[1] Wa yoom waahid, Ibliis gamma didd Bani Israaʼiil wa lazza Dawuud le yahsibhum.
[2] Wa khalaas, Dawuud gaal le Yuwaab wa le kubaaraat al-chaʼab : «Amchu ahsubu kulla Bani Israaʼiil min turaab Daan fi l-munchaakh lahaddi Biir Sabʼa fi l-wati. Wa gabbulu jiibu leyi adadhum achaan naʼarfah.»
[3] Wa Yuwaab gaal : «Khalli Allah yiziid adad al-chaʼab miya marra, ya siidi al-malik ! Al-naas dool ma kulluhum ke khaddaamiinak walla ? Wa maala inta ya siidi tidoor tisawwi al-cheyy da ? Wa maala tilizz Bani Israaʼiil fi l-khata da ?»
[4] Wa laakin amur al-malik bigi chadiid bilheen fi Yuwaab. Wa khalaas, Yuwaab gamma raakh fi kulla balad Israaʼiil le yahsib al-chaʼab. Wa baʼad da, gabbal fi Uruchaliim.
[5] Wa Yuwaab anta adad hisaab al-chaʼab le l-malik. Wa rujaal Bani Israaʼiil adadhum 1 100 000 askar al-yaʼarfu harb al-suyuuf wa min Bani Yahuuza kamaan 470 000.
[6] Wa Yuwaab ma hasab al-Laawiyiin wa la gabiilat Banyaamiin achaan hu jaʼal amur al-malik muharram.
[7] Wa l-cheyy da, fasil giddaam al-Rabb wa hu aakhab Bani Israaʼiil.
[8] Wa Dawuud gaal le l-Rabb : «Ana sawweet zanib kabiir achaan hasabt al-chaʼab. Wa laakin hassaʼ da, akhfir leyi khataayi ana abdak. Achaan ana sawweet al-cheyy da misil naadum matmuus.»
[9] Wa Allah hajja le l-nabi Gaad al-yichiif ruʼya le Dawuud wa gaal leyah :
[10] «Amchi guul le Dawuud : ‹Daahu Allah gaal : “Ana nigaddim leek talaata nafar hana masaayib. Wa aʼazil minhum waahid wa ana ninazzilah.”›»
[11] Wa khalaas, Gaad macha le Dawuud wa gaal leyah : «Daahu Allah gaal : ‹Hassaʼ aʼazil al-waba al-tahmalah.
[12] Inta tidoor talaata sana hana juuʼ fi baladak ? Aw tidoor tajri giddaam udwaanak wa humman yaturduuk le muddit talaata chahar ? Aw tidoor Allah yinazzil waba le muddit talaata yoom fi baladak wa malak Allah yijiib al-kharaab fi kulla balad Israaʼiil ?› Hassaʼ da, fakkir wa ooriini al-radd al-nuguulah le Allah al-rassalaani.»
[13] Wa Dawuud gaal le Gaad : «Ana addaayagt marra waahid. Khalli nagaʼ fi iid Allah achaan rahmatah wasiiʼe. Wa khalli ma nagaʼ fi iid insaan.»
[14] Wa khalaas, Allah nazzal waba fi Israaʼiil. Wa maato 70 000 naas fi kulla balad Israaʼiil.
[15] Wa l-Rabb rassal malak fi Uruchaliim le yidammirha. Wa wakit al-malak gaaʼid yidammir, Allah khalla al-fasaala al-awwal kharrar yisawwiiha. Wa gaal le l-malak al-mudammir : «Khalaas kafa. Arfaʼ iidak !» Wa fi l-wakit da, malak Allah gaaʼid fi madagg hana Urnaan al-Yabuusi.
[16] Wa Dawuud rafaʼ raasah wa chaaf malak Allah waagif ambeen al-sama wa l-ard wa seefah masluul fi iidah wa maddaah ale Uruchaliim. Khalaas fi l-bakaan da, Dawuud wa l-chuyuukh libso khulgaan al-tooba wa wagaʼo be wujuuhhum fi l-ard.
[17] Wa Dawuud gaal le l-Rabb : «Ma ana bas amart yahsubu al-chaʼab walla ? Wa ana bas aznabt wa sawweet al-khata da. Laakin al-chaʼab dool misil khanam bas, ma sawwo cheyy ! Ya Allah Ilaahi ! Aakhibni ana wa aayilti wa laakin ma tinazzil al-waba da fi chaʼabak.»
[18] Wa malak Allah gaal le Gaad : «Amchi guul le Dawuud khalli yamchi yabni madbah le Allah fi l-madagg hana Urnaan al-Yabuusi.»
[19] Wa khalaas Dawuud macha misil gaalah leyah Gaad be usum Allah.
[20] Wa Urnaan gaaʼid yudugg al-gameh fi l-madagg. Wa wakit anlafat, chaaf al-malak. Wa awlaadah al-arbaʼa al-maʼaayah arrado wa allabbado.
[21] Wa Dawuud macha le Urnaan wa wakit Urnaan chaafah, hu marag min al-madagg wa wagaʼ fi l-ard wa sajad giddaam al-malik.
[22] Wa Dawuud gaal le Urnaan : «Antiini bakaan al-madagg da. Nidoor nabni foogah madbah le Allah achaan al-waba da yagiif min al-chaʼab. Antiini wa nikaffiik tamanah kaamil.»
[23] Wa Urnaan radda le Dawuud wa gaal : «Ya siidi al-malik, chiil al-madagg wa sawwi beyah ayyi cheyy al-tidoorah. Chiif, ana nantiik al-bagar le l-dahiiye al-muharraga wa l-kaarro al-yifajjukhu beyah al-gameh yabga leek hatab wa l-gameh kamaan yabga hadiiye hana dagiig. Ana nantiik kulla l-achya dool.»
[24] Wa laakin al-malik Dawuud gaal le Urnaan : «La, abadan ! Ana nachriih minnak wa nikaffiik tamanah kaamil. Ma nidoor nichiil khumaamak wa nigaddimah le Allah wa be da, nigaddim dahiiye al-ma nakhsar foogha.»
[25] Wa khalaas, Dawuud chara min Urnaan al-madagg be 600 jineeh hana dahab.
[26] Wa fi l-bakaan da, Dawuud bana madbah le Allah wa gaddam foogah dahaaya muharragiin wa dahaaya salaama. Wa hu saʼal Allah wa Allah khibil suʼaalah wa nazzal naar min al-sama le yiharrig al-dahaaya al-fi l-madbah.
[27] Wa baʼad da, Allah amar al-malak yidakhkhil seefah fi beetah.
[28] Wa fi l-wakit da, Dawuud irif kadar Allah radda leyah fi suʼaalah fi l-madagg hana Urnaan al-Yabuusi. Wa min al-yoom da, Dawuud gaaʼid yigaddim dahaaya fi l-bakaan da.
[29] Fi l-wakit da, kheemat Allah al-Muusa banaaha fi l-sahara wa l-madbah hana l-dahaaya gaaʼidiin fi bakaan al-ibaada fi Gibʼuun.
[30] Wa laakin Dawuud ma gidir macha yasʼal al-Rabb hinaak achaan hu khaaf min seef malak Allah.