[1] ᑭᔮᑦ ᑕᐦᑐ ᐊᑐᐢᑫᔮᑲᓇᐠ ᑳ ᑎᐯᔨᒥᐦᒋᐠ ᐃᐧᔭᐋᐧᐤ ᐅᐟ ᐅᑭᒫᒥᐋᐧᐊᐧ ᑭᑕ ᑭᐢᑌᔨᒣᐊᐧᐠ, ᐅ ᐃᐧᔪᐃᐧᐣ ᑭᓭᒪᓂᑐ ᒥᓇ ᐅ ᑭᐢᑭᓄᐦᐊᒫᑫᐃᐧᐣ ᐁᑳ ᑭᑕ ᒫᔨᑭᓵᐧᑕᒥᕽ.
[2] ᐊᓂᑭ ᒫᑲ ᑳ ᑖᐯᐧᑕᒥᔨᐟ ᐅᐟ ᐅᑭᒫᒥᐋᐧᐊᐧ ᐁᑳᐃᐧᔭ ᑭᑕ ᒫᔦᔨᒣᐊᐧᐠ ᐁ ᐅᒋᐋᐧᒥᒫᐃᐧᔨᐠ ᐅᐦᒋ; ᒫᑲ ᓇᐊᐧᐨ ᑭᑕ ᐊᑐᐢᑲᐁᐧᐊᐧᐠ ᐊᓂᒪ ᐅᐦᒋ ᑳ ᐃᐧᒋ ᐅᑎᓇᒧᒥᐁᐧᒋᐠ ᐋᐸᒋᐅᐃᐧᐣ ᐁ ᑖᐯᐧᑕᐦᑭᐠ ᒥᓇ ᐁ ᓵᑭᐃᐦᒋᐠ. ᐁᐊᐧᑯᓂ ᐅᐦᐃ ᑭᐢᑭᓄᐦᐊᒫᑫ ᒥᓇ ᓯᑭᑫᒧ.
[3] ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐱᑐᐢ ᐃᓯ ᑭᐢᑭᓄᐦᐊᒫᑫᒋ ᐁᑳ ᒫᑲ ᓇᐢᑯᑕᑭ ᑳ ᐱᒫᑎᓯᐢᑳᑫᑭ ᐃᑌᐧᐃᐧᓇ ᐅᐟ ᐃᑌᐧᐃᐧᓇ ᐅᑎ ᑳ ᑎᐯᔨᒥᑯᔭᕽ ᒋᓴᐢ ᙭ ᒥᓇ ᐊᓂᒪ ᑭᐢᑭᓄᐦᐊᒫᑫᐃᐧᐣ ᐊᔭᒥᐦᐋᐋᐧᑎᓯᐃᐧᓂᕽ ᑳ ᐃᑕᐢᑌᐠ;
[4] ᑭᐢᑌᔨᒥᓱ ᐁᑳ ᑫᑲᐧᐩ ᐁ ᑭᐢᑫᔨᑕᕽ ᒫᑲ ᐁ ᑭᓯᔦᔨᑕᕽ ᑲᑫᐧᒋᑐᐃᐧᓇ ᒥᓇ ᐋᔮᓯᑌᑐᐃᐧ ᐃᑌᐧᐃᐧᓇ ᐃᑕ ᐁᐧᒋᐸᔨᐠ ᐃᓴᐋᐧᓇᑫᔨᒧᐃᐧᐣ, ᑲᑫᐧᐸᐢᑭᔮᑐᐃᐧᐣ, ᑭᓯ ᑭᑐᑎᑐᐃᐧᐣ, ᒪᒋ ᐃᑌᔨᒥᑐᐃᐧᐣ,
[5] ᐅ ᑭᑳᑐᐃᐧᓂᐋᐧᐊᐧ ᐊᔨᓯᔨᓂᐊᐧᐠ ᐁ ᓂᓯᐊᐧᓈᒋ ᒥᑐᓀᔨᒋᑲᓀᒋᐠ ᒥᓇ ᐁ ᐊᐧᓂᑖᒋᐠ ᑖᐯᐧᐃᐧᐣ; ᐊᔭᒥᐦᐋᐋᐧᑎᓯᐃᐧᐣ ᐁᐊᐧᑯ ᑭᑕ ᐃᓯ ᑲᐢᑭᒋᑫᕽ ᐁ ᐃᑌᔨᑕᐦᑭᐠ.
[6] ᒫᑲ ᐊᔭᒥᐦᐋᐋᐧᑎᓯᐃᐧᐣ ᑭᑭ ᑌᐱᔭᐁᐧᓯᐃᐧᐣ ᐁᐊᐧᑯ ᑭᐦᒋ ᑲᐢᑭᒋᑫᐃᐧᐣ;
[7] ᒋᑫᒫ ᓇᒪᐃᐧᔭ ᑫᑲᐧᐩ ᑯᐦᒋ ᐯᑖᓇᐤ ᐅᑕ ᐊᐢᑭᕽ ᐁᑯᓯ ᒥᓇ ᓇᒪᐃᐧᔭ ᑫᑲᐧᐩ ᑭ ᑲ ᑭ ᓯᐯᐧᑕᑖᓇᐤ;
[8] ᒫᑲ ᐁ ᐊᔮᔭᕽ ᒥᒋᐃᐧᐣ ᒥᓇ ᑭᑭᐢᑳᒋᑲᐣ ᐁᑯᔨᑯᕽ ᑭ ᑲ ᑌᐱᔭᐁᐧᓯᓈᓇᐤ.
[9] ᒫᑲ ᐊᓂᑭ ᑳ ᓄᑌ ᐁᐧᔪᑎᓯᒋᐠ ᐸᐦᑭᓯᓇᐧᐠ ᑯᑌᔨᒥᑯᐃᐧᓂᕽ ᒥᓇ ᓇᑳᐧᑲᓂᕽ ᒥᓇ ᒥᐦᒉᐟ ᐱᑯᓇᑕ ᒥᓇ ᑳ ᐃᐧᓴᑲᐅᐁᐧᑭ ᒪᒋ ᐊᑳᐋᐧᑕᒧᐃᐧᓇ, ᑐᐊᐧ ᑳ ᓂᐢᑖᐹᐊᐧᔨᑯᒋᐠ ᐊᔨᓯᔨᓂᐊᐧᐠ ᓂᓯᐊᐧᓈᑎᓯᐃᐧᓂᕽ ᒥᓇ ᓈᐢᐱᒋ ᓂᓯᐊᐧᓈᒋᐦᐅᐃᐧᓂᕽ.
[10] ᒋᑫᒫ ᑳ ᓵᑭᐃᐦᐠ ᓱᓂᔮᐤ ᐁᑯᑕ ᐅᐦᒋᐸᔨᐤ ᑲᐦᑭᔭᐤ ᑐᐃᐧ ᒪᒋ ᑫᑲᐧᐩ; ᐁᐊᐧᑯᓂ ᐋᑎᐦᐟ ᐁ ᑲᑫᐧ ᑳᒋᑎᓈᒋᐠ ᑭ ᐸᐢᑫᑕᐋᐊᐧᐠ ᑖᐯᐧᔦᔨᑕᒧᐃᐧᓂᕽ ᐅᐦᒋ ᒥᓇ ᑭ ᓵᐳᐢᑕᐅᓱᐊᐧᐠ ᒥᐦᒉᐟ ᒥᒋᔭᐁᐧᓯᐃᐧᓇ ᐅᐦᒋ.
[11] ᒫᑲ ᑭᔭ ᐅᐟ ᐊᔨᓯᔨᓂᒪ ᑭᓭᒪᓂᑐ, ᑕᐸᓯᑖ ᐅᐦᐃ; ᒥᓇ ᐱᒥᑎᓴᐦᐊ ᑲᐧᔭᐢᑳᐧᑎᓯᐃᐧᐣ, ᐊᔭᒥᐦᐋᐋᐧᑎᓯᐃᐧᐣ, ᑖᐯᐧᔦᔨᑕᒧᐃᐧᐣ, ᓵᑭᐦᐃᐁᐧᐃᐧᐣ, ᓯᐯᔨᑕᒧᐃᐧᐣ, ᔪᐢᑳᑎᓯᐃᐧᐣ.
[12] ᓄᑎᓂᑫ ᒥᔪ ᓄᑎᓂᑫᐃᐧᐣ ᑖᐯᐧᔦᔨᑕᒧᐃᐧᓂᕽ, ᐅᑎᑎᓇ ᑳᑭᑫ ᐱᒫᑎᓯᐃᐧᐣ ᐃᑕ ᑳ ᑭ ᐃᓯ ᓇᑐᒥᑲᐃᐧᔭᐣ ᐁᑯᓯ ᐁ ᑭ ᐋᒋᒧᔭᐣ ᐊᓂᒪ ᒥᔪ ᐋᒋᒥᓱᐃᐧᐣ ᐁ ᐋᐧᐸᒥᐢᑭᐠ ᒥᐦᒉᐟ ᐅᑖᒋᒧᐋᐧᐠ.
[13] ᑭᐟ ᐊᔮᑳᐧᒥᒥᑎᐣ ᐁ ᑲᓇᐋᐧᐸᒥᐢᐠ ᑭᓭᒪᓂᑐ ᑳ ᐱᒫᑎᓯᐢᑲᕽ ᑲᐦᑭᔭᐤ ᑫᑲᐧᐩ ᒥᓇ ᙭ ᒋᓴᐢ ᐁ ᐅᑎᐢᑲᐃᐧᐢᑲᐋᐧᐟ ᐹᐣᑎᔭᐢ ᐸᐃᓬᐊᑕ ᑳ ᑭ ᐊᒋᒧᐟ ᐊᓂᒪ ᒥᔪ ᐋᒋᒥᓱᐃᐧᐣ;
[14] ᑭᑕ ᑲᓇᐁᐧᔨᑕᒪᐣ ᐅᔭᓱᐁᐧᐃᐧᐣ ᐁᑳ ᐁ ᒫᔨᓈᑯᒋᑫᔭᐣ ᒥᓇ ᐁᑳ ᐁ ᐋᓀᐧᔨᑖᑯᓯᔭᐣ ᐃᔨᑯᕽ ᑭᑕ ᓄᑯᓯᐟ ᑳ ᑎᐯᔨᒥᑯᔭᕽ ᒋᓴᐢ ᙭
[15] ᐁᐊᐧᑯ ᐃᐢᐱ ᓇᐃᐸᔨᑭ ᑫ ᐋᐧᐸᐦᑕᐦᐃᐁᐧᐟ ᐊᐁᐧᓈᓇ ᑳ ᒫᒥᒋᒥᑯᐃᐧᓯᐟ ᒥᓇ ᐊᓇ ᐱᑯ ᑳ ᑭᐦᒑᔨᐃᐧᐟ ᐅ ᑭᐦᒋ ᐅᑭᒫᒥᐋᐧᐊᐧ ᑭᐦᒋ ᐅᑭᒫᐊᐧᐠ ᑳ ᑎᐯᔨᒥᑯᒋᐠ ᐅᑎᐯᔨᒋᑫᐊᐧᐠ;
[16] ᐊᓇ ᐃᐧᔭ ᐱᑯ ᑳ ᐊᔮᐟ ᑳᑭᑫ ᐱᒫᑎᓯᐃᐧᐣ, ᐋᐧᐢᑌᕽ ᐁᑳ ᑭᑕ ᑭ ᓭᓯᑫᑖᕽ ᐁᑯᑕ ᐁ ᐊᔮᐟ; ᐁᑳ ᐊᐃᐧᔭ ᐊᔨᓯᔨᓂᐊᐧ ᐁ ᑭ ᐅᐦᒋ ᐋᐧᐸᒥᑯᐟ ᐊᐦᐳ ᑭᑕ ᑭ ᐋᐧᐸᒥᑯᐟ; ᐁᐊᐧᑯ ᑭᑕ ᐊᔮᐤ ᑭᐢᑌᔨᑖᑯᓯᐃᐧᐣ ᒥᓇ ᑲᐢᑭᐦᐁᐃᐧᓯᐃᐧᐣ ᑳᑭᑫ. ᐋᒣᐣ.
[17] ᐊᔮᑳᐧᒥᒥᐠ ᐊᓂᑭ ᑳ ᐁᐧᔪᑎᓯᒋᐠ ᐅᑕ ᐊᐢᑭᕽ ᐁᑳ ᑭᑕ ᐃᐢᐯᔨᒥᓱᒋᐠ ᐊᐦᐳ ᑭᑕ ᒪᒥᓯᑐᑕᑭᐠ ᐁᑳ ᑳ ᑫᒋᓈᑕᑭ ᐁᐧᔪᑎᓯᐃᐧᓇ ᒫᑲ ᑭᓭᒪᓂᑐᐊᐧ ᑳ ᐁᐧᔪᒋ ᒥᔨᑯᔭᕽ ᑲᐦᑭᔭᐤ ᑫᑲᐧᐩ ᑭᑕ ᐅᐦᒋ ᒪᒪᐦᑖᑯᓯᔭᕽ;
[18] ᑭᑕ ᒥᔪ ᑐᑕᐦᑭᐠ ᑭᑕ ᐁᐧᔪᑎᓯᒋᐠ ᒥᔪ ᐊᑐᐢᑫᐃᐧᓇ ᑭᑕ ᒥᔦᐧᔨᑕᐦᑭᐠ ᑭᑕ ᒫᑎᓇᒫᑫᒋᐠ ᑭᑕ ᒋᑫᔨᑕᐦᑭᐠ ᑭᑕ ᒣᑭᒋᐠ;
[19] ᐁ ᒫᐊᐧᒋᑖᐧᓱᒋᐠ ᒥᔪ ᐅᔭᐢᒋᑫᐃᐧᐣ ᓂᑳᐣ, ᐁ ᒥᑐᓀᔨᑕᐦᑭᐠ ᑭᑕ ᑭ ᐅᑎᑎᓇᑭᐠ ᐊᓂᒪ ᐱᒫᑎᓯᐃᐧᐣ ᑖᐯᐧ ᑳ ᐱᒫᑎᓯᐃᐧᓂᐃᐧᐠ.
[20] ᐋᐤ ᑎᒪᑎ, ᑲᓇᐁᐧᔨᑕ ᐊᓂᒪ ᑳ ᐸᑭᑎᓇᒫᑲᐃᐧᔭᐣ, ᐁ ᐁᐧᐱᓇᒪᐣ ᓀᓯᐊᐧᓈᒋᐃᐁᐧᑭ ᐅᓵᒥᑐᓂᐃᐧᓇ ᒥᓇ ᐁ ᓇᑳᐢᑲᒥᕽ ᑭᐢᑫᔨᑕᒧᐃᐧᐣ ᓇᐢᐹᐨ ᑳ ᐃᓯᔨᐦᑳᑌᐠ;
[21] ᐁᐊᐧᑯ ᐋᑎᐦᐟ ᐁ ᐅᑎᓇᑭᐠ ᑳ ᑭ ᐸᐢᑫᒋᐠ ᑖᐯᐧᔦᔨᑕᒧᐃᐧᓂᕽ ᐅᐦᒋ. ᑭᓭᐋᐧᑐᑖᑯᐃᐧᐣ ᑭ ᑲ ᐃᐧ ᐃᐧᒉᐃᐧᑯᐣ.