[1] ᐊᔨᐢᑳᐧᔮᐨ, ᓂᒋᐋᐧᒥᑎᐠ, ᒪᒪᐦᑖᑯᓯᐠ ᑳ ᑎᐯᔨᐦᒋᑫᐟ ᐃᓯ. ᑫᔮᐱᐨ ᐅᐦᐃ ᑭᑕ ᒪᓯᓇᐦᐊᒫᑕᑯᐠ ᓇᒪᐃᐧᔭ ᓂᐟ ᐃᑫᔨᑌᐣ, ᑭᔭᐋᐧᐤ ᒫᑲ ᑭᐟ ᐋᐸᒋᐃᑯᓈᐋᐧᐤ.
[2] ᐊᔮᑳᐧᒥᓯᐢᑖᑯᐠ ᐊᑎᒪᐧᐠ, ᐊᔮᑳᐧᒥᓯᐢᑖᑯᐠ ᑳ ᒪᒋ ᐊᑐᐢᑳᑕᐦᑭᐠ, ᐊᔮᑳᐧᒥᓯᐢᑖᑯᐠ ᑳᐣᓯᓴᐣ:
[3] ᒋᑫᒫ ᑭᔮᓈᐤ ᑭ ᓴᕒᑲᑦᓵᐦᐃᓯᐃᐧᓈᓂᐤ, ᑳ ᐊᔭᒥᐦᐋᔭᕽ ᐁ ᐃᐧᒋᐃᑯᔭᕽ ᑭᓭᒪᓂᑐ ᐅᐟ ᐊᐦᒑᐦᑲᐧ, ᒥᓇ ᑳ ᑭᐢᑕᑭᑕᒪᕽ ᙭ ᒋᓴᐢ ᐁ ᐃᐧᒉᐋᐧᔭᕽ, ᐁᑳ ᒫᑲ ᑳ ᐊᐢᐯᔨᒧᑐᑕᒪᕽ ᐃᐧᔮᓯᐃᐧᐃᐧᐣ:
[4] ᐋᑕ ᒫᑲ ᓂᔭ ᑭᑕ ᑭ ᐊᐢᐯᔨᒧᑐᑕᒫᐣ ᐊᐦᐳ ᐃᐧᔮᓯᐃᐧᐃᐧᐣ: ᑭᐢᐱᐣ ᑯᑕᐠ ᐊᔨᓯᔨᓂᐤ ᐃᑌᔨᑕᑭ ᑭᑕ ᑭ ᐊᐢᐯᔨᒧᑐᑕᕽ ᐃᐧᔮᓯᐃᐧᐃᐧᐣ, ᓇᐊᐧᐨ ᓂᔭ ᑫᔮᐱᐨ:
[5] ᐁ ᑭ ᓴᕒᑲᑦᓴᐃᓯᐃᐧᐃᑲᐃᐧᔮᐣ ᐁ ᐊᔨᓈᓀᐅᑭᓯᑳᐠ, ᐃᐢᕒᐁᐃᓬ ᐁ ᐅᐦᒋᔮᐣ, ᐅ ᐱᐢᑭᑐᑌᐃᐧᓯᐃᐧᓂᕽ ᐯᐣᒋᒥᐣ ᐅᐦᒋ; ᐅᔭᓱᐁᐧᐃᐧᓂᕽ ᐃᓯ ᐁ ᐹᕒᐊᓯᐃᐧᔮᐣ;
[6] ᐋᑲᒣᔨᒧᐃᐧᓂᕽ ᐃᓯ, ᐁ ᑯᑕᑭᐊᑭᐠ ᐅᑕᔭᒥᐦᐋᐊᐧᐠ; ᐊᓂᒪ ᑲᐧᔭᐢᑳᐧᑎᓯᐃᐧᐣ ᐅᔭᓱᐁᐧᐃᐧᓂᕽ ᐃᐧᔭ ᑳ ᐋᔮᐠ, ᐁᑳ ᑭᑕ ᑭ ᐋᓀᐧᔨᑖᑯᓯᔮᐣ.
[7] ᒫᑲ ᐊᓂᐦᐃ ᑳ ᑭ ᐅᑎᓯᔮᐣ, ᐁᐊᐧᑯᓂ ᓂ ᐊᐧᓂᒋᑳᐣ ᓂ ᑭ ᐃᑕᑭᑌᐣ ᙭ ᐅᐦᒋ.
[8] ᐁᐦᐁ ᑖᐯᐧ, ᒥᓇ ᑲᐦᑭᔭᐤ ᑫᑲᐧᐩ ᐊᐧᓂᒋᑫᐃᐧᐣ ᓂᐟ ᐃᑕᑭᑌᐣ ᐁ ᐃᓯ ᑭᐢᑌᔨᑖᑲᐧᕽ ᐁ ᑭᐢᑫᔨᒪᐠ ᙭ ᒋᓴᐢ ᑳ ᑎᐯᔨᒥᐟ: ᐊᓇ ᑲᐦᑭᔭᐤ ᑫᑲᐧᐩ ᑳ ᑭ ᐅᐦᒋ ᐊᐧᓂᑖᔮᐣ, ᐁᑯᓯ ᑖᐱᐢᑯᐨ ᒪᒋᑲᐧᓈᓴ ᓂᐟ ᐃᑕᑭᑌᐣ, ᙭ ᑭᑕ ᐅᐦᑎᓯᔮᐣ,
[9] ᐁᑯᓯ ᐃᐧᔭ ᑭᑕ ᑭᑭ ᐊᔮᔮᐣ, ᓇᒪᐃᐧᔭ ᐁ ᐊᔮᔮᐣ ᑲᐧᔭᐢᑳᐧᑎᓯᐃᐧᐣ ᓂᔭ ᑎᐱᔭᐤ, ᐊᓂᒪ ᐅᑎ ᐅᔭᓱᐁᐧᐃᐧᓂᕽ ᑳ ᐅᐦᒋᐠ, ᒫᑲ ᐊᓂᒪ ᑳ ᐅᐦᒋ ᐊᔮᐠ ᐁ ᑖᐯᐧᔦᔨᒥᐦᐟ ᙭, ᑲᐧᔭᐢᑳᐧᑎᓯᐃᐧᐣ ᑭᓭᒪᓂᑐᕽ ᑳ ᐅᐦᒋᐠ ᑖᐯᐧᔦᔨᑕᒧᐃᐧᐣ ᐅᐦᒋ:
[10] ᑭᑕ ᑭᐢᑫᔨᒪᐠ, ᒥᓇ ᐁ ᐃᓯ ᒪᐢᑲᐃᐧᓯᒪᑲᓂᔨᐠ ᐅᐟ ᐋᐱᓯᓯᓄᐃᐧᐣ, ᒥᓇ ᐁ ᐃᐧᒉᑕᒧᐦᐟ ᐅ ᑯᑕᑭᑖᐃᐧᓇ, ᐅ ᓂᐳᐃᐧᓂᕽ ᐁ ᐊᑎ ᐃᓯᐃᑲᐃᐧᔮᐣ;
[11] ᑭᐢᐱᐣ ᓈᐣᑕᐤ ᐃᓯ ᑭᑕ ᐅᑎᑕᒫᐣ ᐋᐱᓯᓯᓄᐃᐧᐣ ᓂᐳᐃᐧᓂᕽ ᐅᐦᒋ.
[12] ᓇᒪᐃᐧᔭ ᐃᐧᔭ ᓵᓴᐩ ᐁ ᐅᑎᑕᒫᐣ, ᐊᐦᐳ ᓵᓴᐩ ᐁ ᑭᓯᐃᑯᐃᐧᓯᔮᐣ: ᒫᑲ ᓂᐟ ᐋᑲᒣᔨᒧᑐᑌᐣ, ᑭᐢᐱᐣ ᑫ ᑭ ᐅᑎᑎᓇᒧᐋᐧᓀ ᐊᓂᒪ ᑳ ᑭ ᐅᐦᒋ ᑳᒋᑎᓂᐟ ᙭ ᒋᓴᐢ.
[13] ᓂᒋᐋᐧᒥᑎᐠ, ᓇᒣᐢᑲ ᓂᐟ ᐃᑕᑭᒥᓱᐣ ᐁ ᑭ ᐅᑎᑎᓇᒫᐣ: ᒫᑲ ᐯᔭᐠ ᑫᑲᐧᐩ ᓂᐟ ᐃᑐᑌᐣ, ᐁ ᐊᐧᓂᑭᐢᑭᓯᑐᑕᒫᐣ ᐊᓂᐦᐃ ᐅᑖᓈᕽ ᑳ ᐊᔮᑭ, ᐁ ᑲᑫᐧ ᑳᒋᑎᓂᒫᐣ ᐊᓂᐦᐃ ᓂᑳᐣ ᑳ ᐊᔮᑭ,
[14] ᓂᐟ ᐋᑲᒥ ᒧᐢᑭᐢᑌᐣ ᐃᑕ ᐁ ᑭᐢᑭᓇᐋᐧᒋᑌᐠ ᐅᐟ ᐊᐢᑖᐧᑫᐃᐧᐣ ᑳ ᑭᐦᒉᔨᑖᑲᐧᓂᔨᐠ ᐅ ᓇᑐᑫᒧᐃᐧᐣ ᑭᓭᒪᓂᑐ ᙭ ᒋᓴᐢ ᐃᓯ.
[15] ᑭᔮᑦ ᒫᑲ ᑭᔮᓇᐤ, ᑕᐦᑐ ᑳ ᐃᐧ ᑭᓯᐃᑯᐃᐧᓯᔭᕽ, ᐁᑯᓯ ᐃᓯ ᒥᑐᓀᔨᑕᑖᐠ: ᑭᐢᐱᐣ ᒫᑲ ᓈᐣᑕᐤ ᑫᑲᐧᐩ ᐱᑐᐢ ᑭ ᐃᓯ ᒥᑐᓀᔨᑌᓈᐋᐧᐤ, ᐊᐦᐳ ᐅᒪ ᑭᓭᒪᓂᑐ ᑭ ᑲ ᐋᐧᐸᐦᑕᐦᐃᑯᐋᐧᐤ:
[16] ᐱᑯ, ᐃᑕ ᓵᓴᐩ ᐁ ᑭ ᐃᐢᑯ ᐅᑎᑕᒪᕽ, ᐁᐊᐧᑯ ᐊᓂᒪ ᑫᔮᐱᐨ ᐱᒧᑖᑕᑖᐠ.
[17] ᓂᒋᐋᐧᒥᑎᐠ, ᓇᓈᐢᐱᑕᐃᐧᐠ ᓂᔭ, ᒥᓇ ᑭᐢᑭᓇᐋᐧᐸᒥᑯᐠ ᐊᓂᑭ ᑳ ᐃᓯ ᐱᒧᐦᑌᒋᐠ ᑖᐱᐢᑯᐨ ᓂᔭᓈᐣ ᑳ ᐃᓯ ᑭᐢᑭᓇᐋᐧᐸᐦᑕᐃᑖᕽ.
[18] ᒋᑫᒫ ᒥᐦᒉᐟ ᐱᒧᐦᑌᐊᐧᐠ, ᐁᐊᐧᑯᓂᐠ ᒥᐦᒉᑖᐧᐤ ᑳ ᐃᐧᐦᑕᒫᑕᑯᐠ, ᐁᑯᓯ ᐁᑲᐧ ᑳ ᐃᐧᐦᑕᒫᑕᑯᐠ ᐊᐦᐳ ᐁ ᒫᑐᔮᐣ, ᐁ ᓄᑎᓇᑭᐠ ᙭ ᐅ ᐱᒥᑖᐢᑯᐃᑲᐣ:
[19] ᐊᓂᑭ ᑭᓯᐸᓄᕽ ᑳ ᐊᔮᒋᐠ ᓂᓯᐊᐧᓈᑎᓯᐃᐧᐣ, ᐊᐧᑖᐋᐧᐤ ᑳ ᐅ ᒪᓂᑐᒥᒋᐠ, ᑳ ᑲᑭᒋᒧᑐᑕᐦᑭᐠ ᐅ ᓇᓀᐯᐃᐧᐅᐃᐧᓂᐋᐧᐤ, ᑳ ᓈᑲᑕᐁᐧᔨᑕᐦᑭᐠ ᐊᐢᑭᐃᐧ ᑫᑲᐧᔭ.
[20] ᒋᑫᒫ ᑭ ᐃᐧᑕᐢᑭᑐᐃᐧᓂᓇᐤ ᑭᐦᒋ ᑭᓯᑯᕽ ᐊᔮᐤ; ᐃᑕ ᐅᐦᒋ ᑳ ᐯᐋᔭᕽ ᐅᐱᒫᒋᐦᐃᐁᐧᐤ, ᑳ ᑎᐯᔨᐦᒋᑫᐟ ᒋᓴᐢ ᙭:
[21] ᑫ ᐅᐢᑭ ᐅᓯᑖᐟ ᐅᒪ ᑳ ᑕᐸᑌᔨᑖᑲᐧᕽ ᒥᔭᐤ, ᑭᑕ ᐃᓯᑖᕽ ᐁᓯᓈᑲᐧᓂᔨᐠ ᑳ ᑭᐢᑌᔨᑖᑲᐧᓂᔨᐠ ᐃᐧᔭᐤ, ᐁ ᐃᓯ ᐊᑐᐢᑫᐟ ᑳ ᐅᐦᒋ ᑲᐢᑭᑖᐟ ᑭᑕ ᓵᑯᒋᑕᒫᓱᐟ ᑲᐦᑭᔭᐤ ᑫᑲᐧᐩ.