<1 Timothy ᓂᐢᑕᑦ ᑎᒪᑎ 2

[1] ᓂᑳᐣ ᒫᑲ ᓂ ᓯᑭᑫᒧᐣ ᒪᐃᐧᒧᐢᒋᑫᐃᐧᓇ ᐊᔭᒥᐦᐋᐃᐧᓇ ᐊᔭᒥᐁᐢᑕᒫᑫᐃᐧᓇ ᓇᓈᐢᑯᒧᐃᐧᓇ ᑭᑕ ᑐᑌᐢᑕᒫᒋᐠ ᑲᐦᑭᔭᐤ ᐊᔨᓯᔨᓂᐊᐧᐠ;

[2] ᑭᐦᒋ ᐅᑭᒫᐊᐧᐠ ᒥᓇ ᑲᐦᑭᔭᐤ ᑳ ᑭᐢᑌᔨᑖᑯᓯᒋᐠ; ᐯᔭᑕᐠ ᒥᓇ ᑭᔮᒣᐃᐧᓯᐃᐧᓂᕽ ᑭᑕ ᐱᒫᑎᓯᔭᕽ ᒥᓯᐁᐧ ᐊᔭᒥᐦᐋᐋᐧᑎᓯᐃᐧᓂᕽ ᒥᓇ ᐊᔮᑳᐧᒥᓯᐃᐧᓂᕽ.

[3] ᐁᐊᐧᑯ ᐅᒪ ᒥᔮᐧᓯᐣ ᒥᓇ ᒥᔮᐧᐱᓯᒥᐠ ᑭᓭᒪᓂᑐ ᑯᐱᒫᒋᐦᐃᐁᐧᒥᓇᐤ;

[4] ᑳ ᓇᑕᐁᐧᔨᑕᕽ ᑲᐦᑭᔭᐤ ᐊᔨᓯᔨᓂᐊᐧ ᑭᑕ ᐱᒫᑎᓯᔨᐟ ᒥᓇ ᑭᑕ ᐅᑎᑕᒥᔨᐟ ᑭᐢᑫᔨᑕᒧᐃᐧᐣ ᑖᐯᐧᐃᐧᓂᕽ.

[5] ᒋᑫᒫ ᐯᔭᑯ ᑭᓭᒪᓂᑐ, ᐯᔭᑯ ᒥᓇ ᐅᓇᑐᑌᐢᑕᒫᑫᐤ ᑕᐢᑕᐋᐧᔨᕽ ᑭᓭᒪᓂᑐᐊᐧ ᒥᓇ ᐊᔨᓯᔨᓂᐊᐧ, ᐃᐧᔭ ᐁ ᐊᔨᓯᔨᓂᐃᐧᐟ ᙭ ᒋᓴᐢ,

[6] ᑳ ᑭ ᐸᑭᑎᓂᓱᐟ ᑭᑕ ᑎᐸᐦᐃᑫᐢᑕᒪᐋᐧᐟ ᑲᐦᑭᔭᐤ; ᐁᐊᐧᑯ ᐋᒋᒧᐃᐧᐣ ᐃᑕ ᐁ ᐅᑎᐦᒋᐸᔨᐠ;

[7] ᐁᐊᐧᑯ ᑳ ᑭ ᐅᔭᑭᒥᑲᐃᐧᔮᐣ ᑭᑕ ᐋᑐᑕᒫᐣ ᒥᓇ ᑭᑕ ᐊᐹᐢᑎᓬᐃᐃᐧᔮᐣ (ᑖᐯᐧᐃᐧᐣ ᑳ ᐃᑌᐧᔮᐣ ᓇᒪᐃᐧᔭ ᓂ ᑭᔮᐢᑭᐣ) ᑭᑕ ᑭᐢᑭᓄᐦᐊᒫᐊᐧᑭᐠ ᒉᐣᑕᐃᓬᐊᐠ ᑖᐯᐧᔦᔨᑕᒧᐃᐧᓂᕽ ᒥᓇ ᑖᐯᐧᐃᐧᓂᕽ.

[8] ᓂ ᓇᑕᐁᐧᔨᑌᐣ ᒫᑲ ᓈᐯᐊᐧᐠ ᑭᑕ ᐊᔭᒥᐦᐋᒋᐠ ᒥᓯᐁᐧ ᐃᑕ ᐁ ᐅᐱᓇᑭᐠ ᐁ ᑲᓈᑕᓂᔨᑭ ᒥᒋᐦᒋᔭ ᓇᒪᐃᐧᔭ ᑭᓯᐁᐧᔨᑕᒧᐃᐧᓂᕽ ᒥᓇ ᓇᒪᐃᐧᔭ ᐊᓯᐁᐧᔨᑕᒧᐃᐧᓂᕽ.

[9] ᐁᑯᓯ ᐃᓯ ᒥᓇ ᐃᐢᑫᐧᐊᐧᐠ ᑭᑕ ᐊᐧᐁᐧᓯᒋᐠ ᐁ ᐯᔭᑕᑭᓈᑲᐧᕽ ᑭᑭᐢᑳᒋᑲᐣ, ᐁ ᑲᓇᐁᐧᔨᒥᓱᒋᐠ ᒥᓇ ᐁ ᐊᔮᑳᐧᒥᓯᒋᐠ; ᓇᒪᐃᐧᔭ ᑲᑖᐨ ᐁ ᐊᐱᑳᑕᑭᐠ ᐃᐧᐢᑕᑳᐋᐧᐊᐧ ᒥᓇ ᐁ ᑭᑭᐢᑲᐋᐧᒋᐠ ᐅᓵᐃᐧᓱᓂᔮᐊᐧ ᐊᐦᐳ ᓱᓂᔮᐊᐧᓯᓂᔭ ᐊᐦᐳ ᐁ ᐋᑲᐧᑭᑌᐠ ᑭᑭᐢᑳᒋᑲᐣ;

[10] ᒫᑲ (ᐊᓂᒪ ᑳ ᓇᐃᐢᑳᑯᒋᐠ ᐃᐢᑫᐧᐊᐧᐠ ᑖᐯᐧ ᑳ ᓄᑯᑖᒋᐠ ᐊᔭᒥᐦᐋᐋᐧᑎᓯᐃᐧᐣ) ᒥᔪ ᐊᑐᐢᑫᐃᐧᓇ ᐅᐦᒋ.

[11] ᑭᔮᑦ ᐃᐢᑫᐧᐤ ᑭᑕ ᑲᑫᐧ ᑭᐢᑫᔨᑕᑦ ᑫᑲᐧᐩ ᐯᔭᑕᑳᑎᓯᐃᐧᓂᕽ ᒥᓯᐁᐧ ᓇᓇᐃᑕᒧᐃᐧᓂᕽ.

[12] ᒋᑫᒫ ᓇᒪᐃᐧᔭ ᓂ ᐸᑭᑎᓇᒪᐋᐧᐤ ᐃᐢᑫᐧᐤ ᑭᑕ ᐱᑭᐢᑫᐧᐟ ᐊᐦᐳ ᑭᑕ ᑎᐯᔨᒫᐟ ᓈᐯᐊᐧ ᒫᑲ ᑭᑕ ᐯᔭᑕᑳᑎᓯᐟ.

[13] ᒋᑫᒫ ᐋᑕᑦ ᓂᑳᐣ ᑭ ᐅᓯᐋᐤ ᐁᑲᐧ ᒣᐧᐢᑕᐢ ᐃᑊ;

[14] ᒥᓇ ᓇᒪᐃᐧᔭ ᐋᑕᑦ ᑳ ᑭ ᐊᐧᔦᓯᐃᐦᐟ ᒫᑲ ᐃᐢᑫᐧᐤ ᐁ ᑭ ᐊᐧᔦᓯᐃᐦᐟ ᑭ ᐸᐦᑭᓯᐣ ᐊᐧᓂᑐᑕᒧᐃᐧᓂᕽ;

[15] ᒫᑲ ᑭᑕ ᐱᒫᒋᐦᐋᐤ ᓂᐦᑖᐃᐧᑭᐦᐋᐊᐧᓱᐃᐧᓂᕽ ᑭᐢᐱᐣ ᐃᐧᒉᑐᑖᐧᐃᐧ ᑖᐯᐧᔦᔨᑕᒧᐃᐧᓂᕽ ᒥᓇ ᓵᑭᐦᐃᐁᐧᐃᐧᓂᕽ ᒥᓇ ᑲᓈᑎᓯᐃᐧᓂᕽ ᑭᑭ ᐊᔮᑳᐧᒥᓯᐃᐧᐣ.