[1] Wa wakit Dawuud bigi chaayib marra waahid wa chibiʼ min al-dunya, darraj wileedah Suleymaan malik fi Israaʼiil.
[2] Wa lamma kulla kubaaraat Bani Israaʼiil wa rujaal al-diin wa l-Laawiyiin.
[3] Wa hasabo al-Laawiyiin al-umurhum 30 sana wa foog wa adadhum bigi 38 000 raajil.
[4] Wa Dawuud khatta minhum 24 000 le yuguudu al-khidme hana beet Allah wa 6 000 kamaan muraakhibiin wa hukkaam.
[5] Wa khatta 4 000 haraasa al-yaharsu al-biibaan wa 4 000 le yachkuru Allah be aalaat al-musiikha al-hu sawwaahum le yachkuru beehum.
[6] Wa Dawuud gassam al-Laawiyiin be majmuuʼaat ale hasab iyaal Laawi wa humman Girchuun wa Gahaat wa Maraari.
[7] Wa awlaad Girchuun humman Laʼdaan wa Chimʼi.
[8] Wa awlaad Laʼdaan humman talaata, al-kabiir Yahiyiil wa Zitaam wa Yuwiil.
[9] Wa Chimʼi kula indah talaata awlaad wa humman Chaluumit wa Haziyiil wa Harraan. Humman dool kubaaraat aayilat Laʼdaan.
[10] Wa Chimʼi indah arbaʼa awlaad aakhariin wa humman Yahat wa Ziina wa Yaʼuuch wa Bariiʼa.
[11] Wa Yahat hu bas al-kabiir wa Ziiza al-taani. Wa laakin Yaʼuuch wa Bariiʼa ma jaabo awlaad katiir wa be da, humman lammo wa bigo aayila waahide achaan yisawwu khidme waahide.
[12] Wa Gahaat indah arbaʼa awlaad wa humman Amraam wa Yishaar wa Habruun wa Uzziyiil.
[13] Wa awlaad Amraam humman Haaruun wa Muusa. Wa Haaruun azalooh hu wa iyaalah le yabgo mukhassasiin wa yisawwi khidmit Allah fi l-bakaan al-mukhaddas marra waahid, ila l-abad. Wa yiharrugu bakhuur giddaam Allah wa yisawwu khidmit Allah wa yibaaruku al-naas be usum Allah ila l-abad.
[14] Wa Muusa hu abd Allah, iyaalah hasaboohum maʼa gabiilat Laawi.
[15] Wa awlaad Muusa humman Girchuum wa Aliʼaazar.
[16] Wa min awlaad Girchuum, Chabuwiil al-kabiir.
[17] Wa Aliʼaazar wilid wileed waahid bas wa hu Rahabya wa hu masʼuul. Wa Rahabya wilid iyaal katiiriin marra waahid.
[18] Wa min awlaad Yishaar, Chaluumit al-kabiir.
[19] Wa awlaad Habruun humman Yariiya al-kabiir wa Amarya al-taani wa Yahaziyiil al-taalit wa Yakhmaʼaam al-raabiʼ.
[20] Wa awlaad Uzziyiil humman Miika al-kabiir wa Yichiiya al-taani.
[21] Wa awlaad Maraari humman Mahli wa Muuchi. Wa awlaad Mahli humman Aliʼaazar wa Khiich.
[22] Wa Aliʼaazar maat ma indah wileed. // Wa laakin indah banaat // wa akhwaanhum iyaal immuhum Khiich akhadoohum.
[23] Wa Muuchi wilid awlaad talaata wa humman Mahli wa Idar wa Yarimuut.
[24] Wa kulla l-naas dool min gabiilat Laawi wa ayyi waahid kabiir fi aayiltah. Wa hasaboohum waahid be waahid wa asaameehum maktuubiin fi l-daftar. Wa min umur hana 20 sana wa foog, humman mukallafiin be khidmit beet Allah.
[25] Achaan Dawuud gaal : «Allah Ilaah Bani Israaʼiil anta al-raaha le chaʼabah. Wa hassaʼ, hu yaskun ila l-abad fi Uruchaliim.
[26] Wa be misil da, al-Laawiyiin ma yangulu battaan kheemat al-ibaada wa kulla muʼiddaat al-khidme.»
[27] Wa hasab al-kalaam al-aakhir hana Dawuud, al-Laawiyiin hasaboohum min umur 20 sana wa foog.
[28] Wa l-Laawiyiin gaaʼidiin tihit zurriiyit Haaruun fi khidmit beet Allah. Wa l-Laawiyiin humman mukallafiin be l-fadaay wa l-khuraf wa tihaarat kulla achya al-mukhaddasiin. Wa yakhdumu fi khidmit beet Allah.
[29] Wa yijahhuzu al-khubza al-yigaddumuuha le Allah wa l-hadaaya hana l-dagiig wa l-khubza bala tawwaara wa l-kaʼak al-sallalo be dihin wa kaʼak aakhar. Wa battaan yifakkuru fi l-miizaan al-yikiilu wa l-yigaawusu beyah.
[30] Wa l-mukallafiin dool yahdaro kulli sabaah wa kulli achiiye le yahmudu wa yachkuru Allah.
[31] Wa yigaddumu le Allah kulla l-dahaaya al-muharragiin hana kulli yoom al-sabt wa awwal yoom fi kulli chahar wa kulli iid. Wa da hasab al-adad al-muhaddad leehum fi l-chariiʼa al-humman taabʼiin leeha daayman giddaam Allah.
[32] Wa yahfado kheemat al-ijtimaaʼ wa l-bakaan al-mukhaddas wa yisaaʼudu akhwaanhum zurriiyit Haaruun fi khidmit beet Allah.