<1 Timothy ᓂᐢᑕᑦ ᑎᒪᑎ 4

[1] ᒫᑲ ᐊᐦᒑᕽ ᑫᒋᓈ ᐃᑌᐧᐤ ᐃᐢᑳᐧᔮᐨ ᐊᑎ ᑲᑭᓯᑳᑫ ᐊᑎᐦᐟ ᑭᑕ ᓂᒋᐸᔨᐊᐧᐠ ᑖᐯᐧᔦᔨᑕᒧᐃᐧᓂᕽ ᐅᐦᒋ, ᐁ ᓇᑐᑕᐋᐧᒋᐠ ᐁ ᑲᔦᓯᒥᐁᐧᔨᐟ ᐊᐦᒑᐦᑲᐧ ᒥᓇ ᒪᒑᔭ ᐅ ᑭᐢᑭᓄᐦᐊᒫᑫᐃᐧᓂᔨᐊᐧ,

[2] ᐅᐟ ᐊᔭᒥᐁᑳᓱᐃᐧᓂᔨᐤ ᐅᐦᒋ ᐊᔨᓯᔨᓂᐊᐧ ᑳ ᑭᔮᐢᑭᐢᑭᔨᐟ ᐅ ᑭᐢᑫᔨᒥᓱᐃᐧᓂᐋᐧᕽ ᑖᐱᐢᑯᐨ ᐁ ᓂᐳᐃᐧᑲᓱᒋᐠ ᐁ ᑭᓵᐱᐢᑭᑌᐠ ᐱᐋᐧᐱᐢᐠ ᐅᐦᒋ;

[3] ᐁ ᑭᑕᐊᒫᑫᒋᐠ ᑭᑕ ᐃᐧᑭᑐᐃᐧᐦᐟ ᒥᓇ ᐁ ᐃᑕᓱᐁᐧᒋᐠ ᑭᑕ ᐁᑳ ᒥᒋᕽ ᐃᐧᔮᓴ ᑭᓭᒪᓂᑐ ᑳ ᑭ ᐅᓯᑖᐟ ᑭᑕ ᐅᑎᓇᒥᔨᐟ ᓇᓈᐢᑯᒧᐃᐧᓂᕽ ᐊᓂᐦᐃ ᑳ ᑖᐯᐧᑕᒥᔨᐟ ᒥᓇ ᑳ ᑭᐢᑫᔨᑕᒥᔨᐟ ᑖᐯᐧᐃᐧᐣ.

[4] ᒋᑫᒫ ᑲᐦᑭᔭᐤ ᐅᓯᐦᒋᑲᓇ ᑭᓭᒪᓂᑐ ᒥᔪᓯᔨᐊᐧ ᒥᓇ ᓇᒪᐃᐧᔭ ᑫᑲᐧᐩ ᑭᑕ ᐋᑕᐁᐧᔨᑕᒥᕽ, ᑭᐢᐱᐣ ᐁ ᐅᑎᓂᑳᑌᐠ ᑭᑭ ᓇᓈᐢᑯᒧᐃᐧᐣ;

[5] ᐃᐧᔭ ᑲᓈᒋᑖᓂᐊᐧᐣ ᐅᐟ ᐃᑌᐧᐃᐧᐣ ᑭᓭᒪᓂᑐ ᐅᐦᒋ ᒥᓇ ᐊᔭᒥᐦᐋᐃᐧᐣ.

[6] ᑭᐢᐱᐣ ᐅᐦᐃ ᑭ ᒥᐢᑲᐋᐧᓱᒫᐊᐧᐠ ᐅᒋᐋᐧᒥᒫᐊᐧᐠ ᑭ ᑲ ᒥᔪ ᐸᒥᐢᑕᐋᐧᐤ ᙭ ᒋᓴᐢ, ᐁ ᔭᑭᑭᔭᐣ ᐁᑌᐧᒪᑲᕽ ᑖᐯᐧᔦᔨᑕᒧᐃᐧᐣ ᒥᓇ ᐊᓂᒪ ᒥᔪ ᑭᐢᑭᓄᐦᐊᒫᑫᐃᐧᐣ ᑳ ᑭ ᐱᒥᑎᓴᐦᐊᒪᐣ ᐱᔨᐢ ᐊᓄᐦᐨ;

[7] ᒫᑲ ᐋᑕᐁᐧᔨᑕ ᐱᑯᓇᑕ ᒥᓇ ᓄᑐᑫᐧᐃᐧ ᐋᒋᒧᐃᐧᓇ. ᐊᑐᐢᑫᐃᓱ ᒫᑲ ᓇᐊᐧᐨ ᐊᔭᒥᐦᐋᐋᐧᑎᓯᐃᐧᓂᕽ;

[8] ᒋᑫᒫ ᒥᔭᐃᐧ ᐊᑐᐢᑳᒋᑲᐣ ᐊᐱᓯᐢ ᐱᑯ ᐋᐸᒋᐃᐁᐧᐤ; ᒫᑲ ᐊᔭᒥᐦᐋᐋᐧᑎᓯᐃᐧᐣ ᒥᓯᐁᐧ ᐃᓯ ᐋᐸᒋᐃᐁᐧᐤ ᐁ ᐃᐦᑕᑲᐧᕽ ᐊᓱᑕᒫᑯᐃᐧᐣ ᐊᓄᐦᐨ ᐅᒪ ᐱᒫᑎᓯᐃᐧᐣ ᑳ ᐊᔮᐠ ᒥᓇ ᐊᓂᒪ ᓂᑳᐣ ᑳ ᐊᔮᐠ.

[9] ᑖᐯᐧᒪᑲᐣ ᐃᑌᐧᐃᐧᐣ ᒥᓇ ᑌᐸᑫᔨᑖᑲᐧᐣ ᑲᐦᑭᔭᐤ ᐊᐃᐧᔭᐠ ᑭᑕ ᐅᑎᓇᕽ.

[10] ᒋᑫᒫ ᐁᐊᐧᑯ ᐅᒪ ᐅᐦᒋ ᑳ ᐊᑐᐢᑫᔭᕽ ᒥᓇ ᑳ ᐃᐧᑯᔭᕽ ᒋᑫᒫ ᑭᐟ ᐊᐢᐯᔨᒧᑐᑕᐋᐧᓇᐤ ᑳ ᐱᒫᑎᓯᐟ ᑭᓭᒪᓂᑐ ᑳ ᐅᐱᒫᒋᐦᐃᐁᐧᒥᒋᐠ ᑲᐦᑭᔭᐤ ᐊᔨᓯᔨᓂᐊᐧᐠ ᐅᓵᑦ ᒫᑲ ᐊᓂᑭ ᑳ ᑖᐯᐧᑕᐦᑭᐠ.

[11] ᐁᐊᐧᑯᓂ ᐅᐦᐃ ᐃᑕᓱᐁᐧ ᒥᓇ ᑭᐢᑭᓄᐦᐊᒫᑫ.

[12] ᐁᑳᐃᐧᔭ ᐊᐃᐧᔭᐠ ᑭᑕ ᒫᔦᔨᑕᑦ ᐁ ᐅᐢᑳᑎᓯᔭᐣ; ᒫᑲ ᑭ ᑲ ᐃᐧ ᑭᐢᑭᓇᐋᐧᐸᐦᑕᐋᐊᐧᐠ ᐊᓂᑭ ᑳ ᑖᐯᐧᑕᐦᑭᐠ ᐃᑌᐧᐃᐧᓂᕽ ᒥᓇ ᐁ ᐃᓯ ᐱᒫᑎᓯᔭᐣ ᓵᑭᐦᐃᐁᐧᐃᐧᓂᕽ, ᑖᐯᐧᔦᔨᑕᒧᐃᐧᓂᕽ, ᐯᑳᑎᓯᐃᐧᓂᕽ.

[13] ᐃᐢᑯ ᑭᑕ ᑕᑯᓯᓂᔮᐣ ᐋᑲᒣᔨᒧᑐᑕ ᐊᔭᒥᒋᑫᐃᐧᐣ, ᑲᑫᐢᑭᑫᒧᐃᐧᐣ, ᑭᐢᑭᓄᐦᐊᒫᑫᐃᐧᐣ.

[14] ᐁᑳᐃᐧᔭ ᐋᒋᐢᑕᐁᐧᔨᑕ ᐊᓂᒪ ᒥᔨᑯᐃᐧᐣ ᑳ ᑭᑭᐢᑳᑯᔭᐣ ᑳ ᑭ ᒥᔨᑲᐃᐧᔭᐣ ᑭᐢᑭᐁᐧᐦᐃᑫᐃᐧᐣ ᐅᐦᒋ ᐊᓯᒋ ᐁ ᑭ ᓴᓵᒥᓂᑲᐃᐧᔭᐣ ᐁ ᒫᐊᐧᒋᐃᑐᒋᐠ ᑳ ᓂᑳᓀᔨᑖᑯᓯᒋᐠ.

[15] ᐋᑲᒣᔨᒧᑐᑕ ᐁᐊᐧᑯᓂ ᐅᐦᐃ; ᒥᑐᓂ ᐸᑭᑎᓂᓱ ᐁᐊᐧᑯᓂ ᐱᓯᓯᐠ ᑭᑕ ᐊᑐᐢᑳᑕᒪᐣ; ᐁ ᔭᑭᐸᔨᐃᑯᔭᐣ ᑭᑕ ᐋᐧᐸᐦᑕᐦᑭᐠ ᑲᐦᑭᔭᐤ.

[16] ᐊᔮᑳᐧᒥᓯ ᑭᔭ ᒥᓇ ᑭ ᑭᐢᑭᓄᐦᐊᒫᑫᐃᐧᓂᕽ. ᑖᐱᑕᐁᐧᔨᑕ ᐅᐦᐃ ᒋᑫᒫ ᑭᐢᐱᐣ ᐁᑯᓯ ᐃᑐᑕᒪᓂ ᑭᔭ ᑭ ᑲ ᐱᒫᒋᐦᐅᐣ ᒥᓇ ᐊᓂᑭ ᑳ ᓇᑐᑖᐢᑭᐠ.