[1] Ruʼyat Ubadya. Daahu kalaam Allah al-Rabb didd chaʼab Adoom. Simiʼna khabar jaayi min Allah, hu rassal rasuul been al-umam // le yuguul : «Yalla gummu ! Gummu haarubu balad Adoom !»
[2] «Ya chaʼab Adoom, daahu ana nisawwiiku umma sakhayre wa fi ust al-umam, yahguruuku ziyaada.
[3] Wa istikbaarku bas khachchaaku, ya intu al-gaaʼidiin fi karaakiir al-hujaar. Taskunu fi l-bakaanaat al-aaliyiin wa tuguulu fi nufuusku : ‹Yaatu yinazzilna tihit ?›
[4] Wa hatta kan titiiru misil al-suguura wa tabnu uchchuku been al-nujuum kula, min hinaak ana ninazzilku. Wa da kalaam Allah.
[5] Wa kan saraariig aw nahhaabiin yajuuku be l-leel, humman ma yichiilu al-yakfiihum bas walla ? Wa kan gattaaʼiin al-inab yaju leeku, ma yikhallu waraahum al-kichcheeb walla ?
[6] Ya zurriiyit Isuu, udwaanku yifattuchuuku wa yakchufu kanzuku.
[7] Kulla l-rujaal al-induku maʼaahum alaakha yaturduuku khaadi le huduudku. Wa l-rujaal al-induku maʼaahum salaam yukhuchchuuku wa yahkumu foogku. Wa rufgaanku al-akalo akilku yukujju leeku charak tihit rijleeku. Wa yuguulu : ‹Humman dool ma induhum agul !›
[8] Fi l-yoom da bas, ana nidammir kulla l-ulama // al-fi Adoom wa l-faahimiin al-fi jibaal zurriiyit Isuu. Wa da kalaam Allah.
[9] Ya hillit Teemaan, furraaski yinbahtu wa be da, al-adu yaktul ayyi naadum al-gaaʼid fi jibaal zurriiyit Isuu.»
[10] «Wa be sabab al-unuf al-sawweetuuh le akhwaanku zurriiyit Yaakhuub, al-eeb yikhattiiku wa tiddammaro ila l-abad.
[11] Achaan fi yoom diigithum, intu wagaftu baʼiid wakit al-ajaanib nahabo khunaahum wa l-udwaan dakhalo biibaan al-madiina wa sawwo amʼiyeedaat le yilgaasamo Madiinat al-Khudus. Wa fi l-yoom da, intu kula bigiitu waahidiin // min udwaanhum.
[12] Ma waajib tafraho fi yoom damaar akhwaanku, fi yoom masiibithum. Wa ma waajib tafraho be sabab Bani Yahuuza fi yoom addammaro. Wa ma waajib tatulgu lisaanku fi yoom diigithum.
[13] Wa ma waajib tadkhulu madiinat chaʼabi fi yoom kharaabhum wa la tafraho be fasaalithum fi yoom kharaabhum wa la tanhabo khunaahum fi yoom kharaabhum.
[14] Wa ma waajib tagoodu fi machbak al-duruub le taktulu al-muʼarridiin minhum wa tisallumu al-faddalo hayyiin fi yoom diigithum.
[15] Achaan al-yoom al-Allah yihaakim foogah kulla l-umam jaayi gariib. Misil sawweet, yisawwu foogak. Wa amalak al-sawweetah, yigabbil leek fi raasak.»
[16] «Ya Bani Yahuuza, misil chiribtu min kaas khadabi fi jabali al-mukhaddas, kulla l-umam yacharbo minnah daayman. Humman yarwo min kaas khadabi misil al-sakkaara yarwo // min al-mariise wa yabgo misil abadan ma khalagoohum.
[17] Wa laakin chaʼab Allah al-faddalo yaljaʼo fi jabal Sahyuun wa l-bakaan da battaan yabga mukhaddas. Wa zurriiyit Yaakhuub yaglaʼo arduhum min al-naas al-galaʼooha minhum.
[18] Wa zurriiyit Yaakhuub yabgo // misil naar wa zurriiyit Yuusuf yabgo // misil ambalbaala. Wa laakin zurriiyit Isuu yabgo // misil gechch wa l-naar tutuchchuhum // wa tahrighum. Wa naadum waahid kula min zurriiyit Isuu ma yifaddil hayy achaan da kalaam Allah al-hu gaalah.»
[19] Wa fi l-junuub, Bani Yahuuza yaglaʼo jibaal zurriiyit Isuu wa fi sahalat Chafiila, yaglaʼo balad al-Filistiyiin. Wa yaglaʼo turaab gabiilat Afraayim wa turaab madiinat al-Saamira. Wa naas gabiilat Banyaamiin yaglaʼo Gilʼaad.
[20] Wa Bani Israaʼiil al-gabbalo min al-khurba yaglaʼo balad Kanʼaan lahaddi Sarafa. Wa sukkaan Madiinat al-Khudus al-gabbalo min al-khurba fi Safaarad yaglaʼo mudun al-junuub.
[21] Wa l-munajjiyiin yatlaʼo jabal Sahyuun wa yahkumu jibaal zurriiyit Isuu. Wa l-muluk yukuun le Allah !