[1] Wa kulla Bani Israaʼiil jo le Dawuud fi Hibruun wa gaalo leyah : «Chiif ! Aniina min dammak wa lahamak.
[2] Zamaan wakit Chaawuul malik, inta gaaʼid tuguud deech Bani Israaʼiil. Wa fi l-wakit daak bas, Allah Ilaahak gaal leek : ‹Inta tabga raaʼi le chaʼabi Bani Israaʼiil wa tahkim fooghum.›»
[3] Wa fi chaan da, kulla chuyuukh Bani Israaʼiil jo le Dawuud fi Hibruun wa hu sawwa maʼaahum muʼaahada giddaam Allah. Wa humman masahooh wa darrajooh malik fi Bani Israaʼiil hasab kalaam Allah al-gaalah zamaan be waasitat Samuwiil.
[4] Wa yoom waahid, Dawuud wa kulla Bani Israaʼiil macho Uruchaliim. Wa fi l-wakit da, al-hille di usumha Yabuus wa l-Yabuusiyiin bas saakniin fiiha.
[5] Wa l-Yabuusiyiin gaalo le Dawuud : «Inta ma tagdar tadkhul fi l-hille di.» Wa laakin Dawuud chaal bakaanhum al-gawi al-usmah Sahyuun. Wa be da, sammo al-bakaan da madiinat Dawuud.
[6] Wa gubbaal ma yichiil al-bakaan da, Dawuud gaal : «Al-naadum al-yugumm awwal wa yahjim al-Yabuusiyiin, ana nidarrijah khaayid al-deech.» Wa khalaas fi l-bakaan da, Yuwaab wileedha le Saruuya hajamaahum awwal wa hu bigi khaayid al-deech.
[7] Wa Dawuud sakan fi l-bakaan al-gawi da. Wa achaan da bas, sammo al-bakaan da madiinat Dawuud.
[8] Wa hu wassaʼ al-hille min ayyi jiihe wa da min durdur al-difaaʼ al-sammooh Millu lahaddi hawaaleeha. Wa Yuwaab kamaan jaddad al-baagi hana l-hille.
[9] Wa gudrat Dawuud gaaʼide tiziid be ziyaada achaan Allah al-Gaadir gaaʼid maʼaayah.
[10] Daahu kubaaraat furraas Dawuud al-saaʼadooh marra waahid fi kulla wakit mulkah. Wa humman maʼa kulla Bani Israaʼiil darrajooh malik hasab kalaam Allah fi Bani Israaʼiil.
[11] Wa daahu asaame furraas Dawuud. Al-awwalaani Yachabʼaam wileed naadum waahid min hillit Hakmuun wa hu khaayid majmuuʼat al-talaatiin. Wa hu bas al-be haribtah katal 300 raajil fi l-duwaas fi yoom waahid.
[12] Wa l-taani Aliʼaazar wileed Duudu min hillit Akhuukh. Hu kula faaris min al-furraas al-talaata.
[13] Wa hu bas al-macha maʼa Dawuud fi Faas Dammiim wakit al-Filistiyiin lammo le l-harib. Wa fi l-bakaan da, fiyah zereʼ hana gameh abyad wa rujaal Bani Israaʼiil arrado min al-Filistiyiin.
[14] Wa karaso fi lubb al-zereʼ wa baʼad da, marago wa haaraboohum le l-Filistiyiin. Wa Allah anta nasur kabiir le Bani Israaʼiil.
[15] Wa yoom waahid, talaata min al-furraas al-talaatiin hana Dawuud jo ligooh le Dawuud fi karkuur Adullaam. Wa fi l-wakit da, muʼaskar al-Filistiyiin gaaʼid fi waadi Rafaayiin.
[16] Wa Dawuud gaaʼid fi bakaanah al-gawi. Wa l-Filistiyiin kamaan gaaʼidiin fi muʼaskarhum fi Beet Laham.
[17] Wa tawwaali Dawuud atmanna wa gaal : «Yaatu yijiib leyi almi nachrab min al-biir al-gaaʼide fi madkhal Beet Laham ?»
[18] Wa khalaas al-furraas al-talaata dool macho dakhalo fi muʼaskar al-Filistiyiin, chaalo almi min al-biir al-gaaʼide fi madkhal Beet Laham, jaabooh wa antooh le Dawuud. Wa laakin hu aba ma yacharbah wa gaddamah hadiiyat charaab le Allah.
[19] Wa gaal : «Istakhfar Allah ! Abadan ma nisawwi cheyy misil da ! Ma nagdar nachrab min al-almi da achaan hu misil damm al-rujaal al-macho jaabooh be taman hayaathum. Aywa ! Be taman hayaathum bas humman jaabo al-almi da.» Wa Dawuud aba ma yachrab al-almi da. Wa da l-cheyy al-sawwooh al-furraas al-talaata dool.
[20] Wa Abichaay akhu Yuwaab hu bas khaayid al-talaata. Wa yoom waahid, hu bas be haribtah katal 300 raajil. Wa usmah bigi taaliʼ ambeen al-furraas al-talaata dool.
[21] Wa hu ligi charaf ziyaada min al-tineen wa hu bigi khaayidhum. Wa ma fi al-yufuutah ambeen al-furraas al-talaata.
[22] Wa Banaaya al-min hillit Khabsiil, hu wileed Yahuuyadaʼ raajil waahid fahal. Wa Banaaya da, hu zaatah fahal wa chadiid. Da hu al-katal rujaal itneen fahaliin hana balad Muwaab. Wa yoom waahid wakit al-talaj nazal, hu dakhal fi nugra wa katal duud.
[23] Wa battaan hu bas katal Masri al-tuulah yisaawi 5 duraaʼ wa uud haribtah gadur murdaas al-ligdaabe. Wa Banaaya macha leyah hajamah be asa wa galaʼ minnah haribtah wa katalah beeha.
[24] Wa dool al-aʼmaal al-sawwaahum Banaaya wileed Yahuuyadaʼ wa usmah bigi taaliʼ misil al-furraas al-talaata.
[25] Wa hu ligi charaf ziyaada min al-talaatiin wa laakin ma lihig al-talaata. Wa Dawuud khattaah masʼuul harasah.
[26] Wa daahu rujaal furraas aakhariin hana Dawuud. Asaahiil akhu Yuwaab wa Alihanaan wileed Duudu min Beet Laham
[27] wa Chammuut min hillit Haruur wa Haalas min hillit Faluun
[28] wa Iira wileed Ikheech min hillit Takhuuʼa wa Abiʼaazar min hillit Anatuut
[29] wa Sibbakaay min hillit Huucha wa Ilaay min hillit Akhuukh
[30] wa Mahraay min hillit Natuufa wa Khaalid wileed Baʼana min hillit Natuufa
[31] wa Ittaay wileed Riibaay min hillit Gibeeʼa min gabiilat Banyaamiin wa Banaaya min hillit Firʼatuun
[32] wa Huuraay min waadi Gaʼach wa Abiyiil min hillit Araba
[33] wa Azmaawat min hillit Baharuum wa Aliyahba min hillit Chaʼalbuun
[34] wa awlaad Haachim min hillit Gizuun wa Yuunataan wileed Chaagi min hillit Haraar
[35] wa Akhiyaam wileed Saakar min hillit Haraar wa Alifaal wileed Uur
[36] wa Hiifar min hillit Makiira wa Akhiiya min hillit Faluun
[37] wa Hasru min hillit Karmal wa Naʼaraay wileed Azbaay.
[38] Wa Yuwiil akhu Naataan wa Mibhaar wileed Haagri
[39] wa Salakh al-Ammuuni wa Nahraay min hillit Biiruut hu al-chaayil silaah Yuwaab wileedha le Saruuya
[40] wa Iira wa Gaarib kulluhum min aayilat Yitri
[41] wa Uriiya al-Hitti wa Zabaad wileed Ahlaay
[42] wa Adiina wileed Chiiza cheekh khachum beet Raʼuubiin wa maʼaayah 30 askar
[43] wa Hanaan wileed Maʼaaka wa Yuchaafaat min hillit Mitan
[44] wa Uzziiya min hillit Achtaruut wa Chamaʼ wa Yaʼiyiil awlaad Huutaam min hillit Aruuʼir
[45] wa Yadiyaʼiil wileed Chimri wa akhu Yuuha min hillit Tiisi
[46] wa Aliyiil min hillit Mahawa wa Yaribaay wa Yuchawya awlaad Alinaaʼam wa Yitma min balad Muwaab
[47] wa Aliyiil wa Ubeed wa Yaʼsiyiil min hillit Suuba.