[1] ᐁᑯᑕ ᒫᑲ ᑭ ᐅᐦᒋ ᐊᐧᔭᐃᐧᐤ, ᐁ ᑭ ᑕᑯᓯᕽ ᒫᑲ ᑎᐱᔭᐁᐧ ᐅᐟ ᐊᐢᑭᕽ; ᐁᑯᓯ ᐅ ᑭᐢᑭᓄᐦᐊᒪᐋᐧᑲᓇ ᑭ ᐱᒥᑎᓴᐦᐅᐠ.
[2] ᐃᐢᐱ ᒫᑲ ᐁ ᐊᔭᒥᐦᐁᑭᓯᑳᐠ ᐁᐧᑎᒋᐸᔨᐠ, ᑭ ᒫᒋ ᑭᐢᑭᓄᐦᐊᒫᑫᐤ ᐊᔭᒥᐦᐁᐃᐧᑲᒥᑯᕽ, ᒥᐦᒉᐟ ᒫᑲ ᐁ ᐯᑖᑯᐟ ᑭ ᒫᒪᐢᑳᑕᒥᔨᐊᐧ, ᐁ ᐃᑌᐧᔨᐟ, ᑖᓂᑌ ᐁᐧᑎᓇᕽ ᐊᐊᐧ ᐊᔨᓯᔨᓂᐤ ᐅᐦᐃ ᑫᑲᐧᔭ? ᒥᓇ, ᑫᑯ ᐃᔨᓂᓯᐃᐧᐣ ᑳ ᒥᔨᐦᐟ ᐊᐊᐧ ᐊᔨᓯᔨᓂᐤ, ᒥᓇ ᑖᓂᓯ ᐅᒪ ᐃᔨᑯᕽ ᐅᐦᐃ ᐁ ᓱᑫᔨᑖᑲᐧᓂᔨᑭ ᐊᑐᐢᑫᐃᐧᓇ ᐅ ᒋᐦᒋᔭ ᐅᐦᒋ ᑳ ᐃᑐᑕᕽ?
[3] ᓇᒪ ᒋ ᐁᐊᐧᑯ ᐊᐊᐧ ᒥᐢᑎᑯ ᓈᐯᐤ, ᐅ ᑯᓯᓴ ᒣᕒᐃ, ᐅᒋᐋᐧᒥᐋᐧᐊᐧ ᒉᒥᐢ ᒥᓇ ᒍᓯᐢ ᒥᓇ ᒍᑕᐢ ᒥᓇ ᓴᐃᒪᐣ? ᓇᒪ ᒋ ᒥᓇ ᐅᑕᐁᐧᒫᐊᐧ ᐅᑕ ᑭ ᐃᐧᒋ ᐊᔮᒥᑯᓇᐊᐧ? ᐁᑯᓯ ᑭ ᓇᔦᑖᐁᐧᔨᒣᐊᐧᐠ.
[4] ᒫᑲ ᒋᓴᐢ ᐅᒥᓯ ᑭ ᐃᑌᐤ, ᐅᑭᐢᑭᐁᐧᐦᐃᑫᐤ ᓇᒪᐃᐧᔭ ᐁᑳ ᑭᑕ ᑭᐢᑌᔨᒥᐦᐟ, ᐱᑯ ᐃᐧᔭ ᐅᐟ ᐊᐢᑭᕽ ᓇᒪᐃᐧᔭ, ᒥᓇ ᐃᑕ ᐁ ᐊᔮᔨᐟ ᑎᐱᔭᐁᐧ ᐅ ᐋᐧᑯᒫᑲᓇ, ᒥᓇ ᐃᐧᔭ ᐃᐧᑭᕽ.
[5] ᐁᑯᑕ ᒫᑲ ᓇᒪᐃᐧᔭ ᑭ ᐃᑐᑕᑦ ᐁ ᓱᑫᔨᑖᑲᐧᓂᔨᐠ ᐊᑐᐢᑫᐃᐧᐣ, ᐱᑯ ᐁ ᑭ ᓵᒥᓈᐟ ᒐᑲᐋᐧᓯᐢ ᐁ ᐋᑯᓯᔨᐟ ᐊᔨᓯᔨᓂᐊᐧ ᐁᑯᓯ ᐁ ᑭ ᐃᔨᓂᑲᐦᐋᐟ.
[6] ᑭ ᒫᒪᐢᑳᑕᒣᐧᐤ ᒫᑲ ᐅᐟ ᐋᓀᐧᑕᒧᐃᐧᓂᔨᐤ. ᒥᓯᐁᐧ ᒫᑲ ᐋᐧᓴᑳᑦ ᐅᑌᓈᕽ ᑭ ᐊᔨᑐᑌᐤ ᐁ ᑭᐢᑭᓄᐦᐊᒫᑫᐟ.
[7] ᐁᑯᓯ ᑭ ᓇᑐᒣᐤ ᐊᓂᐦᐃ ᒥᑖᑕᐦᐟ ᓂᓱᓵᑊ, ᒥᓇ ᑭ ᒫᒋ ᓵᓯᐯᐧᑎᓴᐁᐧᐤ ᓈᐦᓂᓱ, ᒥᓇ ᐁ ᑭ ᒥᔮᐟ ᑲᐢᑭᐦᐁᐃᐧᓯᐃᐧᐣ ᑭᑕ ᓵᑯᒋᐋᔨᐟ ᐁᑳ ᑳ ᐯᑭᓯᔨᐟ ᐊᐦᒑᐦᑲᐧ;
[8] ᑭ ᐊᔮᑳᐧᒥᒣᐤ ᒫᑲ ᐁᑳ ᑫᑲᐧᐩ ᑭᑕ ᑕᐦᑯᓇᒥᔨᐟ ᐱᑯ ᓴᐢᑲᐅᓈᑎᐠ; ᓇᒪᐃᐧᔭ ᐸᑫᐧᓯᑲᓇ, ᓇᒪᐃᐧᔭ ᓂᒫᐃᐧᓂᐊᐧᐟ, ᓇᒪᐃᐧᔭ ᓱᓂᔮᐊᐧ ᐅ ᓱᓂᔮᐊᐧᑎᓯᐋᐧᕽ;
[9] ᑭᑕ ᐸᐯᓯᑫᐧᐢᑭᓯᓀᒋᐠ, ᒥᓇ ᐃᑌᐤ, ᐁᑳᐃᐧᔭ ᐊᔮᑭᐧᑕᐊᐧᓵᑫᐠ.
[10] ᐁᑯᓯ ᒥᓇ ᐃᑌᐤ, ᐃᑕ ᓈᓂᑕᐤ ᐋᐧᐢᑳᐦᐃᑲᐣ ᐱᐦᑐᑫᔦᑯ, ᐁᑯᑕ ᐊᔮᐠ ᐱᔨᐢ ᐁᑯᑕ ᑭᑕ ᐅᐦᒋ ᓯᐯᐧᑌᔦᐠ.
[11] ᐱᑯ ᐃᑕ ᒫᑲ ᐁᑳ ᐅᑎᓂᑯᔦᑲᐧᐁᐧ, ᒥᓇ ᐁᑳ ᓇᑐᑖᑯᔦᑳᐧᐁᐧ, ᐃᐢᐱ ᓯᐯᐧᑌᔦᑯ, ᐸᐸᐃᐧᐸᔨᑖᐠ ᒪᒋᑲᐧᓈᓴ ᑭᓯᑎᐋᐧᕽ ᐅᐦᒋ ᑭᑕ ᐅᐦᒋ ᐋᒋᒧᐢᑕᐋᐧᔦᑳᐧᐤ.
[12] ᐁᑯᓯ ᒫᑲ ᑭ ᐊᐧᔭᐃᐧᐊᐧᐠ ᒥᓇ ᑭ ᑲᑫᐢᑭᒥᐁᐧᐊᐧᐠ ᐊᔨᓯᔨᓂᐊᐧ ᑭᑕ ᑫᐧᐢᑭᐱᒫᑎᓯᔨᐟ.
[13] ᒥᐦᒉᐟ ᒫᑲ ᒪᒋ ᐊᐦᒑᐦᑲᐧ ᑭ ᐊᐧᔭᐃᐧᐁᐧᐱᓀᐊᐧᐠ, ᒥᓇ ᑭ ᑐᒥᓀᐊᐧᐠ ᐱᒥ ᐅᐦᒋ ᒥᐦᒉᐟ ᑳ ᐋᑯᓯᔨᐟ, ᐁᑯᓯ ᐁ ᑭ ᐃᔨᓂᑲᐋᒋᐠ.
[14] ᑭᐦᒋ ᐅᑭᒫᐤ ᐁᕒᐊᐟ ᒫᑲ ᑭ ᐯᑕᑦ ᐁᐊᐧᑫᐧᔨᐤ; ᒋᑫᒫ ᐅ ᐃᐧᔪᐃᐧᓂᔨᐤ ᒥᓯᐁᐧ ᐊᑎ ᑭᐢᑫᔨᑕᒫᐧᐣ: ᐁᑯᓯ ᑭ ᐃᑌᐧᐤ, ᒑᐣ ᐹᑊᑎᐢᐟ ᓂᐳᐃᐧᓂᕽ ᑭ ᐅᐦᒋ ᐊᐧᓂᐢᑳᐤ, ᐁᐊᐧᑯ ᐅᐦᒋ ᒫᑲ ᐅᐦᐃ ᓱᑫᔨᑖᑯᓯᐃᐧᓇ ᑳ ᐊᑐᐢᑫᒪᑲᓂᔨᑭ ᐁ ᑭᑭᐢᑳᑯᐟ.
[15] ᑯᑕᑲᐠ ᑭ ᐃᑌᐧᐊᐧᐠ, ᐁᐊᐧᑯ ᐃᓬᐋᐃᒐ. ᑯᑕᑲᐠ ᒫᑲ ᐃᑌᐧᐊᐧᐠ, ᐅᑭᐢᑭᐁᐧᐦᐃᑫᐤ ᐊᓇ, ᑖᐱᐢᑯᐨ ᐯᔭᐠ ᐊᓂᑭ ᐅᑭᐢᑭᐁᐧᐦᐃᑫᐊᐧᐠ.
[16] ᒫᑲ ᐃᐢᐱ ᐁᕒᐊᐟ ᐱᔦᑕᕽ ᐁᐊᐧᑫᐧᔨᐤ, ᐅᒥᓯ ᑭ ᐃᑌᐧᐤ, ᒑᐣ ᑳ ᑭ ᑭᐢᑭᑫᐧᑕᐊᐧᐠ ᑭ ᐋᐱᓯᓯᐣ,
[17] ᒋᑫᒫ ᐁᕒᐊᐟ ᐃᐧᔭ ᑭ ᐃᓯᑌᓴᐅᐁᐧᐤ ᒥᓇ ᑭ ᐅᑎᐦᑎᓀᐤ ᒑᓇ, ᒥᓇ ᑭ ᒪᒫᒋᑲᐧᐱᑌᐤ ᑭᐸᐦᐅᑐᐃᐧᑲᒥᑯᕽ ᐁᕒᐅᑎᔭᓴ ᐅᐦᒋ, ᐅᒋᐋᐧᒪ ᐱᓬᐃᐸ ᐃᐧᐃᐧᔨᐊᐧ; ᒋᑫᒫ ᐁ ᑭ ᐃᐧᑭᒫᐟ.
[18] ᒋᑫᒫ ᒑᐣ ᑭ ᐃᑌᐤ ᐁᕒᐊᑕ, ᓇᒪᐃᐧᔭ ᐃᑕᐢᑌᐤ ᑭᔭ ᑭᑕ ᐊᔮᒪᐟ ᑭᒋᐋᐧᑦ ᐃᐧᐊᐧ.
[19] ᐁᑯᓯ ᒫᑲ ᐁᕒᐅᑎᔭᐢ ᑭ ᒫᔨ ᑲᓇᐋᐧᐸᒣᐤ, ᒥᓇ ᑭ ᐃᐧ ᓂᐸᐁᐤ; ᒫᑲ ᓇᒪᐃᐧᔭ ᑭ ᑲᐢᑭᑖᐤ;
[20] ᒋᑫᒫ ᐁᕒᐊᐟ ᑭ ᑯᐢᑌᐤ ᒑᓇ, ᐁ ᑭᐢᑫᔨᑕᕽ ᐁ ᑲᐧᔭᐢᐠ ᐃᓯᐁᐧᐱᓯᐃᐧ ᐊᔨᓯᔨᓂᐃᐧᔨᐟ, ᒥᓇ ᐁ ᑲᓈᑎᓯᔨᐟ, ᐁᑯᓯ ᑭ ᑲᓇᐁᐧᔨᒣᐤ. ᐃᐢᐱ ᒫᑲ ᐱᔦᑕᐋᐧᐟ, ᒥᐢᑕᐦᐃ ᑭ ᐊᐧᐋᐧᓀᔨᑕᑦ; ᒫᑲ ᐃᐧᔭ ᑭ ᒥᔦᐧᔨᑕᑦ ᐁ ᐯᑕᐋᐧᐟ.
[21] ᐃᐢᐱ ᒫᑲ ᐁ ᓇᐃᐸᔨᐠ ᑭᓯᑳᐤ ᐁᐧᑎᒋᐸᔨᐠ, ᐁᕒᐊᐟ ᐁ ᑎᐱᐢᑲᕽ ᑭ ᐃᐧᑯᒣᐤ ᐊᓂᐦᐃ ᐁᐧᑭᒫᑲᑕᒥᔨᐟ ᐅᐟ ᐊᐢᑭᕽ, ᒥᓇ ᑭᐦᒋ ᓯᒫᑲᓂᓯᐃᐧᑭᒫᐊᐧ, ᒥᓇ ᑭᐦᒋᔨᓂᐊᐧ ᑳᓬᐊᓬᐃᕽ;
[22] ᐃᐢᐱ ᒫᑲ ᐅᑖᓂᓴ ᐁᕒᐅᑎᔭᐢ ᑳ ᐱᐦᑐᑫᐟ ᒥᓇ ᐁ ᓂᒥᐃᑐᐟ, ᑭ ᓇᐦᐃᔭᐁᐧᐁᐤ ᐁᕒᐊᑕ ᒥᓇ ᐊᓂᐦᐃ ᑳ ᐃᐧᒋ ᒥᒋᓱᒥᑯᔨᐟ; ᐁᑯᓯ ᑭᐦᒋ ᐅᑭᒫᐤ ᑭ ᐃᑌᐤ ᐊᓂᐦᐃ ᐅᐢᑭᓂᑭᐢᑫᐧᐊᐧ, ᓇᑐᑕᒪᐃᐧᐣ ᐱᑯ ᑫᑲᐧᐩ ᐁ ᐃᑌᔨᑕᒪᐣ ᐁᑯᓯ ᑭ ᑲ ᒥᔨᑎᐣ.
[23] ᑭ ᑭᐦᒋ ᐃᑌᐤ ᒫᑲ, ᐱᑯ ᑫᑲᐧᐩ ᑫ ᓇᑐᑕᒪᐃᐧᐊᐧᓀ ᑭ ᑲ ᒥᔨᑎᐣ ᐊᐳᐦᒋᑲ ᐋᐱᑕᐤ ᓂᐟ ᐅᑭᒫᐃᐧᐃᐧᐣ.
[24] ᐁᑯᓯ ᑭ ᓯᐯᐧᑌᐤ, ᐅᒥᓯ ᒫᑲ ᐁ ᑭ ᐃᑖᐟ ᐅᑳᐃᐧᔭ, ᑫᑲᐧᐩ ᑫ ᓇᑐᑕᒫᔮᐣ? ᐅᒥᓯ ᒫᑲ ᑭ ᐃᑎᐠ, ᐅᐢᑎᑳᐧᐣ ᒑᐣ ᐹᑊᑎᐢᐟ.
[25] ᓭᒫᐠ ᒫᑲ ᑭᔨᐸ ᑭ ᐯ ᐱᑐᑲᐁᐧᐤ ᑭᐦᒋ ᐅᑭᒫᐊᐧ, ᑭ ᑲᑫᐧᒋᒣᐤ ᒫᑲ, ᐁ ᐃᑌᐧᐟ, ᓂ ᓇᑕᐁᐧᔨᑌᐣ ᑭᑕ ᒥᔨᔭᐣ ᓭᒫᐠ ᒑᐣ ᐹᑊᑎᐢᐟ ᐅᐢᑎᑳᐧᐣ ᐅᔮᑲᓂᕽ.
[26] ᑭᐦᒋ ᐅᑭᒫᐤ ᒫᑲ ᒥᐢᑕᐦᐃ ᑭ ᒥᒋᔭᐁᐧᓯᐤ; ᒫᑲ ᐅ ᑭᐦᒋ ᐃᑌᐧᐃᐧᓇ ᐅᐦᒋ, ᒥᓇ ᐊᓂᐦᐃ ᐅᐦᒋ ᑳ ᐃᐧᑕᐱᒥᑯᐟ ᓇᒪᐃᐧᔭ ᐃᐧ ᐊᓀᐧᑕᐁᐧᐤ.
[27] ᓭᒫᐠ ᒫᑲ ᑭᐦᒋ ᐅᑭᒫᐤ ᑭ ᐃᓯᑎᓴᐁᐧᐤ ᐯᔭᐠ ᐅ ᓯᒫᑲᓂᓯᒪ ᑳ ᑲᓇᐁᐧᔨᒥᑯᐟ, ᑭ ᐃᑕᓱᐁᐧᐤ ᐅᐢᑎᑳᐧᓂᔨᐤ ᑭᑕ ᐯᑖᐃᐧᐦᐟ: ᐁᑯᓯ ᑭ ᓇᑕᐃᐧ ᑭᐢᑭᑫᐧᑕᐁᐧᐤ ᑭᐸᐦᐅᑐᐃᐧᑲᒥᑯᕽ,
[28] ᑭ ᐯᑖᐁᐧᐤ ᐅᐢᑎᑳᐧᓂᔨᐤ ᐅᔮᑲᓂᕽ, ᒥᓇ ᑭ ᒥᔦᐤ ᐊᓂᐦᐃ ᐅᐢᑭᓂᑭᐢᑫᐧᐊᐧ; ᐊᓇ ᐅᐢᑭᓂᑭᐢᑫᐧᐤ ᒫᑲ ᑭ ᒥᔦᐤ ᐅᑳᐃᐧᔭ.
[29] ᐃᐢᐱ ᒫᑲ ᐅ ᑭᐢᑭᓄᐦᐊᒪᐋᐧᑲᓇ ᐱᔦᑕᒥᔨᐟ, ᑭ ᐯ ᐃᑐᐦᑌᔨᐊᐧ ᒥᓇ ᑭ ᐅᑎᓇᒥᔨᐊᐧ ᐃᐧᔭᐤ, ᑭ ᐊᐢᑖᔨᐊᐧ ᒫᑲ ᓇᐦᐃᓂᑐᐃᐧᑲᒥᑯᕽ.
[30] ᐊᐸᐢᑎᓬᐊᐠ ᒫᑲ ᑭ ᒫᒪᐃᐧ ᒫᐊᐧᒋᐃᑐᐊᐧᐠ ᐃᑕ ᐁ ᐊᔮᔨᐟ ᒋᓴᓴ; ᑭ ᐃᐧᐦᑕᒪᐁᐧᐊᐧᐠ ᒫᑲ ᑲᐦᑭᔭᐤ ᑫᑲᐧᐩ, ᑕᐦᑐ ᑫᑲᐧᐩ ᑳ ᑭ ᐊᔨᑐᑕᑭᐠ, ᒥᓇ ᑕᐦᑐ ᑫᑲᐧᐩ ᑳ ᑭ ᑭᐢᑭᓄᐦᐊᒫᑫᒋᐠ.
[31] ᐅᒥᓯ ᒫᑲ ᑭ ᐃᑌᐤ, ᐯ ᐃᑐᐦᑌᐠ ᑭᔮᑦ ᑭᔭᐋᐧᐤ ᐅᐱᒣ ᐱᑲᐧᒑᔨᕽ ᐁᑯᓯ ᐊᔦᐧᐱᐠ ᐱᑕᒫ. ᒋᑫᒫ ᑭ ᒥᐦᒉᑎᔨᐊᐧ ᑲᐦᑫᐧᑯᐢᐠ ᐁ ᑕᑯᓯᓂᔨᐟ ᒥᓇ ᐁ ᓯᐯᐧᑌᔨᐟ, ᐁᑯᓯ ᓇᒪᐃᐧᔭ ᑭ ᑕᐃᐧᐸᔨᐃᑲᐧᐠ ᐊᐦᐳ ᑭᑕ ᑭ ᒥᒋᓱᒋᐠ.
[32] ᑭ ᓯᐯᐧᐸᔨᐊᐧᐠ ᒫᑲ ᐅᓯᕽ ᐁ ᐃᑐᑌᐅᒋᐠ ᐃᑕ ᐁ ᐱᑲᐧᒋ ᐊᔮᔨᐠ ᐅᐱᒣ.
[33] ᑭ ᐋᐧᐸᒥᑲᐧᐠ ᒫᑲ ᐊᔨᓯᔨᓂᐊᐧ ᐁ ᓯᐯᐧᐸᔨᒋᐠ, ᐁᑯᓯ ᒥᐦᒉᐟ ᑭ ᓂᓯᑕᐃᐧᓈᑲᐧᐠ, ᐁᑯᓯ ᑭ ᒧᒋᐸᑖᔨᐊᐧ ᒥᓯᐁᐧ ᐅᑌᓈᕽ ᐁᑯᑕ ᐅᐦᒋ, ᒥᓇ ᑭ ᐋᓯᐢᑳᑲᐧᐠ.
[34] ᐁᑯᓯ ᑭ ᐯ ᐃᑐᐦᑌᐤ, ᑭ ᐋᐧᐸᒣᐤ ᒫᑲ ᒥᐦᒉᐟ ᐊᔨᓯᔨᓂᐊᐧ, ᐁᑯᓯ ᑭ ᑭᑎᒫᑭᓇᐁᐧᐤ, ᒋᑫᒫ ᑭ ᐃᓯ ᐊᔮᐊᐧᐠ ᑖᐱᐢᑯᐨ ᒫᔭᑎᐦᑲᐧᐠ ᐁᑳ ᐁ ᐊᔮᐋᐧᒋᐠ ᐅᑲᓇᐃᐧᒫᔭᑎᐦᑫᐧᐊᐧ: ᑭ ᒫᒋ ᑭᐢᑭᓄᐦᐊᒫᐁᐧᐤ ᒫᑲ ᒥᐦᒉᐟ ᑫᑲᐧᔭ.
[35] ᐁᑯᓯ ᐃᐢᐱ ᑭᓯᑳᐤ ᐁᑲᐧ ᐁ ᐊᑎ ᐅᑖᑲᐧᓂ ᐊᔮᐠ, ᐅ ᑭᐢᑭᓄᐦᐊᒪᐋᐧᑲᓇ ᑭ ᐯ ᓈᑎᐠ, ᐁ ᐃᑌᐧᔨᐟ, ᐱᑲᐧᒑᔨᐊᐧᐣ ᐅᑕ, ᒥᓇ ᐊᑎ ᐅᑖᑲᐧᓂ ᐊᔮᐤ,
[36] ᓯᐯᐧᑎᓴᐦᐅᐠ, ᑭᑕ ᐃᑐᐦᑌᒋᐠ ᑭᐢᑕᐱᓈᓂᕽ ᒥᓇ ᐅᑌᓈᕽ ᐋᐧᓴᑳᑦ, ᑭᑕ ᐊᑖᐁᐧᐢᑕᒫᓱᒋᐠ ᒫᑲ ᑭᑕ ᒥᒋᒋᐠ,
[37] ᑭ ᓇᐢᑫᐧᐊᐧᓯᒣᐤ ᒫᑲ ᐅᒥᓯ ᐁ ᑭ ᐃᑖᐟ, ᑭᔭᐋᐧᐤ ᒥᔨᑯᐠ ᑭᑕ ᒥᒋᒋᐠ. ᑭ ᐃᑌᐊᐧᐠ ᒫᑲ, ᓂ ᑲ ᓇᑕᐃᐧ ᐊᑖᐋᐧᓈᐣ ᒋ ᓂᓵᐧᐤ ᒥᑖᑕᐦᑐᒥᑕᓇᐤ ᑕᐦᑐ ᓱᓂᔮᐢ ᐃᔨᑯᕽ ᐸᑫᐧᓯᑲᓇ, ᑭᑕ ᐊᓴᒫᔮᑯᐠ?
[38] ᑭ ᐃᑌᐤ ᒫᑲ, ᑕᓂ ᑕᐦᑐ ᐸᑫᐧᓯᑲᓇᐠ ᐁᔮᐋᐧᔦᑯᐠ? ᒫᐦᑎ ᓇᑕᐋᐧᐯᓂᑫᐠ. ᐃᐢᐱ ᒫᑲ ᑫᐢᑫᔨᑕᐦᑭᐠ ᑭ ᐃᑌᐧᐊᐧᐠ, ᓂᔮᓇᐣ, ᒥᓇ ᓂᓱ ᑭᓄᓭᐊᐧᐠ.
[39] ᑭ ᐃᑕᓱᐁᐧᐤ ᒫᑲ ᑭᑕ ᒫᒥᓀ ᓇᐦᐊᐱᔨᐟ ᒪᐢᑯᓯᐢᑳᕽ.
[40] ᐁᑯᓯ ᑭ ᓈᓂᐱᑌ ᓇᐦᐊᐱᔨᐊᐧ, ᒪᒥᑖᑕᐦᑐᒥᑕᓇᐤ, ᒥᓇ ᓈᓂᔮᓇᓄᒥᑕᓇᐤ.
[41] ᑭ ᐅᑎᓀᐤ ᒫᑲ ᐊᓂᐦᐃ ᓂᔮᓇᐣ ᐸᑫᐧᓯᑲᓇ ᒥᓇ ᐊᓂᐦᐃ ᓂᓱ ᑭᓄᓭᐊᐧ, ᐁᑯᓯ ᑭᐦᒋ ᑭᓯᑯᕽ ᐁ ᐃᑖᐱᐟ, ᑭ ᒥᔭᐧᑭᒣᐤ, ᒥᓇ ᑭ ᐊᑎ ᓇᓇᐃᐧᓀᐤ ᐊᓂᐦᐃ ᐸᑫᐧᓯᑲᓇ; ᑭ ᒥᔦᐤ ᒫᑲ ᑭᐢᑭᓄᐦᐊᒪᐋᐧᑲᓇ ᑭᑕ ᐅᔭᐢᑐᐋᐧᔨᐟ; ᒥᓇ ᐊᓂᐦᐃ ᓂᓱ ᑭᓄᓭᐊᐧ ᑭ ᒫᑎᓇᒪᐁᐧᐤ ᑲᐦᑭᔭᐤ.
[42] ᐁᑯᓯ ᑲᐦᑭᔭᐤ ᑭ ᒥᒋᓱᐊᐧᐠ ᒥᓇ ᑭ ᑭᐢᐳᐊᐧᐠ.
[43] ᑭ ᒧᓴᑭᓇᒪᐧᐠ ᒫᑲ ᐃᐢᑲᐧᐢᒋᑲᓇ, ᒥᑖᑕᐟ ᓂᓱᓵᑊ ᐃᐧᑯᐱᐊᐧᑕ ᓵᑲᐢᑭᐣ, ᒥᓇ ᑭᓄᓭᐊᐧ ᐊᓯᒋ.
[44] ᐊᓂᑭ ᒫᑲ ᑳ ᑭ ᒧᐋᐧᒋᐠ ᐊᓂᐦᐃ ᐸᑫᐧᓯᑲᓇ ᓂᔮᓇᓈᐧᐤ ᑭᐦᒋ ᒥᑖᑕᐦᑐᒥᑕᓇᐤ ᓈᐯᐊᐧᐠ ᑭ ᐃᑕᓯᐊᐧᐠ.
[45] ᓭᒫᐠ ᒫᑲ ᑭ ᓯᑭᒣᐤ ᐅ ᑭᐢᑭᓄᐦᐊᒪᐋᐧᑲᓇ ᑭᑕ ᐳᓯᔨᐟ ᐅᓯᕽ ᐁᑯᓯ ᓂᑳᐣ ᑭᑕ ᐋᓱᐊᐧᐊᒥᔨᐟ ᐯᐦᐟᓭᑕᐃᕽ ᐃᓯ, ᐃᐧᔭ ᐁ ᐃᐢᐱᒋ ᓯᐯᐧᑎᓴᐋᐧᐟ ᐊᔨᓯᔨᓂᐊᐧ.
[46] ᐃᐢᐱ ᒫᑲ ᑳ ᐸᐢᑫᐃᐧᔮᐟ, ᑭ ᓯᐯᐧᑌᐤ ᐊᐧᒋᕽ ᐁ ᐃᑐᐦᑌᐟ ᑭᑕ ᐊᔭᒥᐦᐋᐟ.
[47] ᐃᐢᐱ ᒫᑲ ᐁᐧᑖᑯᓯᐠ, ᐅᓯ ᑖᐊᐧᑳᑦ ᓵᑲᐦᐃᑲᓂᕽ ᑭ ᐊᔮᐤ, ᐃᐧᔭ ᒫᑲ ᐁ ᐯᔭᑯᐟ ᒧᒋᕽ.
[48] ᐁ ᐋᐧᐸᒫᐟ ᒫᑲ ᐁ ᓯᒋᔨᐟ ᐁ ᐱᒥᐢᑳᔨᐟ, ᒋᑫᒫ ᓇᔦᒪᓂᔨᐤ, ᓈᐣᑕᐤ ᓵᓴᐩ ᓀᐅ ᑲᓇᐃᐧᑎᐱᐢᑫᐧᐃᐧᐣ ᐁ ᐅᑎᐦᒋᐸᔨᐠ ᑭ ᐯ ᓈᑌᐤ, ᐁ ᐱᒧᐦᑌᐟ ᓵᑲᐦᐃᑲᓂᕽ; ᐁᑯᓯ ᐃᐧ ᐊᑎ ᒪᔮᐢᑲᐁᐧᐤ;
[49] ᒫᑲ ᐃᐧᔭᐋᐧᐤ ᐃᐢᐱ ᐃᐧᔮᐸᒫᒋᐠ ᐁ ᐱᒧᐦᑌᔨᐟ ᓵᑲᐦᐃᑲᓂᕽ, ᐊᐃᐧᔭᐠ ᐁᑳ ᐁ ᐅᐃᐧᔭᐃᐧᐟ ᑭ ᐃᑌᔨᑕᒪᐧᐠ, ᐁᑯᓯ ᑭ ᒪᐃᐧᒧᑫᐊᐧᐠ;
[50] ᒋᑫᒫ ᑲᐦᑭᔭᐤ ᑭ ᐋᐧᐸᒣᐊᐧᐠ ᐁᑯᓯ ᑭ ᒥᑯᐢᑳᑌᔨᑕᒪᐧᐠ. ᒫᑲ ᐃᐧᔭ ᓭᒫᐠ ᑭ ᑭᑐᑌᐤ, ᒥᓇ ᐁ ᐃᑖᐟ, ᒥᔦᐧᔨᑕᒧᐠ; ᓂᔭ ᐅᒪ; ᐁᑳᐃᐧᔭ ᓭᑭᓯᐠ.
[51] ᑭ ᐊᑎ ᓈᑌᐤ ᒫᑲ ᐁ ᐳᓯᐟ ᐅᓯᕽ; ᐁᑯᓯ ᑭ ᐳᓂ ᔪᑎᐣ: ᐃᐧᔭᐋᐧᐤ ᒫᑲ ᒥᐢᑕᐦᐃ ᑭ ᒫᒪᐢᑳᑌᔦᔨᑕᒪᐧᐠ;
[52] ᒋᑫᒫ ᓇᒪᐃᐧᔭ ᓂᓯᑐᐦᑕᒪᐧᐠ ᐸᑫᐧᓯᑲᓇ ᐅᐦᒋ, ᒫᑲ ᒪᐢᑲᐃᐧᑖᐋᐧᐣ ᐅ ᑌᐦᐃᐋᐧᐤ.
[53] ᐃᐢᐱ ᒫᑲ ᑳ ᐊᓱᐊᐧᐊᑭᐠ ᑭ ᒥᓴᑳᒣᐊᒪᐧᐠ ᐊᓂᑕ ᑫᓀᓴᕒᐃᐟ ᐊᐢᑭ, ᒥᓇ ᑭ ᓭᐢᑭ ᓴᑲᐱᑕᒪᐧᐠ ᐅᓯ,
[54] ᐃᐢᐱ ᒫᑲ ᐅᓯᕽ ᑳ ᐅᐦᒋ ᑲᐹᒋᐠ, ᓭᒫᐠ ᐊᔨᓯᔨᓂᐊᐧ ᑭᐢᑫᔨᒥᐠ,
[55] ᐁᑯᓯ ᐁ ᑭ ᐸᐹᒥᐸᑖᒋᐠ ᒥᓯᐁᐧ ᐋᐧᓴᑳᑦ ᐁᑯᑕ ᐊᐢᑭᕽ, ᐁ ᑭ ᒫᒋ ᐸᐹᒧᑕᐋᒋᐠ ᒫᑲ ᐅ ᓂᐯᐃᐧᓂᔨᕽ ᐊᓂᐦᐃ ᑳ ᐋᑯᓯᔨᐟ ᐃᑌ ᐁ ᐯᐦᑕᐦᑭᐠ ᐁ ᐊᔮᔨᐟ.
[56] ᐱᑯ ᐃᑕ ᒫᑲ ᐁ ᐸᐱᑐᑫᐟ ᑭᐢᑕᐱᓈᓂᕽ ᐊᐦᐳ ᐅᑌᓈᕽ, ᐊᐦᐳ ᐊᐢᑭᕽ, ᑭ ᐸᐱᒥᓯᒣᐊᐧᐠ ᐊᓂᐦᐃ ᑳ ᐋᑯᓯᔨᐟ ᐊᓂᑕ ᐱᒧᐦᑌᐢᑲᓈᕽ, ᒥᓇ ᑭ ᑳᑭᓯᒧᑐᑕᐁᐧᐊᐠ ᑭᑕ ᓵᒥᓇᒥᔨᐟ ᐊᐦᐳ ᐱᑯ ᐁ ᓀᔦᑲᓂᔨᐠ ᐅᐢᑯᑖᑲᐩ: ᑕᐦᑐ ᒫᑲ ᑳ ᓵᒥᓇᒥᔨᐟ ᑭ ᒥᔪ ᐊᔮᔨᐊᐧ.