[1] ᐁ ᐊᑎ ᓂᐢᑐ ᑭᓯᑳᐠ ᒫᑲ ᑭ ᐃᐧᑭᑐᓈᓂᐊᐧᐣ ᑫᓇ ᑲᓬᐊᓬᐃᕽ; ᒋᓴᐢ ᒫᑲ ᐅᑳᐃᐧᔭ ᐁᑯᑕ ᑭ ᐊᔮᔨᐊᐧ:
[2] ᐁᑯᓯ ᒋᓴᐢ ᐃᐧᐢᑕ ᑭ ᓇᑐᒫᐤ, ᐊᓯᒋ ᐅ ᑭᐢᑭᓄᐦᐊᒪᐋᐧᑲᓇ ᐃᐧᑭᑐᐃᐧᓂᕽ.
[3] ᐃᐢᐱ ᒫᑲ ᓂᔪᑌᐸᔨᔨᐠ ᓱᒥᓈᐳ, ᒋᓴᐢ ᐅᑳᐃᐧᔭ ᐅᒥᓯ ᑭ ᐃᑎᐠ, ᓇᒪᐃᐧᔭ ᐊᔮᐊᐧᐠ ᓱᒥᓈᐳ.
[4] ᒋᓴᐢ ᒫᑲ ᐅᒥᓯ ᐃᑌᐤ, ᐃᐢᑫᐧᐤ, ᑫᑲᐧᐩ ᒫᑲ ᑭᔮᓇᐤ ᑫ ᐅᐦᒋ ᐸᐸᒣᔨᑕᒪᕽ ᐁᐊᐧᑯ? ᓇᒣᐢᑲᐧ ᐃᓴ ᐅᑎᐦᒋᐸᔨᐤ ᐃᔨᑯᕽ ᐁᑌᔨᑕᒫᐣ.
[5] ᐅᑳᐃᐧᔭ ᐅᒥᓯ ᐃᑌᔨᐊᐧ ᐊᑐᐢᑫᔮᑲᓇ, ᐱᑯ ᑫᑲᐧᐩ ᑫ ᐃᑎᑯᐁᐧᑫᐧ, ᐃᑐᑕᒧᐠ.
[6] ᐁᑯᑕ ᒫᑲ ᑭ ᐊᐢᑌᐊᐧ ᓂᑯᑕᐧᓯᐠ ᐊᓯᓂᐃᐧ ᓂᐱ ᐊᓯᐊᐧᒋᑲᓇ ᑳ ᐃᓯᑕᐧᒋᐠ ᒍᐊᐧᐠ ᐁ ᐯᑭᐃᓱᒋᐠ, ᓈᐣᑕᐤ ᓈᓂᓱ ᐊᐦᐳ ᓈᓂᐢᑐ ᑎᐸᐅᐹᐣ ᐁ ᐃᐢᐱᑌᔨᑖᑳᐧᑭ.
[7] ᒋᓴᐢ ᒫᑲ ᐅᒥᓯ ᐃᑌᐤ, ᓴᑲᐢᑭᓀᐸᑖᐠ ᓂᐱ ᐊᓯᐊᐧᒋᑲᓇ ᓂᐱ ᐅᐦᒋ. ᑭ ᑖᑎᐸᐢᑭᓀᐸᑖᐊᐧᐠ ᒫᑲ.
[8] ᐅᒥᓯ ᒫᑲ ᐃᑌᐤ, ᓯᑭᓇᒧᐠ ᐁᑲᐧ, ᐃᑐᑕᑕᒫᕽ ᒫᑲ ᐃᐧᑯᑫᐃᐧᑭᒫᐤ. ᑭ ᐃᑐᐦᑕᑕᒪᐁᐧᐊᐧᐠ ᒫᑲ.
[9] ᐃᐢᐱ ᒫᑲ ᐃᐧᑯᑫᐃᐧᑭᒫᐤ ᑳ ᑯᒋᐢᑕᕽ ᓂᐱ ᑳ ᑭ ᓱᒥᓈᐳᐃᐧᑖᕽ, ᓇᒪᐃᐧᔭ ᒫᑲ ᑭᐢᑫᔨᑕᑦ ᑕᓂᑌ ᑳ ᐅᒋᐸᔨᔨᐠ; (ᒫᑲ ᐊᑐᐢᑫᔮᑲᓇᐠ ᑳ ᑭ ᓯᑭᓇᑭᐠ ᑭ ᑭᐢᑫᔨᑕᒪᐧᐠ;) ᐊᓇ ᒫᑲ ᐃᐧᑯᑫᐃᐧᑭᒫᐤ ᑭ ᓇᑐᒣᐤ ᐅᐃᐧᑭᑐᐊᐧ,
[10] ᐅᒥᓯ ᒫᑲ ᐃᑌᐤ, ᑳ ᐃᑕᓯᐟ ᐊᔨᓯᔨᓂᐤ ᓂᑳᐣ ᒫᓇ ᐸᑭᑎᓇᑦ ᑳ ᒥᐋᐧᓯᓂᔨᐠ ᓱᒥᓈᐳ, ᐃᐢᐱ ᒫᑲ ᐊᔨᓯᔨᓂᐊᐧᐠ ᑳ ᒥᔪ ᒥᓂᑫᐧᑖᐧᐃᐧ, ᐁᑲᐧ ᐁᑳ ᓈᐢᐱᐨ ᑳ ᒥᐋᐧᓯᐠ; ᒫᑲ ᑭᔭ ᑭ ᑭ ᑲᓇᐁᐧᔨᑌᐣ ᑳ ᒥᐋᐧᓯᐠ ᓱᒥᓈᐳ ᐱᔨᐢ ᐊᓄᐦᐨ.
[11] ᐁᐊᐧᑯ ᐅᒪ ᓂᐢᑕᑦ ᐁ ᑭᐢᑭᓇᐋᐧᒋ ᐋᐧᐸᐦᑕᐦᐃᐁᐧᐟ ᑭ ᐃᑐᑕᑦ ᒋᓴᐢ ᑫᓇ ᑲᓬᐊᓬᐃᕽ, ᐁ ᑭ ᓄᑯᑖᐟ ᐅ ᑭᐢᑌᔨᑖᑯᓯᐃᐧᐣ; ᐅ ᑭᐢᑭᓄᐦᐊᒪᐋᐧᑲᓇ ᒫᑲ ᑭ ᑖᐯᐧᔦᔨᒥᐠ.
[12] ᑳ ᐳᓂ ᐃᓯᐦᒋᑫᐟ ᒫᑲ ᐅᒪ, ᑭ ᐃᑐᐦᑌᐤ ᑫᐸᕒᓀᐊᒥᕽ, ᐃᐧᔭ, ᒥᓇ ᐅᑳᐃᐧᔭ ᒥᓇ ᐅᒋᐋᐧᒪ ᒥᓇ ᐅ ᑭᐢᑭᓄᐦᐊᒪᐋᐧᑲᓇ: ᐁᑯᑕ ᑭ ᐊᔮᐊᐧᐠ ᓇᒪᐃᐧᔭ ᒥᒉᑐ ᑭᓯᑳᐊᐧ.
[13] ᐅ ᒪᔮᐢᑯᑖᑐᐃᐧᑯᑐᐃᐧᓂᐋᐧᐤ ᒫᑲ ᒍᐊᐧᐠ ᓵᓴᐩ ᑫᑳᐟ ᐅᑎᐦᒋᐸᔨᔨᐤ, ᒋᓴᐢ ᒫᑲ ᒉᕒᐅᓴᓬᐊᒥᕽ ᑭ ᐃᑐᐦᑌᐤ,
[14] ᑭ ᒥᐢᑲᐁᐧᐤ ᒫᑲ ᑭᐦᒋ ᐊᔭᒥᐦᐁᐃᐧᑲᒥᑯᕽ ᐊᓂᐦᐃ ᑳ ᐊᑖᐋᐧᑫᔨᐟ ᒧᐢᑐᓴᐧ ᒥᓇ ᒫᔭᑎᐦᑲᐧ ᒥᓇ ᐅᒥᒥᐊᐧ, ᒥᓇ ᓱᓂᔮᐊᐧ ᑳ ᒥᐢᑯᑐᓈᔨᐟ ᐁ ᐊᐱᔨᐟ:
[15] ᐃᐢᐱ ᒫᑲ ᑳ ᐅᓯᑖᐟ ᐸᓴᐢᑌᐃᑲᐣ ᐱᒥᓇᑲᐧᓂᓴ ᐅᐦᒋ, ᑭ ᐊᐧᔭᐃᐧᑎᓴᐁᐧᐤ ᑲᐦᑭᔭᐤ ᑭᐦᒋ ᐊᔭᒥᐦᐁᐃᐧᑲᒥᑯᕽ ᐅᐦᒋ, ᐊᓯᒋ ᒫᔭᑎᐦᑲᐧ, ᒥᓇ ᒧᐢᑐᓴᐧ: ᑭ ᓯᑭᐁᐧᐸᐊᒪᐁᐧᐤ ᑳ ᒣᐢᑯᑐᓈᔨᐟ ᓱᓂᔮᐊᐧ, ᒥᓇ ᑭ ᑲᐧᑕᐱᐁᐧᐸᐊᑦ ᒥᒋᓱᐃᐧᓇᐦᑎᑲᐧ;
[16] ᐅᒥᓯ ᒫᑲ ᑭ ᐃᑌᐤ ᐅᒥᒥᐊᐧ ᑳ ᐊᑖᐋᐧᑫᔨᐟ, ᓯᐯᐧᑕᑖᐠ ᐅᐦᐃ; ᐁᑳᐃᐧᔭ ᐊᑖᐁᐧᐃᐧᑲᒥᑯᑫᐠ ᓄᑖᐃᐧ ᐅ ᐋᐧᐢᑳᐃᑲᐣ.
[17] ᐅ ᑭᐢᑭᓄᐦᐊᒪᐋᐧᑲᓇ ᒫᑲ ᑭ ᑭᐢᑭᓱᐸᔨᔨᐊᐧ ᐅᒥᓯ ᐁ ᐃᑕᓯᓇᐦᐃᑳᑌᔨᐠ, ᐁᐢᐱᒋ ᓴᑭᑖᔮ.ᐣ ᑭ ᐋᐧᐢᑳᐦᐃᑲᐣ ᓂ ᑭ ᑭᑕᒧᑯᐣ.
[18] ᑭ ᓇᐢᑫᐧᐊᐧᓯᒣᐊᐧᐠ ᒫᑲ ᒍᐊᐧᐠ ᐅᒥᓯ ᐁ ᑭ ᐃᑖᒋᐠ, ᑫᑲᐧᐩ ᑫᐢᑭᓇᐋᐧᒋ ᐋᐧᐸᑎᔨᔮᕽ, ᐅᒥᓯ ᑳ ᑐᑕᒪᐣ?
[19] ᒋᓴᐢ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᓂᓯᐊᐧᓈᒋᑖᐠ ᐅᒪ ᐊᔭᒥᐦᐁᐃᐧᑲᒥᐠ, ᑭ ᓂᐢᑐ ᑭᓯᑳᑭ ᒫᑲ ᓂ ᑲ ᐊᐧᓂᐢᑳᓀᐣ.
[20] ᐅᒥᓯ ᒫᑲ ᑭ ᐃᑌᐊᐧᐠ ᒍᐊᐧᐠ, ᓀᒥᑕᓇᐤ ᓂᑯᑖᐧᓱᓴᑊ ᑕᐦᑐ ᐊᐢᑭ ᑭ ᐊᑐᐢᑳᒋᑳᑌᐤ ᐁ ᐅᓯᒋᑳᑌᐠ ᐅᒪ ᑭᐦᒋ ᐊᔭᒥᐦᐁᐃᐧᑲᒥᐠ, ᓂᐢᑐ ᑭᓯᑳᐊᐧ ᒋ ᒫᑲ ᑭᔭ ᑭ ᑳ ᐊᐧᓂᐢᑳᓀᐣ?
[21] ᐊᓂᒪ ᒫᑲ ᐊᔭᒥᐦᐁᐃᐧᑲᒥᐠ ᑳ ᐃᑌᐧᐟ ᐃᐧᔭᐤ ᑳ ᐃᑕᕽ.
[22] ᐃᐢᐱ ᒪᑳ ᐁ ᑭ ᐊᐧᓂᐢᑳᐟ ᓂᐳᐃᐧᓂᕽ ᐅᐦᒋ, ᐅ ᑭᐢᑭᓄᐦᐊᒪᐋᐧᑲᓇ ᑭ ᑭᐢᑭᓱᐸᔨᔨᐊᐧ ᐅᒪ ᐁ ᑭ ᐃᑖᐟ; ᐁᑯᓯ ᑭ ᑖᐯᐧᑕᒪᐧᐠ ᑭᐦᒋ ᒪᓯᓇᐦᐃᑫᐃᐧᐣ, ᒥᓇ ᐃᑌᐧᐃᐧᐣ ᒋᓴᐢ ᑳ ᑭ ᐃᑌᐧᐟ.
[23] ᒣᑳᐧᐨ ᒫᑲ ᐁ ᐊᔮᐟ ᒉᕒᐅᓴᓬᐊᒥᕽ ᐁ ᒪᔮᐢᑯᑖᑐᐃᐧᑯᑐᕽ, ᐁ ᐃᐧᐦᑯᐦᑐᐃᐧ ᑭᓯᑳᐠ, ᒥᐦᒉᐟ ᑭ ᑖᐯᐧᑕᒥᔨᐊᐧ ᐅ ᐃᐧᔪᐃᐧᐣ, ᐃᐢᐱ ᐃᐧᔮᐸᐦᑕᒥᔨᐟ ᒪᒪᐦᑖᐃᐧ ᐃᓯᐦᒋᑫᐃᐧᓇ ᑳ ᐃᑐᑕᕽ.
[24] ᓇᒪᐃᐧᔭ ᒫᑲ ᒋᓴᐢ ᑭ ᐸᑭᑌᔨᒥᓱᐢᑕᐁᐧᐤ, ᒋᑫᒪ ᑭ ᑭᐢᑫᔨᒣᐤ ᑲᐦᑭᔭᐤ ᐊᔨᓯᔨᓂᐊᐧ,
[25] ᓇᒪᐃᐧᔭ ᒥᓇ ᐊᐃᐧᔭ ᑭ ᓇᑕᐁᐧᔨᒣᐤ ᑭᑕ ᐊᒋᒪᔨᐟ ᐊᔨᓯᔨᓂᐊᐧ: ᒋᑫᒫ ᑭ ᑭᐢᑫᔨᑕᑦ ᑫᑲᐧᐩ ᑫᑭᐢᑳᑯᔨᐟ ᐊᔨᓯᔨᓂᐊᐧ.