[1] Аwа лаwе мьн, бь wе к’әрәма мәйә кӧ йәктийа Мәсиһ Исада йә qәwат бә.
[2] У әw тьштед кӧ тә ль бәр гәләк шә’да жь мьн бьһист, бьсперә wан мәрьвед амьн, йед кӧ wе бькарьбьн һьнәкед дьн һин кьн.
[3] Аwа т’әви щәфе мә бә, мина әскәре Мәсиһ Исайи qәнщ.
[4] Т’ӧ әскәр шьхӧле бьнәлитийева мьжул набә, wәки ль сәрәскәр хwәш бе.
[5] Ләщк’арәк жи к’офийе настинә, һәгәр ль гора qәйдә нәк’әвә ләще.
[6] У щотк’ар, кӧ щәфе дьк’ьшинә, гәрәке әw пешьн жь бәред ә’рде тә’м кә.
[7] Бьзаньбә әз чь дьбежьм, чьмки Хӧдан һәр тьштида һ’ьш-аqьл wе бьдә тә.
[8] Бир бинә wи Иса Мәсиһе жь мьрьне р’акьри, жь зӧр’әта Даwьд, ль гора wе Мьзгинийа әз даннасин дькьм.
[9] Бона ве Мьзгинийе әз дьчәрчьрьм, һ’әта мина зӧлмк’арәки жи qәйдкьри мә, ле хәбәра Хwәде qәйдкьри нинә.
[10] Ләма әз һәр тьшти тәйах дькьм, бона хатьре бьжартийа, кӧ әw жи wе хьлазбуна кӧ бь сайа Мәсиһ Иса йә, бьстиньн, бь р’умәта һ’әта-һ’әтайева т’әвайи.
[11] Ве готьнеда хельф т’ӧнә: Һәгәр әм т’әви Wи мьрьн, әме т’әви Wи бьжин жи.
[12] Һәгәр әм тәйах кьн, әме п’адшатийе жи т’әви Wи бькьн. Һәгәр әм Wи инк’ар кьн, Әwе жи мә инк’ар кә .
[13] Һәгәр әм амьн нәминьн, Әwе амьн бьминә, чьмки Әw нькарә Хwә инк’ар кә .
[14] Ван тьшта бинә бира щьмә’те, ль бәр Хwәде бькә дәйне стуйе wан, кӧ сәр хәбәра һәвр’а нәк’әвьнә дә’wе. Әw кери т’ӧ кәси найе, т’әне мала гӧһдара хьраб дькә.
[15] Бькә кӧ тӧ ль Хwәде хwәш бейи, п’аләки ӧса кӧ шәрм нәки, хәбәра р’астийе р’аст шьровәки.
[16] Ле жь хәбәрданед һ’әрамә п’уч’ хwә дур бьгьрә, чьмки әвед кӧ хwә данә ве йәке, wе һе нәп’акийеда пешда һәр’ьн
[17] у хәбәред wан мина хьш-хьше п’әнщ дьдә. Һумәнайо у Фьлито жи жь wан ьн,
[18] йед кӧ жь р’астийе хальфинә у дьбежьн, кӧ р’абуна мьрийа иди буйә у баwәрийа һьнәка дәвәр’у дькьн.
[19] Ле бәле һ’име кӧ Хwәде дани qәдим дьминә у әв мор сәр ә: «Хӧдан йед п’ара Хwә нас дькә» у «Һәр кәсед кӧ наве Хӧдан һьлданә сәр хwә, бьра әw жь нәһәqийе дур бьн».
[20] Маләкә мәзьнда нә кӧ т’әне дәрданед зер’ у зив һәнә, ле йед жь дар у һ’әр’ийе жи һәнә, һьнәк бона дәрәщед бьльнд ьн, һьнәк жи бона дәрәщед ньмьз.
[21] Аwа һәгәр йәк хwә жь wан тьштед нәщайиз паqьж кә, әwе бьбә дәрданәкә дәрәща бьльнд, бӧһӧрти-жьбарә, кери хwәйе хwә һати, бона һәр дәрәщед qәнщда һазьр.
[22] Жь дьлхwәстьнед щаһьлтийе бьр’әвә, хwә ль һәqийе, баwәрийе, һ’ьзкьрьне, ә’дьлайийе бьгьрә, т’әви wан бә, йед кӧ бь дьле сах гази наве Хӧдан дькьн.
[23] Тӧ хwә жь дә’w-дозед ахмахә бефә’м дур бьгьрә, чьмки тӧ зани кӧ шәр’ жь wан пешда тен.
[24] Ль хӧламе Хӧдан нак’әвә, кӧ шәр’ бькә, ле һьндава һ’әмуйада бәрбьһер бә, бькарьбә һин кә у бинфьрә бә,
[25] бь ширьнайи йед мьqабьл ширәт кә, бәлки Хwәде мәщале бьдә wан, кӧ жь гӧнәкьрьне вәгәр’ьн у р’астийе нас кьн.
[26] Һьнге әwе сәр һ’ьше хwәда бен, жь т’әләка wи мирещьн хьлаз бьн, к’ижани әw гьртьнә, кӧ ә’мьре wи бьqәдиньн.