[1] Daahu al-cheyy al-Allah al-Rabb wassafah leyi ana Amuus. Allah gaaʼid yijahhiz jaraad wakit al-kichcheeb bada yamrug wa da baʼad al-ganaadiil al-awwal gataʼoohum le l-malik.
[2] Wa wakit al-jaraad ja akal kulla l-khadaar hana l-balad, ana gult : «Ya Allah al-Rabb, min fadlak akhfir ! Zurriiyit Yaakhuub ma yagdaro yahmalooh achaan humman daʼiifiin.»
[3] Wa khalaas, Allah afaahum wa gaal : «Al-cheyy da ma yukuun.»
[4] Wa daahu al-cheyy al-wassafah leyi Allah al-Rabb. Hu amar al-naar tanzil le yiʼaakhib beeha al-naas. Wa tiyabbis al-almi al-fi tihit al-ard wa taakul kulla ard Israaʼiil.
[5] Wa fi l-bakaan da, ana gult : «Ya Allah al-Rabb, min fadlak al-cheyy da waggifah ! Zurriiyit Yaakhuub ma yagdaro yahmalooh achaan humman daʼiifiin.»
[6] Wa khalaas, Allah al-Rabb afaahum wa gaal : «Al-cheyy da ma yukuun.»
[7] Wa daahu ana chift battaan fi l-ruʼya al-Rabb waagif jamb durdur wa fi iidah indah habil al-yigaawusu beyah al-buna.
[8] Wa Allah gaal leyi : «Chift chunu, ya Amuus ?» Wa ana gult : «Habil al-yigaawusu beyah.» Wa l-Rabb gaal leyi : «Daahu chaʼabi Bani Israaʼiil humman misil al-durdur al-aʼwaj be fiʼilhum al-cheen. Wa achaan da, battaan ma nakhfir leehum.
[9] Ana nihaddim al-bakaanaat al-aaliyiin hana ibaadat zurriiyit Ishaakh wa nikassir madaabih Bani Israaʼiil wa nigawwim harib didd aayilat al-malik Yarubaʼaam.»
[10] Wa fiyah raajil diin waahid min hillit Beet Iil usmah Amasya. Wa l-raajil da rassal le Yarubaʼaam malik mamlakat Israaʼiil wa gaal leyah : «Amuus gaaʼid yiharrich al-chaʼab achaan ma yitaabuʼuuk. Wa Bani Israaʼiil ma yagdaro yahmalo kulla l-kalaam al-hu gaaʼid yuguulah.
[11] Achaan Amuus gaal : ‹Al-malik Yarubaʼaam, udwaanah yaktuluuh ! Wa Bani Israaʼiil kula, yakurbuuhum wa yiwadduuhum fi l-khurba baʼiid min baladhum.›»
[12] Wa khalaas, Amasya gaal le Amuus : «Gumm, ya chawwaafi ! Gabbil amchi le balad Yahuuza wa hinaak abga nabi wa talga rizgak.
[13] Wa laakin ma titnabbaʼ battaan fi Beet Iil achaan da bakaan al-ibaada hana l-malik.»
[14] Wa Amuus radda le Amasya wa gaal : «Ana wa la nabi wa la wileed nabi. Ana raaʼi wa harraati hana tiin.
[15] Laakin Allah bas naadaani wakit ana gaaʼid nasrah be khanami wa gaal leyi : ‹Amchi atnabbaʼ le chaʼabi Bani Israaʼiil.›
[16] Wa hassaʼ da, ya Amasya, asmaʼ kalaam Allah. Inta gult leyi ana ma nitnabbaʼ fi Bani Israaʼiil wa la nihajji le zurriiyit Ishaakh.
[17] Wa fi chaan da, daahu Allah gaal : ‹Martak tabga charmuuta fi lubb al-hille wa awlaadak wa banaatak yaktuluuhum be l-seef. Wa yichiilu ardak wa yigassumu ziraaʼtak // le udwaanak. Wa inta kamaan tumuut fi balad al-kuffaar wa Bani Israaʼiil yakurbuuhum wa yiwadduuhum fi l-khurba.›»