[1] Wa wakit Samuwiil bigi chaayib khalaas, darraj awlaadah hukkaam fi Israaʼiil.
[2] Wa wileedah al-bikir usmah Yuwiil wa l-taani Abiiya. Wa humman gaaʼidiin yahkumu min hillit Biir Sabʼa.
[3] Laakin al-awlaad dool ma taabaʼo derib abuuhum. Dawwaro maslahat nafishum wa yakhbalo al-rachwa wa yidangusu al-chariiʼa.
[4] Wa kulla chuyuukh Bani Israaʼiil lammo wa macho le Samuwiil fi hillit al-Raama.
[5] Wa gaalo leyah : «Daahu inta bigiit chaayib wa awlaadak ma gaaʼidiin yitaabuʼu derbak. Hassaʼ da, darrij leena malik yahkimna, misil al-umam al-aakhariin.»
[6] Wa Samuwiil ziʼil fi l-kalaam al-buguul : «Darrij leena malik yahkimna.» Wa gamma saʼal Allah.
[7] Wa Allah gaal leyah : «Asmaʼ kalaam al-chaʼab fi kulla cheyy al-buguuluuh leek. Humman ma rafadook inta laakin rafadooni ana. Wa ma yidooru nahkimhum.
[8] Aʼarif ! Min yoom al-ana maragtuhum min balad Masir lahaddi hassaʼ, humman khallooni wa abado ilaahaat aakhariin. Wa l-cheyy al-daayman sawwooh leyi ana da, hassaʼ gaaʼidiin yisawwuuh leek inta kula !
[9] Wa hassaʼ da khalaas, akhbal talabhum. Laakin hazzirhum wa arrifhum huguug al-malik al-yahkimhum.»
[10] Wa Samuwiil hajja le Bani Israaʼiil al-talabo minnah malik be kulla l-kalaam al-gaalah leyah Allah.
[11] Wa gaal leehum : «Daahu huguug al-malik al-yahkimku. Hu yichiil awlaadku le yusuugu leyah arabaatah hana l-harib wa yarkabo fi kheelah wa yajru giddaam arabatah.
[12] Wa yichiil waahidiin minhum wa yisawwiihum khuyyaad fi aalaaf wa khuyyaad fi khamsiinaat. Wa yahartu zerʼah wa yagtaʼo intaajah wa yasnaʼo leyah silaah hana l-harib wa aalaat arabaatah hana l-harib.
[13] «Wa yichiil banaatku achaan yisawwan leyah riihe fi beetah wa yisawwan leyah akil wa yidissan leyah khubza fi l-furun.
[14] Wa yichiil al-adiil min ziraaʼitku wa jineenaatku hana l-inab wa l-zaytuun wa yantiihum le khaddaamiinah.
[15] Wa yichiil al-uchur min intaaj ziraaʼitku wa inabku wa yantiihum le khaddaamiinah wa kubaaraatah.
[16] Wa yichiil khaddaamiinku wa khaddaamaatku wa subyaanku wa hamiirku al-induhum gudra le yakhdumu leyah.
[17] Wa yichiil al-uchur min khanamku. Wa fi l-akhiir, intu zaatku tabgo leyah abiid !
[18] Wa fi l-wakit da, intu tabku le Allah achaan al-malik al-intu azaltuuh. Wa laakin fi l-yoom da, Allah ma yasmaʼku abadan.»
[19] Wa be da kula, al-chaʼab abo ma simʼo kalaam Samuwiil wa gaalo : «La ! Ma lammaana ! Darrij leena malik bas
[20] achaan aniina kula nabgo misil al-umam al-aakhariin. Malikna yahkim foogna wa yamchi giddaam askarna wa yihaarib maʼaana.»
[21] Wa Samuwiil simiʼ kulla kalaamhum wa kallamah le Allah.
[22] Wa Allah gaal leyah : «Kan ke da, asmaʼ kalaamhum wa darrij leehum malik.» Wa khalaas, Samuwiil gaal le Bani Israaʼiil : «Khalli ayyi waahid yigabbil hillitah.»