<1 Timothy ᓂᐢᑕᑦ ᑎᒪᑎ 3

[1] ᑖᐯᐧᒪᑲᐣ ᐃᑌᐧᐃᐧᐣ, ᑭᐢᐱᐣ ᐊᔨᓯᔨᓂᐤ ᓇᑐᓇᑭ ᑭᐦᒋ ᐊᔭᒥᐦᐁᐃᐧᔨᓂᐤ ᐅᐟ ᐃᑕᐱᐃᐧᐣ ᒥᔪ ᐊᑐᐢᑫᐃᐧᐣ ᓇᑐᓇᑦ.

[2] ᐃᑕᐢᑌᐤ ᒫᑲ ᑭᐦᒋ ᐊᔭᒥᐦᐁᐃᐧᔨᓂᐤ ᐁᑳ ᑭᑕ ᐋᓀᐧᔨᑖᑯᓯᐟ, ᑭᑕ ᐯᔭᑯᔨᐟ ᐃᐧᐊᐧ, ᑭᑕ ᓇᐃᔨᑯᑳᐧᑎᓯᐟ, ᑭᑕ ᐊᔮᑳᐧᒥᓯᐟ, ᐁ ᒪᒥᔪᐟ, ᐁ ᓀᑳᒥ ᐱᐦᑐᑲᐦᐃᐁᐧᐟ, ᐁ ᓂᐦᑖ ᑭᐢᑭᓄᐦᐊᒫᑫᐟ;

[3] ᓇᒪᐃᐧᔭ ᑭᑕ ᑭᑳᐃᐧᑕᐢᑭᐟ, ᓇᒪᐃᐧᔭ ᑭᑕ ᐸᑲᒪᐃᑫᐢᑭᐟ; ᒫᑲ ᑭᑕ ᔪᐢᑳᑎᓯᐟ, ᐁᑳ ᐁ ᓄᑎᓂᑫᐢᑭᐟ, ᐁᑳ ᐁ ᓵᑭᐋᐟ ᓱᓂᔮᐊᐧ;

[4] ᑲᐧᔭᐢᐠ ᐁ ᑎᐯᔨᒫᐟ ᐊᓂᐦᐃ ᐃᐧᑭᕽ ᑳ ᐊᔮᔨᐟ, ᐅᐟ ᐊᐋᐧᓯᒥᓴ ᐁ ᓇᓇᐃᑖᑯᐟ ᒥᓯᐁᐧ ᐊᔮᑳᐧᒥᓯᐃᐧᓂᕽ;

[5] (ᒫᑲ ᑭᐢᐱᐣ ᐊᔨᓯᔨᓂᐤ ᐁᑳ ᑭᐢᑫᔨᑕᒋ ᑭᑕ ᐃᓯ ᑎᐯᔨᑕᕽ ᐃᐧᔭ ᐃᐧᑭ ᑖᓂᓯ ᑫ ᑭ ᐃᓯ ᑲᓇᐁᐧᔨᑕᕽ ᐅᐟ ᐊᔭᒥᐦᐁᐃᐧᑲᒥᑯᔨᐤ ᑭᓭᒪᓂᑐᐊᐧ?)

[6] ᓇᒪᐃᐧᔭ ᐁ ᐅᐢᑳᑎᓯᐟ, ᑳᑲᔦ ᐃᐧᔭ ᑭᐢᑌᔨᒥᓱᒋ ᑭᑕ ᐸᐦᑭᓯᐣ ᐅᔭᓱᐋᐧᑎᑯᐃᐧᓂᔨᕽ ᒪᒑᔭ.

[7] ᐁᑯᓯ ᒥᓇ ᐱᑯ ᑭᑕ ᒥᔮᐧᒋᒥᑯᐟ ᐊᓂᐦᐃ ᐊᐧᔭᐃᐧᑎᒫᔨᕽ ᑳ ᐊᔮᔨᐟ; ᐁᑳ ᓈᐣᑕᐤ ᐃᓯ ᑭᑕ ᐸᐦᑭᓯᕽ ᐊᓀᐧᔨᑖᑯᓯᐃᐧᓂᕽ ᒥᓇ ᐅ ᓇᑳᐧᓯᐁᐧᐃᐧᓂᔨᕽ ᒫᒑᔭ.

[8] ᐁᑯᓯ ᒥᓇ ᐊᔭᒥᐦᐁᐃᐧᔨᓂᐊᐧᐠ ᐱᑯ ᑭᑕ ᐊᔮᑳᐧᒥᓯᒋᐠ, ᐁᑳ ᑭᑕ ᐅᓵᒥᑐᓂᒋᐠ, ᐁᑳ ᑭᑕ ᒥᓂᑫᐧᐢᑭᒋᐠ ᓱᒥᓈᐳ, ᐁᑳ ᑭᑕ ᑳᓴᑳᑎᓯᒋᐠ ᒪᒋ ᐅᑎᓯᐃᐧᐣ;

[9] ᐁ ᒥᒋᒥᓇᑭᐠ ᑳ ᐃᓯ ᐊᐧᓂᒧᑕᕽ ᑖᐯᐧᔦᔨᑕᒧᐃᐧᐣ ᐯᑭ ᑭᐢᑫᔨᒥᓱᐃᐧᓂᕽ.

[10] ᑭᔮᑦ ᒫᑲ ᐅᑭ ᓂᑳᐣ ᑭᑕ ᑯᒋᐋᐊᐧᐠ; ᐁᑲᐧ ᒫᑲ ᑭᑕ ᐃᑕᑐᐢᑫᐊᐧᐠ ᐁ ᐊᔭᒥᐦᐁᐃᐧᔨᓂᐃᐧᒋᐠ ᑭᐢᐱᐣ ᐁᑳ ᐋᓀᐧᔨᑖᑯᓯᑖᐧᐃ.

[11] ᐁᑯᓯ ᒥᓇ ᐃᐢᑫᐧᐊᐧᐠ ᐱᑯ ᑭᑕ ᐃᔨᓂᓯᒋᐠ, ᐁᑳ ᑭᑕ ᒪᒋ ᐋᔨᒧᒥᐁᐧᒋᐠ, ᑭᑕ ᓇᐃᔨᑯᑳᐧᑎᓯᒋᐠ, ᑭᑕ ᐊᔮᑳᐧᒥᓯᒋᐠ ᒥᓯᐁᐧ ᐃᓯ.

[12] ᑭᔮᑦ ᐅᑭ ᐊᔭᒥᐦᐁᐃᐧᔨᓂᐊᐧᐠ ᑭᑕ ᐯᔭᑯᔨᐊᐧ ᐃᐧᐃᐧᐋᐧᐊᐧ, ᑲᐧᔭᐢᐠ ᐁ ᑎᐯᔨᒫᒋᐠ ᐅᐟ ᐊᐋᐧᓯᒥᓯᐋᐧᐊᐧ ᒥᓇ ᐃᐧᑭᐋᐧᐊᐧ.

[13] ᒋᑫᒫ ᐊᓂᑭ ᑳ ᑭ ᐊᑐᐢᑫᒋᐠ ᑲᐧᔭᐢᐠ ᐁ ᐊᔭᒥᐦᐁᐃᐧᔨᓂᐃᐧᒋᐠ ᑲᐢᑭᑕᒫᓱᐊᐧᐠ ᒥᔪ ᐃᑕᑭᒥᑯᐃᐧᐣ ᒥᓇ ᑭᐦᒋ ᓱᑫᔨᒧᐃᐧᐣ ᑖᐯᐧᔦᔨᑕᒧᐃᐧᓂᕽ ᙭ ᒋᓴᓯᕽ ᑳ ᐊᔮᐠ.

[14] ᐅᐦᐃ ᑭ ᒪᓯᓇᐦᐊᒫᑎᐣ ᐁ ᐸᑯᓭᔨᒧᔮᐣ ᐃᐧᐸᐨ ᑭᑕ ᐅᑎᑎᑖᐣ;

[15] ᒫᑲ ᑭᐢᐱᐣ ᑭᓀᐧᐢ ᐃᑖᐱᒋᔮᓀ ᑭᑕ ᑭᐢᑫᔨᑕᒪᐣ ᐊᔨᓯᔨᓂᐊᐧᐠ ᑫ ᐃᓯᐦᒋᑫᐊᐧᐸᐣ ᐅ ᐋᐧᐢᑳᐦᐃᑲᓂᔨᕽ ᑭᓭᒪᓂᑐᐋᐧ, ᐁᐊᐧᑯ ᐅᐟ ᐊᔭᒥᐦᐁᐃᐧᑲᒥᐠ ᑳ ᐱᒫᑎᓯᐟ ᑭᓭᒪᓂᑐ, ᐁ ᒋᒪᒋᑲᓂᐊᐧᕽ ᒥᓇ ᐁ ᐁᓇᐢᑲᒥᑭᒋᑲᓂᐊᐧᕽ ᑖᐯᐧᐃᐧᐣ.

[16] ᐁᑳ ᒫᑲ ᑭᑕ ᑭ ᐋᓀᐧᑕᒥᕽ ᒥᐢᑕᐦᐃ ᒫᒪᐢᑳᑌᔨᑖᑲᐧᐣ ᒪᓂᑐᐋᐧᑎᓯᐃᐧᐣ; ᐊᓇ ᑳ ᑭ ᓄᑯᓯᐟ ᐃᐧᔮᓯᕽ ᑳ ᑭ ᑲᐧᔭᐢᑳᐧᑎᓯᐊᐧᑭᒥᐦᐟ ᐊᐦᒑᐦᑯᕽ, ᑳ ᑭ ᐋᐧᐸᒥᑯᐟ ᐅᑭᓯᑯᐊᐧ, ᑳ ᑭ ᐋᒋᒥᐦᐟ ᒣᑳᐧ ᓇᓈᑐᑯᐢᑳᐣ ᐊᔨᓯᔨᓂᓈᕽ, ᑳ ᑭ ᑖᐯᐧᑖᐦᐟ ᐊᐢᑭᕽ, ᑳ ᑭ ᐅᑎᓂᐦᐟ ᑭᐢᑌᔨᑖᑯᓯᐃᐧᓂᕽ.