[1] ᐹᓬ, ᐅᐟ ᐊᐹᐢᑎᓬᐃᒪ ᙭ ᒋᓴᐢ ᐅᐟ ᐃᑌᔨᑕᒧᐃᐧᐣ ᐅᐦᒋ ᑭᓭᒪᓂᑐ, ᒥᓇ ᑎᒪᑎ ᑭᒋᐋᐧᒥᓇᐤ,
[2] ᐁ ᒪᓯᓇᐦᐊᒪᐋᐧᒋᐠ ᐅᑲᓈᑎᓯᐊᐧ ᒥᓇ ᑳ ᐊᔮᑳᐧᒥᓯᔨᐟ ᐅᒋᐋᐧᒥᒫᐊᐧ ᙭ ᐃᓯ ᑲᓬᐋᓯ ᑳ ᐊᔮᒋᐠ: ᑭᓭᐋᐧᑐᑖᑯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐅᒋᐢᑕᒫᑯᐋᐧᐤ ᑭᓭᒪᓂᑐ ᑯᑖᐃᐧᓇᐤ.
[3] ᓂ ᓇᓈᐢᑯᒫᓈᐣ ᑭᓭᒪᓂᑐ ᐅᑖᐃᐧᔭ ᑳ ᑎᐯᔨᒥᑯᔭᕽ ᒋᓴᐢ ᙭, ᒧᓴᐠ ᐁ ᐊᔭᒥᐦᐁᐢᑕᒫᑖᕽ,
[4] ᐁ ᑭ ᐯᑕᒫᕽ ᐁ ᐃᓯ ᑖᐯᐧᔦᔨᒫᔦᐠ ᙭ ᒋᓴᐢ, ᒥᓇ ᐁ ᐃᓯ ᓵᑭᐋᔦᑳᐧᐤ ᑲᐦᑭᔭᐤ ᐅᑲᓈᑎᓯᐊᐧᐠ,
[5] ᐊᓂᒪ ᐁ ᐃᑕᑌᔨᑕᒣᐠ ᑳ ᑲᐧᔮᑕᐢᑕᒫᑲᐃᐧᔦᐠ ᑭᐦᒋ ᑭᓯᑯᕽ, ᑳ ᑭ ᐯᐦᑕᒣᐠ ᑲᔭᑌ ᐁ ᑖᐯᐧᒪᑲᕽ ᐃᑌᐧᐃᐧᐣ ᒥᔮᐧᒋᒧᐃᐧᓂᕽ,
[6] ᑭᔭᐋᐧᐤ ᑳ ᐅᑎᐦᑎᑯᔦᐠ; ᑳ ᐃᓯ ᐅᑎᐦᑎᑯᒋᐠ ᒥᓯᐁᐧᐢᑲᒥᐠ ᐁ ᒥᓂᓯᐋᐧᕽ ᒥᓇ ᐁ ᔭᑭᐅᒪᑲᕽ, ᑖᐱᐢᑯᐨ ᑳ ᐃᑭᕽ ᑭᔭᐋᐧᐤ ᒥᓇ, ᐊᐢᐱᐣ ᐊᓂᒪ ᐁ ᑭᓯᑳᐠ ᑳ ᑭ ᐯᐦᑕᒣᐠ ᒥᓇ ᑳ ᑭᐢᑫᔨᑕᒣᐠ ᑖᐯᐧ ᐅ ᑭᓭᐋᐧᑎᓯᐃᐧᐣ ᑭᓭᒪᓂᑐ;
[7] ᑖᐱᐢᑯᐨ ᑳ ᑭ ᐃᓯ ᑭᐢᑫᔨᑕᒧᐃᑯᔦᐠ ᐁᐸᑊᕒᐋᐢ ᑳ ᓵᑭᐋᔮᕽ ᓂ ᐃᐧᒋ ᐊᑐᐢᑫᒫᑲᓂᓈᐣ, ᑭᔮᓇᐤ ᒫᑲ ᐃᐧᔭ ᐅᐦᒋ ᐁ ᐊᔮᑳᐧᒥᓯᔨᐟ ᙭ ᐅᐸᒥᐢᑖᑫᒪ,
[8] ᑳ ᑭ ᒥᓇ ᐃᐧᐦᑕᒫᑯᔮᕽ ᑭ ᓵᑭᐦᐃᐁᐧᐃᐧᓂᐋᐧᐤ ᐊᐦᒑᐦᑯᕽ.
[9] ᐁᐊᐧᑯ ᐅᒪ ᒫᑲ ᐅᐦᒋ ᓂᔭᓈᐣ ᒥᓇ, ᐊᐢᐱᐣ ᐊᓂᒪ ᐁ ᑭᓯᑳᐠ ᑳ ᑭ ᐯᑕᒫᕽ, ᓇᒪᐃᐧᔭ ᓂ ᐳᓂᑖᓈᐣ ᐁ ᐊᔭᒥᐦᐁᐢᑕᒫᑖᕽ ᒥᓇ ᓇᑐᑌᐢᑕᒫᑖᕽ, ᑭᑕ ᒧᐢᑭᓀᐢᑳᑯᔦᐠ ᐁ ᑭᐢᑫᔨᑕᒫᐧᔦᐠ ᐅᐟ ᐃᑌᔨᑕᒧᐃᐧᐣ ᒥᓯᐁᐧ ᐊᐦᒑᐦᑯᐃᐧ ᐃᔨᓂᓯᐃᐧᓂᕽ ᒥᓇ ᓂᓯᑐᐦᑕᒧᐃᐧᓂᕽ,
[10] ᐁ ᐃᓯ ᐱᒧᐦᑌᔦᐠ ᑭᑕ ᑌᐸᑫᔨᑖᑯᓯᐢᑕᐋᐧᔦᐠ ᑳ ᑎᐯᔨᐦᒋᑫᐟ ᒥᓯᐁᐧ ᐃᓯ ᐁ ᓇᐦᐃᔭᐁᐧᐋᔦᐠ, ᑭᑕ ᒥᓂᓯᐃᐧᔦᐠ ᑲᐦᑭᔭᐤ ᒥᔪ ᐊᑐᐢᑫᐃᐧᓂᕽ, ᒥᓇ ᐁ ᔭᐦᑭ ᑭᐢᑫᔨᒫᔦᐠ ᑭᓭᒪᓂᑐ;
[11] ᑭᑕ ᒪᐢᑲᐃᐧᓯᐢᑳᑯᔦᐠ ᑲᐦᑭᔭᐤ ᑲᐢᑭᐦᐁᐃᐧᓯᐃᐧᐣ, ᐁ ᐃᓯ ᓱᑳᔭᐊᐧᓂᔨᐠ ᐅ ᑭᐢᑌᔨᑖᑯᓯᐃᐧᐣ, ᒥᓯᐁᐧ ᓯᐱᔭᐁᐧᓯᐃᐧᓂᕽ ᒥᓇ ᓯᐯᔨᑕᒧᐃᐧᓂᕽ ᑭᑭ ᒪᒪᐦᑖᑯᓯᐃᐧᓂᕽ;
[12] ᐁ ᓇᓈᐢᑯᒫᔦᐠ ᐁᐧᔪᑖᐃᐧᕽ, ᑳ ᑭ ᐃᓯᐃᑯᔭᕽ ᑭᑕ ᐃᐧᒋ ᑎᐯᔨᑕᒧᒫᔭᑯᐠ ᐅᑲᓈᑎᓯᐊᐧᐠ ᐋᐧᐢᑌᕽ;
[13] ᑳ ᑭ ᐸᐢᐱᐃᑯᔭᕽ ᐁ ᒪᐢᑲᐃᐧ ᒥᒋᒥᓂᑯᔭᕽ ᐊᐧᓂᑎᐱᐢᑳᐤᐧ, ᐁᑯᓯ ᐁ ᑭ ᐊᐦᒋᐸᑭᑎᓂᑯᔭᕽ ᐅᐟ ᐅᑌᓇᐃᐧᐃᐧᓂᔨᕽ ᐅᑯᓯᓴ ᑳ ᓴᑭᐋᐟ;
[14] ᐊᓇ ᑳ ᐅᐦᒋ ᐊᔮᔭᕽ ᑭ ᐱᒫᒋᐃᑯᐃᐧᓂᓇᐤ, ᐁ ᐳᓀᔨᑕᒫᑲᐃᐧᔭᕽ ᑭ ᒪᒋᐃᑎᐃᐧᓂᓇᐊᐧ:
[15] ᐊᓇ ᑳ ᐊᔮᐟ ᐅᐟ ᐃᓯᓈᑯᓯᐃᐧᓂᔨᐤ ᐁᑳ ᑳ ᓄᑯᓯᔨᐟ ᑭᓭᒪᓂᑐᐊᐧ, ᑳ ᓂᐢᑕᑦ ᓂᐦᑖᐃᐧᑭᐟ ᑲᐦᑭᔭᐤ ᐅᓯᐦᒋᑲᐣ;
[16] ᒋᑫᒫ ᐃᐧᔭ ᐅᐦᒋ ᑲᐦᑭᔭᐤ ᑫᑲᐧᐩ ᑭ ᐅᓯᒋᑳᑌᐤ, ᐊᓂᐦᐃ ᑭᓯᑯᕽ ᑳ ᐊᔮᑭ ᒥᓇ ᐊᐧᐢᑭᑕᐢᑲᒥᐠ ᑳ ᐊᔮᑭ, ᐊᓂᐦᐃ ᑳ ᓄᑲᐧᑭ ᒥᓇ ᐁᑳ ᑳ ᓄᑲᐧᑭ, ᑭᐢᐱᐣ ᑭᐦᒋ ᐅᑭᒫᐊᐧᐱᐃᐧᓇ ᐊᐦᐳ ᑎᐯᔨᐦᒋᑫᐃᐧᓇ ᐊᐦᐳ ᐅᑭᒫᐃᐧᐃᐧᓇ ᐊᐦᐳ ᑲᐢᑭᐦᐁᐃᐧᓯᐃᐧᓇ; ᑲᐦᑭᔭᐤ ᑫᑲᐧᐩ ᐃᐧᔭ ᐅᐦᒋ ᑭ ᐅᓯᒋᑳᑌᐊᐧ, ᒥᓇ ᐃᐧᔭ ᐃᓯ;
[17] ᐁᑯᓯ ᐃᐧᔭ ᓂᑳᓂᐢᑲᑦ ᑲᐦᑭᔭᐤ ᑫᑲᐧᔭ, ᒥᓇ ᐃᐧᔭ ᑳ ᐅᐦᒋ ᐃᐦᑕᑲᐧᓂᔨᑭ.
[18] ᐃᐧᔭ ᒫᑲ ᑳ ᐅᐢᑎᑳᐧᓂᐢᑲᕽ ᒥᔭᐤ, ᐊᔭᒥᐦᐁᐃᐧᑲᒥᐠ ᐅᑎ: ᐊᓇ ᒥᒋᒫᐨ ᐅᐦᒋ ᑳ ᐊᔮᐟ, ᑳ ᓂᐢᑕᒥ ᓂᐦᑖᐃᐧᑭᐟ ᓂᐳᐃᐧᓂᕽ ᐅᐦᒋ; ᒥᓯᐁᐧ ᐃᓯ ᑭᑕ ᐊᔨᐋᐧᑫᔨᑖᑯᓯᐟ.
[19] ᒋᑫᒫ ᑭ ᒥᔪ ᐃᑌᔨᑕᑦ ᐁᐧᔪᑖᐃᐧᕽ ᑲᐦᑭᔭᐤ ᒫᒪᐁᐧᔨᑖᑯᓯᐃᐧᐣ ᑭᑕ ᑭᑭᐢᑳᑯᔨᐟ;
[20] ᐁᑯᓯ ᐁᐊᐧᑯᓂ ᐅᐦᒋ ᑭᑕ ᐃᐧᒉᐋᐧᑲᓂᑕᕽ ᑲᐦᑭᔭᐤ ᑫᑲᐧᔭ, ᐁ ᑭ ᐅᓯᑖᔨᐟ ᐃᐧᑕᐢᑭᑐᐃᐧᐣ ᐅ ᒥᐦᑯ ᐅᐦᒋ ᐱᒥᑖᐢᑯᐃᑲᓂᕽ; ᐁᐊᐧᑯᓂ ᐅᐦᒋ, ᓂᐟ ᐃᑖᐧᐣ, ᑭᐢᐱᐣ ᐊᓂᐦᐃ ᐊᐢᑭᕽ ᑳ ᐊᔮᑭ, ᐊᐦᐳ ᐊᓂᐦᐃ ᑭᓯᑯᕽ ᑳ ᐊᔮᑭ.
[21] ᑭᔭᐋᐧᐤ ᒫᑲ, ᐁ ᑭ ᐯ ᐱᑐᓯᓯᔦᐠ ᒥᓇ ᐁ ᑭ ᐸᑳᐧᑖᔦᐠ ᑭ ᒥᑐᓀᔨᒋᑲᓂᐋᐧᕽ ᑭ ᒪᒋ ᐃᓯᐦᒋᑫᐃᐧᓂᐋᐧᕽ, ᐁᔨᐁᐧᕽ ᐁᑲᐧ ᑭ ᐃᐧᒉᐋᐧᑲᓂᑕᐃᑯᐋᐧᐤ
[22] ᐃᐧᔭᐃᐧᕽ ᐅ ᐃᐧᔮᓯᕽ ᓂᐳᐃᐧᐣ ᐅᐦᒋ, ᑲᓈᑎᓯᐃᐧᓂᕽ ᒥᓇ ᒪᒥᑐᓂᐃᐧᓂᕽ ᒥᓇ ᐁᑳ ᐁ ᐋᓀᐧᔨᑖᑯᓯᔦᐠ ᑭᑕ ᐅᑎᐢᑲᐤ ᐊᔨᑲᐃᐧᔦᐠ:
[23] ᑭᐢᐱᐣ ᑕᐦᑭ ᑖᐯᐧᔦᔨᑕᒧᐃᐧᓂᕽ ᑭᐟ ᐊᔮᓈᐋᐧᐤ, ᐁ ᐋᔮᒋ ᐊᔮᔦᐠ ᒥᓇ ᐁ ᒪᐢᑲᐃᐧ ᐊᔮᔦᐠ, ᐁᑳ ᐅᐱᒣ ᐁ ᐃᑐᑕᐃᑲᐃᐧᔦᐠ, ᐁ ᐃᓯ ᐊᐢᐯᔨᒧᐃᐁᐧᐠ ᒥᔮᒋᒧᐃᐧᐣ ᑳ ᑭ ᐯᐦᑕᒣᐠ, ᑳ ᑭ ᐃᐧᐦᑕᒫᐦᐟ ᑲᐦᑭᔭᐤ ᐊᐃᐧᔭᐠ ᑳ ᑭ ᐅᓯᐃᐦᐟ ᓯᐹ ᑭᓯᑯᕽ; ᐁᐊᐧᑯ ᓂᔭ ᐹᓬ ᐅᐸᒥᐢᑖᑫᐤ ᑳ ᑭ ᐅᐦᒋ ᐃᓯᐃᑲᐃᐧᔮᐣ.
[24] ᐁᑲᐧ ᒫᑲ ᓂ ᒪᒪᐦᑖᑯᓯᐣ ᓂ ᑯᑕᑭᑖᐃᐧᓂᕽ ᑭᔭᐋᐧᐤ ᐅᐦᒋ, ᐁᑯᓯ ᓂ ᑎᐸᐢᑭᓇᑖᐣ ᓂᔭ ᐊᓂᐦᐃ ᑳ ᓄᑌᐸᔨᑭ ᐅ ᑯᑕᑭᑖᐃᐧᓇ ᓂ ᐃᐧᔮᓯᕽ ᐃᐧᔭᐤ ᐅᐦᒋ, ᐁᐊᐧᑯ ᐊᔭᒥᐦᐁᐃᐧᑲᒥᐠ;
[25] ᐃᑕ ᐅᐸᒥᐢᑖᑫᐤ ᑳ ᐃᑕᔨᑲᐃᐧᔮᐣ, ᐁ ᐃᑕᐢᑌᔨᐠ ᐅ ᐸᒥᓂᑫᐃᐁᐧᐃᐧᐣ ᑭᓭᒪᓂᑐ ᑳ ᑭ ᒥᔨᑲᐃᐧᔮᐣ ᑭᔭᐋᐧᐤ ᐅᐦᒋ, ᑭᑕ ᑎᐱᐸᔨᑖᔮᐣ ᑭᓭᒪᓂᑐ ᐅᐟ ᐃᑌᐧᐃᐧᐣ,
[26] ᐊᓂᒪ ᐅᑎ ᑳ ᒪᒫᑖᐊᐧᕽ ᐁᑳ ᑳ ᑭ ᓄᑲᐧᕽ ᐁ ᐯ ᐊᐢᑭᐊᐧᕽ ᒥᓇ ᐁ ᐯ ᐋᔮᓂᐢᑫ ᐱᒫᑎᓯᕽ: ᒫᑲ ᐁᑲᐧ ᑳ ᑭ ᓄᑯᑖᐧᒥᐦᐟ ᐅᑲᓈᑎᓯᒪ,
[27] ᐊᓂᐦᐃ ᑭᓭᒪᓂᑐ ᑳ ᑭ ᐃᓯ ᒥᔦᐧᔨᑕᕽ ᑭᑕ ᑭᐢᑫᔨᑕᒧᐋᐟ ᐁ ᐃᓯ ᐁᐧᔪᑕᕽ ᐁ ᑭᐢᑌᔨᑖᑲᐧᕽ ᐅᒪ ᑳ ᒪᒫᑖᐊᐧᕽ ᒣᑳᐧᐨ ᒉᐣᑕᐃᓬᐃᓇᕽ, ᐁᐊᐧᑯ ᙭ ᐁ ᑭᑭᐢᑳᑯᔦᐠ, ᐁ ᐃᑕᑌᔨᑕᒫᓱᕽ ᑭᐢᑌᔨᑖᑯᓯᐃᐧᐣ:
[28] ᐊᓇ ᑳ ᐋᒋᒫᔮᕽ, ᐁ ᓯᑭᒫᔮᕽ ᒥᓇ ᐁ ᑭᐢᑭᓄᐦᐊᒪᐋᐧᔮᕽ ᑲᐦᑭᔭᐤ ᐊᔨᓯᔨᓂᐤ ᒥᓯᐁᐧ ᐃᔨᓂᓯᐃᐧᓂᕽ, ᑭᑕ ᑭ ᐸᑭᑎᓈᔮᕽ ᑲᐦᑭᔭᐤ ᐊᔨᓯᔨᓂᐤ ᐁ ᒪᒥᑐᓂᐟ ᙭ ᐃᓯ;
[29] ᐁᑯᑌ ᒫᑲ ᓂᐢᑕ ᑳ ᐃᓯ ᐊᑐᐢᑫᔮᐣ, ᐁ ᐃᐧᑯᔮᐣ ᐅᐟ ᐊᑐᐢᑫᐃᐁᐧᐃᐧᓂᕽ, ᑳ ᒪᐢᑲᐃᐧ ᐊᑐᐢᑫᐃᑯᔮᐣ.