[1] Yoom waahid, Allah hajja le Yuunus wileed Amittaay wa gaal :
[2] «Gumm amchi fi Niinawa, al-madiina al-kabiire di. Wa khabbir naas al-madiina kadar al-fasaala al-humman gaaʼidiin yisawwuuha di, ana chiftaha. Khalli yingarʼu !»
[3] Khalaas, Yuunus gamma arrad wa aba ma yichiil derib hana Niinawa laakin chaal derib hana hillit Tarchiich achaan yidoor yajri min Allah. Wa wisil fi hillit Yaafa fi khachum al-bahar al-Abyad al-Mutawassit wa ligi safiina maache Tarchiich. Khalaas kaffa ujurtah wa rikib maʼa khaddaamiin al-safiina le yamchi Tarchiich, baʼiid min Allah.
[4] Wa wakit maachiin fi l-bahar da, Allah rassal riih chadiide wa challaal chadiid gamma lahaddi yidoor yikassir al-safiina.
[5] Wa khaddaamiin al-safiina khaafo bilheen wa ayyi waahid minhum gamma yasrakh le ilaahah achaan yinajjiihum. Wa daffago al-khumaam al-fi l-safiina fi l-bahar achaan tabga khafiife. Wa Yuunus kamaan dalla tihit fi lubb al-safiina ragad wa naayim noom chadiid.
[6] Wa masʼuul al-safiina ja gaal leyah : «Haay da ! Maalak naayim ? Gumm asʼal ilaahak ! Akuun yifakkir foogna wa yinajjiina min al-moot.»
[7] Wa khaddaamiin al-safiina gaalo ambeenaathum : «Taʼaalu nisawwu amʼiyeedaat achaan naʼarfu yaatu al-jaab leena al-masiibe di.» Khalaas sawwo amʼiyeedaat wa wagaʼ fi Yuunus.
[8] Wa fi l-bakaan da, humman gaalo leyah : «Ooriina chunu al-jaab leena al-masiibe di. Inta jaayi min ween ? Wa jiit tisawwi chunu ? Wa baladak ween wa nafarak chunu ?»
[9] Wa Yuunus radda leehum wa gaal : «Ana Ibraani wa naʼabud Allah Rabb al-samaawaat, al-khalag al-ard wa l-bahar.
[10] Wa ana muʼarrid min Allah.» Wa wakit humman simʼo kalaamah da, khaafo khoof chadiid. Wa gaalo leyah : «Maala sawweet cheyy misil da ?»
[11] Wa l-challaal gaaʼid yatlaʼ be ziyaada. Wa gaalo leyah : «Hassaʼ da, nisawwu leek chunu achaan al-challaal yagiif leena ?»
[12] Wa Yuunus gaal leehum : «Chiiluuni wa azguluuni fi l-bahar wa l-challaal yagiif leeku. Achaan ana naʼarif kadar al-riih al-chadiide di jaat fi chaani ana bas.»
[13] Wa laakin khaddaamiin al-safiina haawalo yigabbulu al-safiina fi khachum al-bahar. Wa ma gidro achaan al-challaal gaaʼid yatlaʼ be ziyaada.
[14] Wa gammo yachhado Allah wa gaalo : «Ya Allah ! Ma tahlikna fi chaan al-raajil da wa ma tukhutt foogna dimmit bari. Ya Allah ! Inta sawweet al-cheyy al-tidoorah.»
[15] Khalaas, chaalo Yuunus wa zagalooh fi l-bahar wa tawwaali al-challaal wagaf.
[16] Wa l-khaddaamiin khaafo khoof chadiid min Allah wa gaddamo leyah dahiiye wa aahad Allah achaan yaʼabudu be ziyaada.
[17] Wa fi l-bakaan da, Allah rassal huutaay kabiire zaratat Yuunus. Wa khalaas, Yuunus gaʼad fi batun al-huutaay talaata yoom wa talaata leele.