[1] Asmaʼan, ya l-awiin al-gaaʼidaat fi jibaal madiinat al-Saamira ! Intan misil bagar al-yasraho fi marʼa Baachaan. Intan tazulman al-masaakiin wa titaʼʼiban al-fagraaniin. Wa taamuran siyaad buyuutkan wa tuguulan : «Jiib leyi nachrab !»
[2] Wa khalaas, Allah al-Rabb halaf be usmah al-Khudduus wa gaal : «Yaji leekan yoom waahid al-foogah yakurbuukan misil huut // be jambaat wa iyaalkan yatʼanoohum // be kookaab.
[3] Wa ayyi waahide tamrug // be khurmit al-durdur wa yiwadduuha ale jabal Harmuun.» Wa da kalaam Allah.
[4] «Wa kan abeetu kalaami ana Allah, khalaas amchu Beet Iil wa aʼaso wa amchu Gilgaal wa ziidu isyaanku. Wa kulli sabaah, gaddumu dahaayaaku wa ayyi talaata yoom, antu uchuurku.
[5] Wa harrugu khubza bala tawwaara hadiiyat chukur wa faachuru be l-hadaaya al-tigaddumuuhum le Allah // be niiyitku. Wa da bas al-cheyy al-yaʼajibku intu, ya Bani Israaʼiil.» Wa da kalaam Allah al-Rabb.
[6] «Ana jibt leeku al-juuʼ fi kulla mudunku wa buyuutku. Ma fi cheyy al-tidissuuh fi khuchuumku wa be da kula, ma tubtu.» Wa da kalaam Allah.
[7] «Wa fi wakt al-iine bas, ana manaʼt minku al-matar. Wa nazzalt al-matara fi hille waahide wa fi hille aakhara kamaan, ana ma nazzaltaha. Wa nazzalt al-matara fi zereʼ waahid wa zereʼ aakhar yibis.
[8] Wa naas mudun itneen aw talaata macho le madiina waahide le yacharbo almi. Laakin ma ligo almi al-yarwiihum wa be da kula, ma tubtu.» Wa da kalaam Allah.
[9] «Wa ana nazzalt waba al-yabaas wa battaan affant nabaataatku. Wa l-jaraad akal jineenaatku wa inabku wa tiinku wa zaytuunku wa be da kula, ma tubtu.» Wa da kalaam Allah.
[10] «Wa nazzalt foogku al-waba misil ana nazzaltah fi balad Masir. Wa subyaanku maato fi l-harib wa kheelku kula anchaalo. Wa chammeetu afanat al-janaazaat fi muʼaskaraatku wa be da kula, ma tubtu.» Wa da kalaam Allah.
[11] «Wa dammartuku misil dammart hillaal Saduum wa Amuura wa damaarhum da ja minni // ana Ilaahhum. Wa bigiitu misil al-muchhaab al-maragooh min al-naar wa be da kula, ma tubtu.» Wa da kalaam Allah.
[12] «Wa da kulla nisawwiih foogku, // ya Bani Israaʼiil, wa misil da bas, nisawwiih foogku. Jahhuzu nufuusku le mugaabalati // ana Ilaahku, ya Bani Israaʼiil !»
[13] Chiifu Allah bas al-khalag al-jibaal wa l-riih. Hu bas al-bayyan le l-insaan al-cheyy al-hu yidoor yisawwiih. Wa hu bas al-sawwa al-nuur dalaam wa hu bas al-yahkim fi kulla l-ard. Wa hu bas usmah Allah al-Ilaah al-Gaadir.