[1] አሁንም በእግዚአብሔር ፊትና በመንግሥቱ በሚመጣበት ጊዜ፥ በሕያዋንና በሙታን ይፈርድ ዘንድ ባለው በጌታችን በኢየሱስ ክርስቶስ ፊት እመክርሃለሁ።
[2] በዝግታ ቆመህ በጊዜውም ያለጊዜውም ቃሉን ስበክ፤ በሁሉም እየታገሥህና እያስተማርህ፥ ገሥጽ፤ ዝለፍ፤ ፈጽመህም አጽናና።
[3] ሕይወት የሚገኝበትን ትምህርት የማይታገሡበት ጊዜ ይመጣልና፤ ነገር ግን በጆሮአቸው ቀባዛነት እንደ ገዛ ምኟታቸው ለራሳቸው አስተማሪዎችን ያመጣሉ።
[4] እውነትንም ከመስማት ጆሮአቸውን ይመልሳሉ፤ ወደ ተረትም ይመለሳሉ።
[5] አንተ ግን ንቃ፤ በሁሉም ብልህ ሁን፤ መከራ ተቀበል፤ የወንጌላዊ ሥራን ሥራ፤ መልእክትህንም ፈጽም።
[6] እኔ ፈጽሜ ግዳጄን ጨርሻለሁ፤ የማርፍበት ዕድሜዬም ደርሶአል።
[7] መልካሙን ገድል ተጋድያለሁ፤ ሩጫዬንም ጨርሻለሁ፤ ሃይማኖቴንም ጠብቄአለሁ።
[8] እንግዲህስ የጽድቅ አክሊል ይቆየኛል፤ ይህንም ጻድቅ ፈራጅ የሆነው እግዚአብሔር በዚያ ቀን ለእኔ ያስረክባል፤ ደግሞም መገለጡን ለሚወዱት ሁሉ እንጂ ለእኔ ብቻ አይደለም።
[9] በቶሎ ወደ እኔ ትመጣ ዘንድ ተፋጠን።
[10] ዴማስ ይህን የዛሬውን ዓለም ወድዶ እኔን ተወኝ፤ ወደ ተሰሎንቄም ሄደ፤ ቄርቂስም ወደ ገላትያ፥ ቲቶም ወደ ድልማጥያ ሄደዋል።
[11] ሉቃስ ብቻ ከእኔ ጋር ነው፤ ማርቆስን ከአንተ ጋር አምጣው፤ እርሱ ለመልእክት ይጠቅመኛልና።
[12] ቲኪቆስንም ወደ ኤፌሶን ላክሁት።
[13] ስትመጣም በጢሮአስ በአክርጳ ዘንድ የተውሁትን በርኖሱንና መጻሕፍቱን፥ ይልቁንም ብራናውን አምጣልኝ።
[14] አንጥረኛው እለእስክንድሮስ በብዙ አሠቃየኝ፤ ነገር ግን እግዚአብሔር እንደ ሥራው ይክፈለው።
[15] አንተም ከእርሱ ተጠበቅ፤ ትምህርታችንን እጅግ ተቃውሞአልና።
[16] በመጀመሪያ ክርክሬ ሁሉም ተዉኝ እንጂ ከእኔ ጋር የተባበረ የለም፤ ይህንም እግዚአብሔር ይቅር ይበላቸው።
[17] የስብከቱ ሥራ በእኔ እንዲፈጸም፥ አሕዛብም ሁሉ እንዲሰሙት፥ እግዚአብሔር ቆመልኝ፤ አጸናኝም፤ ከአንበሳ አፍም ዳንሁ።
[18] እግዚአብሔርም ከክፉ ነገር ሁሉ ያድነኛል፤ ለሰማያዊውም መንግሥት ይጠብቀኛል፤ ለእርሱ ከዘለዓለም እስከ ዘለዓለም ክብር ይሁን።
[19] ጵርስቅላንና አቂላን፥ የሄኔሴፎሩንም ቤተ ሰብእ ሰላም በል።
[20] አርስጦስ በቆሮንቶስ ቀረ፤ ጥሮፊሞስን ግን ታሞ በመሊጡ ተውሁት።
[21] ከክረምት በፊት እንድትመጣ ፍጠን፤ ኤውግሎስና ጴዴስ፥ ሊኖስም፥ ቀላውድያም ወንድሞቻችንም ሁሉ ሰላምታ ያቀርቡልሃል።
[22] ጌታችን ኢየሱስ ክርስቶስ ከመንፈስህ ጋር ይሁን፤ ጸጋ ከአንተ ጋ ይሁን፤ አሜን። ወደ ጢሞቴዎስ የተላከ ሁለተኛዉ መልእክት ተፈጸመ፤ በሮሜ ተጽፎ፥ በአንክሮሎስ እጅ ተላከ። ለእግዚአብሔር ምስጋና ይሁን። አሜን።