[1] Daahu ana Amuus chift al-Rabb waagif jamb al-madbah wa hu gaal : «Adurbu ruuse amad beet Allah wa gaʼarah yarjif wa yagaʼ fi raas kulla l-naas wa humman yumuutu. Wa zurriiyithum kamaan yaktuluuhum be l-seef wa naadum waahid ma yiʼarrid wa la yifaddil.
[2] Wa kan dakhalo fi l-khabur kula, nimarrighum wa kan talaʼo fi l-sama kula, ninazzilhum.
[3] Wa kan allabbado fi raas jabal al-Karmal kula, nifattichhum wa nakrubhum. Wa kan tamaso fi gaʼar al-bahar le yillabbado minni kula, naamur daabi al-bahar yiʼaddiihum.
[4] Wa kan aduuhum yiwaddiihum abiid kula, ana naamur yaktulhum kulluhum be l-seef. Wa ana gaaʼid niraakhib fooghum wa da ma le l-kheer laakin le l-charr.»
[5] Kan Allah al-Rabb al-Gaadir yalmas al-ard, hi tarjif wa sukkaanha yahzano. Wa hi tatlaʼ kullaha misil bahar hana Masir wa tatmi wa tanzil misil seel al-Niil.
[6] Hu bana beetah aali fi l-sama wa khatta asaasah fi l-ard. Wa hu yitalliʼ almi al-buhuur wa yazgi beyah al-ard. Wa hu bas usmah Allah.
[7] Wa daahu kalaam Allah : «Ya Bani Israaʼiil, intu tahsubu nufuusku muhimmiin leyi ziyaada min al-Habachiyiin walla ? Ma ana bas al-maragt Bani Israaʼiil // min balad Masir wa l-Filistiyiin min Kaftuur wa l-Araamiyiin min Khiir walla ?
[8] Asmaʼo ! Ana Allah al-Rabb niraakhib foogku, intu mamlakat al-muznibiin, wa nuguchchuku min wijh al-ard. Wa laakin be da kula, ma nuguchch zurriiyit Yaakhuub marra waahid. Wa da kalaam Allah.
[9] Wa daahu ana naamur wa nikharbil Bani Israaʼiil min ambeen kulla l-umam. Wa da misil yikharbuluuhum be tabag wa habbaay waahide kula // ma tagaʼ fi l-ard.
[10] Wa kulla l-muznibiin min chaʼabi yumuutu fi l-harib. Dool humman al-yuguulu : ‹Al-masiibe di ma talhagna wa abadan ma tawsalna !›»
[11] «Wa fi l-yoom da, nabni min jadiid madiinat Dawuud al-mukassara. Wa nikaddik nugaarha wa niʼaddil daraadirha wa hi tabga misil awwal.
[12] Wa Bani Israaʼiil yichiilu al-faddal min ard Adoom wa min kulla l-umam al-ana naadeethum be usmi.» Wa da kalaam Allah wa hu yihaggig kalaamah.
[13] «Wa daahu yaji yoom waahid al-foogah al-harraati yaji wara l-yagtaʼ wa l-yagtaʼ al-inab yaji // wara l-yiteeribah. Wa l-khamar yisiil be katara misil almi al-yanzil min al-hajar. Wa da kalaam Allah.
[14] Wa nigabbil chaʼabi Bani Israaʼiil // min al-khurba wa yabnu hillaalhum al-mukassariin wa yaskunu fooghum. Wa yazraʼo jineenaathum hana l-inab wa yacharbo min khamarhum. Wa yimaggunu jineenaathum wa yaakulu fawaakihhum.
[15] Wa nisabbithum fi arduhum wa ma yaturduuhum battaan min arduhum al-ana anteetha leehum.» Wa da, Allah Ilaahku bas gaalah.