[1] ᒪᐧᔦᐢ ᒫᑲ ᐁ ᐅᑎᐦᒋᐸᔨᐠ ᒪᔮᐢᑯᑖᑐ ᐃᐧᐦᑯᐦᑐᐃᐧᐣ, ᒋᓴᐢ ᐁ ᑭᐢᑫᔨᑕᕽ ᓵᓴᐩ ᐁ ᐅᑎᐦᒋᐸᔨᔨᐠ ᐅ ᑎᐸᐃᑲᐣ ᐃᑕ ᑭᑕ ᓇᑲᑕᕽ ᐅᒪ ᐊᐢᑭ, ᑭᑕ ᓈᑖᐟ ᐁᐧᔪᑖᐃᐧᕽ, ᐁ ᑭ ᓵᑭᐋᐟ ᑳ ᐊᔮᐋᐧᐟ ᐅᑕ ᐊᐢᑭᕽ ᑳ ᐊᔭᔨᐟ, ᑭ ᓵᑭᐦᐁᐤ ᐱᔨᐢ ᐁ ᐳᓂ ᐃᐧᒉᐊᐧᐟ.
[2] ᒣᑳᐧᐨ ᒫᑲ ᐁ ᑎᐱᐢᑭ ᒥᒋᓱᒋᐠ, ᓵᓴᐩ ᐁ ᑭ ᐊᐢᑕᐟ ᒪᒑᔭ ᐅ ᑌᐃᔨᕽ ᒍᑕᐢ ᐃᐢᑲᕒᐃᔭᑕ, ᓴᐃᒪᐣ ᐅᑯᓯᓴ, ᑭᑕ ᒥᓯᒫᔨᐟ;
[3] ᒋᓴᐢ ᐁ ᑭᐢᑫᔨᑕᕽ ᑲᐦᑭᔭᐤ ᑫᑲᐧᐩ ᐁ ᑭ ᒥᔨᑯᐟ ᐅᒋᒋᕽ ᐁᐧᔪᑖᐃᐧᕽ, ᒥᓇ ᑭᓭᒪᓂᑐᕽ ᐁ ᑭ ᐯ ᐅᐦᒋᐟ, ᒥᓇ ᐁ ᓈᑖᐟ ᑭᓭᒪᓂᑐᐊᐧ;
[4] ᑎᐱᐢᑭ ᒥᒋᓱᐃᐧᓂᕽ ᑭ ᐅᐦᒋ ᐸᓯᑯ, ᐁ ᑭ ᑫᑕᓵᑫᐟ, ᐁᑯᓯ ᑭ ᐅᑎᓇᑦ ᑲᓯᑲᐧᓂᔨᐤ, ᐁ ᑭ ᐸᑲᐧᑌᐦᐅᑐᑕᕽ.
[5] ᐁᑲᐧ ᒫᑲ ᑭ ᓯᑭᓇᑦ ᓂᐱᔨᐤ ᐅᔮᑲᓂᕽ, ᐁᑯᓯ ᐁ ᑭ ᑭᓯᐯᑭᓇᒫᐧᐟ ᐅᓯᑎᔨᐊᐧ ᐅ ᑭᐢᑭᓄᐦᐊᒪᐋᐧᑲᓇ, ᒥᓇ ᐁ ᑭ ᑲᓯᓯᑌᐊᐧᐟ ᑳᓯᑲᐧᓂᔨᐤ ᐅᐦᒋ ᑳ ᑭ ᐸᑲᐧᑌᐦᐅᑐᑕᕽ.
[6] ᐁᑯᓯ ᑭ ᐯ ᓈᑌᐤ ᓴᐃᒪᐣ ᐱᑕᕒᐊᐧ. ᐱᑕᕒ ᒫᑲ ᑭ ᐃᑌᐤ, ᑌᐯᔨᐦᒋᑫᔭᐣ, ᑭ ᑲ ᑭᓯᐯᑭᓯᑌᓂᐣ ᒋ ᓂᔭ?
[7] ᒋᓴᐢ ᑭ ᓇᐢᑫᐧᐊᐧᓯᒣᐤ, ᐅᒥᓯ ᐁ ᑭ ᐃᑕᐟ, ᐊᓂᒪ ᑳ ᑐᑕᒫᐣ ᐊᓄᐦᐨ ᓇᒪᐃᐧᔭ ᑭ ᑭᐢᑫᔨᑌᐣ: ᒫᑲ ᐹᑎᒫ ᑭ ᑲ ᑭᐢᑫᔨᑌᐣ.
[8] ᐱᑕᕒ ᐅᒥᓯ ᐃᑌᐤ, ᓇᒪᐃᐧᑳᐨ ᓂᔮ ᑭ ᑲ ᑭᓯᐯᑭᓯᑌᓂᐣ. ᒋᓴᐢ ᑭ ᓇᐢᑫᐧᐊᐧᓯᒣᐤ, ᑭᐢᐱᐣ ᐁᑳ ᑭᓯᐯᑭᓂᑕᓂ, ᓇᒪᐃᐧᔭ ᓈᐣᑕᐤ ᐃᑕ ᑯᐃᐧᒉᐋᐧᑲᓂᒥᐣ.
[9] ᓴᐃᒪᐣ ᐱᑕᕒ ᐅᒥᓯ ᐃᑌᐤ, ᑌᐯᔨᐦᒋᑫᔭᐣ, ᓇᒪᐃᐧᔭ ᐱᑯ ᓂᓯᑕ, ᒫᑲ ᒥᓇ ᓂᒋᒋᔭ, ᒥᓇ ᓂᐢᑎᑲᐧᐣ.
[10] ᒋᓴᐢ ᐅᒥᓯ ᐃᑌᐤ, ᐊᓇ ᑳ ᑭ ᑭᓯᐯᑭᐟ ᓇᒪᐃᐧᔭ ᓇᑕᐁᐧᔨᑕᑦ ᑭᑕ ᑭᓯᐯᑭᐟ ᐱᑯ ᐅᓯᑕ, ᒫᑲ ᒥᓯᐁᐧ ᐯᑭᓯᐤ: ᐁᑯᓯ ᑭ ᐯᑭᓯᓈᐋᐧᐤ ᒫᑲ ᓇᒪᐃᐧᔭ ᑲᐦᑭᔭᐤ.
[11] ᒋᑫᒫ ᑭ ᑭᐢᑫᔨᒣᐤ ᐊᓂᐦᐃ ᑫ ᒥᓯᒥᑯᐟ; ᐁᐊᐧᑯ ᒫᑲ ᑳ ᐅᐦᒋ ᐃᑌᐧᐟ, ᓇᒪᐃᐧᔭ ᑲᐦᑭᔭᐤ ᑭ ᐯᑭᓯᓈᐋᐧᐤ.
[12] ᑳ ᐳᓂ ᑭᓯᐯᑭᓯᑌᓇᐟ ᒫᑲ, ᒥᓇ ᑳ ᐅᑎᓇᕽ ᐅᐢᑯᑖᑲᐩ, ᒥᓇ ᑳ ᓇᐦᐊᐱᐟ, ᐅᒥᓯ ᑭ ᐃᑌᐤ, ᑭ ᑭᐢᑫᔨᑌᓈᐋᐧᐤ ᒋ ᐅᒪ ᑳ ᑭ ᐊᔨᑐᑖᑕᑯᐠ?
[13] ᐅᑭᐢᑭᓄᐦᐊᒫᑫᐤ ᒥᓇ ᑌᐯᔨᐦᒋᑫᐟ ᑭᐟ ᐃᓯᔨᐦᑳᓯᓈᐋᐧᐤ: ᑲᐧᔭᐢᐠ ᒫᑲ ᑭᐟ ᐃᑖᐧᓈᐋᐧᐤ; ᒋᑫᒪ ᐅᑯᑐᐃᐧ ᓂᔭ.
[14] ᑭᐢᐱᐣ ᒫᑲ ᓂᔭ ᑳ ᑎᐯᔨᐦᒋᑫᐟ ᒥᓇ ᐅᑭᐢᑭᓄᐦᐊᒫᑫᐤ ᐁ ᑭ ᑭᓯᐯᑭᓯᑌᓂᑕᑯᐠ; ᑭᐢᑕᐋᐧᐤ ᑭ ᑲ ᑭᓯᐯᑭᓯᑌᓂᑐᑕᐋᐧᐤ.
[15] ᒋᑫᒪ ᑭ ᑭ ᒥᔨᑎᓈᐋᐧᐤ ᑫ ᑭᐢᑭᓇᐋᐧᐸᐦᑕᒣᐠ, ᑭᑕ ᐊᔨᑐᑖᑐᔦᐠ ᑳ ᑭ ᐊᔨᑐᑖᑕᑯᐠ,
[16] ᑖᐯᐧ, ᑖᐯᐧ, ᑭᐟ ᐃᑎᓈᐋᐧᐤ, ᐊᑐᐢᑫᔮᑲᐣ ᓇᒪᐃᐧᔭ ᐊᐊᐧᓯᒣ ᐃᑌᔨᑖᑯᓯᐤ ᐃᐢᐱᐨ ᐅᐟ ᐅᑭᒫᒪ; ᒥᓇ ᑳ ᐯ ᐃᓯᑎᓴᐅᐦᐟ ᐃᐢᐱᐨ ᑳ ᐯ ᐃᓯᑎᓴᐦᐅᑯᐟ.
[17] ᑭᐢᐱᐣ ᑭᐢᑫᔨᑕᒣᑯ ᐅᐦᐃ, ᑭ ᓴᐁᐧᔨᑖᑯᓯᓈᐋᐧᐤ ᑭᐢᐱᐣ ᐃᑐᑖᒣᑯ.
[18] ᓇᒪᐃᐧᔭ ᑲᐦᑭᔭᐤ ᑭᐟ ᐃᑎᓈᐋᐧᐤ; ᓂ ᑭᐢᑫᔨᒪᐊᐧᐠ ᐊᓂᑭ ᑳ ᑭ ᐊᐧᐁᐧᔦᔨᒪᑭᐠ: ᒫᑲ ᑭᑕ ᑎᐱᐸᔨᐠ ᒪᓯᓇᐦᐃᑫᐃᐧᐣ, ᑳ ᐃᐧᒋ ᒥᒋᓱᒥᐟ ᐸᑫᐧᓯᑲᓇ ᓂ ᑭ ᐅᐱᓇᒫᐠ ᐅᑐᐦᑕᐣ.
[19] ᐊᓄᐦᐨ ᐅᐦᒋ, ᑭ ᐃᐧᐦᑕᒫᑎᓈᐋᐧᐤ ᒪᐧᔦᐢ ᐅᑎᐦᒋᐸᔨᐠ, ᐃᐢᐱ ᐅᑎᐦᒋᐸᔨᑭ, ᑭᑕ ᑖᐯᐧᑕᒣᐠ ᓂᔭ ᐁ ᐊᐃᐧᔮᐣ.
[20] ᑖᐯᐧ, ᑖᐯᐧ, ᑭᐟ ᐃᑎᓈᐋᐧᐤ, ᐊᓇ ᐁᐧᑎᓈᐟ ᐊᐃᐧᔭ ᑳ ᐃᓯᑎᓴᐅᒪᐠ ᓂᔭ ᓅᑎᓂᐠ; ᒥᓇ ᐊᓇ ᐁᐧᑎᓂᐟ ᐅᑎᓀᐤ ᑳ ᐯ ᐃᓯᑎᓴᐅᔨᐟ.
[21] ᐃᐢᐱ ᒫᑲ ᒋᓴᐢ ᐅᒪ ᑳ ᐃᑌᐧᐟ, ᑭ ᒥᑯᐢᑳᑌᔨᑕᑦ ᐅᐟ ᐊᒐᐦᑯᕽ, ᐁᑯᓯ ᑭ ᐃᐧᐦᑕᑦ, ᐅᒥᓯ ᐁ ᐃᑌᐧᐟ, ᑖᐯᐧ, ᑖᐯᐧ, ᑭᐟ ᐃᑎᓈᐋᐧᐤ, ᐯᔭᐠ ᐅᒪ ᑲ ᐃᑕᓯᔦᐠ ᓂ ᑲ ᐊᐧᔦᓯ ᐸᑭᑎᓂᐠ.
[22] ᑭᐢᑭᓄᐦᐊᒪᐋᐧᑲᓇᐠ ᒫᑲ ᑭ ᑲᑲᓇᐊᐧᐸᑐᐊᐧᐠ, ᐁ ᐊᐧᐊᐧᓀᔨᑕᐦᑭᐠ ᐊᐁᐧᔨᐊᐧ ᑳ ᐃᑖᔨᐟ.
[23] ᑭ ᐊᓱᓯᒧᔨᐊᐧ ᒫᑲ ᒋᓴᐢ ᐊᐧᐢᑭᑲᓂᕽ ᐯᔭᐠ ᐅ ᑭᐢᑭᓄᐦᐊᒪᐋᐧᑲᓇ, ᒋᓴᐢ ᑳ ᓴᑭᐊᐟ.
[24] ᓴᐃᒪᐣ ᐱᑕᕒ ᒫᑲ ᑭ ᐃᑎᓂᑫᐢᑕᐁᐧᐤ, ᑭᑕ ᑲᑫᐧᒋᒫᔨᐟ ᐊᐁᐧᔨᐊᐧ ᑳ ᐃᑕᔨᐟ.
[25] ᐊᓇ ᒫᑲ ᑳ ᐊᓱᓯᒧᐟ ᒋᓴᓴ ᐊᐧᐢᑭᑲᓂᔨᕽ ᐅᒥᓯ ᐃᑌᐤ, ᑌᐯᔨᐦᒋᑫᔭᐣ. ᐊᐁᐧᓈᓇ?
[26] ᒋᓴᐢ ᑭ ᓇᐢᑫᐧᐊᐧᓯᒣᐤ, ᐁᐊᐧᑯ ᐊᓇ ᑫ ᒥᔭᐠ ᐊᐢᐸᒋᑲᓂᔨᐤ ᑭ ᑭᑖᓇᒪᐧᑭ. ᐃᐢᐱ ᒫᑲ ᑳ ᑭᑕᓇᕽ ᐊᐢᐸᒋᑲᓂᔨᐤ, ᑭ ᒥᔦᐤ ᒍᑕᐢ ᐃᐢᑳᕒᐃᔭᑕ, ᓴᐃᒪᐣ ᐅᑯᓯᓴ.
[27] ᑳ ᐳᓂ ᒥᒋᐟ ᐊᐢᐸᒋᑲᓂᔨᐤ ᑭ ᐱᒋᔭᐁᐧᐢᑲᐠ ᓭᑕᓇ. ᒋᓴᐢ ᒫᑲ ᐅᒥᓯ ᑭ ᐃᑌᐤ, ᑳ ᐃᐧ ᐃᑐᑕᒪᐣ, ᑭᔨᐱ ᐃᑐᑕ.
[28] ᓇᒪ ᒫᑲ ᐊᐃᐧᔭ ᑳ ᐃᐧᑕᐱᒥᑯᐟ ᒥᒋᓱᐃᐧᓇᑎᑯᕽ ᑭᐢᑫᔨᑕᒥᔨᐊᐧ ᑫᑲᐧᐩ ᑳ ᐅᐦᒋ ᐃᑖᐟ.
[29] ᐊᑎᐦᐟ ᒫᑲ ᐅᒥᓯ ᑭ ᐃᑌᔨᑕᒪᐧᐠ, ᒋᑫᒪ ᒍᑕᐢ ᐁ ᐊᔮᐟ ᒥᐊᐧᔨᐤ, ᒋᓴᐢ ᐁ ᑭ ᐃᑕᐟ ᐊᑕᐁᐧ ᑫ ᐊᐸᒋᑕᔭᕽ ᐃᐧᐦᑯᐦᑐᐃᐧᓂᕽ; ᐊᐦᐳ, ᑫᑲᐧᐩ ᑭᑕ ᒥᔮᐟ ᐅᑭᑎᒫᑭᓯᐊᐧ.
[30] ᐃᐧᔭ ᒫᑲ ᐃᐢᐱ ᑳ ᐅᑎᓇᕽ ᐊᐢᐸᒋᑲᓂᔨᐤ, ᐁᑯᓯ ᓭᒫᐠ ᑭ ᐊᑎ ᐊᐧᔭᐃᐧᐤ: ᓵᓴᐩ ᒫᑲ ᐁ ᑎᐱᐢᑳᐠ.
[31] ᐃᐢᐱ ᒫᑲ ᑳ ᐊᑎ ᐊᐧᔭᐃᐧᔨᐟ, ᒋᓴᐢ ᑭ ᐃᑌᐧᐤ, ᐁᑲᐧ ᐃᓴ ᐃᔨᓂᐃᐧᑯᓯᓵᐣ ᑭᐢᑌᔨᑖᑯᐋᐤ, ᒥᓇ ᑭᓭᒪᓂᑐ ᑭᐢᑌᔨᑖᑯᐋᐤ ᐃᐧᔭ ᐅᐦᒋ;
[32] ᐁᑯᓯ ᑭᓭᒪᓂᑐ ᑭᑕ ᑭᐢᑌᔨᑖᑯᐁᐤ ᑭᑭ ᐃᐧᔭ ᒥᓇ ᓭᒫᐠ ᑭᑕ ᑭᐢᑌᔨᑖᑯᐁᐤ.
[33] ᐊᐱᐢᑕᐋᐧᓯᓯᑎᐠ, ᑫᔮᐱᐨ ᐊᒋᔭᐤ ᑭ ᐃᐧᒉᐃᐧᑎᓈᐋᐧᐤ. ᑭ ᑲ ᓇᓈᑐᓇᐃᐧᓈᐋᐧᐤ; ᒣᐧᐦᒋ ᑳ ᑭ ᐃᑕᑭᐠ ᒍᐊᐧᐠ, ᐃᑌ ᐁᑐᑌᔮᐣ, ᓇᒪᐃᐧᔭ ᑭ ᑲ ᑭ ᐯ ᐃᑐᐦᑖᓈᐋᐧᐤ; ᐁᑯᓯ ᒥᓇ ᐊᓄᐦᐨ ᑭᔭᐋᐧᐤ ᐁᑎᑕᑯᐠ.
[34] ᐅᐢᑭ ᐅᔭᓱᐁᐧᐃᐧᐣ ᑭ ᒥᔨᑎᓈᐋᐧᐤ; ᑭᑕ ᓴᑭᐃᑐᔦᐠ; ᑳ ᑭ ᐃᓯ ᓴᑭᐦᐃᑕᑯᐠ, ᐁᑯᓯ ᒥᓇ ᑭᔭᐋᐧᐤ ᑭᑕ ᐃᓯ ᓴᑭᐃᑐᔦᐠ.
[35] ᐁᐊᐧᑯ ᒫᑲ ᑲᐦᑭᔭᐤ ᐊᔨᓯᔨᓂᐊᐧᐠ ᑫ ᐅᐦᒋ ᑭᐢᑫᔨᒥᑌᑯᐠ ᐁ ᐅᑭᐢᑭᓄᐦᐊᒪᐋᐧᑲᓂᒥᑕᑯᐠ, ᑭᐢᐱᐣ ᓵᑭᐦᐃᑐᔦᑯ.
[36] ᓴᐃᒪᐣ ᐱᑕᕒ ᐅᒥᓯ ᐃᑌᐤ, ᑌᐯᔨᐦᒋᑫᔭᐣ, ᑕᓂᑌ ᐁᑐᐦᑌᔭᐣ? ᒋᓴᐢ ᒫᑲ ᓇᐢᑫᐧᐊᐧᓯᒣᐤ, ᐃᑌ ᐁᑐᑌᔮᐣ, ᓇᒪᐃᐧᔭ ᐊᓄᐦᐨ ᑭ ᑲ ᑭ ᐱᒥᑎᓴᐦᐅᐣ; ᒫᑲ ᑭ ᑲ ᐱᒥᑎᓴᐦᐅᐣ ᐹᑎᒪ.
[37] ᐱᑕᕒ ᐅᒥᓯ ᐃᑌᐤ, ᑌᐯᔨᐦᒋᑫᔭᐣ, ᑖᓀᑭ ᐁᑳ ᑫ ᑭ ᐱᒥᑎᓴᐦᐅᑖᐣ ᐊᓄᐦᐨ? ᓂ ᑲ ᐸᑭᑎᓀᐣ ᓂ ᐱᒫᑎᓯᐃᐧᐣ ᑭᔭ ᐅᐦᒋ.
[38] ᒋᓴᐢ ᒫᑲ ᓇᐢᑫᐧᐊᐧᓯᒣᐤ, ᑭ ᑲ ᐸᑭᑎᓀᐣ ᒋ ᑭ ᐱᒫᑎᓯᐃᐧᐣ ᓂᔭ ᐅᐦᒋ? ᑖᐯᐧ, ᑖᐯᐧ, ᑭᐟ ᐃᑎᐣ, ᐸᑲᐊᑳᐧᐣ ᓇᒪᐃᐧᔭ ᑭᑕ ᐯᐦᑖᑯᓯᐤ, ᐃᔨᑯᕽ ᓂᐢᑖᐧᐤ ᑫ ᐊᓀᐧᑕᐃᐧᔭᐣ.