[1] ᐁᑯᓯ ᒫᑲ, ᓂᒋᐋᐧᒥᑎᐠ ᑳ ᓵᑭᐦᐃᑕᑯᐠ ᒥᓇ ᑳ ᐱᑭᐢᑳᑎᑕᑯᐠ, ᓂ ᒪᒪᐦᑖᑯᓯᐃᐧᐣ ᒥᓇ ᓂ ᑭᐦᒋ ᑭᐢᑭᓇᐋᐧᒋᐅᐃᐧᐣ, ᐁᑯᓯ ᐃᓯ ᐊᔮᒋᑳᐸᐃᐧᐢᑖᕽ ᑳ ᑎᐯᔨᐦᒋᑫᐟ, ᓯᔮᑭᐦᐃᑕᑯᐠ.
[2] ᓂ ᓯᑭᒫᐤ ᔪᐋᑎᔭ, ᒥᓇ ᓂ ᓯᑭᒫᐤ ᓯᐣᑎᑭ, ᑭᑕ ᐯᔭᑲᐧᓂᔨᐠ ᐅ ᒫᒥᑐᓀᔨᒋᑲᓂᐋᐧᐤ ᑳ ᑎᐯᔨᐦᒋᑫᐟ ᐃᓯ.
[3] ᐁᐦᐁ, ᑭᔭ ᒥᓇ ᑭ ᐹᑯᓭᔨᒥᑎᐣ, ᑖᐯᐧ ᐃᐧᒋ ᐊᑐᐢᑫᒫᑲᐣ, ᐃᐧᒋᐃᐠ ᒥᓇ ᐅᑭ ᐃᐢᑫᐧᐊᐧᐠ, ᒋᑫᒫ ᓂ ᑭ ᐃᐧᒋ ᐊᑐᐢᑫᒥᑲᐧᐠ ᒥᔮᐧᒋᒧᐃᐧᓂᕽ, ᐊᓯᒋ ᑭᓬᐁᒪᐣᐟ, ᒥᓇ ᑯᑕᑲᐠ ᓂ ᐃᐧᒋ ᐊᑐᐢᑫᒫᑲᓇᐠ, ᐅ ᐃᐧᔪᐃᐧᓂᐊᐧᐊᐧ ᐱᒫᑎᓯᐃᐧᓂ ᒪᓯᓇᐦᐃᑲᓂᕽ ᑳ ᐊᔮᔨᑭ.
[4] ᒪᒪᐦᑖᑯᓯᐠ ᑳ ᑎᐯᔨᐦᒋᑫᐟ ᐃᓯ ᑳᑭᑫ: ᒥᓇ ᒫᑲ ᓂ ᑲ ᐃᑖᐧᐣ, ᒪᒪᐦᑖᑯᓯᐠ.
[5] ᑭᔮᑦ ᑭᐟ ᐊᔮᑳᐧᒥᓯᐃᐧᓂᐋᐧᐤ ᑭᑕ ᑭᐢᑫᔨᑕᒪᐧᐠ ᑲᐦᑭᔭᐤ ᐊᔨᓯᔨᓂᐊᐧᐠ. ᑳ ᑎᐯᔨᐦᒋᑫᐟ ᑭᓯᐋᐧᐠ ᐊᔮᐤ.
[6] ᐁᑳᐃᐧᔭ ᑫᑲᐧᐩ ᑭ ᑲ ᐃᐧ ᑲᐢᑫᔨᑕᒥᐃᑯᓈᐋᐧᐤ; ᒫᑲ ᑲᐦᑭᔭᐤ ᑫᑲᐧᐩ ᐁ ᐊᔭᒥᐦᐋᔦᐠ ᒥᓇ ᐁ ᒪᐃᐧᒧᐢᒋᑫᔦᐠ ᑭᑭ ᐁ ᓇᓈᐢᑯᒧᔦᐠ ᑭ ᓇᑐᑌᐢᑕᒫᓱᐃᐧᓂᐋᐧᐊᐧ ᑭ ᑲ ᐃᐧ ᑭᐢᑫᔨᑕᒧᐊᐋᐧᐤ ᑭᓭᒪᓂᑐ.
[7] ᐁᑯᓯ ᐅ ᐯᔭᑕᑫᔨᒧᐃᐁᐧᐃᐧᐣ ᑭᓭᒪᓂᑐ, ᑲ ᐊᔨᐋᐧᑭᐢᑲᒧᒪᑲᕽ ᑲᐦᑭᔭᐤ ᓂᓯᑐᐦᑕᒧᐃᐧᐣ, ᑭ ᑲ ᑲᓇᐁᐧᔨᑕᒫᑯᓈᐋᐧᐤ ᑭ ᑌᐃᐋᐧᐊᐧ ᒥᓇ ᑭ ᒥᑐᓀᔨᒋᑲᓂᐋᐧᐊᐧ ᙭ ᒋᓴᐢ ᐃᓯ.
[8] ᐃᐢᑳᐧᔮᐨ ᒫᑲ, ᓂᒋᐋᐧᒥᑎᐠ, ᐱᑯ ᑫᑲᐧᐩ ᐁ ᑖᐯᐧᒪᑲᕽ, ᐱᑯ ᑫᑲᐧᐩ ᐁ ᑭᐦᒉᔨᑖᑲᐧᕽ, ᐱᑯ ᑫᑲᐧᐩ ᐁ ᑲᐧᔭᐢᑲᐧᕽ, ᐱᑯ ᑫᑲᐧᐩ ᐁ ᒥᔪᓈᑲᐧᕽ, ᐱᑯ ᑫᑲᐧᐩ ᐁ ᒥᔮᐧᑐᑖᑲᐧᕽ; ᑭᐢᐱᐣ ᐁᑕᑲᐧᓄᑫᐧ ᒥᔮᐧᑎᓯᐃᐧᐣ, ᑭᐢᐱᐣ ᐁᑕᑲᐧᓄᑫᐧ ᒪᒥᒋᒥᐁᐧᐃᐧᐣ, ᐅᐦᐃ ᒫᒥᑐᓀᔨᑕᒧᐠ.
[9] ᐊᓂᐦᐃ ᑳ ᑭ ᑭᐢᑭᓄᐦᐊᒫᑲᐃᐧᔦᐠ ᒥᓇ ᑳ ᑭ ᐅᑎᓇᒣᐠ ᒥᓇ ᑳ ᑭ ᐯᐦᑕᒣᐠ ᒥᓇ ᑳ ᑭ ᐃᓯ ᐊᐧᐸᒥᔦᐠ, ᐁᐊᐧᑯᓂ ᐅᐦᐃ ᐃᑐᑕᒧᐠ: ᐁᑯᓯ ᑭᓭᒪᓂᑐ ᑳ ᑎᐯᔨᑕᕽ ᐯᔭᑕᑫᔨᒧᐃᐧᐣ ᑭ ᑲ ᐃᐧᒉᐃᐧᑯᐋᐧᐤ.
[10] ᒫᑲ ᒥᐢᑕᐦᐃ ᓂ ᒪᒪᐦᑖᑯᓯᐣ ᑳ ᑎᐯᔨᐦᒋᑫᐟ ᐃᓯ, ᐁᑲᐧ ᐱᔨᐢ ᐁ ᐋᐹᑲᐃᐧᓯᔦᐠ ᑭ ᒫᒥᑐᓀᔨᒋᑲᓂᐋᐧᕽ ᓂᔭ ᐅᐦᒋ; ᐃᑕ ᑳ ᑭ ᑖᐯᐧ ᒫᒥᑐᓀᔨᒥᔦᐠ, ᒫᑲ ᐁᑳ ᐁ ᑭ ᓇᐃᐸᔨᐃᑯᔦᐠ.
[11] ᓇᒪᐃᐧᔭ ᒫᑲ ᑭᐧᑕᒫᐃᐧᐣ ᑳ ᐅᐦᒋ ᐱᑭᐢᑫᐧᔮᐣ: ᒋᑫᒫ ᓂ ᑭ ᑭᐢᑭᓄᐦᐊᒫᑯᐃᐧᓯᐣ, ᐱᑯ ᐁ ᐃᓯ ᐊᔮᔮᐣ, ᐁᑯᔨᑯᕽ ᑭᑕ ᑌᐱᔭᐁᐧᓯᔮᐣ.
[12] ᓂ ᑭᐢᑫᔨᑌᐣ ᑭᑕ ᐃᓯ ᑕᐸᑌᔨᒧᔮᐣ, ᒥᓇ ᓂ ᑭᐢᑫᔨᑌᐣ ᑭᑕ ᐃᓯ ᐁᐧᔪᒋ ᐊᔮᔮᐣ: ᑲᐦᑭᔭᐤ ᑫᑲᐧᐩ ᒥᓇ ᒥᓯᐁᐧ ᐃᓯ ᓂ ᑭ ᑭᐢᑭᓄᐦᐊᒫᑯᐃᐧᓯᐣ ᑭᑕ ᑭᐢᐳᔮᐣ ᒥᓇ ᑭᑕ ᓄᑌᑲᑌᔮᐣ, ᑭᑕ ᐁᐧᔪᒋ ᐊᔮᔮᐣ ᒥᓇ ᑭᑕ ᑭᐧᑕᒫᔮᐣ.
[13] ᑲᐦᑭᔭᐤ ᑫᑲᐧᐩ ᓂ ᑲ ᑭ ᐃᑐᑌᐣ ᐊᓇ ᐅᐦᒋ ᑳ ᒪᐢᑲᐃᐧᓯᐃᐟ.
[14] ᐁᔨᐁᐧᕽ ᒫᑲ ᑭ ᑭ ᒥᔪᑐᑌᓈᐋᐧᐤ, ᑳ ᑭ ᐅᐦᑎᓇᒪᐃᐧᔦᐠ ᓂᐟ ᐋᔨᒥᓯᐃᐧᓂᕽ.
[15] ᑭᔮᐋᐧᐤ ᒫᑲ ᒥᓇ ᑭ ᑭᐢᑫᔨᑌᓈᐋᐧᐤ, ᑭᔭᐋᐧᐤ ᐱᓬᐃᐱᔭᓂᑎᐠ, ᐁ ᒫᒋᐸᔨᐠ ᒥᔮᐧᒋᒧᐃᐧᐣ, ᐃᐢᐱ ᐁ ᓯᐯᐧᑌᔮᐣ ᒫᓯᑖᓂᔭᐃᕽ ᐅᐦᒋ, ᓇᒪᐃᐧᔭ ᐊᐃᐧᔭᐠ ᐅᑕᔭᒥᐦᐋᐊᐧᐠ ᓄᐦᒋ ᐃᐧᒋᐃᑲᐧᐠ ᐁ ᒣᑭᕽ ᒥᓇ ᐁ ᐅᑎᓇᒥᕽ ᑫᑲᐧᐩ, ᑭᔭᐋᐧᐤ ᐱᑯ;
[16] ᒋᑫᒫ ᐊᐦᐳ ᑌᓴᓬᐊᓇᐃᑲᐃᕽ ᑭ ᑭ ᐃᓯᑎᓴᐦᐊᒪᐃᐧᓈᐋᐧᐤ ᐯᔭᑳᐧᐤ ᒥᓇ ᑭᑖᐧᑦ ᓂ ᑭᐧᑕᒫᐃᐧᓂᕽ.
[17] ᓇᒪᐃᐧᔭ ᒫᑲ ᐁ ᓇᑐᓇᒫᐣ ᒣᑭᐃᐧᐣ; ᒫᑲ ᓂ ᓇᑐᓀᐣ ᒥᓂᓯᐃᐧᐃᐧᐣ ᑭᑕ ᔭᑭᑭᐠ ᑭᔭᐋᐧᐤ ᑭᑕ ᐅᐦᑎᓯᔦᐠ.
[18] ᒫᑲ ᑲᐦᑭᔭᐤ ᑫᑲᐧᐩ ᓂᐟ ᐊᔮᐣ, ᒥᓇ ᓂ ᐁᐧᔪᑎᓯᐣ: ᓂ ᒧᐢᑭᓈᐣ ᐁᑳᐧ, ᐃᐧᔭ ᐁ ᑭ ᒥᔨᐟ ᐃᐹᑊᕒᐊᑕᐃᑕᐢ ᐊᓂᐦᐃ ᑳ ᑭ ᐯ ᐃᓯᑎᓴᐊᒣᐠ, ᐃᐧᑭᒫᑯᐅᐃᐧᐣ ᑖᐯᐧ ᐁ ᐃᐧᑭᒫᑲᐧᕽ, ᐸᑭᑎᓈᓱᐃᐧᐣ ᐁ ᐅᑎᓇᕽ, ᐁ ᒥᔦᐧᔨᑕᕽ ᑭᓭᒪᓂᑐ.
[19] ᓂ ᑭᓭᒪᓂᑐᑦ ᒫᑲ ᑭᑕ ᐅᐦᒋᐢᑕᒪᐋᐧᑕᑦ ᑲᐦᑭᔭᐤ ᑭ ᑭᐧᑕᒫᐃᐧᓂᐋᐧᐊᐧ ᐁ ᐃᓯ ᐁᐧᔪᑎᓯᐟ ᐅ ᑭᐢᑌᔨᑖᑯᓯᐃᐧᓂᕽ ᙭ ᒋᓴᐢ ᐃᓯ.
[20] ᐁᑲᐧ ᒫᑲ ᑭ ᑭᓭᒪᓂᑐᒥᓇᐤ ᒥᓇ ᑯᑖᐃᐧᓇᐤ ᑭᑕ ᐃᐧ ᐊᔮᐤ ᑭᐢᑌᔨᑖᑯᓯᐃᐧᐣ ᑳᑭᑫ ᒥᓇ ᑳᑭᑫ. ᐋᒣᐣ.
[21] ᐊᑕᒥᐢᑳᑯᐠ ᑲᐦᑭᔭᐤ ᐅᑲᓈᑎᓯᐊᐧᐠ ᙭ ᒋᓴᐢ ᐃᓯ. ᐅᒋᐋᐧᒥᒫᐊᐧᐠ ᑳ ᐃᐧᒉᐃᐧᒋᐠ ᑭᐟ ᐊᑕᒥᐢᑳᑯᐋᐧᐊᐧᐠ.
[22] ᑲᐦᑭᔭᐤ ᐅᑲᓇᑎᓯᐊᐧᐠ ᑭᐟ ᐊᑕᒥᐢᑳᑯᐋᐧᐊᐧᐠ, ᐅᓵᑦ ᒫᑲ ᐊᓂᑭ ᓯᓵᕒ ᐃᐧᑭᕽ ᑳ ᐊᔮᒋᐠ.
[23] ᐅ ᑭᓭᐋᐧᑎᓯᐃᐧᐣ ᑳ ᑎᐯᔨᐦᒋᑫᐟ ᒋᓴᐢ ᙭ ᑭ ᑲ ᐃᐧ ᐃᐧᒉᐃᐧᑯᐋᐧᐤ ᑭᐟ ᐊᐦᒑᐦᑯᐋᐧᕽ.