ, ᐁᑯᑕ ᓇᒪᐃᐧᔭ ᐊᐃᐧᔭᐠ ᐊᔨᓯᔨᓂᐤ ᑭᑕ ᑭ ᐊᑐᐢᑫᐤ.
[5] ᐃᔨᑯᕽ ᐁ ᐊᔮᔮᐣ ᐅᑕ ᐊᐢᑭᕽ, ᓂᔭ ᓂ ᐊᐧᓭᐢᑫᐣ ᐅᒪ ᐊᐢᑭ.
[6] ᐃᐢᐱ ᒫᑲ ᐅᒥᓯ ᑳ ᐃᑌᐧᐟ, ᑭ ᓯᐦᑯ ᒧᒋᕽ, ᐊᓯᐢᑭ ᐁ ᑭ ᐅᓯᑖᐟ ᓯᐦᑯᐃᐧᐣ ᐅᐦᒋ, ᐁ ᑭ ᓯᓵᐧᐱᓈᐟ ᒫᑲ ᐊᓂᐦᐃ ᐁᑳ ᑳ ᐋᐧᐱᔨᐟ ᐊᔨᓯᔨᓂᐊᐧ ᐊᓯᐢᑭ ᐅᐦᒋ.
[7] ᐅᒥᓯ ᒫᑲ ᑭ ᐃᑌᐤ, ᓯᐯᐧᐦᑌ, ᑭᓯᐯᑭ ᓴᐃᓬᐅᐊᑦ ᐊᐧᔨᐯᔮᕽ, (ᐁᐊᐧᑯ ᐁ ᐃᑌᐧᐢᑕᒪᐋᐧᑕᒥᕽ, ᑳ ᐃᑎᓯᐅᐦᐟ). ᑭ ᓯᐯᐧᑌᐤ ᒫᑲ, ᒥᓇ ᑭ ᑭᓯᐯᑭᐤ, ᐁᑯᓯ ᐯ ᐃᑐᐦᑌᐤ ᐁ ᐯ ᐋᐧᐱᐟ.
[8] ᐃᐧᒋᔨᓂᐊᐧ ᒫᑲ, ᒥᓇ ᑲᔭᑌ ᑳ ᑭ ᐋᐧᐸᒫᒋᐠ ᐁ ᒣᑲᐧ ᐸᑯᓯᑖᐧᔨᐟ, ᐅᒥᓯ ᑭ ᐃᑌᐧᐊᐧᐠ, ᓇᒪᔦᐤ ᒋ ᐊᐊᐧ ᑳ ᑭ ᐊᐱᐟ ᐁ ᐸᑯᓯᑕᐧᐟ?
[9] ᐊᑎᐦᐟ ᒫᑲ ᑭ ᐃᑌᐧᐊᐧᐠ, ᐁᐊᐧᑯ ᐊᐊᐧ: ᑯᑕᑲᐠ ᑭ ᐃᑌᐧᐊᐧᐠ, ᐁᑯᓯ ᐃᓯᓈᑯᓯᐤ: ᒫᑲ ᐃᐧᔭ ᑭ ᐃᑌᐧᐤ, ᓂᔭ ᐁᐊᐧᑯ.
[10] ᐅᒥᓯ ᒫᑲ ᑭ ᐃᑌᐊᐧᐠ, ᑖᓂᓯ ᑳ ᐃᓯ ᔪᑌᓂᑳᑌᑭ ᑭᐢᑭᓯᑲᐧ?
[11] ᑭ ᓇᐢᑫᐧᐊᐧᓯᒣᐤ ᒫᑲ ᐅᒥᓯ ᐁ ᑭ ᐃᑌᐧᐟ, ᐊᔨᓯᔨᓂᐤ ᒋᓴᐢ ᑳ ᐃᓯᔨᐦᑳᓱᐟ ᐊᓯᐢᑭ ᑭ ᐅᓯᑖᐤ, ᐁ ᑭ ᓯᓵᐧᐱᓂᐟ ᒫᑲ, ᐁᑯᓯ ᓂ ᑭ ᐃᑎᐠ, ᐃᑐᐦᑌ ᓴᐃᓬᐅᐊᑦ ᐊᐧᔨᐯᔮᕽ, ᑭᓯᐯᑭ ᒫᑲ: ᓂ ᑭ ᐃᑐᐦᑖᐣ ᒫᑲ ᐁ ᑭ ᑭᓯᐯᑭᔮᐣ, ᐁᑯᓯ ᓂ ᑭ ᐋᐧᐱᐣ.
[12] ᐁᑯᓯ ᒫᑲ ᑭ ᐃᑌᐋᐧᐠ, ᑕᓂᑌ ᐁᔮᐟ? ᐅᒥᓯ ᑭ ᐃᑌᐧᐤ, ᓇᒪᐃᐧᔭ ᓂ ᑭᐢᑫᔨᑌᐣ.
[13] ᑭ ᐯᑕᒪᐁᐧᐊᐧᐠ ᒫᑲ ᐸᕒᐊᓯᐊᐧ ᐊᓂᐦᐃ ᑲᔭᑌ ᐁᑳ ᑳ ᑭ ᐋᐧᐱᔨᐟ
[14] ᐊᔭᒥᐦᐁᑭᓯᑲᐤ ᒫᑲ ᐁᑯᐢᐱ ᒋᓴᐢ ᑳ ᑭ ᐅᓯᑖᐟ ᐊᓯᐢᑭ, ᒥᓇ ᐁ ᑭ ᔪᑌᓇᒫᐧᐟ ᐅᐢᑭᓯᑯᔨᐊᐧ.
[15] ᒥᓇ ᒫᑲ ᐸᕒᐊᓯᐊᐧᐠ ᑭ ᑲᑫᐧᒋᒣᐊᐧᐠ, ᑖᓂᓯ ᑳ ᑭ ᐃᓯ ᐋᐧᐱᔨᐟ. ᐅᒥᓯ ᒫᑲ ᑭ ᐃᑌᐤ, ᑭ ᐊᐢᑖᐤ ᐊᓯᐢᑭ ᓂᐢᑭᓯᑯᕽ, ᐁᑯᓯ ᓂ ᑭ ᑭᓯᐯᑭᐣ, ᓂ ᑭ ᐋᐧᐱᐣ ᒫᑲ.
[16] ᐁᑯᓯ ᐊᑎᐦᐟ ᐸᕒᐊᓯᐊᐧᐠ ᑭ ᐃᑌᐧᐊᐧᐠ, ᐊᐊᐧ ᐊᔨᓯᔨᓂᐤ ᓇᒪᐃᐧᔭ ᑭᓭᒪᓂᑐᕽ ᐅᐦᒋᐤ, ᒋᑫᒪ ᓇᒪᐃᐧᔭ ᑲᓇᐁᐧᔨᑕᑦ ᐊᔭᒥᐦᐁᑭᓯᑲᐤ. ᑯᑕᑲᐠ ᑭ ᐃᑌᐧᐊᐧᐠ, ᑖᓂᓯ ᐊᔨᓯᔨᓂᐤ ᐁ ᒪᒋ ᐃᓯᐦᒋᑫᐢᑭᐟ ᑫ ᑭ ᐃᓯ ᑲᐢᑭᑖᐣ ᑭᑕ ᑑᑕᕽ ᐅᐦᐃ ᒪᒪᐦᑖᐃᐧ ᐃᓯᐦᒋᑫᐃᐧᓇ? ᐸᐱᑐᐢ ᒫᑲ ᑭ ᐊᔨᑌᔨᒣᐊᐧᐠ.
[17] ᒥᓇ ᒫᑲ ᐅᒥᓯ ᐃᑌᐊᐧᐠ ᐁᑳ ᑳ ᑭ ᐋᐧᐱᔨᐟ ᐊᔨᓯᔨᓂᐊᐧ, ᑖᓂᓯ ᐁᑌᔨᒪᐟ ᑭᔭ ᐊᓂᒪ ᐁ ᑭ ᔪᑌᓇᒫᐢᐠ ᑭᐢᑭᓯᑲᐧ? ᐅᒥᓯ ᑭ ᐃᑌᐤ, ᐅᑭᐢᑭᐁᐧᐦᐃᑫᐃᐧᐤ.
[18] ᒫᑲ ᒍᐊᐧᐠ ᓇᒪᐃᐧᔭ ᑭ ᑖᐯᐧᑕᒪᐧᐠ ᑳ ᐃᑖᒋᒥᒥᐦᐟ ᐁᑳ ᐁ ᑭ ᐋᐧᐱᔨᐟ, ᒥᓇ ᐁ ᑭ ᒥᔨᒥᐦᐟ ᐋᐧᐱᐃᐧᐣ, ᐹᑎᒪ ᐱᑯ ᑳ ᓇᑐᒫᒋᐠ ᐅᓂᑭᐃᑯᔨᐊᐧ ᐊᓂᐦᐃ ᑳ ᑭ ᒥᔨᒥᐦᐟ ᐋᐧᐱᐃᐧᐣ.
[19] ᒥᓇ ᑳ ᑲᑫᐧᒋᒫᒋᐠ ᐁ ᐃᑌᐧᒋᐠ, ᐁᐊᐧᑯ ᒋ ᐊᐊᐧ ᑭᑯᓯᓯᐋᐧᐤ, ᑳ ᐃᑌᐧᔦᐠ ᐁᑳ ᐁ ᑭ ᐋᐧᐱᐟ ᐁ ᐃᓯ ᓂᐦᑖᐃᐧᑭᐟ? ᑖᓂᓯ ᒫᑲ ᐁᑲᐧ ᐁᓯ ᐋᐧᐸᐦᑕᕽ?
[20] ᐅᓂᑭᐃᑲᐧ ᑭ ᓇᐢᑫᐧᐊᐧᓯᒣᔨᐊᐧ ᐅᒥᓯ ᐁ ᑭ ᐃᑖᔨᐟ, ᓂ ᑭᐢᑫᔨᑌᓈᐣ ᓂᔭᓈᐣ ᐊᐊᐧ ᓂ ᑯᓯᓯᓇᐣ, ᐁᑳ ᑳ ᑭ ᐋᐧᐱᐟ ᐁ ᓂᑕᐁᐧᑭᐟ:
[21] ᑖᓂᓯ ᒫᑲ ᐁᑲᐧ ᑳ ᐃᓯ ᐋᐧᐱᐟ ᓇᒪᐃᐧᔭ ᓂ ᑭᐢᑫᔨᑌᓈᐣ; ᐊᐦᐳ ᐊᐁᐧᓂᐃ ᑳ ᑭ ᔪᑌᓇᒥᔨᐟ ᐅᐢᑭᓯᑲᐧ, ᓇᒪᐃᐧᔭ ᓂ ᑭᐢᑫᔨᑌᓈᐣ: ᐁᑯᔨᑯᕽ ᑭᓭᔮᑎᓯᐤ; ᑲᑫᐧᒋᒥᕽ: ᐃᐧᔭ ᑭ ᑳ ᐃᐧᐦᑕᒫᑯᐋᐧᐤ.
[22] ᐁᑯᓯ ᐅᒪ ᑳ ᐃᑌᐧᔨᐟ ᐅ ᓂᑭᐃᑲᐧ, ᒋᑫᒪ ᑭ ᑯᐢᑌᔨᐊᐧ ᒍᐊᐧ; ᐃᐧᔭ ᓵᓴᐩ ᒍᐊᐧᐠ ᑭ ᐃᑕᓱᐁᐧᐊᐧᐠ, ᑭᐢᐱᐣ ᐊᐃᐧᔭᐠ ᐃᑌᐧᒋ ᐁᐊᐧᑯ ᐊᐊᐧ, ᐁᑯᓯ ᑫ ᐊᐧᔭᐃᐧᐁᐧᐱᓂᐦᐟ ᐊᔭᒥᐦᐁᐃᐧᑲᒥᑯᕽ ᐅᐦᒋ.
[23] ᐁᐊᐧᑯ ᒫᑲ ᑳ ᐅᐦᒋ ᐃᑌᐧᔨᐟ ᐅᓂᑭᐃᑲᐧ, ᐁᑯᔨᑯᕽ ᑭᓭᔮᑎᓯᐤ; ᑲᑫᐧᒋᒥᕽ.
[24] ᒥᓇ ᒫᑲ ᑭ ᓇᑐᒣᐊᐧᐠ ᐊᓂᐦᐃ ᓈᐯᐊᐧ ᐁᑳ ᑳ ᑭ ᐋᐧᐱᔨᐟ, ᐅᒥᓯ ᐁ ᑭ ᐃᑖᒋᐠ, ᒥᐩ ᑭᓭᒪᓂᑐ ᓇᓈᐢᑯᒧᐃᐧᐣ; ᓂ ᑭᐢᑫᔨᑌᓈᐣ ᐊᐊᐧ ᐊᔨᓯᔨᓂᐤ ᐁ ᒪᒋ ᐃᓯᐦᒋᑫᐢᑭᐟ.
[25] ᑭ ᓇᐢᑫᐧᐊᐧᓯᒣᐤ ᒫᑲ ᐅᒥᓯ ᐁ ᑭ ᐃᑖᐟ, ᑭᐢᐱᐣ ᒣᒋ ᐃᓯᐦᒋᑫᐢᑭᑫᐧ, ᐊᐦᐳ ᐁᑳ, ᓇᒪᐃᐧᔭ ᓂ ᑭᐢᑫᔨᑌᐣ; ᐯᔭᐠ ᑫᑲᐧᐩ ᓂ ᑭᐢᑫᔨᑌᐣ, ᐁᑳ ᐁ ᑭ ᐋᐧᐱᔮᐣ, ᐁᑲᐧ ᒫᑲ ᓂ ᐋᐧᐱᐣ.
[26] ᐁᑯᓯ ᒫᑲ ᒥᓇ ᑭ ᐃᑌᐊᐧᐠ, ᑖᓂᓯ ᑳ ᐃᐦᑑᑖᐢᐠ? ᑖᓂᓯ ᑳ ᐃᓯ ᔪᑌᓇᕽ ᑭᐢᑭᓯᑲᐧ?
[27] ᑭ ᓇᐢᑫᐧᐊᐧᓯᒣᐤ ᒫᑲ, ᓵᓴᐩ ᑭ ᑭ ᐃᐧᐦᑕᒫᑎᓈᐋᐧᐤ, ᒫᑲ ᓇᒪᐃᐧᔭ ᑭ ᑭ ᓇᑐᑌᓈᐋᐧᐤ; ᑖᓀᑭ ᒥᓇ ᑳ ᐃᐧ ᐯᐦᑕᒣᐠ? ᑭᐢᑕᐋᐧᐤ ᒋ ᑭ ᑳ ᐅᑭᐢᑭᓄᐦᐊᒪᐋᐧᑲᓂᒥᑯᐋᐧᐤ?
[28] ᐁᑲᐧ ᒫᑲ ᑳ ᑭᑳᒪᒋᐠ ᐁ ᐃᑖᒋᐠ, ᑭᔭ ᑯ ᑭᐢᑭᓄᐦᐊᒪᐋᐧᑲᓂᒥᐠ; ᓂᔭᓈᐣ ᒫᑲ ᒧᓯᐢ ᓂ ᑭᐢᑭᓄᐦᐊᒫᑯᓈᐣ.
[29] ᓂ ᑭᐢᑫᔨᑌᓈᐣ ᑭᓭᒪᓂᑐ ᐁ ᑭ ᑭᑐᑖᐟ ᒧᓯᓴ: ᐊᐊᐧ ᒫᑲ ᐊᔨᓯᔨᓂᐤ, ᓇᒪᐃᐧᔭ ᓂ ᑭᐢᑫᔨᑌᓈᐣ ᐃᑌ ᐁᐧᐦᒋᐟ.
[30] ᐊᓇ ᒫᑲ ᐊᔨᓯᔨᓂᐤ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᒪᒪᐢᑲᑎᑲᐧᐣ ᑖᐯᐧ ᐅᒪ, ᐁᑳ ᐁ ᑭᐢᑫᔨᒫᔦᐠ ᐃᑌ ᐁᐧᐦᒋᐟ ᐁᔨᐁᐧᕽ ᒫᑲ ᐁ ᑭ ᔪᑌᓇᕽ ᓂᐢᑭᓯᑲᐧ.
[31] ᑭ ᑭᐢᑫᔨᑌᓈᓇᐤ ᐁᑳ ᑭᓭᒪᓂᑐ ᐁ ᓇᑐᑕᐊᐧᐟ ᑳ ᒪᒑᑎᓯᔨᐟ: ᒫᑲ ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐊᔭᒥᐦᐁᐢᑕᐋᐧᒋ ᑭᓭᒪᓂᑐᐊᐧ, ᒥᓇ ᑐᑕᑭ ᐅᐟ ᐃᑌᔨᑕᒧᐃᐧᓂᔨᐤ, ᐁᐊᐧᑯ ᓀᑐᑖᑯᐟ.
[32] ᐊᐢᐱᐣ ᑳ ᐯ ᐊᐢᑭᐊᐧᕽ ᓇᒪᐃᐧᑳᐨ ᐅᐦᒋ ᐯᑕᑲᐧᐣ ᐊᐃᐧᔭᐠ ᐊᔨᓯᔨᓂᐤ ᑭᑕ ᔪᑌᓇᒪᐋᐧᐟ ᐅᐢᑭᓯᑯᔨᐊᐧ ᑳ ᑭ ᐃᓯ ᓂᐦᑖᐃᐧᑭᔨᐟ ᐁᑳ ᐁ ᐋᐧᐱᔨᐟ.
[33] ᑭᐢᐱᐣ ᐊᐊᐧ ᐊᔨᓯᔨᓂᐤ ᐁᑳ ᑭᓭᒪᓂᑐᕽ ᐅᐦᒋᐟ ᓇᒪ ᑫᑲᐧᐩ ᑭᑕ ᑭ ᑐᑕᑦ.
[34] ᑭ ᓇᐢᑫᐧᐊᐧᓯᒣᐊᐧᐠ ᒫᑲ ᐅᒥᓯ ᐁ ᑭ ᐃᑖᒋᐠ, ᒥᑐᓂ ᒪᒋ ᐃᓯᐁᐧᐱᓯᐃᐧᓂᕽ ᑭ ᑭ ᓂᐦᑖᐃᐧᑭᐣ, ᑭ ᑭᐢᑭᓄᐦᐊᒫᐃᐧᓇᐣ ᒋ ᒫᑲ ᓂᔭᓈᐣ? ᑭ ᐊᐧᔭᐃᐧᐁᐧᐱᓀᐊᐧᐠ ᒫᑲ.
[35] ᒋᓴᐢ ᒫᑲ ᑭ ᐯᑕᑦ ᐁ ᑭ ᐊᐧᔭᐃᐧᐁᐧᐱᓇᔨᐟ; ᐃᐢᐱ ᒫᑲ ᑳ ᒥᐢᑲᐊᐧᐟ, ᐅᒥᓯ ᑭ ᐃᑌᐤ, ᑭ ᑖᐯᐧᔦᔨᒪᐤ ᒋ ᑭᓭᒪᓂᑐᐃᐧᑯᓯᓵᐣ?
[36] ᑭ ᓇᐢᑫᐧᐊᐧᓯᒣᐤ ᒫᑲ ᐅᒥᓯ ᐁ ᑭ ᐃᑌᐧᐟ, ᐊᐁᐧᓈᓇ, ᑌᐯᔨᐦᒋᑫᔭᐣ, ᑭᑕ ᑖᐯᐧᔦᔨᒪᐠ?
[37] ᒋᓴᐢ ᒫᑲ ᐅᒥᓯ ᑭ ᐃᑌᐤ, ᑭ ᑭ ᐋᐧᐸᒫᐤ, ᐁᐊᐧᑯ ᒫᑲ ᐊᐊᐧ ᑳ ᐊᔭᒥᐃᐢᐠ.
[38] ᐅᒥᓯ ᒫᑲ ᑭ ᐃᑌᐤ, ᑌᐯᔨᐦᒋᑫᔭᐣ, ᓂ ᑖᐯᐧᑌᐣ. ᐁᑯᓯ ᐁ ᑭ ᐅᒋᐦᒋᐦᑲᐧᓇᐱᐢᑕᐋᐧᐟ.
[39] ᒋᓴᐢ ᒫᑲ ᐅᒥᓯ ᑭ ᐃᑌᐧᐤ, ᐅᔭᓱᐋᐧᓯᐁᐧᐃᐧᐣ ᓂ ᐯ ᐅᐦᒋ ᐃᑐᐦᑖᐣ ᐅᑕ ᐊᐢᑭᕽ, ᐊᓂᑭ ᒫᑲ, ᐁᑳ ᑳ ᐋᐧᐱᒋᐠ ᑭᑕ ᐋᐧᐱᒋᐠ; ᐊᓂᑭ ᒫᑲ ᒥᓇ ᑳ ᐋᐧᐱᒋᐠ ᑭᑕ ᐁᑳ ᐋᐧᐱᒋᐠ.
[40] ᐊᑎᐦᐟ ᒫᑲ ᐸᕒᐊᓯᐊᐧ ᑳ ᐃᐧᒉᐊᐧᒋᐠ ᐁ ᐯᐦᑕᐦᑭᐠ ᐅᐦᐃ ᐃᑌᐧᐃᐧᓇ, ᑭ ᐃᑌᐊᐧᐠ. ᓂᔭᓈᐣ ᒋ ᒥᓇ ᓇᒪ ᓂ ᐊᐧᐱᓈᐣ?
[41] ᒋᓴᐢ ᒫᑲ ᐅᒥᓯ ᑭ ᐃᑌᐤ, ᑭᐢᐱᐣ ᐁᑳ ᐋᐧᐱᔦᐠ, ᓇᒪᐃᐧᔭ ᑭ ᑳ ᐊᔮᑖᐋᐧᐤ ᒪᒋᐃᑎᐃᐧᐣ; ᒫᑲ ᐁᑲᐧ ᑭᐟ ᐃᑖᐧᓈᐋᐧᐤ, ᓂ ᐋᐧᐱᓈᐣ; ᐁᑯᓯ ᒫᑲ ᐃᐦᑕᑲᐧᐣ ᑭ ᒪᒋᐃᑎᐃᐧᓂᐋᐧᐤ.