<1 Timothy ᓂᐢᑕᑦ ᑎᒪᑎ 1

[1] ᐹᓬ ᐅᐟ ᐊᐹᐢᑎᓬᐃᒪ ᒋᓴᐢ ᙭ ᐁ ᐃᑕᐢᑌᔨᐠ ᐅᔭᓱᐁᐧᐃᐧᐣ ᑭᓭᒪᓂᑐ ᑯᐱᒫᒋᐦᐃᐁᐧᒥᓇᐤ ᒥᓇ ᙭ ᒋᓴᐢ ᑭᐟ ᐊᐢᐯᔨᒧᐃᐧᓂᓇᐤ;

[2] ᐁ ᒪᓯᓇᐦᐊᒫᑖᐣ ᑎᒪᑎ ᑖᐯᐧ ᓂᐟ ᐊᐋᐧᓯᒥᐢ ᑖᐯᐧᔦᔨᑕᒧᐃᐧᓂᕽ; ᑭᓭᐋᐧᑐᑖᑯᐃᐧᐣ, ᑭᑎᒫᑭᓈᑯᐃᐧᐣ, ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐅᐦᒋᐢᑕᒫᐠ ᑭᓭᒪᓂᑐ ᐁᐧᔪᑖᐃᐧᕽ ᒥᓇ ᙭ ᒋᓴᐢ ᑳ ᑎᐯᔨᒥᑯᔭᕽ.

[3] ᑳ ᑭ ᐃᓯ ᓯᑭᒥᑖᐣ ᑫᔮᐱᐨ ᑭᑕ ᐊᔮᔭᐣ ᐁᐱᓴᓯᕽ ᒣᑳᐧᐨ ᒫᓯᑖᓂᔭᐃᕽ ᐁ ᐃᑐᐦᑌᔮᐣ, ᑭᑕ ᐊᔮᑳᐧᒥᒪᒋᐠ ᐋᑎᐦᐟ ᐊᔨᓯᔨᓂᐊᐧᐠ ᐁᑳ ᑭᑕ ᑭᐢᑭᓄᐦᐊᒫᑫᒋᐠ ᐱᑐᐢ ᑭᐢᑭᓄᐦᐊᒫᑫᐃᐧᐣ,

[4] ᒥᓇ ᐁᑳ ᑭᑕ ᐱᓯᐢᑫᔨᑕᐦᑭᐠ ᐋᑕᔪᑲᓇ ᒥᓇ ᐁᑳ ᑳ ᑭᓯᐱᐸᔨᑭ ᐋᔮᓂᐢᑫ ᐋᒋᒧᐃᐧᓇ, ᐁᐊᐧᑯᓂ ᑳ ᐅᐦᒋ ᐸᓯᑯᒪᑲᑭ ᑲᑫᐧᒋᑐᐃᐧᓇ ᐃᔨᑯᕽ ᐃᐧᔭ ᑳ ᐃᓯ ᐸᑭᑎᓇᒫᑫᐟ ᑭᓭᒪᓂᑐ ᑖᐯᐧᔦᔨᑕᒧᐃᐧᓇᕽ ᑳ ᐊᔮᐠ; ᐁᑯᓯ ᐃᑐᑕ.

[5] ᒫᑲ ᐁ ᑭᓯᐱ ᐊᔮᐠ ᐊᔮᑳᐧᒥᒥᐁᐧᐃᐧᐣ ᐁᐊᐧᑯ ᓵᑭᐦᐃᐁᐧᐃᐧᐣ ᐁ ᐯᑲᕽ ᒥᑌᐦ ᐅᐦᒋ ᒥᓇ ᐁ ᒥᔮᐧᓯᐠ ᑭᐢᑫᔨᒥᓱᐃᐧᐣ ᒥᓇ ᑖᐯᐧᔦᔨᑕᒧᐃᐧᐣ ᐁᑳ ᐁ ᑲᔦᓴᕽ;

[6] ᐁᐊᐧᑯᓂ ᐋᑎᐦᐟ ᐁ ᑭ ᐸᑕᐊᑭᐠ ᑭ ᐸᐢᑫᐊᐧᐠ ᐱᑯᓇᑕ ᐱᑭᐢᑫᐧᐃᐧᓂᕽ;

[7] ᐁ ᓄᐦᑌ ᑭᐢᑭᓄᐦᐊᒫᑫᒋᐠ ᐅᔭᓱᐁᐧᐃᐧᐣ, ᐋᑕ ᐁᑳ ᐁ ᓂᓯᑐᐦᑕᐦᑭᐠ ᐊᓂᒪ ᑳ ᑕᓯᑕᑭᐠ ᐊᐦᐳ ᑳ ᐃᓯ ᑫᒋᓈᐅᐃᐧ ᐃᑌᐧᒋᐠ.

[8] ᒫᑲ ᑭ ᑭᐢᑫᔨᑌᓈᓇᐤ ᐁ ᒥᔮᐧᓯᐠ ᐅᔭᓱᐁᐧᐃᐧᐣ ᑭᐢᐱᐣ ᐊᔨᓯᔨᓂᐤ ᑲᐧᔭᐢᐠ ᐃᓯ ᐊᐸᒋᑖᒋ,

[9] ᐁ ᑭᐢᑫᔨᑕᒪᕽ ᐅᒪ ᓇᒪᐃᐧᔭ ᐁ ᑲᐧᔭᐢᑭᑖᑎᓯᐟ ᓈᐯᐤ ᑳ ᐅᓯᑖᐧᐦᐟ ᐅᔭᓱᐁᐧᐃᐧᐣ, ᒫᑲ ᐁᑳ ᑳ ᓈᑲᑐᑫᒋᐠ ᐅᔭᓱᐁᐧᐃᐧᐣ ᒥᓇ ᑳ ᓴᓯᐱᑕᑭᐠ, ᐁᑳ ᑳ ᐊᔭᒥᐦᐋᐋᐧᑎᓯᒋᐠ ᒥᓇ ᑳ ᒪᒑᑎᓯᒋᐠ, ᐁᑳ ᑳ ᐯᑳᑎᓯᒋᐠ ᒥᓇ ᑳ ᒪᒋ ᐃᑌᐧᐢᑭᒋᐠ, ᑳ ᐸᑲᒪᐋᐧᒋᐠ ᐅᑖᐃᐧᐋᐧᐊᐧ ᒥᓇ ᑳ ᐸᑲᒪᐋᐧᒋᐠ ᐅᑲᐃᐧᐋᐧᐊᐧ, ᐊᔨᓯᔨᓂᐊᐧ ᑳ ᓂᐸᐦᐋᒋᐠ,

[10] ᐅᐱᓯᑳᐧᑎᓯᐊᐧᐠ ᒥᓇ ᐃᐧᒋ ᐊᔨᓯᔨᓂᐋᐧᐊᐧ ᑳ ᑭᑭ ᓂᓯᐊᐧᓈᒋᐃᓱᒋᐠ, ᐊᔨᓯᔨᓂᐊᐧ ᑳ ᑭᒧᑎᒋᐠ, ᐅᑭᔮᐢᑭᐢᑲᐠ, ᑳ ᑭᔮᐢᑭᐃᐧ ᑭᐦᒋ ᐃᑌᐧᒋᐠ, ᒥᓇ ᑭᐢᐱᐣ ᓈᐣᑕᐤ ᑯᑕᐠ ᑫᑲᐧᐩ ᐁᑕᑲᐧᓄᑫᐧ ᐁ ᓇᐢᐹᑕᐢᑌᐠ ᑲᐧᔭᐢᐠ ᑭᐢᑭᓄᐦᐊᒫᑫᐃᐧᐣ;

[11] ᑳ ᐃᑕᐢᑌᐠ ᐁ ᒥᔮᐧᒋᒧᐃᐧᓂᐊᐧᓂᔨᐠ ᐅ ᑭᐢᑌᔨᑖᑯᓯᐃᐧᐣ ᑳ ᒪᒥᒋᒥᑯᐃᐧᓯᐟ ᑭᓭᒪᓂᑐ, ᐁᐊᐧᑯ ᒥᔮᐧᒋᒧᐃᐧᐣ ᑳ ᑭ ᐸᒥᓇᒧᐃᑲᐃᐧᔮᐣ.

[12] ᓂ ᓇᓈᐢᑯᒫᐤ ᒫᑲ ᑳ ᑭ ᒥᔨᐟ ᑭᑕ ᐃᓯ ᑲᐢᑭᑖᔮᐣ, ᒋᓴᐢ ᙭ ᐅᑎ ᑳ ᑎᐯᔨᒥᑯᔭᕽ, ᒋᑫᒫ ᐊᔮᑳᐧᒥᓯᐤ ᓂ ᑭ ᐃᑕᑭᒥᐠ, ᐁ ᐅᔭᑭᒥᐟ ᑭᑕ ᐊᑐᐢᑲᐊᐧᐠ;

[13] ᐋᑕ ᓂᔭ ᑲᔮᐢ ᐁ ᑭ ᐹᐢᑖᒧᐃᐧ ᐱᑭᐢᑫᐧᐢᑭᔮᐣ, ᒥᓇ ᐁ ᑭ ᑯᑕᑭᐦᐃᐁᐧᔮᐣ, ᒥᓇ ᐁ ᑭ ᓂᓯᐊᐧᓈᒋᒋᑫᐢᑭᔮᐣ; ᒫᑲ ᓂ ᑭ ᑭᑌᒫᑭᓈᑲᐃᐧᐣ ᒋᑫᒫ ᓂ ᑭ ᐃᑐᑌᐣ ᐁᑳ ᐁ ᑭᐢᑫᔨᑕᒫᐣ ᐃᐧᔭ ᐁᑳ ᐁ ᑖᐯᐧᑕᒫᐣ;

[14] ᐁᑯᓯ ᐅ ᑭᓭᐊᐧᑎᓯᐃᐧᐣ ᑳ ᑎᐯᔨᒥᑯᔭᕽ ᐊᔨᐋᐧᐠ ᓂ ᑭ ᐁᐧᔪᑌᓇᒫᑲᐃᐧᐣ ᑭᑭ ᑖᐯᐧᔦᔨᑕᒧᐃᐧᐣ ᒥᓇ ᓵᑭᐦᐃᐁᐧᐃᐧᐣ ᙭ ᒋᓴᐢ ᑳ ᐊᔮᐟ.

[15] ᑖᐯᐧᒪᑲᐣ ᐅᒪ ᐃᑌᐧᐃᐧᐣ ᒥᓇ ᑌᐸᑫᔨᑖᑲᐧᐣ ᑲᐦᑭᔭᐤ ᐊᐃᐧᔭᐠ ᑭᑕ ᐅᑎᓈᕽ, ᙭ ᒋᓴᐢ ᐁ ᑭ ᐯ ᐃᑐᐦᑌᐟ ᐊᐢᑭᕽ ᑭᑕ ᐱᒫᒋᐦᐋᐟ ᐅᒫᒑᑎᓴ; ᓂᔭ ᒫᑲ ᑳ ᓂᑳᓀᔨᑖᑯᓯᔮᐣ ᐁᑯᑐᐊᐧ;

[16] ᐁᔨᐁᐧᕽ ᒫᑲ ᐅᒪ ᐅᐦᒋ ᓂ ᑭ ᑭᑎᒫᑭᓈᑲᐃᐧᐣ, ᓂᔭ ᐁ ᐊᔨᐋᐧᑫᔨᑖᑯᓯᔭᐣ ᒋᓴᐢ ᙭ ᑭᑕ ᐋᐧᐸᐦᑕᐦᐃᐁᐧᐟ ᑲᐦᑭᔭᐤ ᐅ ᓯᐯᔨᑕᒧᐃᐧᐣ ᑭᑕ ᐋᐧᐸᐦᑕᐦᐃᑯᒋᐠ ᐊᓂᑭ ᒣᐧᐢᑕᐢ ᐃᔨᑯᕽ ᑫ ᑖᐯᐧᑕᐋᐧᒋᐠ ᑳᑭᑫ ᐱᒫᑎᓯᐃᐧᓂᕽ ᐃᓯ.

[17] ᐁᑲᐧ ᒫᑲ ᐊᓇ ᑭᐦᒋ ᐅᑭᒫᐤ ᑳᑭᑫ ᑳ ᐊᔮᐟ, ᐁᑳ ᑳ ᓂᓯᐊᐧᓈᑎᓯᐟ ᐁᑳ ᑳ ᐋᐧᐸᒥᐦᐟ ᐊᓇ ᐱᑯ ᑭᓭᒪᓂᑐ, ᑭᑕ ᐃᐧ ᑭᐢᑕᑭᒫᐤ ᒥᓇ ᑭᐢᑌᔨᑖᑯᐊᐤ ᑳᑭᑫ ᒥᓇ ᑳᑭᑫ. ᐋᒣᐣ.

[18] ᐁᐊᐧᑯ ᐅᒪ ᐊᔮᑳᐧᒥᒥᐁᐧᐃᐧᐣ ᐯᑭᑎᓇᒫᑖᐣ ᓂᑯᓭ ᑎᒪᑎ ᐁ ᐃᑕᐢᑌᑭ ᑭᐢᑭᐁᐧᐦᐃᑫᐃᐧᓇ ᑳ ᑭ ᓂᑳᓂᐢᑳᑯᔭᐣ ᐁᐊᐧᑯᓂ ᑭᑕ ᐅᐦᒋ ᓄᑎᓂᑫᔭᐣ ᒥᔪ ᓄᑎᓂᑫᐃᐧᓂᕽ;

[19] ᐁ ᒥᒋᒥᓇᒪᐣ ᑖᐯᐧᔦᔨᑕᒧᐃᐧᐣ ᒥᓇ ᒥᔪ ᑭᐢᑫᔨᒥᓱᐃᐧᐣ; ᐁᐊᐧᑫᐧᔨᐤ ᐋᑎᐦᐟ ᐁ ᑭ ᒥᑖᑫᐧᓇᒫᓱᒋᐠ ᑭ ᓂᓯᐊᐧᓈᒋᒋᑫᐊᐧᐠ ᑖᐯᐧᔦᔨᑕᒧᐃᐧᓂᕽ ᐃᓯ;

[20] ᐁᐊᐧᑯᓂᐠ ᑖᐱᐢᑯᐨ ᐦᐋᐃᒥᓂᔭᐢ ᒥᓇ ᐋᓬᐃᐠᓵᐣᑕᕒ; ᑳ ᑭ ᐸᑭᑎᓇᒪᐊᐧᐠ ᓭᑕᐣ ᑭᑕ ᑲᑫᐢᑭᒥᑯᐃᐧᓯᒋᐠ ᐁᑳ ᑭᑕ ᐹᐢᑖᒧᒋᐠ.