[1] ᐁᑯᓯ ᒋᓴᐢ ᓂᑯᑖᐧᓱ ᑭᓯᑳᐤ ᒪᐧᔦᐢ ᐁ ᐅᑎᐦᒋᐸᔨᐠ ᒪᔮᐢᑯᑖᑐ ᐃᐧᐦᑯᐦᑐᐃᐧᐣ ᑭ ᐯ ᐃᑐᐦᑌᐤ ᐯᐦᑕᓂᐃᕽ, ᐃᑕ ᐁ ᐊᔮᔨᐟ ᓬᐋᓴᕒᐊᓴ ᑳ ᑭ ᓂᐱᔨᐟ, ᐊᓂᐦᐃ ᑳ ᑭ ᐊᐧᓂᐢᑳᓈᐟ.
[2] ᐁᑯᑕ ᒫᑲ ᑭ ᐅᓯᑕᒪᐁᐧᐊᐧᐠ ᑎᐱᐢᑭᓀᑫᐧᐃᐧᐣ; ᒫᕒᑕ ᒫᑲ ᑭ ᐸᒥᐦᐃᐁᐧᐤ: ᓬᐋᓴᕒᐊᐢ ᒫᑲ ᐁᐊᐧᑯ ᐯᔭᐠ ᑳ ᐃᐧᑕᐱᒫᐟ ᐁ ᒥᒋᓱᒋᐠ.
[3] ᒣᕒᐃ ᒫᑲ ᑭ ᐅᑎᓇᑦ ᐯᔭᑯᓯᑲᐧᐣ ᑕᒪᐢᑯᐃᐧᐣ ᐢᐸᐃᐠᓈᕒᐟ, ᓇᐢᐱᐨ ᐁ ᐋᑲᐧᑭᑌᔨᐠ, ᐁ ᑭ ᑐᒥᓯᑌᓈ ᒫᑲ ᒋᓴᓴ, ᒥᓇ ᐁ ᑭ ᑳᓯᓯᑌᐋᐧᐟ ᐁᐧᐢᑕᑳᔭ ᐅᐦᒋ; ᑭ ᑌᐱᒫᑲᐧᐣ ᒫᑲ ᑕᒪᐢᑯᐃᐧᐣ ᐋᐧᐢᑳᐦᐃᑲᓂᕽ.
[4] ᐅᒥᓯ ᒫᑲ ᐃᑌᐧᔨᐊᐧ ᐯᔭᐠ ᐅ ᑭᐢᑭᓄᐦᐊᒪᐋᐧᑲᓇ, ᒍᑕᐢ ᐃᐢᑳᕒᐃᔭᐟ, ᓵᐃᒪᐣ ᐅᑯᓯᓴ, ᐊᓂᐃᐦ ᑫ ᒥᓯᒥᑯᐟ.
[5] ᑖᓀᑭ ᐁᑳ ᐅᒪ ᑕᒪᐢᑯᐃᐧᐣ ᑳ ᑭ ᐊᑕᐊᐧᑲᓂᐊᐧᕽ, ᑭᑕ ᑭ ᒥᔨᑕᐧᐸᐣ ᒫᑲ ᑫᑎᒫᑭᓯᒋᐠ?
[6] ᐁᐊᐧᑯ ᐅᒪ ᑭ ᐃᑌᐧᐤ, ᓇᒪᐃᐧᔭ ᐁ ᒥᑐᓀᔨᒫᐟ ᑫᑎᒫᑭᓯᔨᐟ; ᒫᑲ ᐁ ᑭᒧᑎᐢᑭᐟ, ᒥᓇ ᐁ ᐊᔮᐟ ᒥᐊᐧᑎᔨᐤ, ᐅᑎᓇᑦ ᒫᑲ ᐁᑯᑕ ᑳ ᐊᓯᐊᐧᑖᐃᐧᐦᐟ.
[7] ᐅᒥᓯ ᒫᑲ ᒋᓴᐢ ᑭ ᐃᑌᐤ, ᐁᑳ ᑐᑖᕽ: ᐊᓂᒪ ᐁ ᑭᓯᑳᐠ ᐃᑕ ᑫ ᓇᐃᓂᑲᐃᐧᔮᐣ ᐅᒪ ᐅᐦᒋ ᐃᑐᑕᑦ.
[8] ᑳᑭᑫ ᑭ ᐃᐧᒋᐊᔮᒥᑯᐊᐧᐊᐧᐠ ᑫᑎᒪᑭᓯᒋᐠ; ᒫᑲ ᓂᔭ ᓇᒪᐃᐧᔭ ᑳᑭᑫ ᑭᐟ ᐊᔮᐃᐧᓈᐋᐧᐤ.
[9] ᐊᐧᓂᔭᐤ ᒫᑲ ᐊᔨᓯᔨᓂᐊᐧᐠ ᐊᓂᑭ ᒍᐊᐧᐠ ᑭ ᑭᐢᑫᔨᑕᒪᐧᐠ ᐃᑕ ᐁ ᐊᔮᔨᐟ: ᑭ ᐯ ᐃᑐᐦᑌᐊᐧᐠ ᒥᓇ ᓇᒪᐃᐧᔭ ᐱᑯ ᒋᓴᓴ ᐅᐦᒋ, ᒫᑲ ᑭᑕ ᐋᐧᐸᒫᒋᐠ ᓬᐋᓴᕒᐊᓴ ᐊᓯᒋ, ᑳ ᑭ ᐊᐧᓂᐢᑳᓈᔨᐟ ᓂᐳᐃᐧᓂᕽ ᐅᐦᒋ.
[10] ᒫᑲ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ ᑭ ᐃᑕᓱᐁᐧᐊᐧᐠ ᓬᐋᓴᕒᐊᓴ ᐊᓯᒋ ᑭᑕ ᓂᐸᐦᐋᒋᐠ:
[11] ᒋᑫᒪ ᐃᐧᔭ ᐅᐦᒋ ᒥᐦᒉᐟ ᒍᐊᐧᐠ ᑭ ᓯᐯᐧᑌᐊᐧᐠ, ᒥᓇ ᑭ ᑖᐯᐧᔦᔨᒣᐊᐧ ᒋᓴᓴ
[12] ᑳ ᐊᑎ ᐋᐧᐸᕽ ᒥᐦᒉᐟ ᐊᔨᓯᔨᓂᐊᐧᐠ ᑳ ᑭ ᐯ ᐃᑐᐦᑌᒋᐠ ᐃᐧᐦᑯᐦᑐᐃᐧᓂᕽ, ᐃᐢᐱ ᑳ ᐯᐦᑕᐦᑭᐠ ᒋᓴᓴ ᐁ ᐯ ᐃᑐᐦᑌᔨᐟ ᒉᕒᐅᓴᓬᐊᒥᕽ,
[13] ᑭ ᐅᑎᓇᒪᐧᐠ ᓂᐱᔭ ᐸᑦ ᒥᐢᑎᑯᕽ ᐅᐦᒋ, ᐁ ᑭ ᓯᐯᐧᑌᒋᐠ, ᐁ ᑭ ᓇᑕᐃᐧ ᓇᑭᐢᑲᐋᐧᒋᐠ, ᐁ ᐃᓯ ᑌᐯᐧᒋᐠ, ᐅᓵᓇ! ᓴᐁᐧᔨᑖᑯᓯᐤ ᐃᐢᕒᐁᐃᓬ ᐅ ᑭᐦᒋ ᐅᑭᒫᒪ ᑳ ᐯ ᐃᑐᐦᑌᐟ ᑳ ᑎᐯᔨᐦᒋᑫᐟ ᐅ ᐃᐧᔪᐃᐧᓂᕽ.
[14] ᒋᓴᐢ ᒫᑲ, ᐃᐢᐱ ᑳ ᒥᐢᑲᐋᐧᐟ ᓱᓱᐃᐧ ᒥᐢᑕᑎᒧᓯᓴ, ᑭ ᑌᑕᐱᐤ; ᑳ ᐃᑕᓯᓇᐃᑲᑌᐠ,
[15] ᐁᑳᐃᐧᔭ ᐊᐢᑖᓯ, ᑭᔭ ᐅᑖᓂᓴ ᓵᔭᐣ; ᐋᐧᐸᑦ, ᑭ ᑭᐦᒋ ᐅᑭᒫᑦ ᐯ ᑕᑯᓯᐣ, ᐁ ᑌᑕᐱᐟ ᓱᓱᐃᐧ ᒥᐢᑕᑎᒧᓯᓴ.
[16] ᐁᐊᐧᑯᓂ ᐅᐦᐃ ᓇᒪᐃᐧᔭ ᓭᒫᐠ ᑭ ᓂᓯᑐᐦᑕᒥᔨᐊᐧ ᐅ ᑭᐢᑭᓄᐦᐊᒪᐋᐧᑲᓇ; ᒫᑲ ᐃᐢᐱ ᒋᓴᐢ ᑳ ᑭᐢᑌᔨᑖᑯᐦᐃᐦᐟ ᐁᑲᐧ ᑭᐢᑭᓱᐸᔨᐊᐧᐠ ᐅᒥᓯ ᐁ ᐃᑕᓯᓇᐃᑲᑌᔨᐠ, ᒥᓇ ᐅᒥᓯ ᐁ ᑭ ᐊᔨᑐᑕᐊᐧᒋᐠ.
[17] ᐊᔨᓯᔨᓂᐊᐧᐠ ᒫᑲ ᑳ ᐃᐧᒉᐋᐧᒋᐠ ᐃᐢᐱ ᑳ ᓇᑐᒫᔨᐟ ᓬᐊᓴᕒᐊᓴ ᓇᐦᐃᓂᑐᐃᐧᑲᒥᑯᕽ ᐅᐦᒋ, ᐁ ᐊᐧᓂᐢᑳᓈᔨᐟ ᓂᐳᐃᐧᓂᕽ ᐅᐦᒋ, ᑭ ᐋᒋᒧᐊᐧᐠ.
[18] ᐁᐊᐧᑯ ᒫᑲ ᐅᐦᒋ ᐊᔨᓯᔨᓂᐊᐧᐠ ᑳ ᐯ ᓇᑭᐢᑲᐊᐧᒋᐠ, ᒋᑫᒫ ᐁ ᑭ ᐯᐦᑕᐦᑭᐠ ᐁ ᑭ ᑐᑕᒥᔨᐠ ᐅᒪ ᒪᒪᑕᐃᐧ ᐃᓯᐦᒋᑫᐃᐧᐣ.
[19] ᐸᕒᐊᓯᔭᐠ ᒫᑲ ᑭ ᐊᔨᑌᐧᐊᐧᐠ ᐃᐧᔭᐋᐧᐤ, ᑭ ᐋᐧᐸᐦᑌᓈᐋᐧᐤ ᐁ ᐃᓯ ᐁᑳ ᑫᑲᐧᐩ ᓵᑯᒋᑖᔦᐠ? ᒋᐢᐟ, ᑲᐦᑭᔭᐤ ᐊᐢᑭ ᐱᒥᑎᓴᐦᐅᐠ.
[20] ᐊᑎᐦᐟ, ᒫᑲ ᐁᑯᑕ ᑲᕒᐃᐠ ᐊᔨᓯᔨᓂᐊᐧᐠ ᑭ ᐊᔮᐊᐧᐠ, ᐁ ᑭ ᐯ ᐃᑐᐦᑌᒋᐠ ᑭᑕ ᐊᔭᒥᐊᒋᐠ ᐁ ᐃᐧᐦᑯᐦᑐᕽ.
[21] ᐁᐊᐧᑯᓂᐠ ᑭ ᐯ ᓈᑌᐊᐧᐠ ᐱᓬᐃᐸ, ᐯᐟᓭᑕ ᑲᓬᐊᓬᐃᕽ ᑳ ᐅᐦᒋᐟ, ᑭ ᓇᑕᐁᐧᔨᒣᐊᐧᐠ ᒫᑲ ᐁ ᐃᑌᐧᒋᐠ, ᐅᑭᒫᐤ, ᓂ ᐃᐧ ᐋᐧᐸᒫᓈᐣ ᒋᓴᐢ.
[22] ᐱᓬᐃᑊ ᐯ ᐃᑐᐦᑌᐤ ᐁ ᐃᐧᐦᑕᒪᐊᐧᐟ ᐊᐣᑕᕒᐅᐊᐧ; ᐁᑯᓯ ᒫᑲ ᐊᐣᑕᕒᐅ ᒥᓇ ᐱᓬᐃᑊ ᐃᐧᐦᑕᒪᐁᐧᐊᐧᐠ ᒋᓴᓴ.
[23] ᒋᓴᐢ ᒫᑲ ᑭ ᓇᐢᑫᐧᐊᐧᓯᒣᐤ, ᐅᒥᓯ ᐁ ᐃᑖᐟ, ᓵᓴᐩ ᐃᓴ ᐅᑎᐦᒋᐸᔨᐤ ᑎᐸᐃᑲᐣ ᐃᔨᓂᐃᐧᑯᓯᓵᐣ ᑭᑕ ᑭᐢᑌᔨᑖᑯᐦᐃᐦᐟ.
[24] ᑖᐯᐧ, ᑖᐯᐧ, ᑭᐟ ᐃᑎᓈᐋᐧᐤ, ᑭᐢᐱᐣ ᐁᑳ ᐯᔭᑯᒥᐣ ᐸᑫᐧᓯᑲᓂᑲᐣ ᐸᐦᑭᓯᕽ ᐊᐢᑭᕽ ᒥᓇ ᓂᐳᒪᑲᑭ ᐯᔭᑯ ᐊᔮᐤ; ᒫᑲ ᑭᐢᐱᐣ ᓂᐳᒪᑲᑭ ᒥᐢᑕᐦᐃ ᓂᐦᑖᐃᐧᑭᒋᑫᒪᑲᐣ.
[25] ᐊᓇ ᑳ ᓴᑭᑕᐟ ᐅ ᐱᒫᑎᓯᐃᐧᐣ ᑭᑕ ᐊᐧᓂᑕᐤ; ᐊᓇ ᒫᑲ ᑳ ᐸᑳᐧᑕᕽ ᐅ ᐱᒫᑎᓯᐃᐧᐣ ᐅᑕ ᐊᐢᑭᕽ, ᑭᑕ ᑲᓇᐁᐧᔨᑕᑦ ᑳᑭᑫ ᐱᒫᑎᓯᐃᐧᓂᕽ ᐃᓯ.
[26] ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐊᑐᐢᑫᐢᑕᐃᐧᒋ, ᑭᔮᑦ ᓂ ᑲ ᐱᒥᑎᓴᐦᐅᐠ; ᐃᑌ ᒫᑲ ᐁ ᐊᔮᔮᐣ, ᐁᑯᑌ ᐃᐧᐢᑕ ᑫ ᐊᔮᐟ ᓂᐟ ᐊᑐᐢᑫᔮᑲᐣ; ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐊᑐᐢᑫᐢᑕᐃᐧᒋ, ᐁᐊᐧᑲᐧᓂ ᓄᑖᐃᐧ ᑫ ᑭᐢᑌᔨᒫᐟ.
[27] ᐊᓄᐦᐨ ᒫᑲ ᓂᐟ ᐊᐦᒐᕽ ᒥᑯᐢᑳᑌᔨᑕᑦ; ᑖᓂᓯ ᒫᑲ ᑫ ᐃᑌᐧᔮᐣ? ᓅᐦᑖ ᐸᐢᐱᐃᐣ ᐅᒪ ᑳ ᐃᐢᐸᔨᐠ ᑎᐸᐃᑲᐣ, ᒫᑲ ᐁᐊᐧᑯ ᑳ ᐯ ᐅᐦᒋ ᐃᑐᐦᑌᔮᐣ ᐅᒪ ᑳ ᐃᐢᐸᔨᐠ ᑎᐸᐃᑲᐣ.
[28] ᓄᐦᑖ, ᑭᐢᑌᔨᑖᑯᑖ ᑭ ᐃᐧᔪᐃᐧᐣ. ᑭᐦᒋ ᑭᓯᑯᕽ ᒫᑲ ᑭ ᐯ ᐅᐦᒋᐸᔨᐤ ᐃᑌᐧᐃᐧᐣ, ᐅᒥᓯ ᐁ ᐃᑌᐧᒪᑲᕽ, ᓵᓴᐩ ᓂ ᑭ ᐯ ᑭᐢᑌᔨᑖᑯᑖᐣ, ᒥᓇ ᒫᑲ ᓂ ᑲ ᑭᐢᑌᔨᑖᑯᑖᐣ.
[29] ᐊᔨᓯᔨᓂᐊᐧᐠ ᒫᑲ ᐁᑯᑕ ᑳ ᓂᐸᐃᐧᒋᐠ, ᐁ ᐯᐦᑕᐦᑭᐠ, ᐅᒥᓯ ᑭ ᐃᑌᐧᐊᐧᐠ, ᐱᔦᓯᐊᐧᐠ ᑭᑐᐊᐧᐠ: ᑯᑕᑲᐠ ᑭ ᐃᑌᐧᐊᐧᐠ, ᐅᑭᓯᑯᐊᐧ ᐁ ᑭᑐᑎᑯᐟ.
[30] ᒋᓴᐢ ᒫᑲ ᑭ ᓇᐢᑫᐧᐊᐧᓯᒣᐤ, ᐅᒥᓯ ᐁ ᑭ ᐃᑌᐧᐟ. ᐅᒪ ᐃᑌᐧᐃᐧᐣ ᓇᒪᐃᐧᔭ ᓂᔭ ᐅᐦᒋ ᐹᐸᔨᐤ, ᒫᑲ ᑭᔭᐋᐧᐤ ᐅᐦᒋ.
[31] ᐁᑲᐧ ᑭᑕ ᐅᔭᓱᐋᐧᑕᒥᕽ ᐅᒪ ᐊᐢᑭ: ᐁᑲᐧ ᑫ ᐊᐧᔭᐃᐧᐁᐧᐱᓂᐦᐟ ᑳ ᐅᑭᒫᑲᑕᕽ ᐅᒪ ᐊᐢᑭ.
[32] ᓂᔭ ᒫᑲ, ᑭᐢᐱᐣ ᐅᑕ ᐊᐢᑭᕽ ᐅᐦᒋ ᐅᐱᓂᑲᐃᐧᔮᓂ, ᑲᐦᑭᔭᐤ ᐊᔨᓯᔨᓂᐊᐧᐠ ᓂ ᑲ ᐅᑖᐯᑭᓇᒫᓱᐣ.
[33] ᐅᒪ ᒫᑲ ᑭ ᐃᑌᐧᐤ ᐁ ᑭᐢᑭᓇᐋᐧᒋ ᐃᐧᐦᑕᕽ ᑫ ᐃᓯ ᓂᐱᐟ.
[34] ᐊᔨᓯᔨᓂᐊᐧᐠ ᒫᑲ ᑭ ᓇᐢᑫᐧᐊᐧᓯᒣᐊᐧᐠ, ᓂ ᑭ ᐯᑌᓈᐣ ᐅᔭᓱᐁᐧᐃᐧᓂᕽ ᐅᐦᒋ ᙭ ᑲᑭᑫ ᐁ ᐃᑖᐟ; ᑖᓀᑭ ᒫᑲ ᑭᔭ ᐁᐧᒋ ᐃᑌᐧᔭᐣ, ᐃᔨᓂᐃᐧᑯᓯᓵᐣ ᑭᑕ ᐅᐱᓈᐤ? ᐊᐁᐧᓇᓇ ᐃᔨᓂᐃᐧᑯᓯᓵᐣ?
[35] ᒋᓴᐢ ᒫᑲ ᑭ ᐃᑌᐤ, ᑫᔮᐱᐨ ᐊᒋᔭᐤ ᐋᐧᐢᑌᐤ ᑭ ᐃᐧᒋ ᐊᔮᒥᑯᓈᐋᐧᐤ. ᐱᒧᐦᑌᐠ ᒣᑳᐧᐨ ᐁ ᐊᔮᔦᐠ ᐋᐧᐢᑌᐤ, ᐁᑳ ᐊᐧᓂᑎᐱᐢᑳᐤ ᑭᑕ ᐊᑲᐧᓂᐢᑳᑯᔦᐠ; ᒋᑫᒪ ᐊᓇ ᐊᐧᓂᑎᐱᐢᑲᕽ ᑳ ᐱᒧᐦᑌᐟ ᓇᒪᐃᐧᔭ ᑭᐢᑫᔨᑕᑦ ᐃᑌ ᐁ ᐃᑐᐦᑌᐟ.
[36] ᒣᑳᐧᐨ ᐁ ᐊᔮᔦᐠ ᐋᐧᐢᑌᐤ, ᑖᐯᐧᑕᒧᐠ ᐋᐧᐢᑌᐤ, ᑭᑕ ᐅᐟ ᐊᐋᐧᓯᒥᓯᒥᑯᔦᐠ ᐋᐧᐢᑌᐤ. ᐁᐊᐧᑯᓂ ᐅᐦᐃ ᑳ ᐊᔨᑌᐧᐟ ᒋᓴᐢ, ᐊᑎ ᓯᐯᐧᑌᐤ, ᐁ ᑭ ᑳᓱᐢᑕᐋᐧᐟ.
[37] ᒫᑲ ᐊᑕ ᒥᐦᒉᐟ ᒪᒫᑕᐃᐧ ᐃᓯᐦᒋᑫᐃᐧᓇ ᐁ ᑭ ᐊᔨᑐᑕᕽ ᐁ ᐋᐧᐸᒥᑯᐟ, ᑫᔮᐱᐨ ᓇᒪᐃᐧᔭ ᑭ ᑖᐯᐧᐊᐧᑫᔨᒥᐠ:
[38] ᑭᑕ ᑎᐱᐸᔨᔨᐠ ᐅᐟ ᐃᑌᐧᐃᐧᐣ ᐊᐩᓵᔭ ᐅᑭᐢᑭᐁᐧᐦᐃᑫᐤ, ᑳ ᑭ ᐃᑌᐧᐟ, ᑌᐯᔨᐦᒋᑫᔭᐣ, ᐊᐁᐧᓇ ᑳ ᑖᐯᐧᑕᕽ ᓂᐟ ᐊᒋᒧᐃᐧᓂᓈᐣ? ᒥᓇ ᐊᐁᐧᓇ ᑳ ᑭᐢᑫᔨᑕᒧᐃᐦᐟ ᑳ ᑎᐯᔨᐦᒋᑫᐟ ᐅᐢᐱᑐᐣ?
[39] ᐁᐊᐧᑯ ᒫᑲ ᐁᑳ ᑳ ᑭ ᐅᐦᒋ ᑖᐯᐧᑕᐦᑭᐠ, ᒋᑫᒪ ᐊᐩᓵᔭ ᒥᓇ ᑭ ᐃᑌᐧᐤ.
[40] ᑭ ᑲᑫᐸᐧᐱᓀᐤ ᒥᓇ ᑭ ᒪᐢᑲᐃᐧᑕᐁᐧᐤ ᐅᑌᐃᔨᐊᐧ; ᐁᑳ ᑭᑕ ᐊᐧᐱᒪᑲᓂᔨᑭ ᐅᐢᑭᓯᑯᐊᐧᐊᐧ, ᐊᐦᐳ ᐁᑳ ᑭᑕ ᓂᓯᑐᐦᑕᒧᒫᑲᓂᔨᑭ ᐅᑌᐦᐃᐋᐧᐊᐧ, ᐁᑳ ᑭᑕ ᑭ ᑫᐧᐢᑭᒋᐠ, ᐁᑯᓯ ᑭᑕ ᑭ ᐃᔨᓂᑲᐊᑭᐠ.
[41] ᐁᐊᐧᑯᓂ ᐅᐦᐃ ᑭ ᐃᑌᐧᐤ ᐊᐩᓵᔭ, ᐃᐢᐱ ᑳ ᑭ ᐋᐧᐸᐦᑕᒫᐧᐟ ᐅ ᑭᐢᑌᔨᑖᑯᓯᐃᐧᓂᔨᐤ, ᐁᑯᓯ ᑳ ᑭ ᐋᒋᒫᐟ.
[42] ᐁᔨᐁᐧᕽ ᒫᑲ ᐊᐦᐳ ᐅᔭᓱᐁᐧᐃᐧᔨᓂᐊᐧᐠ ᑭ ᑖᐯᐧᐊᐧᑫᔨᒣᐊᐧᐠ ᒫᑲ ᐸᕒᐊᓯᔭ ᐅᐦᒋ ᓇᒪᐃᐧᔭ ᑭ ᐃᐧᐦᑕᒪᐧᐠ, ᐁᑳ ᑭᑕ ᐊᐧᔭᐃᐧᐁᐧᐱᓂᑯᒋᐠ ᐊᔭᒥᐦᐁᐃᐧᑲᒥᑯᕽ ᐅᐦᒋ.
[43] ᒋᑫᒫ ᐊᐊᐧᓯᒣ ᑭ ᓴᑭᑕᐊᐧᐠ ᐅ ᑭᐢᑌᔨᑖᑯᐃᐁᐧᐃᐧᓂᔨᐤ ᐊᔨᓯᔨᓂᐊᐧ, ᐃᐢᐱᐨ ᐅ ᑭᐢᑌᔨᑖᑯᐃᐁᐧᐃᐧᓂᔨᐤ ᑭᓭᒪᓂᑐᐊᐧ.
[44] ᒋᓴᐢ ᑭ ᑌᐯᐧᐤ, ᐁ ᐃᑌᐧᐟ, ᐊᓇ ᑳ ᑖᐯᐧᔦᔨᒥᐟ, ᓇᒪᐃᐧᔭ ᓂᔭ ᓂ ᑖᐯᐧᔦᔨᒥᐠ, ᒫᑲ ᑳ ᐯ ᐃᓯᑎᓴᐅᔨᐟ.
[45] ᒥᓇ ᐊᓇ ᑳ ᐋᐧᐸᒥᐟ ᐋᐧᐸᒣᐤ ᑳ ᑭ ᐯ ᐃᓯᑎᓴᐅᔨᐟ.
[46] ᓂ ᐯ ᐋᐧᓭᐢᑫᐣ ᐅᒪ ᐊᐢᑭ, ᐊᐃᐧᔭ ᒫᑲ ᑫ ᑖᐯᐧᔦᔨᒥᑫᐧ, ᓇᒪᐃᐧᔭ ᐊᐧᓂᑎᐱᐢᑳᕽ ᑭᑕ ᐊᔮᐤ.
[47] ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐯᐦᑕᐦᑭ ᓂᐟ ᐃᑌᐧᐃᐧᓇ, ᐁᑳ ᒫᑲ ᑲᓇᐁᐧᔨᐦᑕᐦᑭ ᓇᒪᐃᐧᔭ ᓄᔭᓱᐊᐧᑕᐤ: ᒋᑫᒪ ᓇᒪᐃᐧᔭ ᓂ ᐯ ᐃᑐᑕᐣ ᑭᑕ ᐅᔭᓱᐋᐧᑕᒫᐣ ᐊᐢᑭ, ᒫᑲ ᑭᑕ ᐱᒫᒋᑖᔮᐣ ᐊᐢᑭ.
[48] ᐊᓇ ᐃᔭᑕᐁᐧᔨᒥᐟ, ᒥᓇ ᐁᑳ ᐁᐧᑎᓇᕽ ᓂᐟ ᐃᑌᐧᐃᐧᓇ, ᐃᑕᔨᐊᐧ ᐯᔭᐠ ᑳ ᐅᔭᓱᐋᐧᑎᑯᐟ: ᐃᑌᐧᐃᐧᓇ ᑳ ᑭ ᐃᑌᐧᔮᐣ, ᐁᐊᐧᑯᓂ ᑫ ᐅᔭᓱᐋᐧᑎᑯᐟ ᐃᐢᑲᐧᔮᐨ ᑭᓯᑳᑭ.
[49] ᒋᑫᒫ ᓇᒪᐃᐧᔮ ᓂᔭ ᐅᐦᒋ ᑳ ᐱᑭᐢᑫᐧᔮᐣ; ᒫᑲ ᐁᐧᔪᑖᐃᐧᕽ ᑳ ᐯ ᐃᓯᑎᓴᐦᐅᐟ, ᐃᐧᔭ ᓂ ᑭ ᒥᔨᐠ ᐅᔭᓱᐁᐧᐃᐧᐣ, ᑫ ᐊᔨᑌᐧᔮᐣ, ᒥᓇ ᑫ ᐃᓯ ᐱᑭᐢᑫᐧᔮᐣ.
[50] ᓂ ᑭᐢᑫᔨᑌᐣ ᒫᑲ ᐅᔭᓱᐁᐧᐃᐧᐣ ᐁᐊᐧᑯ ᑳᑭᑫ ᐱᒫᑎᓯᐃᐧᐣ: ᐁᑯᓯ ᐊᓂᐦᐃ ᑳ ᐱᑭᐢᑫᐧᔮᐣ, ᐁᐧᔪᑖᐃᐧᕽ ᑳ ᑭ ᐃᓯᐟ, ᐁᑯᓯ ᐁᓯ ᐱᑭᐢᑫᐧᔮᐣ.