[1] Wa l-wileed Samuwiil gaaʼid yakhdim le Allah tihit muraakhabat Ali. Wa fi l-wakit daak, kalaam Allah al-yihajjiih le l-naas ma katiir wa l-ruʼya kula chiyya.
[2] Wa yoom waahid, Ali naayim fi bakaanah al-yunuum foogah. Wa da wakit al-hu chayyab khalaas wa choofah kula bigi daʼiif wa uyuunah ma bichiifu.
[3] Wa Samuwiil kamaan naayim fi beet Allah fi l-bakaan al-foogah sanduug al-Rabb. Wa da be l-leel gabul faanuus al-Rabb ma yumuut.
[4] Wa Allah naada Samuwiil wa Samuwiil gaal : «Naʼam !»
[5] Wa gamma jara macha le Ali wa gaal leyah : «Daahuuni. Inta naadeetni wa ana jiit !» Wa Ali gaal leyah : «Ana ma naadeetak, ya wileedi. Gabbil nuum !» Wa hu macha naam.
[6] Wa battaan Allah naadaah le Samuwiil. Wa Samuwiil gamma jara le Ali wa gaal : «Daahuuni. Inta naadeetni wa ana jiit !» Wa Ali gaal leyah : «La ! Ana ma naadeetak, ya wileedi. Gabbil nuum !»
[7] Wa fi l-wakit da, Samuwiil ma irif Allah wa la Allah hajja leyah yoom waahid.
[8] Wa Allah naadaah le Samuwiil le taalit marra. Wa Samuwiil gamma jara macha le Ali wa gaal : «Daahuuni. Inta naadeetni wa ana jiit !» Wa khalaas fi l-bakaan da, Ali irif kadar Allah gaaʼid yinaadi al-wileed.
[9] Wa Ali gaal le Samuwiil : «Gabbil nuum. Wa kan naadaak battaan, guul leyah : ‹Kallim, ya Allah. Abdak gaaʼid yasmaʼak !›» Wa Samuwiil gabbal fi bakaanah wa ragad.
[10] Wa Allah ja wa naadaah le Samuwiil misil awwal : «Ya Samuwiil ! Ya Samuwiil !» Wa Samuwiil gaal : «Kallim, ana abdak gaaʼid nasmaʼak !»
[11] Wa Allah gaal leyah : «Nisawwi cheyy fi Bani Israaʼiil al-yabhat kulla l-naas al-yasmaʼooh !
[12] Wa fi l-yoom da, ana nitimm kulla kalaami al-gult nisawwiih fi zurriiyit Ali, min al-bidaaya lahaddi l-nihaaya.
[13] Wa ana gult leyah niʼaakhib zurriiytah ikhaab daayim. Wa da, be sabab al-hugra al-awlaadah gaaʼidiin yisawwuuha wa hu ma aakhabaahum.
[14] Wa be da, ana nahlif kadar zanib hana zurriiyit Ali abadan ma indah kaffaara wa la be dahiiye wa la be hadiiye aakhara.»
[15] Wa baʼad da, Samuwiil gabbal ragad. Wa be fajur, gamma fatah biibaan beet Allah. Wa hu khaaf ma gidir yiʼooriih le Ali be l-ruʼya di.
[16] Laakin Ali naadaah wa gaal : «Ya Samuwiil wileedi !» Wa Samuwiil gaal : «Naʼam.»
[17] Wa Ali gaal : «Chunu al-kalaam al-gaalah leek Allah ? Ma tilabbid minni cheyy. Khalli al-Rabb yiʼaakhibak ikhaab chadiid kan labbadt kilme waahide kula !»
[18] Khalaas, Samuwiil kallamah le Ali be kulla l-kalaam da wa ma labbad minnah cheyy. Wa Ali gaal : «Hu Allah. Wa hu yisawwi al-cheyy al-yidoorah.»
[19] Wa Samuwiil bigi kabiir wa Allah kaan maʼaayah wa kulla l-kalaam al-gaalah leyah Allah da, tamma.
[20] Wa kulla Bani Israaʼiil min Daan fi l-munchaakh lahaddi Biir Sabʼa fi l-wati irfo kadar Allah sabbat Samuwiil nabi.
[21] Wa daayman Allah gaaʼid yibayyin nafsah fi Chiilooh be kalaamah al-hu gaaʼid yuguulah le Samuwiil.