<Тито 1

[1] Жь Паwлосе хӧламе Хwәде у шандийе Иса Мәсиһ, бона пешдачуйина баwәрийа бьжартийед Хwәде у занәбуна сәр р’астийе, анәгори хwәденасийе,

[2] ӧса жи бона wе гӧмана жийина һ’әта-һ’әтайе газикьри . Бона wе жийине, Хwәдейе хwәйе готьна Хwә, һе дәwред бәреда соз дайә

[3] у wәхте хwәда готьна Хwә бь даннасинийе да ә’йанкьрьне, йа кӧ ль мьн һатә спартьне, бь ә’мьре Хwәдейе Хьлазкьре мә.

[4] Титор’а, лаwе хwәйи һәq-һ’әлали баwәрийа мәйә т’омәрида: Дә бьра к’әрәм у ә’дьлайийа Хwәдейе Бав у Мәсиһ Иса Хьлазкьре мә ль тә бә.

[5] Бона wе йәке мьн тӧ ль Кьретайе һьшти, wәки чь кемаси һәбьн бини сери у һәр бажарәкида бәрпьрсийара к’ьфш ки, чаwа мьн әв т’әми ль тә кьр:

[6] Гәрәке бәрпьрсийар беләк’ә бә, мере жьнәке бә, зар’ед wи баwәрмәнд бьн, йед кӧ бона авитийе йан жи бона нәгӧһдарийе нәк’әтьнә нава дәв-дьрана.

[7] Бәле сәрwер чаwа малкьре Хwәде, гәрәке беләк’ә бә: Нә сәрһ’ьшк, нә һерс, нә пәй шәраве к’әти, нә сьр’тук, нә пәй к’әда һ’әрам,

[8] ле меванһ’ьз, херхwаз, аqьлда гьран, сәр һәqийе, Хwәдер’а дайи, хwәгьрти.

[9] Гәрәке wе готьна амьн qәwин бьгьрә, чаwа кӧ һин буйә, wәки бькарьбә бь һинкьрьна сахләм дьл бьдә йед майин у шашийед мьqабьла бьдә р’уйе wан.

[10] Йед хwәсәрихwә гәләк ьн, йед хәбәрп’уч’ у дәрәwин, илаһи әwед кӧ жь нава щьһуйада нә.

[11] Гәрәке дәнге йед ӧса бьдьнә бьр’ине, чьмки әw мала лап хьраб дькьн, тьштед нәщайиз һин дькьн у ве йәке бона к’ара хwәйә һ’әрам дькьн.

[12] Жь кьретийа һәма хут занәки wан жи готийә: «Кьрети т’ьме дәрәwин ьн, әw р’ә’wьред хьраб ьн, у п’ьр’хӧред бехирәт ьн».

[13] Әв шә’дәтикә р’аст ә, ләма һ’ьшк ль wан һьле, кӧ сахләм бьн баwәрийеда

[14] у гӧһ нәдьнә ч’ьловискийед щьһуйа у т’әмийед wан мәрьвед кӧ жь р’астийе дагәр’ийанә.

[15] Һәр тьшт һ’әлал ә бона һ’әлала, ле һ’әрам у нәбаwәрар’а тьштәки һ’әлал т’ӧнә, һ’әта аqьл у исафа wан жи һ’әр’ьминә.

[16] Әw дьбежьн, кӧ Хwәде нас дькьн, ле бь кьред хwә Wи инк’ар дькьн, һ’әрам у хwәсәрихwә нә у һәр кьрьнәкә qәнщр’а бекер ьн.