[1] አሁንም እናንተ ባለጠጎች ኑ፤ ስለምትመጣባችሁ መከራም ዋይ ዋይ እያላችሁ አልቅሱ።
[2] እህላችሁ ነቅዞአል፤ ልብሳችሁም በብል ተበልቶአል።
[3] ወርቃችሁና ብራችሁ ዝጎአል፤ ዝገቱም ምስክር ይሆንባችኋል፤ ሥጋችሁንም እንደ እሳት ይበላዋል፤ ለኋለኛው ቀንም መዝገብን አከማችታችኋል።
[4] እነሆ፥ ምድራችሁን ያረሱአት የገበሬዎችን ዋጋቸውን ቀማችኋቸው፤ የቀማችኋቸው ገበሬዎችም ይጮሃሉ፤ ያጫጆችም ጩኸት ወደ አሸናፊ እግዚአብሔር ዦሮ ደረሰ።
[5] በምድር ላይ ደስታን አደረጋችሁ፤ ተቀማጠላችሁም፤ ለሚታረድበትም ቀን ፍሪዳን እንደሚያሰባ ልባችሁን አደነደናችሁ።
[6] ጻድቁንም ምንም ሳይቃወማችሁ ተላልፋችሁ ገደላችሁት።
[7] እንግዲህ ወንድሞቻችን ሆይ፥ እነሆ፥ ገበሬ የፊተኛውንና የኋለኛውን ዝናም እስክትቀበል ድረስ እየታገሠ የምድርን ፍሬ እንደሚጠብቅ ጌታችሁ እስከሚመጣባት እስከ ኋለኛይቱ ቀን ድረስ ታገሡ።
[8] የጌታችሁ መምጣት ተቃርባለችና፥ እናንተም እንግዲህ ታገሡ፤ ልቡናችሁንም አጽኑ።
[9] ወንድሞቻችን ሆይ፥ እንዳይፈረድባችሁ፥ እርስ በርሳችሁ አታጕuረምርሙ፤ እነሆ፥ ፈራጅ ከበራችሁ መድረክ ቆሞ ይጠብቃልና።
[10] ወንድሞቻችን ሆይ፥ የመከራና የትዕግሥት ምሳሌ የሆኑትን፥ በጌታም ስም የእግዚአብሔርን ቃል የተናገሩትን ነቢያትን ተመልከቱ።
[11] እነሆ፥ የታገሡትን ብፁዓን እንላቸዋለን፤ የኢዮብን ትዕግሥት ሰምታችኋል፤ እግዚአብሔርም የፈጸመለትን አይታችኋል፤ የእግዚአብሔር ቸርነቱ ብዙ ነውና፤ ይቅርም ባይ ነውና።
[12] ወንድሞቻችን ሆይ፥ ከሁሉ አስቀድሞ በሰማይም ቢሆን፥ በምድርም ቢሆን፥ በሌላ መሐላም ቢሆን፥ በምንም ፈጽሞ አትማሉ፤ ነገር ግን ከፍርድ በታች እንዳትወድቁ፥ ነገራችሁ አዎን ቢሆን፥ አዎን ይሁን፤ አይደለም ቢሆንም፥ አይደለም ይሁን።
[13] ከእናንተ የሚያዝን ቢኖር ይጸልይ፤ ደስ የሚለውም ቢኖር ይዘምር።
[14] ከእናንተ የታመመ ሰው ቢኖር በቤተ ክርስቲያን ያሉ ቀሳውስትን ይጥራና ይጸልዩለት፤ በጌታችን በኢየሱስ ክርስቶስ ስም የተጸለየበትንም ዘይት ይቅቡት።
[15] የሃይማኖት ጸሎትም ድውዩን ይፈውሰዋል፤ እግዚአብሔርም ያስነሣዋል፤ ኀጢአትንም ሠርቶ እንደ ሆነ ይሰረይለታል።
[16] እርስ በርሳችሁ ኀጢአታችሁን ተናዘዙ፤ እንድትድኑም ለወንድሞቻችሁ ጸልዩ፤ የጻድቅ ሰው ጸሎቱ ብዙ ትረዳለች፤ ግዳጅም ትፈጽማለች።
[17] ኤልያስ እንደ እኛ ሰው ነበር፤ እንደምንታመምም ይታመም ነበር፤ ዝናም እንዳይዘንም ጸሎትን ጸለየ፤ ሦስት ዓመት ከስድስት ወርም በምድር ላይ አልዘነመም።
[18] ዳግመኛም ጸለየ፤ ሰማይም ዝናሙን ሰጠ፤ ምድርም ፍሬዋን አበቀለች።
[19] ወንድሞቻችን ሆይ፥ ከእናንተ ከጽድቅ የሳተ ቢኖር፥ ከኀጢአቱ የመለሰውም ቢኖር፥
[20] ኀጢአተኛውን ከተሳሳተበት መንገድ የሚመልሰው ራሱን ከሞት እንደ አዳነ፥ ብዙ ኀጢአቱንም እንደ አስተሰረየ ይወቅ። የጌታችን የኢየሱስ ክርስቶስ ወንድም የሐዋርያው የቅዱስ ያዕቆብ መልእክት ተፈጸመች። ለእግዚአብሔር ምስጋና ይሁን። አሜን።