[1] ᑭᐢᐱᐣ ᒫᑲ ᑳ ᐋᐧᓂᐢᑳᓂᑲᐃᐧᐁᐧᑫᐧ ᐊᓯᒋ ᙭, ᓇᑐᓇᒧᐠ ᐊᓂᐦᐃ ᐃᐢᐱᒥᕽ ᑳ ᐊᔮᑭ ᐃᑕ ᙭ ᑳ ᐊᔮᐟ, ᐁ ᐊᐱᐟ ᐅ ᑭᐦᒋᓂᐢᑭᔨᕽ ᑭᓭᒪᓂᑐᐊᐧ.
[2] ᐋᔮᒋ ᒥᑐᓀᔨᑕᒧᐠ ᐊᓂᐦᐃ ᐃᐢᐱᒥᕽ ᑳ ᐊᔮᑭ, ᓇᒪᐃᐧᔮ ᒫᑲ ᐊᓂᐦᐃ ᐊᐢᑭᕽ ᑳ ᐊᔮᑭ.
[3] ᒋᑫᒫ ᑭ ᑭ ᓂᐱᓈᐋᐧᐤ, ᐁᑯᓯ ᑭ ᐱᒫᑎᓯᐃᐧᓂᐋᐧᐤ ᑳᑕᓄᕽ ᐊᔮᐤ ᑭᑭ ᙭ ᑭᓭᒪᓂᑐᕽ.
[4] ᐃᐢᐱ ᙭, ᐁᐊᐧᑯ ᑭ ᐱᒫᑎᓯᐃᐧᓂᓇᐤ, ᓄᑯᓯᒋ, ᐁᑲᐧ ᑭᔭᐋᐧᐤ ᒥᓇ ᑫ ᐊᓯᒋ ᓄᑯᓯᔦᐠ ᑭᐢᑌᔨᑖᑯᓯᐃᐧᓂᕽ.
[5] ᓵᑯᒋᑖᐠ ᒫᑲ ᐁ ᐃᑕᑖᐧᐸᑕᑭ ᑭᔭᐃᐧᐋᐧᐊᐧ ᐊᐢᑭᕽ, ᐱᓯᑳᐧᑎᓯᐃᐧᐣ, ᐁᑳ ᑳ ᐯᑲᕽ ᐃᓯᐦᒋᑫᐃᐧᐣ, ᒫᒑᑎᓯᐃᐧᐣ, ᒪᒋ ᓇᑕᐁᐧᔨᑕᒧᐃᐧᐣ, ᒥᓇ ᒧᐢᑕᐃᐧᓇᒫᑫᐃᐧᐣ, ᐁᐊᐧᑯ ᒪᓂᑐᑫᐃᐧᐣ;
[6] ᐁᐊᐧᑯᓂ ᐅᐦᐃ ᐅ ᑭᓯᐋᐧᓯᐃᐧᐣ ᑭᓭᒪᓂᑐ ᑳ ᐅᐦᒋ ᐅᑎᐦᑎᑯᒋᐠ ᑳ ᓂᐦᑖᐃᐧᑭᐃᑯᒋᐠ ᓴᓯᐱᑕᒧᐃᐧᐣ;
[7] ᐁᑯᑐᐃᐧᕽ ᑭᐢᑕᐋᐧᐤ ᑳ ᑭ ᐱᒧᐦᑌᔦᐠ ᑲᔮᐢ, ᐁᐊᐧᑯᓂ ᒣᑳᐧᐨ ᐁ ᑭᑭ ᐱᒫᑎᓯᔦᐠ.
[8] ᒫᑲ ᐁᑲᐧ ᐅᐦᐃ ᒥᓇ ᑭ ᐸᑭᑎᓀᓈᐋᐧᐤ; ᑭᓯᐁᐧᔨᑕᒧᐃᐧᐣ, ᑭᓯᐋᐧᓯᐃᐧᐣ, ᑭᒧᒋ ᐸᑳᐧᑎᑐᐃᐧᐣ, ᑭᑳᐃᐧᑕᒧᐃᐧᐣ, ᐁ ᓇᓀᐯᐊᐧᑫᔨᑖᑲᐧᕽ ᐱᑭᐢᑫᐧᐃᐧᐣ ᑭᑐᓂᐋᐧᕽ ᐅᐦᒋ:
[9] ᐁᑳᐃᐧᔭ ᑳᑭᔮᐢᑭᑯᑖᑐᐠ; ᐃᐧᔭ ᐁ ᑭ ᐸᑭᑎᓈᔦᐠ ᑲᔭᑌ ᐊᔨᓯᔨᓂᐤ ᑭᑭ ᐅᐟ ᐃᓯᐦᒋᑫᐃᐧᓇ,
[10] ᒥᓇ ᐁ ᑭ ᐳᓯᐢᑲᐋᐧᔦᐠ ᐅᐢᑭ ᐊᔨᓯᔨᓂᐤ, ᑳ ᐅᐢᑭ ᐅᓯᐃᐦᐟ ᑭᐢᑫᔨᑕᒧᐃᐧᓂᕽ ᐁ ᐃᓯᓈᑯᓯᔨᐟ ᐊᓂᐦᐃ ᑳ ᑭ ᐅᓯᐃᑯᐟ:
[11] ᐃᑕ ᐁᑳ ᑫ ᑭ ᐊᔮᐟ ᑲᕒᐃᐠ ᒥᓇ ᒍ, ᓴᕒᑲᑦᓴᐃᓯᐃᐧᐃᐧᐣ ᒥᓇ ᐁᑳ ᐁ ᓴᕒᑲᑦᓴᐃᓯᐃᐧᕽ, ᐱᑲᐧᒋ ᐊᔨᓯᔨᓂᐤ, ᓯᑎᔭᐃᐧᔨᓂᐤ, ᐊᐊᐧᑳᐣ, ᐅᑎᐯᔨᒥᓱ; ᒫᑲ ᙭ ᐁ ᒫᒪᐃᐧ ᑎᐯᔨᒫᐟ, ᒥᓇ ᐁ ᒫᒪᐃᐧ ᑭᑭᐢᑲᐋᐧᐟ.
[12] ᐳᓯᐢᑲᒧᐠ ᒫᑲ, ᑖᐱᐢᑯᐨ ᑭᓭᒪᓂᑐ ᐅ ᐊᐧᐁᐧᔦᔨᒫᑲᓇ, ᑳ ᑲᓈᑎᓯᔨᐟ ᒥᓇ ᑳ ᓵᑭᐋᐟ, ᓴᐃᐧᑌᐦᐁᐃᐧᐣ, ᑭᑎᒫᑭᓈᑫᐃᐧᐣ, ᑕᐸᑌᔨᒧᐃᐧᐣ, ᔪᐢᑳᑎᓯᐃᐧᐣ, ᓯᐯᔨᑕᒧᐃᐧᐣ;
[13] ᐁ ᓴᓯᐱᔭᐁᐧᓯᐢᑖᑐᔦᐠ, ᒥᓇ ᐁ ᐸᐳᓀᔨᑕᒫᑐᔦᐠ, ᑭᐢᐱᐣ ᐊᐃᐧᔭᐠ ᓈᐣᑕᐤ ᐃᓯ ᓇᔦᑖᐁᐧᔨᒫᒋ ᑯᑕᑲ; ᑖᐱᐢᑯᐨ ᑳ ᑎᐯᔨᐦᒋᑫᐟ ᑳ ᑭ ᐃᓯ ᐳᓀᔨᑕᒫᑯᔦᐠ, ᐁᑯᓯ ᐃᓯ ᑭᐢᑕᐋᐧᐤ ᐃᑐᑖᑐᐠ:
[14] ᒫᒪᐃᐧ ᒫᑲ ᑕᑯᐨ ᐅᐦᐃ ᐳᓯᐢᑲᒧᐠ ᓵᑭᐦᐃᐁᐧᐃᐧᐣ, ᐁᐊᐧᑯ ᑳ ᒫᒪᐊᐧᐱᓯᐁᐧᐠ ᒪᒥᑐᓂᐃᐧᓂᕽ.
[15] ᑭᔮᑦ ᒫᑲ ᐅ ᐯᔭᑕᑫᔨᒧᐃᐁᐧᐃᐧᐣ ᙭ ᑭ ᑲ ᑎᐯᔨᒥᑯᓈᐋᐧᐤ ᑭᑌᐃᐊᐧᕽ, ᑳ ᐃᓯ ᓇᑐᒥᑲᐃᐧᔦᐠ ᒫᒪᐃᐧ ᐯᔭᐠ ᒥᔭᐃᐧᕽ; ᒥᓇ ᓇᓈᐢᑯᒧᐠ.
[16] ᑭᔮᑦ ᐅᐟ ᐃᑌᐧᐃᐧᐣ ᙭ ᑭ ᑲ ᐁᐧᔪᒋ ᑭᑭᐢᑳᑯᓈᐋᐧᐤ ᒥᓯᐁᐧ ᐃᔨᓂᓯᐃᐧᓂᕽ; ᐁ ᑭᐢᑭᓄᐦᐊᒫᑐᔦᐠ ᒥᓇ ᐁ ᓴᓯᑭᒥᑐᔦᐠ ᐊᔭᒥᐦᐋᐃᐧ ᓂᑲᒧᓇ ᒥᓇ ᓇᓈᐢᑯᒧᐃᐧ ᓂᑲᒧᓇ ᒥᓇ ᐊᐦᒑᐦᑯᐃᐧ ᓂᑲᒧᓇ ᐅᐦᒋ, ᑭᑕ ᓂᑲᒧᐢᑕᐋᐧᔦᐠ ᑭᓭᒪᓂᑐ ᐅ ᑭᓭᐋᐧᑐᑖᑫᐃᐧᐣ ᐁ ᑭᑭᐢᑳᑯᔦᐠ ᑭᑌᐦᐃᐋᐧᕽ.
[17] ᐱᑯ ᑫᑲᐧᐩ ᒫᑲ ᐁ ᐃᑐᑕᒣᐠ, ᐁ ᐃᑌᐧᔦᐠ ᐊᐦᐳ ᐁ ᐃᓯᐦᒋᑫᔦᐠ ᑲᐦᑭᔭᐤ ᐃᑐᑕᒧᐠ ᐅ ᐃᐧᔪᐃᐧᓂᕽ ᑳ ᑎᐯᔨᐦᒋᑫᐟ ᒋᓴᐢ, ᐁ ᓇᓈᐢᑯᒫᔦᐠ ᑭᓭᒪᓂᑐ ᐁᐧᔪᑖᐃᐧᕽ ᐃᐧᔭ ᐅᐦᒋ.
[18] ᐃᐢᑫᐧᑎᐠ, ᓇᓇᐃᑖᑯᐠ ᑭ ᓈᐯᒥᐋᐧᐊᐧᐠ, ᑳ ᐃᓯ ᓇᐃᐢᑳᑯᐟ ᑳ ᑎᐯᔨᐦᒋᑫᐟ.
[19] ᓈᐯᑎᐠ, ᓵᑭᐦᐃᐦᑯᐠ ᑭᐃᐧᐋᐧᐊᐧᐠ, ᒥᓇ ᐁᑳᐃᐧᔭ ᐃᐧᓴᑭᔭᐁᐧᓯᐢᑖᑯᐠ.
[20] ᐊᐋᐧᓯᓯᑎᐠ, ᓇᓇᐃᑖᑯᐠ ᑭ ᓂᑭᐃᑯᐋᐧᐊᐧᐠ ᒥᓯᐁᐧ ᐃᓯ, ᒋᑫᒫ ᐁᐊᐧᑯ ᐅᒪ ᒥᔦᐧᔨᑕᑦ ᑳ ᑎᐯᔨᐦᒋᑫᐟ.
[21] ᐅᑖᐃᐧᒫᑎᐠ, ᐁᑳᐃᐧᔭ ᐋᔭᓵᒋᐃᑯᐠ ᑭᐟ ᐊᐋᐧᓯᒥᓯᐋᐧᐊᐧᐠ, ᐁᑳ ᑭᑕ ᐋᒋᐢᑕᐁᐧᔨᑕᒥᐋᔦᑯᐠ.
[22] ᐊᑐᐢᑫᔮᑲᓂᑎᐠ, ᓇᓇᐃᑖᑯᐠ ᒥᓯᐁᐧ ᐁᓯ ᐊᓂᑭ ᑳ ᐅᐟ ᐅᑭᒫᒥᔦᐠ ᐃᐧᔮᓯᕽ ᐃᓯ; ᓇᒪᐃᐧᔭ ᑌᐱᔮᕽ ᒥᐢᑮᓯᑯᐃᐧ ᐊᑐᐢᑫᐢᑖᑫᐃᐧᓂᕽ, ᑖᐱᐢᑯᐨ ᐊᔨᓯᔨᓂᐤ ᐁ ᐃᐧ ᓇᐦᐃᔭᐁᐧᐋᔦᐠ, ᒫᑲ ᐁ ᓇᔦᐢᑕᐊᐧᕽ ᑳ ᓈᑲᑕᐁᐧᔨᑕᒣᐠ ᑭᑌᐃᐋᐧᕽ, ᐁ ᑯᓯᑫᐧᔨᒫᔦᐠ ᑳ ᑎᐯᔨᐦᒋᑫᐟ:
[23] ᐱᑯ ᑫᑲᐧᐩ ᒫᑲ ᐁ ᐃᑐᑕᒣᐠ, ᒋᑫᔨᑕᒧᐃᐧᓂᕽ ᐊᑐᐢᑫᐠ, ᑖᐱᐢᑯᐨ ᑳ ᑎᐯᔨᐦᒋᑫᐟ ᐁ ᐊᑐᐢᑲᐋᐧᔦᐠ, ᓇᒪᐃᐧᔭ ᒫᑲ ᐊᔨᓯᔨᓂᐤ;
[24] ᐁ ᑭᐢᑫᔨᑕᒣᐠ ᑳ ᑎᐯᔨᐦᒋᑫᐟ ᑭᑕ ᒥᔨᑯᔦᐠ ᐊᓂᒪ ᑎᐸᐦᐊᒫᑯᐃᐧ ᑎᐯᔨᐦᒋᑫᐃᐧᐣ: ᐊᔨᐢ ᑭᐟ ᐊᑐᐢᑲᐋᐧᐋᐧᐤ ᑳ ᑎᐯᔨᐦᒋᑫᐟ ᙭.
[25] ᒋᑫᒫ ᐊᓇ ᑳ ᐊᐧᓂᑐᑕᕽ ᑭᑕ ᒥᔮᐤ ᒥᓇ ᐊᓂᒪ ᐊᐧᓂᑐᑕᒧᐃᐧᐣ ᑳ ᑭ ᐃᑐᑕᕽ: ᓇᒪᐃᐧᔭ ᒫᑲ ᐸᐱᑐᐢ ᐃᑕᑭᑕᒪᐋᐧᐊᐧᐠ ᐊᔨᓯᔨᓂᐊᐧᐠ.