[1] Wa sanduug Allah gaʼad fi balad al-Filistiyiin muddit sabʼa chahar.
[2] Wa l-Filistiyiin naado rujaal al-diin wa l-chawwaafiin wa saʼaloohum wa gaalo : «Kikkeef nisawwu be sanduug Allah ? Wassufuuna kikkeef nisawwu le nigabbuluuh fi baladah.»
[3] Wa humman gaalo : «Kan tigabbulu sanduug ilaah Bani Israaʼiil fi baladah, ma tigabbuluuh saakit. Laakin gaddumu leyah hadiiye le kaffaarat al-khata. Wa be da, intu tachfo min al-marad wa taʼarfu maala Allah ma rafaʼ minku al-waba da.»
[4] Wa l-Filistiyiin gaalo : «Chunu al-hadiiye le kaffaarat al-khata al-niwadduuha maʼaayah ?» Wa humman raddo leehum wa gaalo : «Gaddumu khamsa daraadim hana dahab misil al-hubuun dool wa khamsa faar hana dahab ale adad kubaaraat al-Filistiyiin. Achaan al-waba da lihigku intu kulluku wa kubaaraatku kula.
[5] Adduluuhum misil al-hubuun al-karabooku wa l-faar al-kharab baladku. Wa timajjudu Allah Ilaah Bani Israaʼiil. Wa be da, akuun yiwaggif nazziliin al-waba minku intu wa min ilaahku wa min baladku.
[6] Ma tigawwu ruuseeku misil zamaan al-Masriyiin wa Firʼoon malik Masir sawwooh ! Achaan Allah taʼʼabaahum hatta humman khallo Bani Israaʼiil faato.
[7] «Wa hassaʼ da, sawwu kaarro jadiid wa chiilu bagar itneen chawaayil al-yoom waahid kula ma rabato fooghum uud hana kaarro. Wa arbutuuhum fi l-kaarro da. Wa gabbulu iyaalhum wa dissuuhum fi l-zariibe.
[8] Chiilu sanduug Allah wa khuttuuh fi l-kaarro. Wa l-khumaam hana l-dahab al-tigaddumuuhum misil hadiiye le kaffaarat al-khata da, dissuhum fi sanduug aakhar wa khuttuuh jamb sanduug Allah. Wa khalaas, khallu al-kaarro yamchi
[9] wa chiifu. Kan al-bagar macho ale huduud balad Israaʼiil ale hillit Beet Chams, taʼarfu kadar Allah bas darabaaku be kulla l-waba da. Wa kan faato be derib aakhar kamaan, taʼarfu kadar al-cheyy al-jaaku, da ma min Allah laakin sudfa bas.»
[10] Wa l-Filistiyiin sawwo al-cheyy al-gaalo leehum da. Chaalo bagar itneen chawaayil wa rabatoohum fi l-kaarro. Wa iyaalhum kamaan dassoohum fi l-zariibe.
[11] Wa khalaas, khatto sanduug Allah fi l-kaarro maʼa l-sanduug al-indah foogah faar wa daraadim hana dahab.
[12] Wa l-bagar macho adiil ale hillit Beet Chams. Humman maachiin fi deribhum wa yabku wa ma mayyalo isra walla zeene. Wa kubaaraat al-Filistiyiin taabaʼoohum le l-bagar lahaddi huduud Beet Chams.
[13] Wa fi l-yoom da, sukkaan Beet Chams gaaʼidiin fi l-waadi yagtaʼo al-gameh. Wa tawwaali wakit chaafo sanduug Allah da, firho farha chadiide.
[14] Wa wakit al-kaarro wassal fi zereʼ Yachuuʼ fi hillit Beet Chams, wagaf. Wa fi l-bakaan da, fiyah hajar kabiir. Wa l-naas chaggago hatab al-kaarro wa dabaho al-bagar al-itneen wa harragoohum dahiiye muharraga le Allah.
[15] Wa gubbaal da, al-Laawiyiin rafaʼo sanduug Allah wa l-sanduug al-maʼaayah al-foogah al-achya hana l-dahab wa nazzaloohum fi l-hajar al-kabiir da. Wa fi nafs al-yoom, sukkaan Beet Chams gaddamo dahaaya muharragiin wa dahaaya aakhariin le Allah.
[16] Wa baʼad chaafo kulla cheyy al-bigi, kubaaraat al-Filistiyiin al-khamsa gabbalo madiinat Akhruun fi nafs al-yoom.
[17] Wa daahu adad daraadim al-dahab al-Filistiyiin gaddamoohum misil hadiiye le kaffaarat al-khata le Allah. Waahid le Achduud wa waahid le Khazza wa waahid le Achgaluun wa waahid le Gaat wa waahid le Akhruun.
[18] Wa l-faar hana l-dahab kamaan, adadhum yimassil kulla l-hillaal al-taabʼiin le l-kubaaraat al-Filistiyiin al-khamsa. Wa l-hillaal dool, humman al-mudun al-gawiyiin wa l-furgaan lahaddi l-huduud gariib le l-hajar al-kabiir al-khatto foogah sanduug Allah. Wa l-hajar da gaaʼid lahaddi l-yoom, fi zereʼ Yachuuʼ al-fi hillit Beet Chams.
[19] Wa Allah darab sukkaan hillit Beet Chams achaan humman chaafo lubb sanduug Allah. Wa maato minhum 70 raajil. Wa l-chaʼab bigo haznaaniin achaan Allah darabaahum darbe chadiide.
[20] Wa sukkaan hillit Beet Chams gaalo : «Yaatu al-yagdar yagood giddaam Allah al-Rabb al-Khudduus ? Wa sanduug Allah da, hassaʼ niwadduuh ween ?»
[21] Wa humman rassalo le sukkaan Kharyat Yaʼariim wa gaalo leehum : «Al-Filistiyiin gabbalo sanduug Allah. Hassaʼ da, taʼaalu wadduuh bakaanku !»