[1] Аwа ль бәр Хwәде у wи Мәсиһ Исайе кӧ wе диwана мьри у зендийа бькә, әз бь щамери дьбежьм, тӧ ль wе һатьн у П’адшатийа Wи ки:
[2] Хәбәре даннасин кә, сәр wе нет-фькьре бә, һәгәр wәхтда бә, йан бе wәхт бә, ль шашийа һьле, пешийа нәһәqийе бьгьрә, дьл бьдә мәрьва, бь т’әмамийа сәбьре һин кә.
[3] Чьмки зәмане бе, кӧ мәрьв wе гӧһ нәдьнә һинкьрьна сахләм, ле wе хwәстьнед дьле хwәр’а wан дәрсдара сәрһәв т’оп кьн, йед кӧ тьштед ль гӧһе wан хwәш те wе һин бькьн.
[4] Wе гӧһе хwә жь р’астийе дагәр’иньн у пәй ч’ьловискийа к’әвьн.
[5] Летӧ һәр тьштида сәрхwә бьминә, ль тәнгасийа сәбьр кә, кьре мьзгиндар бькә, qӧльхе хwә бьqәдинә.
[6] Чьмки әз хwәха qӧрбанбунер’а иди сәр р’ож-р’ожа мә у wәхте чуйина мьн пер’а гьһиштийә.
[7] Ләщеда әз qәнщ р’әвим, мьн р’ийа хwә qәданд, баwәри хwәй кьр.
[8] У ньһа мьнр’а дьминә к’офийа һәqийейә сәрк’әтьне, йа кӧ Хӧдан, Һ’акьме р’аст wе бьдә мьн wе р’оже у нә т’әне мьн, ле wан һ’әмуйа жи, йед кӧ бь һ’ьзкьрьне һ’әйра хӧйабуна Wида нә.
[9] Бькә кӧ зу бейи щәм мьн.
[10] Димас кӧ дьнйа һ’ьз кьр әз һьштьм у чу Т’есалонике. Кьрәскис чу Галатйайе, Тито жи Далмәтйайе.
[11] Т’әне Луqа щәм мьн майә. Марqос һьлдә т’әви хwә бинә, чьмки ви qӧльхида әw кери мьн те.
[12] Тьхико, мьн шандә Әфәсе.
[13] Тӧ гава бейи, wи qап’уте кӧ мьн Тройайеда щәм Карпос һьшт, т’әви хwә бинә, ӧса жи к’ьтебед гӧломатк, илаһи йед ч’әрм.
[14] Скәндәре һ’әдад гәләк хьраби ль мьн кьр. Хӧдан wе wәкә кьрьнед wи бинә пешийа wи.
[15] Тӧ жи һ’әвза хwә жь wи бькә, чьмки гәләки ль бәр готьна мә р’абу.
[16] Щара пешьн, гава әз ль бәр диwане сәкьним, кәсәки пьшта мьн нәгьрт, һ’әмуйа әз һьштьм чун. Бьра әв йәк wанр’а гӧнә нәйе һ’әсабе!
[17] Ле Хӧдан т’әви мьн сәкьни у qәwат да мьн, wәки пе мьн Мьзгинидайин мийасәр бә у һ’әму нәщьһу бьбьһен у әз жь дәве шер хьлаз бум.
[18] Хӧдан wе мьн жь һәр кьред хьраб хьлаз кә у сах-сьламәт бьгьһинә П’адшатийа Хwәйә ә’змана. Шькьр жь Wир’а һ’әта-һ’әтайе. Амин.
[19] Сьлаве бьдә Прьскилайе у Акила, ӧса жи мала Онисифоро,
[20] Ерасто ль Корьнт’е ма, Трофимо жи, мьн ль Миләтосе нәхwәш һьшт.
[21] Бькә кӧ бәри зьвьстане бейи. Әйбуло, Пудес, Линос, Клаwдийа у һ’әму хушк-бьра ль тә сьлав дькьн.
[22] Хӧдан т’әви р’ӧһ’е тә бә. К’әрәма Хwәде wәр’а бә.